Habakkuk 1

Sukuma 2019

Jump to: Chapter 2 →

1Mhayo gwa būhangi ūyo ng'hangi Habakuki akanukūla.

2Ee SEEBA, nakwiyanda kūshisha nanalī nang'ho ūtūnidegelekaga? Nibūlī nikale nūlīla nalīhaya, “Wiboneeji!” Alīyo ū bebe yaya ū kūtūguna?

3Nibūlī ūlīnīta nabone mihayo ya malofu gīkī? Nibūlī wīlekile yikale gīko dūhū ī yabūbi? Būkenaagūji na wiboneeji būlī kū būtongi bone gwa; Ī halalī ītī ya kūkalīka, ū wilemeelwa h'ūbo būsugile.

4Nose ī shilagīlo shitī na nīmo, ū būlamuji bo ng'hana būtī n'ilaka. A babūbi bakūbakandīkījaga a batūngīlīja; nose ū būlamuji ūbo būkūfunyiagwa būchaama chaamile.

5Galolage a mahanga ūbone, nīyo ūkūkumya kīngī nasho. Nguno nalīhaya kwīta mhayo ū mu shikū jako; mhayo ūyo ūtūgūzunya ūlū ūwīlwa.

6Nalībasamīla Bakalidayo, banhū bibonya na bangū mu kīītīle, abo bakajaga hose hose ū mu masī bakūdimaga mizengo īyo ītī yabo.

7Banhū ba lyogohya na ba makanji; balī na shilagīlo shabo dūhū, būlī kwene bakajaga bakūkumūchaga ikūjo lyabo.

8Ī falasa jabo mheeji no leba nī sūbī, hangī ng'halī kūheeba mhūūge jiilīlagwa būjikū. A bashilikale babo bakapeelaga bajile kū būtongi dūhū, a badamhīji ba falasa babo bafuma kūle. Ū kūpeela kūlala dūhū gītī mbeeshi īlikweega kūja ha mimba īkalye.

9Bose pye bakizaga bamanile kūkenaagūla dūhū. Ī libità lyabo līkajīlanījaga ī lyose, līkūhūūmaga gītī nyaga gwa kīya; lyaja līkūbilingījaga bading'wa gītī maseni.

10Babadalahile no a batemi, a basugi bakababbyeedelejaga. Ī mizengo īyo īzengeelilwe ndugu ja kwīlang'hana bakingīlaga mo bakūsekaga dūhū, bakīzengeelaga malinhīlo ga malongo bingīla bīdima.

11Bakahūhūūtījaga gītī nshūūlūlū bang'ula bajile. Gwike balī mu kwihīga a benabo, abo nguzu jabo h'ū mulungu wabo.

12Ee SEEBA Mulungu wane na Ng'wela wane, ū bebe ūtī wa kūfuma kale ya welelo bose? Yaya tūtizūshila! Ee SEEBA, bebe wabinhile nīmo gwa kūfunya nsango; wabalagīlile kūhūgūla.

13A miso gako meela no gatī ga kwikala gūūlola būbi; ū būhūbi ūtawiyūmīlīgījaga. Hama nibūlī lūūlū wiyūmīlīje na biboneeji gīko? Nibūlī ūhuumūlile dūhū nūūlū a babūbi bakūbamilaga abo balī batūngīlīja kūbaheeba a boi?

14Ū bebe wabagalūkije a banhū kūbiza gītī shī ja mu nyanza, gītī shiseeng'wa sha mu nyanza, Īsho shitī na nsugi.

15Ū ng'wanishi wabūbi alīyūbaduta na malobo gakwe, akūbagwashaga mu ntego gwakwe, akūbabilingaga ng'wigokoolo lyakwe, wayega no na kūzalabana.

16Hūna ū ntego gwakwe wayūgūfunīja shitambò, nī ligokoolo lyakwe wayūlīzuukīja shitambò sha ng'waso gwawiza. Nguno kūfuma ū mu ntego gwakwe akapandīkanga sha kwiyeja mu būpanga bokwe, akalīīlaga mo shizeeze wigūta.

17Ū wei akwikala ūgwasha na ntego gwakwe dūhū, ikale ūkenaagūla mahanga ndūhū na kūchīla shigongo?

Jump to: Chapter 2 →