Joel 1

Sukuma 2019

Jump to: Chapter 2 →

1Mhayo go ng'wa Seeba ūyo gūkang'wizīīla Yoeli ng'wana Pesūli.

2Bakūla kale gwigwagi ū mhayo ūyū; bing'we bikaji ba mu sī degelekagi. Ū mhayo gwa mbika īyī gwilonga nūūlū kamò ū mu shikū jing'we, nūūlū ū mu ja bakūlūgenji bing'we?

3Basomboolelagi a baana bing'we, na a baana bing'we balabasomboolele baana babo, a baana babo nabo bakūshiwīla ī shibyalīlwe īsho shilalondeele.

4Īsho shalekeelilwe madaale ga ng'hūmbī shalyiwe njige īsho shalekeelilwe na njige, shalyiwe na būtondo wa njige, īsho shalekeelilwe būtondo wa njige, shalyiwe mbilīīzī.

5Bing'we banwaagi mishagi mulīle! Tūlagi ng'hūngū bing'we bang'wi ba divai, līlagi ng'hūngū kūlwa nguno ya divai mhya, nguno ng'waasapujiwe ū kū milomo ying'we.

6Ibità lyīdumīlile ī sī yane, līlī na nguzu no hangī itaale lītī na būbalīle; līlī na mino gītī ga shimba, mahwīmīlo ga shimba ng'hīma.

7Lyīmalile pyī ī mizabibu yane, nī mitiini yane lyīkenaagūla; lyīkūlūlile a magūūla gīnga ho, lyībbutagūlīla hasī, a matambī lyūgakuubagūla geela pe.

8Tūlagi ng'hūngū muzwale magūnīla, gītī munhya akūnīlaga ngosha ūyo walī anūngije.

9Ī shitambò sha būsu nī shitambò sha kūng'wiwa shitīmo ū mu numba ya ng'wa SEEBA ī haha. A bagabīji abo bakatūmamaga kū būtongi bo ng'wa SEEBA bakūlīlaga.

10Ī migūnda yakenaagūkile, a malaale gaakalamukile, ī shilīwa shabipile pye; Ī divai mhya yashilile, na a maguta gatīho.

11A bing'we balīmi gwagi ng'holò, ū na a bing'we balīmi ba mizabibu būūlūlūkagi; pīnīhalagi kūlwa ngano na būsīga, nguno a magesa ga mu migūnda gaabipile.

12Ū nzabibu gūūmile, nū ntiini gūlūūma ī haha; pyī ī mitī gītī mikomamanga, nhende, malimao, ū mu matogolo īlūūma. Na ng'hana ū būyegi bo ng'wa munhū būtīho ī haha.

13Bing'we bagabīji līlagi mulī mu shizwalo sha magūnīla; tūlagi ng'hūngū bing'we batūmami ba ha ng'walīlo. Abo mukatūmamaga kū būtongi bo ng'wa Mulungu, keyulagi būjikū pe muzwalile shizwalo sha magūnīla; nguno ī shitambò sha būsu nī shitambò sha kūng'wiwa shalemejiwe ū kūshika ū mu numba ya ng'wa Mulungu wing'we.

14Tūūlagi ikanza lya kūfunga kwela; itanagi kwibilinga kwela. Bitanagi a banamhala na a bikaji ba mu sī īyī pye a bose, ni bibilingage ū kū numba ya ng'wa SEEBA Mulungu wing'we, ng'wize munīlīīle ū SEEBA.

15Galīho makoye ū lūshikū lwenūlo! Nguno ū lūshikū lwa ng'wa SEEBA lūlī hihī; lūkwiza mu nzīla ya būkenaagūji kūfuma kūlī we ū wa Būdūla bose.

16Ī shilīwa shise shitakenaagūlilwe tūlolile, nū būyegi nū kūzalabana shīnjiwa kūfuma ū mu numba ya ng'wa Mulungu wise?

17Ī mbīyū jilīcha jifukīīlile hasī. Ī numba ja kūbīkīla shilīwa jakambagūlilwe, na a maluuli gūkenaagūlwa, nguno ī shilīwa shūmīlile mu migūnda.

18Ī ng'ombe jikūdaayaga! A madaale gakūyūngaga sagala kūlwa kūgayiwa a madīīmīlo; na a madaale ga ng'holo galī mu makoye mataale.

19Ee SEEBA, nalīkūlīlīīla bebe, nguno moto gwaganogotegije pye a madīīmīlo, Ī mitī ya kū malaale yapiile būpī pyī ī yose.

20Nī ndimu ja mu matogolo jikūseesemaga jikūlolile bebe; ī njonga ja minzī jūūmile kūlū kūlū, a madīīmīlo nago gūūpya moto.

Jump to: Chapter 2 →