Joel 2

Sukuma 2019

← Chapter 1 Jump to: Chapter 3 →

1Fuulagi mhembe ū mu Sayuni; yīng'ang'aajagi ī nhaaninga a ha lūgūlū lwela. Ni badetemage pye a bikaji ba mu sī, nguno ū lūshikū lo SEEBA lwizile. Ū lwene nīyo lwashikaga,

2ū loi lūlī lūshikū lwa giiti n'ilundu, lūshikū lwa malunde na giiti sha gamha. Līkwiza idaale itaale lya magaka hangī lya būdūla būtaale, lya kūfīkīja na ngūlū haabiza iditibīja gītī hū būleela; shinū ījo jitīnilonga na kamò, na jitalabiza ho hangī ū kū shikū ja kū būtongi.

3Ū kū būtongi wajo moto gūkūja gūkūbbebbenaga, ū kū numa ndali jikwiponyaga. Ūko jijile ī sī soga no gītī ngūnda gwa Edeni, ū kū numa jikūjaga jūleka itogolo lyape, shitīho sha kūpūlūgūka.

4Ū mu kūjilola jibange gītī falasa; ja kūyūdalala nhambo gītī bashilikale na shilanga shabo.

5Ja kūyūkīlanhya ngūlū jikūtūlaga yoge gītī ya magogoteni ga būlūgū, gītī kapaanagūkīle ka būpī boshika mu maswa mūūmu, gītī ibità itaale lya bashilikale bajile kū būlūgū.

6Mahanga na mahanga gakadetemaga ūlū gaajibona; a banhū bakajilūkaga ī lihanga lya būshū wabo.

7Ī joi jilī na kalwīīle gītī ka bagosha ba mbagashūūla; ī ndugu jikīlinhaga gītī bashilikale. Jikashimīzaga jiihelaga mu ng'hīlīlī, ndūhū kūgalūka galūka ū mu nzīla.

8Hama jitī na wilemeelwa ūlū jijile; būlī yene īkashimīzaga ījile kū būtongi dūhū. Nūūlū jūpamanya na shilanga jitashokaga numa yaya.

9Jikimeemaga nhambo jijile ū kū mizengo, ja kakīlanhya ndugu jikūpeelanyaga. Jikalinhaga nū mu numba jingīla bo kūbītīla mu madilisha gītī biibi.

10Ūlū jiilonga jikītinginyaga ī sī, nī ligūlū lyayūdetema; ī līīmi nū ng'weji shikabizaga mu giiti, Ī sonda najo jikooyaga ū kūng'weka.

11Ū SEEBA akabizaga ū kū būtongi w'ibità lyakwe wayūlīhamīla n'ilaka lya kūpalalūka; a mabità gakwe gatī na būbalīle, abo akabalagīlaga baashikīlīja balī na būdūla būtaale. Ū lūshikū lwa ng'wa SEEBA lūtaale no, hangī lwa kogohya. Nani adūgije kūlwīmīla?

12Ū SEEBA alīhaya gītī, “Alīyo nūūlū ī haha nishokelagi na ng'holò īmò, mu kūfunga na kūlīla ng'hūngū.”

13Tandūlagi ng'holò jing'we, Ītī shizwalo shing'we. Nshokelagi ū SEEBA Mulungu wing'we, nguno alī na shigongo na nekeja wa būhūbi, ndīīzu ū kūsaaya na izūlile būtogwa, na akilemejaga kūfunya ū nsango.

14Īgīsī nani ūyo amanile? Hamo adūgije kūgalūka ūmuchīla shigongo na kūmulekeelela mbango, mupandīke sha kūfunya shitambò sha būsu na shitambò sha kūng'wiwa kūlwa ng'wa SEEBA Mulungu wing'we.

15Fuulagi mhembe ū mu Sayuni; tūūlagi ikanza lya kūfunga kwela, itanagi kwibilinga kwela.

16Balaalīkagi a banhū bize, kwejagi ū kwibilinga; a banamhala na a bagikūlū benhagi, na a baana mubabilinge, pye na a babo bataalī bakong'haga. Ū nsūmba ūyo watoolile haha afume ū mu maji yakwe, nū munhya ūyo watoolilwe haha īnge ū mu chumba shakwe sha kūlaala.

