Jonah 4

Sukuma 2019

← Chapter 3 Jump to:

1Alīyo ū Yona atayegile nūūlū hado, hangī ūsaaya no.

2Ūnomba ū SEEBA alīhaya, “Ee SEEBA, ū mhayo gwenūyū natagūhayile aho nataalī kaya? Nguno h'ī chene nakangūha nū kūpeelela ī Talishishi. Naalī namanile gīkī ū bebe ūlī Mulungu wa shigongo na nsaatwa wa banhū, hangī ūlī ndīzu nū kūpelana, hama ookalile būtogwa, ūlī Mulungu nekeja wa būbi ūbo ūbūhelile kūbatūmīla bahūbi.

3Alilūūlū SEEBA, nalīkūlomba ūnīngīje ū būpanga bone, nguno īlī hambū hambū nache dūhū ū nene kūtinda kwikala nalī mpanga.”

4Nang'hwe ū SEEBA ūnshokeja, “Ū bebe ūlībona ūlīta chiza ū kūpelana?”

5Ū Yona ūfuma ūūkigasha hanze kwipandī ilebe kū kīya ya nzengo; wibeegeja ibebete lya kūnshīkīja līīmi, hūna wigasha ū mu mbeho yalyo ūlindīīla abone īyo īlagūgwīle ū nzengo.

6Ū SEEBA Mulungu ūzwisha līkasaala saala lya madūūtū mingī, lyūkūla a higūlya y'ibebete lya ng'wa Yona ūpandīka mheho soga no, yūngeheja a makoye ga kūpya līīmi ū ntwe; ū Yona ūyega no kūlwa līkasaala saala lyenīlo.

7Alīyo ū mu dilū a ha ntondo yaho, ū Mulungu ūlagīja igino; lyūlīluma ī līkasaala saala lyenīlo lyūnyaala.

8Ī līīmi aho lyafuma, ū Mulungu wenha nyaga gwa kīya nsebu; ī līīmi lyūmbiisha no ū Yona ū ntwe bbihī na kūngumīla. Wilombela kūcha; ūhaya, “Hambū hambū nache dūhū ū nene kūtinda kwikala nalī mpanga.”

9Alīyo ū Mulungu ūnshokeja, “Ū bebe ūlībona ūlīta chiza ū kūpelana kūlwa nguno ya līkasaala saala?” Ū Yona ūshosha, “Ka gete; nīyo hangī naapelanaga no, namalīīlile nūūlū kūcha.”

10Ū SEEBA ūnshokeja alīng'wīla, “Ū bebe ūlīlīsaatwa līkasaala saala alīyo nū kūlīhamba ūtalīhambile, nūūlū kūlyītīla mhayo gose gose gwa kūlyīta līkūle yaya. Lyazwile lyoi dūhū lūshikū lūmò ha ntondo yaho lyūcha.

11Al'ī Ninawi īkī īlī na banhū bakīlile ha shihūmbī igana na makūmi abīlī, abo batī nabūdūla bo kūmana mhayo gwa kū būlyo nūūlū kū lūmoso lwabo; hama jilīmo na ng'ombe ningī dūhū, nibūlī natizūgūsaatwa ū nzengo gwenūyo na būtaale waago gīko?”

← Chapter 3 Jump to: