Jonah 3

Sukuma 2019

← Chapter 2 Jump to: Chapter 4 →

1Hūna ū mhayo go ng'wa SEEBA gūng'wizīīla ū Yona lūkangala lo kabīlī; gūhaya:

2Jaga ū kū nzengo ntaale ū gwa Ninawi; kagūlomeelage ūmhayo ūyo nalīkwinha nene.

3Ū Yona ūzunya ūmo gūkahayīla ū mhayo go ng'wa SEEBA, ūja ī Ninawi. Ū nzengo gwa Ninawi gwalī ntaale no, lwalī lūgendo lwa shikū idatū ū kūgūtīna a ha gatī gatī ūlīshimīza bo magūlū.

4Ū lūshikū ū lwa kwandya ū Yona wingīla ū mu nzengo, wandya kūlomeela alīhaya, Jasaagaga shikū makūmi anè ī Ninawi īkenaagūlwe.

5A bana Ninawi būgūzunya ū mhayo go ng'wa Mulungu. Bikomiga kūfunga, nīyo pye a bose būzwala shizwalo sha magūnīla, kwandīja bataale kwika sīlīlī kūshisha kū bado bado.

6Ī mhola aho jampandīka ū ntemi wa Ninawi, akabūūka a h'isumbī lyakwe lya būtemi, ūzuula ī shizwalo shakwe sha nyatemi, wigumīīla myenda ya magūnīla hūna wigasha mu mabu.

7Akīīta ūlagīja mhayo gūhamukwe ū mu Ninawi gīkī, “Īshi shene shilagīlo sha ntemi na bana ng'oma bakwe: Atizigela munhū wa kūloja shose shose, pyī nūūlū ī mitugo; ndūhū kūlya nūūlū kūng'wa.

8Alīyo būlī munhū igumīīle magūnīla, nī mitugo jikumve magūnīla. Na būlī ng'wene anīlīīle Mulungu mu kwikūmbīlīja kūtaale; na īnge ū mu nzīla jakwe ī jabūbi, nū wiboneeji abūleke.

9Ī gīsī nani amanile? Nguno hamo ū Mulungu adūgije kūshosha moyo, kūlwa shigongo shakwe shitaale ūgalūka wīnga ū mu būpelanu bokwe tūleka ū kūyagaala.”

10Ū Mulungu aho wabona ūmo bakīītīla, nū mumo bakagalūkīla būjileka ī nzīla jabo jabūbi, akabachīla shigongo ūleka ū kūbenhela ū būkenaagūji ūbo walī wahela kūbenhela.

← Chapter 2 Jump to: Chapter 4 →