17A bagabīji abo bakatūmamaga kū būtongi bo ng'wa SEEBA, ni bīmīīlage ha gatī y'ibīndo lya hekalu na ng'walīlò; ni banīlīīlage balīhaya, “Ee SEEBA, balekejage a banhū bako. A banhū ba wingīji wako ūtizūbīīta babize ba kwikala bakūsondagūlagwa na kwineenelegejiwa mu mahanga. Nibūlī a mahanga gayikala gakwiwīlaga gīkī, ‘Alī halī lūūlū ū Mulungu wabo?’”

18Hūna ū SEEBA akūbiza na wiilu kūlwa sī yakwe, akūbasaatwa a banhū bakwe.

19Ū SEEBA akūbashokeja gīkī, “Nalīmutūmīla sha kūng'wigela gete; shilīwa na divai mhya na maguta, natalang'wīta hangī mubize ba kwikala mukūsondagūlagwa mu mahanga.

20Ī lidaale lya sukuma nakūlīlaja līmusegenele, nalīshindīke kūjū kū sī ya matogolo makalamuku; a magele ayo galī kū būtongi gakūjūshilīla mu Nyanza ya Kīya, ayo galī kū numa gakūshilīla mu Nyanza ya Ng'weli. Alīyo ū būnung'hu walyo būkūponyiwa kwigūlya, Ī lisū līkwinunga ng'wigūlya.” Na ng'hana wītile mitaale.

21Lekaga ū kogoha bebe sī, yegaga ūzalabane. Nguno ū SEEBA wītile mitaale.

22Bing'we ndimu ja mu masaka lekagi ū kogoha, nguno a madīīmīlo gandije kūnīlīlīkīīla hangī. Ī mitī īlītwaja matwajo ī haha; Ī mitiini nī mizabibu īlī na shisuumo shingī no ī haha.

23Banhū ba Sayuni yegagi, yegelagi mulī SEEBA Mulungu wing'we, nguno wang'winhile ī mbula ya mīsa mu būtūngīlīja. Wamutūmīlile mbula ningī, kwandīja ya mu mīsa kūshisha ya kū būkalīkījo bo ng'waka, ūmo wītīlaga nī kale.

24Ī mbūūga jikookala shilīwa; a mabīkīlo ga divai mhya na magūta gakookala pa na kūseesekela.

25Nakūmushokeja ī sha myaka Īyo mukamajiwa n'ibità lyane īlo nakamutūmīla; a madaale ga njige, ī njige nhaale nū būtondo, na amakūmbī, nī mbilīīzī.

26Ī shilīwa mukūpandīka shingī no, mukūlya kūshisha ng'wigeje; mukūlīkumīlīja ī lina lya ng'wa SEEBA Mulungu wing'we, hū ng'wene ūyo wīta ya kūkumya ū mu bing'we; hūna a banhū bane batalading'wa minala hangī.

27A henaho hū mukūdeeba gīkī ū nene nalīho ū mu Isilaeli, na gīkī ū nene nalī SEEBA Mulungu wing'we, na atīho ūngī; a banhū bane batalading'wa minala hangī.

28Hanuma ya henaho, nakūbitīīla Moyo wane pye a banhū; a bitūnja bīng'we na a bashīke bīng'we bakūyūhanga, na a banamhala bīng'we bakūyūloota shilooti. A badinha bīng'we bakūyūbona shakoolechiwa.

29Hama a batūmami bane bagosha na bakīma nakūbitīīla Moyo wane ū mu shikū jenījo.

30Hūna nakoolecha shakūkumya ū kwigūlū nū mu sī; mininga na moto na kūdundumūka lyochi.

31Ī līīmi līkūgalūchiwa kūbiza giiti, ū ng'weji nago gūkūbiza gwaza gītī mininga aho lūtaalī kūshika ū lūshikū lo SEEBA, ū lūtaale na lw'idetemya.

32Hanuma īkūbiza gīkī, būlī ng'wene ūyo ūlīlīlīīla lina lya ng'wa SEEBA akūpījiwa, nguno h'ūmo ahayīlile ū SEEBA. Būkūbiza ho būpīji ū kū lūgūlū lwa Sayuni nī Yelusalemu, ū kū basolwa abo bashiigīīla, abo SEEBA abitanile.

← Chapter 1 Jump to: Chapter 3 →