Habakkuk 3

Sukuma 2019

← Chapter 2 Jump to:

1Kūlomba kwa ng'hangi Habakuki; mu kīmbīle ka shigionosi.

2SEEBA, naalwigwa ū lūkumo lwako; Ee Seeba, ī milīmo yako yanogohije. Ī hīmbūūchage nū mu shikū jise īji, wīyooleche īmanīke ū mu myaka yise; nūūlū ūpelana izūkagwa kūchīla shigongo.

3Ū Mulungu wizile kūfuma Temani, ū Ng'wela wafumile kū lūgūlū lwa Palani. Ī likūjo lyakwe līlī mu mapandī g'igūlū gose pye, nū kūkumīlījiwa kwakwe kūlī hose pye ū mu sī.

4Ū kwaaka kwakwe kūlī gītī kwa līīmi līkūfumaga mu dilū; ndali jikūng'wekaga kūfuma mu nkono gwakwe, ūmo abūbisile ū būdūla bokwe.

5Ū kū būtongi bokwe līlīko ihūūya; ū kū numa alīleka ng'henaagūla.

6Ūlū wīmīīla yatingina ī sī; ūlū waponya ī liso kūlola gadetema a mahanga. Ī ngūlū ja būja na būja ndo na nhaale jikapaanagūkaga na kwikīla. Ī nzīla jakwe ja welelo na welelo.

7Naabonile mayanga ū kū maheema ga Kushani, a bikaji ba Midiani balī mu nduha.

8Ee SEEBA, walī wīpelanīla myongo? Nūūlū gaalī gakūdacha mahululu ga minzī? Aho ūlīdamhīlila falasa jako na magogoteni gako ga būpyeni, walī wasaaya kūlwa nyanza?

9Ūkabūsola ū būta wako ūbūbanga, hūna ūlagīja masonga mingī. Ī sī ūkīholoola wīyokaja myongo,

10Ī ngūlū jūkūbona jūyūkema jikūgalagalaga. Mahūūma ga minzī mingī gūtoloma; būjiba bo nyanza būyūpogoma, mahuuli gakwiponya ng'wigūlya.

11Ī līīmi nū ng'weji shīīma zīgī ū kwigūlū, nguno ya kūlabya kwa masonga gako gakūkweenukaga, na kūlwa kūteemagīla kwa būng'weku w'ichimu lyako.

12Ūbīta pye a hose ū mu sī mu būpelanu būtaale, ūyūgapandagīla a mahanga kūlwa būdaki wako.

13Ūkafuma ūja kūkomoola banhū bako, kūbapīja a babilwa maguta bako. Ūntobagūla ū ntongeeji wa kaya ya malofu. Ūng'wīngīja ī likūjo lyakwe kūfuma kū ntwe kūshisha kū mhambala jakwe.

14Ūnchima ū ntwe n'ichimu lyakwe, ng'wikanza īlo bashilikale bakwe bakiza kūtwihoolekela batūsambaaje; bakwihahambūlaga gītī gīkī babamile abo baalī bibisa kūlwa boobà.

15Ūbīta ū mu nyanza ūkwīpandagīlaga na falasa jako, ūyuuga minzī mingī.

16Nigwile ī ng'holò yane yūtininha, ū nomo gwane gūyūdetema kūlw'ilaka lyenīlo; a maguha gane gūmala ī nguzu, a magūlū gane gūyūzuguma. Ū lūshikū lwa mayanga kūlw'ihanga īlo līlītūdumīla, nakūlūlindīīla mu būlembeezu kūshisha lūshike.

17Ū ntiini nūūlū gūkaleka kūlaba, nī mizabibu yūleka ū kūtwaja; ī mizeituni nayo yūholoosha, na a malaale gūūkeela ī shilīwa; nūūlū ī ng'holo jishile ū mu numba yajo, nū mu mbīgīlī jūshila ī ng'ombe,

18alīyo ū nene nakūyegela dūhū ū mulī SEEBA, nakūnyegela ū Mulungu Mpīja wane.

19Ū Seeba wa Būdūla bose hū nguzuhya wane; hū ng'wene akagītaga a magūlū gane gabize gītī ga saala, hū ng'wene akaninhaga būdūla wa kūshimīza mu mapandī ga higūlya. Kūlwa ntongeeji wa mīmbo; Kwīmba na ndono jikūtūlagwa.

← Chapter 2 Jump to: