Jonah 2

Sukuma 2019

← Chapter 1 Jump to: Chapter 3 →

1Ū Yona aho alī mu gatī ya ndīlo akanomba ū SEEBA Mulungu wakwe.

2Ūhaya gīkī, “Ū mu būluhi bone nakang'witana ū SEEBA, nag'hwe ūniidīka. Naalī mu shigila shishimu nūhīlīka nalīlomba kūgunanhwa, nang'ho ūūkwigwa ū kūlīla kwane.

3Ūkaniponya mu būjiba būshimu, ningīla mu ng'holò ya nyanza, minzī mingī gūnipīndya hose hose; a mahuuli gako na būtaale waago gūhuuyemba higūlya yane.

4Niwīla, ‘Naapejiagwa ū kū būtongi wako; gwike nakwībona hangī dūhū Ī hekalu yako neela.’

5Būjiba būkanilibīja, a minzī ayo gaalī ganipīndije gūyūnikaba, ū ntwe gwane gwilingīīlwa maleewe ga mu minzī.

6Nakanwela nwe nūkashika kū miji ya ngūlū, ī sī ya mu gatī yūnilugalīla ilalī. Alīyo Ee SEEBA Mulungu wane, ū bebe ūwenha ū būpanga bone kūfuma ū ng'wichongo.

7Ū būpanga wane aho wandya kūshila nakakwizūkwa SEEBA, ū kūlomba kwane kūūlinha kwizile kūlī bebe; kūūshika kū hekalu yako neela.

8Abo bakadimanaga na mashiikolile gatī na solobo, bakajimīījaga shigongo Īsho shilīho kūlwa nguno yabo.

9Alīyo ū nene nakwīmba lyīmbo lya kūkūlūmba, hangī nakūkūfunīja shitambò. Nakwīshikīlīja īyo nīyilahīla. Ū būpīji būfumile kūlī SEEBA.”

10Ū SEEBA wīlagīla ī ndīlo yūnūka ū Yona hasī nūūmu.

← Chapter 1 Jump to: Chapter 3 →