Lamentations 4

Sukuma 2019

← Chapter 3 Jump to: Chapter 5 →

1Yee, ī zahabu na kūbeela īyī yajimīīgije gete ū būng'weku wayo! Ī zahabu niiza īyī yahīndīhalile gīkī! A mawe ga mpango gaaponanjiwe sagala sagala būlī ha nhūūng'wanhīlo ya mapanda.

2A badinha ba mu Sayuni abo mpango gwabo gūkabalagwa mu būdito bo zahabu, Ī haha balisaawa gīkī batikīlile na nungū ja mabūmba, shikolo sha kūbeejiwa na makono ga mūmbi!

3Nūūlū ī nyamhawa jikonhyaga a baana bajo ha lūbeele; alīyo a banhū bane baabizile gītī nongu ja mu mabūga, baamalile ī ndīīlīīlī!

4Ī ndīmi ja beleele jikūdamīīlaga kū malangū kūlwa notà; a banīgīnī balīyūlomba ī shilīwa, alīyo atīho ū wa kūbinha.

5Abo baalyaga shizeeze ī kwandya, Ī haha bakuneese ba mu mapanda. Abo bazwalaga shizwalo sh'ikūjo, Ī haha bakwisolelejaga madaaso mu matūūgo ga mapalala.

6Ū nsango gwa būhūbi wa banhū bane ndito no, kūtinda ū gwa shibi sha Sodoma; nzengo ūyo gūkakenaagūlwa ng'wikanza idoololo, gūtakuumiwe na nkono gwa munhū.

7A basugi ba Sayuni baalī bape, bang'weku no kūtinda seluji; baalī bape kūheeba mabeelè, Ī mibīlī yabo yalī misheeku no kūheeba lubi, hangī yalī mikondooku gītī safilo.

8Alīyo ī haha bapi no, hambū hambū na milage, ūlū balīshimīza mu mapanda shilambu ū kūbamana; ī likūnza lya mibīlī yabo lyadamīīlile ha maguha, hūna lyūma kūlū kūlū gītī igūūla lya līntī.

9Hambū hambū abo baabūlagwa bo līlūshū, kūtinda abo balīnanulwa nzala, Ī nzala īlībabipya no bashila gete, nguno ndūhū ī shilīwa ū mu migūnda.

10Ū ng'wikanza lya kūkenaagūlwa a banhū bane, a bakīma nūūlū īkī balī na shigongo bakayūzuga baana babo na makono gabo baabalya shilīwa.

11Ū SEEBA walī wabūlugūlīla pyī ū būpelanu bokwe, ūbūhooleela ū būdaki bo būpelanu bokwe. Akabacha moto ū mu Sayuni gwīlya pyī ī misingi yamo.

12A batemi ba mu sī, pye na a banhū a bangī baalī batazunyaga, Ī gīkī banishi na būūbūki badūgije kwingīla mu mibita ya Yelusalemu.

13Gwike ī yenīyī īkaja gīko kūlwa shibi sha bahangi na būkenaagūji wa bagabīji baamo, abo biita mo mininga ga batūngīlīja.

14Ī haha bakūpaamagīlaga mu mapanda gītī babboku; baasosohala kībi no kūlwa mininga, kūshisha nose atīho ose ose wa kūgima kūkuumya shizwalo shabo.

15A banhū bakūbaayīgaga balīhaya, “Īngagi a henaha! Mulī basoso no! Jagi ūko! Segenelagi nīyo! Yaya ū kūtūkuumya a bise!” Būlī kū mahanga gene ūko baapeelela ū mu kwiyūnga kwabo, a banhū bakūhayaga: “A benaba biya ū kwikala ūmu.”

16Ū SEEBA hū ng'wene wababbalasanya, ooya ū kūbadīlīla. A bagabīji batūlībona hangī ī likūjo. Na a banamhala ndūhū ū kogohwa.

17Hama hangī twalola no tūlisagīlwa gīkī tūkūpandīka būgunanhwa, alīyo nose a miso gise gūnoga; twadīīlaga mu numba jise ndīhu, tūkūlolaga ihanga lya kūtūguna, gashi nīyo lyalī lītadūgije.

18Banhū baatūkūngīlaga būlī kwene ūko tūlīja; nose tūyūlemeelwa nū kūshimīza ū mu mapanda gise. Tūbona ī ngelelo yise yegeelaga, Ī shikū jise jakalīkaga; nguno ī ngelelo yise īkashika.

19Abo baatūpeejaga baalī bapeeji no, leba na ng'hoonà ja kūlala; baatūkūūbījaga na mu ngūlū, nū mu masaka batwibandīīlaga.

20Ū ng'witīīlwa maguta wa ng'wa SEEBA, ūyo alī myūyī ya būpanga wise, ūgwashiwa ū mu mitego yabo. A bise twiganikaga gīkī tūkūbiza ha sīlīlī ya mbeho yakwe ū ng'wikanza lya kwikala kū mahanga.

21Bebe Edomu, ūyo ūkikalaga mu sī ya Uzi, yegaga na kūsangabala ī chene; alīyo nū bebe ūkwinhwa ī shikombe, ūkūshing'wa ūleewe ūkaponye na shizwalo.

22Ee Sayuni, ū nsango gwako gwashilaga; atūkūleka ongeje kwikala mu būding'wa. Alīyo ū bebe Ee Edomu, akūng'winha nsango kūlwa shibi shako, akūbūseesa ha ng'wape ū būbi wako.

← Chapter 3 Jump to: Chapter 5 →