Habakkuk 2

Sukuma 2019

← Chapter 1 Jump to: Chapter 3 →

1Leka nīmīīle ha būlolelo wane, nizūnzīke ha gūngūhu; Nalole nabone īyo akūniwīla, nī lishosho īlo nakūpandīka kūlwa wiyandi wenūbū.

2Hūna ū Seeba ūshosha: Ū mhayo gwa shakoolechiwa shenīshi gwandīkage, nīyo ūgūtūūle hape ha mbawa; ūyo atūmilwe adūle kūgūsoma wangū na kūpeela nago.

3Nguno ī shakoolechiwa shilindīīlile ikanza īlo līhelilwe; Ī shoi shilīhaya ya kū shikū ja kū mhelo nīyo shitūlomaloma na hado yaya. Nūūlū īkakeeleja, lindanaga dūhū; nguno īkwiza, Ītūdīīla ū kūshikīīla.

4Deebaga gīkī akwikumīlījaga, Ī ng'hūmbū jakwe jitagoloolile; alīyo ū ntūngīlīja akūbiza mpanga mu nzīla ya kūzunya kwakwe.

5Gwike ū walwa h'ūbo būlīngwisha; ū wei ndooshi hangī alemeelilwe ū kūlembeela. Nose īkī alī na lwahahi gītī shigila, hama atigūtaga gītī lūfu, pye a mahanga akūgabilingaga gabize gakwe; na a banhū akūbadimaga a bose pye baabiza nding'wa jakwe.

6Batūng'wisesa pye a bose na kūyūng'wineenelegeja balīhaya, “Wimana we ūyo akilūndīkīīlaga sabo ja kwiba, na kūsabīla mu būnyeecha! Ū wei akwikala akwītaga gīko kūshisha nanalī?”

7Abo ūlī na magasa kūbo batūhayimanīla baachagūka būkūūbūkīla? Batūmisha bakūtinginye? Bakūkūlūbya lūbya no.

8Ū bebe īkī wasola sabo ja mahanga mingī bo nguzu, a banhū abo basaagīīla bakūkūtaaja nang'ho ī jako. Nguno ū bebe witagūla mininga ga banhū no; wakenaagūla sī na mizengo mingī no, hamò na a bikaji baamo.

9Alī mu kwihīga ū wa kūzenga kaya yakwe bo kūtūmamīla sabo ja būnyeecha, gīkī atūūle chanjo shakwe kwigūlya atizūpandīkwa mayanga!

10Ū mu kahelele kako ka kūmala banhū bingī, wīta mhayo gwabūbi no, gwa kūgoola kaya yako na kūbūponya ū būpanga wako bebe ng'wenekīlī.

11A mawe ayo gazengelilwe mu ndugu gakūlīla, nī migamba īyo īlūmbīlilwe ī numba Īkwishokeja nago īkūdaayaga.

12Alī mu kwihīga ū wa kūzenga nzengo mu nzīla ya kūbūlaga banhū, na kwīmīlīka nzengo mu nzīla ja būkenaagūji!

13Ū SEEBA wa Būdūla bose atahelile gīkī ī milīmo ya banhū jilī ng'hwi ja kūpemba mu moto dūhū, na gīkī a mahanga ganogele dalali?

14Nguno ī sī īkookala būmani, kūlīmana ikūjo lya ng'wa SEEBA; gīt'ūmo nyanza yookalīlile minzī.

15Alī mu kwihīga ūyo akang'wishaga bazenganwa biye shikoji, wayūbasaamīja mabakuli na mabakuli, baang'wa kūshisha baakolwa, hūna wayūbiloleela balī dūūhū.

16A ha ng'wanya gwa kūpandīka ikūjo ūkūgooka no. Ī haha lwashikaga ū lūdīīma lwako nang'ho lūūlū! Ng'waga ūkazuule na kūzuula. Ī shikombe sha nsango kūfuma mu nkono gwa būlyo go ng'wa SEEBA shilīkwizīīla ūshing'we, ī likūjo lyako līkūkundīkījiwa magooke.

17Ū wiboneeji ūbo owīta mu Lebanoni būkūkwidīkīla nū bebe, nū būkenaagūji ūbo wajīītīla ndimu būkūkūsanga mu lyogohya itaale no. Nguno wita mininga ga banhū no, wakenaagūla sī ningī na mizengo, na a bikaji baamo.

18“Ī shiikolile sha kūlamiwa shikabeejiagwa na banhū dūhū, ī gīsī shilī na fiilū kī? Nūūlū ī shigīmbo shilī na malange ga būlomolomo dūhū! Nguno ū meeja washo akasanyaga shikolo sha kūseema na makono gakwe we ng'wenekīlī; akabeejaga shiikolile shitadūgije kūlūngalūnga.

19Alī mu kwihīga ūyo akūwīlaga līntī gīkī, ‘Mishaga!’ Nūūlū iwe gīkī, ‘Būūkaga!’ Angū līdūgije kūntonga munhū? Na ng'hana ī chene lītūūlīlilwe zahabu na feza; gwike lītī na būpanga ū mulyo!

20Alīyo ū SEEBA alī mu hekalu yakwe neela; ī sī ī yose shiigelile īhuumūle ū kū būtongi bokwe.”

← Chapter 1 Jump to: Chapter 3 →