Lamentations 5

Sukuma 2019

← Chapter 4 Jump to:

1Ee SEEBA, yizūkagwe ī mihayo īyo yatūpandīkile; tūlolage, ūgabone a magooke gise.

2Ū wingīji wise baagabīlilwe banhū bangī, ī numba jise jadimilwe na bageni.

3Twabizile bapīna, tūtī na basīswe; a baninise baalekilwe gītī bachīlwa.

4A minzī ga kūng'wa tūlīyūūgūla; nī ng'hwi ja kūpemba tūlījipandīka bo hela.

5A batūmamya bise bakūtūkiling'himyaga na milīmo midito no; nūūlū twanogaga ndūhū ū kwifuula.

6Twambile makono Misili na Ashuli, gīkī twinhwe shilīwa sha kūtwigela.

7A bakūlūgenji bise abo bīīta shibi batīho ī haha, alīyo ū nsango gwabo tūlīkoya nago bise.

8Ī haha basese h'abo batūsugile, atīho munhū wa kūtwīnja ū mu makono gabo.

9Tūlīyūbīta mu kwihīga kūtaale hū twapandīka ī shilīwa, nguno banyoli bakūtwibandīīlaga ū mu masaka.

10Ī likoba lya mibīlī yise līlīyūseba no gītī liiko, nguno ya būdito bo nzala.

11A bakīma bakwītīlagwa yabūbi ū mu Sayuni, na a banhya ū mu mizengo ya Yuda.

12A basugi balīyūtungwa a makono banungeejiwa; a banamhala batinhagwa ī likūjo.

13A basūmba bakūkoyaga na nīmo gwa kūsha būsu ha mawe; a bayanda bakūdandaligūkaga na miligo ya ng'hwi ha mabega.

14A banamhala boyile ū kwigasha a ha mita gwa nzengo, a badinha nabo boyile ū kūtūla Ī ng'oma jabo.

15Ū būyegi boshilile ū mu ng'holò jise; ī mbina jise jagalūkile kūbiza ng'hūngū.

16Ī shingilima īyo twalī nayo yajimīīlile; twagwīlilwe mayanga kūlwa shibi shise.

17Kūlwa yenīyī ī ng'holò jise jikūsaatagwa no; a miso gise gaabbopomile kūlwa yose īyī,

18nguno ū lūgūlū lwa Sayuni lwalekilwe dalali; nyamhawa dūhū h'ījo jikwibisanyaga moi.

19Ū bebe Ee SEEBA, ūlī nsugi wa welelo na welelo, ī lisumbī lyako lya būtemi līlī lya kūshinga shibyalīlwe na shibyalīlwe.

20Nibūlī ūtwībe ilalī gīko? Nibūlī ūlītūlekanīja ikanza ilīhu gīko?

21Ee SEEBA, tūshoshage kūlī bebe tūkūkūshokela; tūshokeje ū wiza bo mu shikū jise ī ja kale.

22Numho hamo ūbize watūlema gete, hamo watūpelanīla kūkīlanīja!

← Chapter 4 Jump to: