Psalms 119 — Sukuma 2019

1Balī na lubango abo nhūngwa jabo jitī na shilingo, abo bakashimīzīlaga mu shilagīlo sha ng'wa SEEBA.

2Balī na lubango abo babūdimile ū būkaanīji wakwe, abo bakankoobaga na ng'holò yose;

3abo batīītaga ya malofu, alīyo bakashimīzīlaga mu nzīla jakwe.

4Ū bebe ūtūūlile ho kahūgūlīle, ako kigeleelilwe kūlondeelwa.

5Gīt'ūlū ni jabiza jigoloolile ī nzīla jane, ni nadūla ū kūshidima ī shilagīlo shako.

6Ū mu gīko ni naleka ū kūding'wa soni; nguno ya kūshikūja pyī ī shilagīlo shako.

7Nakūkūkumīlīja mu ng'holò ngololoku ūlū nilanga a kalamulīle kako ka būtūngīlīja.

8Nakūshimīzīla ū mu katongeelele kako, ūtizūnileka gete najimīīle.

9Ū ng'walūki adūgije kūjilang'hana mu kinehe ī nzīla jakwe jikale neela? Mu nzīla ya kikalīle ka kūtongeelwa na mhayo gwako.

10Nalīkūkooba na ng'holò yane yose, ūtizūnileka nakatagaalīja nīnge ū mu shilagīlo shako.

11Ū mhayo gwako nagūbīkile ū mu ng'holò yane natizūkwītīla shibi ū bebe.

12Ūkumīlījiwe, Ee SEEBA; nilangage ī shilagīlo shako.

13A kalamulīle ka kūfuma kūlī bebe, a kose nakūkakumūchaga na nomo gwane.

14Nakayegaga no ū kūshimīza mu katongeelele ka būkaanīji wako, gīt'ūmo būlī būyegi wa nsabi wa shikolo shose.

15Ū būhūgūji wako nakawideedeng'hanyaga no, nī nzīla jako nakūjikalalīla mu welwa ng'holò.

16Nakūyega no ū kūbiza ha sīlīlī ya katongeelele kako, natīko kūgūdalaha ū mhayo gwako.

17Nigaliilage ū nene ntūmami wako, hū nakūdūla kwikala nalī mpanga, nū mhayo gwako nakūgūdima.

18Niloleechage a miso gane, nashibone ī shakūkumya sha mu malange gako.

19Ū nene nalī ngeni ū mu sī, ūtizūnibisa ī shilagīlo shako;

20Ū būpanga wane makanza gose būkūminyiagwa ng'hūmbū ja kūbona kalamulīle kako.

21Bebe h'ūyo ūkabahamaga a badooshi abo bazumilwe, abo bakīngaga mu shilagīlo shako.

22Nīngījage ū wibengelejiwa nū būdalahījiwa, nguno nabūdimile ū būkaanīji wako.

23Nūūlū bakigasha kūnisīīga a basugi, nahene ū nene ntūmami wako nakūshiideedeng'hanya ī shilagīlo shako.

24Ū būkaanīji wako būkaniyejaga, hangī nīyo būlī na būhūgūji ū kūlī nene.

25Ū būpanga wane būlīgalagala mu lūbuubu, nihīmbūūchage na mhayo gwako.

26Aho najisomboola ī nzīla jane ūkaniigwa, nilangage ī shilagīlo shako.

27Nigunage nawitegeleje ū būhūgūji wako, hū nakūdūla kūshiideedeng'hanya ī shītīle shako sha kūkumya.

28Ū būpanga wane būlīshila kūlwa būpīna, niguzuhyage na mhayo gwako.

29Nilang'hanage natizūgwa mu nhūngwa ja nyalomolomo, nichīlage shigongo ūnilange ī shilagīlo shako.

30Naasolile gwa kūshimīzīla mu ng'hana, nū būlamuji wako būkūnitongeelaga gwa.

31Ee SEEBA, ū būkaanīji wako nadimanile nabo, ūtizūnileka nakagooka.

32Nakūpeela nhambbo nalī mu shilagīlo shako, nguno ī ng'holò yane wīyinhile wiyaabī.

33Ee SEEBA, nilangage ī nzīla ya shilagīlo shako, nane nakūshimana kūshisha kū ngelelo.

34Ninhage witegeleja, nane nakūgadima a malange gako; nīyo nakūgalondeela na ng'holò yane yose.

35Nitongeelage ū mu nzīla ya shilagīlo shako, nguno nakapandīkīlaga būyegi būtaale moi.

36Īgalūchage ī ng'holò yane īlolele kū būkaanīji wako, ītī kū nhūngwa ja kwikūmvwa sabo.

37Gagalūchage a miso gane gīnge ū mu kwiloleela shikolo shitī na solobo, hama ūnīīte kūbiza mpanga ū mu nzīla yako.

38Ū nene ntūmami wako nishikīlīgījage ū kwisagīja kwako, gīt'ūmo ūkabinhīlaga abo bakogohile.

39Nīngījage ī minala īyo īnogohije, nguno a kalamulīle kako kalī kawiza.

40A kahūgūlīle kako nalī na ng'hūmbū no nako, būhīmbūūchage ū būpanga wane kūlwa būtūngīlīja wako.

41Ee SEEBA, ū būtogwa wako ni būnipandīkage nū nene, ū būpīji wako gīt'ūmo kūlī kwisagija kwako;

42hū nakūdūla kūnshokeja ū ndalahi wane, nguno ū mhayo gwako hū gwene nagūsendamīlile.

43Ūtizūgwīnja ū mhayo gwa ng'hana ū mu nomo gwane, nguno a kalamulīle kako h'ako nakisagīlilwe.

44A malange gako nakūgadima gwa, kūshisha welelo na welelo.

45Nakūshimīnzīla mu wiyaabī, nguno nakūbūkoobaga ū būhūgūji wako.

46Nū būkaanīji wako nakūbūsomboola kū būtongi wa batemi, natīko kūding'wa minala,

47nguno ī shilagīlo shako nashiyegelile, Īkī nashitogilwe.

48Nakūgoloola makono gane nashanukūle Ī shilagīlo shako īsho nashitogilwe no; na a katongeelele kako nakūkideedeng'hanya.

49Gwizūkagwe ū mhayo gwako ūyo ūkaniwīla nene ntūmami wako, nguno gūkaninha kwisagīlwa.

50Ū mhayo ūyo gūkūnilūngūjaga mu būluhi wane gūlī gīkī, ū kwisagīja kwako kūkūniguzuhyaga ū mu būpanga wane.

51A bikumīlīja bakūnisondagūlaga no, alīyo ū nene natīko ū kūshileka ī shīlagīlo shako.

52Ee SEEBA, ū būlamuji wako būlīho kūfuma kale na kale, ūlū nawiganika nakūlūngūjaga.

53Nakūpelanaga no ūlū nabiganika a bahūnga, abo batagadīlīīlaga a malange gako.

54Ū nene ī shilagīlo shako h'ī lyīmbo lyane, lya kwīmba būlī kwene ūko nūūkatūūla ng'hambī.

55Ee SEEBA, būlī gwa ī būjikū nakalizūkagwa Ī lina lyako; nī shilangīlo shako nashidimile.

56Ū kūshimīzīla mu kahūgūlīle kako hū mhayo ūyo gūkūninhaga ū nene.

57Ee SEEBA, ū bebe ūl'inong'ho lyane, ū kwisagīja kwane kūlī gīkī, Ī mihayo yako nakwīdima.

58Nalīkūlomba na ng'holò yane yose, nichīlage shigongo ūmo kūlī kwisagīja kwako.

59Naajiideedeng'hanije ī nzīla jane nūgalūka, Ī mhambala jane jilī mu katongeelele kako.

60Naakangīlīgije no, natatogilwe ū kūdīīla ū kūshishikīlīja ī shilagīlo shako.

61A ba malofu nūūlū būnitaligīnja ngoye jabo, nahene natīko ū kūshīība ī shilangīlo shako.

62Nūūlū būjikū ha gatī nakabūūkaga kūkūkumīlīja, kūlwa būtūngīlīja wa kalamulīle kako.

63Abo balī na logohano kūlī bebe, h'abo nalī na būsangī nabo; abo bakashimīzīlaga mu kahūgūlīle kako.

64Ee SEEBA, ī sī yokalile būtogwa wako, nilangage ī shilagīlo shako.

65Ee SEEBA, ū nene ntūmami wako wanigaliilile no, kūlenganīla na mhayo gwako.

66Nilangage witegeleja na kalamulīle kawiza, nguno nashizunije ī shilagīlo shako.

67Aho naalī nataalī kūluha naalī najimīlile, alīyo ī haha naagūdimile ū mhayo gwako.

68Ūlī wawiza no, nī yīyo ūkīyītaga misoga, nilangage nashimane ī shilagīlo shako.

69A bikumīlīja bakūnibyaagījaga mihayo mu kūnilembekeja, alīyo ū nene nabūdimile ū būhūgūji wako na ng'holò yane yose.

70Ī ng'holò jabo jibambīlile gītī mhaama, alīyo ū nene nashiyegelile ī shilagīlo shako.

71Yabeelelile ū nene ū kūluha, nguno hū nakwilanga a katongeelele kako.

72A malange ga kūfuma mu nomo gwako galī masoga no ū kūlī nene, kūtinda shihūmbī shingī sha feza na zahabu.

73A makono gako gaanibeeja, hū gene gaanibūmba; ninhage witegeleja nadūle ū kūshiilanga ī shilagīlo shako.

74Abo bakogohile bakūyūnibona baayega, nguno ū mhayo gwako h'ūyo nagwisagīlilwe.

75Ee SEEBA, namanile gīkī ū būlamuji wako būtūngīlīgije, na gīkī ūkaniluhya mu ng'hana.

76Ū būtogwa wako būlī wa būja na būja, ni būnilūngūjage gīt'ūmo kūlī kwisagīja kwako ū kūlī nene ntūmami wako.

77Ī shigongo shako ni shiniihoolekelage nadūle kūbiza mpanga, nguno ī shilagīlo shako shīlī būyegi wane.

78Leka bagooke a bikumīlīja, nguno bakūnīītīlaga ītigeleelilwe nū mhayo gūtīho, alīyo ū nene nakongeja kūwideedeng'hanya ū būhūgūji wako.

79Abo bakogohile ni banishokelage, abo bawitegelegije ū būkaanīji wako.

80Ī ng'holò yane ni ībizage ītī na shisembo ū mu katongeelele kako, natizūgwa mu magooke.

81Ū būpanga wane būlī na ng'hūmbū no ja kūbona būpīji wako, nīyo ū mhayo gwako h'ūyo nagwisagīlilwe.

82A miso gane nose gaanogaga ū kwikala galolile mu kūlindīīla kwisagīja kwako; nakwibūjaga, “Ūkūnilūngūja nanalī?”

83Nguno nose nūmile kūlū kūlū gītī Ng'hoomele ha lyochi; alīyo nahene nataalī ū kūshīība Ī shilagīlo shako.

84Nakwiyūmīlīja kūshisha nanalī, ū nene ntūmami wako? A balūhya bane ūkūbagwisīja nanalī ū nsango gwabo?

85A bikumīlīja baanisīmbīlile machongo gīkī nagwīle mo, banhū abo batashimīzīlaga mu malange gako.

86Ī shilagīlo shako pyī ī shose shilī sha kūsanyiwa, bakūniluhyaga nū mhayo yaya; nigunage.

87Baalī basaagije hado banikale gete ū mu sī, alīyo nahene nataalī ū kūwība ū būhūgūji wako.

88Kūlwa būtogwa wako būlang'hanage ū būpanga wane, hū nakūgūdima ū mhayo gwa kūfuma kūlī bebe.

89Ee SEEBA, ū mhayo gwako gūlī gwa welelo na welelo, gwīmīīlile kūlwa būdūla bo ng'wigūlū.

90Ū būsanyiwa wako būlī wa kūshinga ho shibyalīwe shose; ī sī yīmīīlile na nguzu, wīhandatīgije bebe.

91Ī shose shilīho shīmīīlile kūshisha lelo, nguno pyī ī shikolo shikakūtūmamīlaga bebe.

92Ū nene ūlū ni ītī kūyegela shilagīlo shako, ū būluhi ni wanibūlaga kale.

93Natīko kūwība ū būhūgūji wako na hado yaya, nguno ū mu gīko ū būpanga wane ūkūwītaga kūbiza būpya.

94Ū nene nalī wako, nipījage; nalī na ng'hūmbū no nako a kahūgūlīle kako.

95A babūbi bakwikalaga baniibandīīle, nguno batogilwe kūnikenaagūla; alīyo ū nene a maganiko gane galī kū būkaanīji wako.

96Naabonile gīkī būlī shikolo shilī na ngelelo yasho, shilagīlo shako dūhū h'īsho shilī na būgalī galī būtī wa kūkalīchiwa.

97Ū nene nagatogilwe no a malange gako, nakadīīlaga līīmi ji nakūgideedeng'hanyaga.

98Ī shilagīlo shako shikanīītaga kūbiza na masala kūbaheeba a banishi bane, nguno natalekanaga nasho.

99Ū nene nalī na būmani būtaale no kūtinda pye a balangi bane, nguno ū wideedeng'hanya wane būsugilwe na būkaanīji wako.

100Nalī na witegeleja kūtinda wa banamhala, nguno nīmīīlile mu kahūgūlīle kako.

101Ī mhambala jane najilang'hanile ū kūshimīzīla mu būlī nzīla jabūbi, gīkī nadūle kūgūdima ū mhayo gwako.

102A kalamulīle kako natīko kūkinhīla ngongo, nguno bebe ng'wenekīlī hū ūlī nangi wane.

103Ī mihayo yako minonu no ū kūlī nene, kūtinda būnonu wa būūkī ū mu nomo gwane.

104A kahūgūlīle kako kakaninhaga witegeleja, na lūūlū pyī ī ya nyasala sala nīkolilwe.

105Ū mhayo gwako gūlī talà kū mhambala jane, n'isana ū mu nzīla yane.

106Naamalile kūlahīla nizunīlīja, gīkī nakūshimīzīla mu būlamuji wako nguno būtūngīlīgije.

107Ee SEEBA, nalī mu būluhi no; nigunage ū būpanga wane kūlenganīla na mhayo gwako.

108Ee SEEBA, shanukūlage ī shakwinha shane, h'ū kūkumīlīja kwane; hama ūnilange kalamulīle kako.

109Ng'hangala ningī nakūbūdimīīlaga mu nkono ū būpanga wane, alīyo natīko kūshīība ī shilagīlo shako.

110A babūbi baanitegile ntego, gwike ū nene natīko kwīnga ū mu kahūgūlīle kako.

111Ī mihayo yako būlī wingīji wane welelo bose, h'ī yene īkaninhaga būyegi ū mu ng'holò yane.

112Ī ng'holò yane īlī na būyegi no ū kūshishikīlīja ī shilagīlo shako, kūshisha kū ng'halīkījo ya yose.

113A banhū ba magalū galū natabatogilwe, alīyo ī shilagīlo shako nashitogilwe.

114Ū Bebe ūlī ibūngīlo na lūmūda lwane, ū kwisagīlwa kwane kūsendamīlile ha mhayo gwako.

115Bing'we bīīti ba shibi, nīngīlagi; ū nene natogilwe kūshimīzīla mu shilagīlo sha ng'wa Mulungu wane.

116Nihandatījage gīt'ūmo kūlī kwisagīja kwako, nadūle kwikala nalī mpanga; ūtizūnilekanīja nabize gītī nakwisagīlagwa mabu ng'wizungu, nakūgooka.

117Nidimage nakwikala mhola, nadūle kūshimīzīla mu katongeelele kako.

118Bose abo bakatagaalījaga bīnga ū mu shilagīlo shako, ūkabaponyaga; nguno bakilembaga mu mihayo īchile.

119A babūbi a bose ūkabapyagūlaga ū mu sī gītī mapalala, h'ī chene ū nene nabūtogilwe ū būkaanīji wako.

120Ū mīlī gwane gūkūdetemaga kūlwa lyogohya lyako, nabogohile no ū būlamuji wako.

121Īyo nīītile ītūngīlīgije, hangī īgoloolile; ūtizūnilekanīja mu makono ga baluhya bane.

122Ū nene ntūmamī wako nimanīkījage hape Ī gīkī nakwikala mhola, ūtizūnilekanīja banitobe a biboneeji.

123A miso gane nose gaamalaga ī nguzu kūlwa kwikala nalolile mu kūwisagīlwa ū būpīji wako, nū wisagīja wako ūbo būtūngīlīgije.

124Ū nene ntūmami wako nigaliilage kūlenganīla na būtogwa wako, ūnilange nī shilagīlo shako.

125Ū nene nalī ntūmani wako; ninhage witegeleja, nabūmane ū būkaanīji wako.

126Ee SEEBA, īlī h'ī likanza lyako lya kwīta mhayo, nguno a malange gako galīkenaagūlwa.

127Ū nene īkī nashitogilwe ī shilagīlo shako kūtinda zahabu, nūūlū zahabu īyo īgusilwe chiza,

128nīyo hangī īkī ū būhūgūji wako nawisaabile pye ū bose gīkī būtūngīlīgije, ī nzīla ja malofu najikolilwe jose pye.

129Ū būkaanīji wako būlī wa kūkumya no, h'ī chene nakashikīlījaga ūmo būhayīlile.

130Ī mihayo yako ūlū yūkundūlwa hape, Īkenhaga isana, īlo līkang'winhaga witegeleja ngaya masala.

131Ū nomo gwane gwasamaga nalīpīmīla kūlwa kūhahaalīla shilagīlo shako.

132Nigalūkīlage ūnichīle shigongo, ūmo ūkīītīlaga kū bose abo balītogilwe ī lina lyako.

133Nitongeelage ū mu kashimīzīle kane kūlenganīla na mhayo gwako, ūtizūnileka nakasugwa na shibi.

134Nipījage ū mu wiboneeji wa banhū, nadūle kūbūdima ū būhūgūji wako.

135Ū būshū wako ni būnakīīlage ū nene ntūmamī wako, nī shilagīlo shako ūnilange.

136A miso gane gakūsejaga shisoji gītī myongo, nguno ī shilagīlo shako shitūdimagwa.

137Ee SEEBA, ū bebe ūlī ntūngīlīja; na a kalamulīle kako katūngīlīgije.

138Ū mhayo ūyo ūgūtūūlile ho gūtūngīlīgije, hangī gwigeleelilwe kūsanyiwa gete.

139Ū wilu wane būlīniminya no, nguno a baluhya bane bakwīdalahaga ī mihayo yako.

140Ū kwisagīja kwako kūmanīkile kūlī kwa ng'hana, h'ī chene ū nene ntūmami wako nakūtogilwe.

141Na ng'hana ū nene nalī ndo no, nīyo nalī nadalahilwe; alīyo natawībaga ū būhūgūji wako.

142Ū būtūngīlīja wako būlī bo kūshinga ho welelo bose, nī shilagīlo shako shilī sha ng'hana.

143Ī haha nalī mu makoye na būpīna, alīyo ī shilagīlo shako nashiyegelile no.

144Ū būkaanīji wako būtūngīlīgije shikū jose, ninhage witegeleja nikale nalī mpanga.

145Nalīīlīla na ng'holò yane yose; niidīkage, Ee SEEBA, nakūshidima ī shilagīlo shako.

146Nalīkūlīlīīla, nipījage; na nakūbūdima ū būkaanīji wako.

147Dilū mu makingo nakwipunaga kūlīla kūlwa kūkooba būgunwa, ū mhayo gwako h'ūyo nagwisagīlilwe.

148Nakūkeyulaga būjikū pe nalī miso, nakūwideedeng'hanyaga ū wisagīja wako.

149Ee SEEBA, liigwage ī lilaka lyane kūlwa būtogwa wako, ū būpanga wane winhage nguzu mhya kūlenganīla na kalamulīle kako.

150A babeeja ba long'we ja mihayo mibi balī hihī no, a malange gako balī kūle no nago.

151Alīyo ū bebe, Ee SEEBA, ūlī hihī nū nene, nī shilagīlo shako ī shose shilī sha ng'hana.

152Kūfuma kale nilanga kwīngīīla mu būkaanīji wako, gīkī ī shilagīlo shako ūshihandatīgije bebe ng'wenekīlī kūshisha welelo bose.

153Kūlolage ū kūluhiwa kwane ūnipīje, nguno natīko ū kūgīība a malange gako.

154Nigunage ūnipīje, ū būpanga wane winhage nguzu mhya, kūlenganīla na kwisagīja kwako.

155A babūbi balī kūle no nabo ū būpīji, nguno a katongeelele kako batakakoobaga.

156Ee SEEBA, ī shigongo shako shitaale no, ū būpanga wane winhage nguzu mhya, kūlenganīla na kalamulīle kako.

157A banishi bane abo bakūniluhyaga balī bingī no, alīyo ū nene natūbūleka ū būkaanīji wako.

158Abo batī na kūzunya bakanisaayīchaga no, nguno batagūdīlīlaga ū mhayo gwako.

159Ee SEEBA, izūkagwa ūmo nabūtogelilwe ū būhūgūji wako, būlang'hanage ū būpanga wane kūlenganīla na būtogwa wako.

160Ī mihayo yako ī yose īlī ya ng'hana, nū būlamuji wako būlī wa kūshinga ho welelo na welelo, hangī pyī ū bose būtūngīlīgije.

161Basugi bakūniluhyaga nū mhayo ndūhū, alīyo ī ng'holò yane īlī na logohano ūlū nalī kū būtongi wa mhayo gwako.

162Ū nene nagūyegelile no ū mhayo gwako, git'ūmo munhū akayegaga kūlwa kūpandīka nding'wa mu būlūgū.

163Ū būlomolomo nabūkolilwe, hangī nabūbbyedile no; alīyo a malange gako nagatogilwe.

164Būlī lūshīkū nakakūkumīlījaga ng'hangala mpungatī, kūlwa nguno ū būlamuji wako būtūngīlīgije.

165Abo bagatogilwe a malange gako balī na mhola ningī no, nīyo shitīho sha kūbipamya.

166Ee SEEBA, ū būpīji wako nawisagīlilwe, nī shilagīlo shako nakashishikīlījaga.

167Ū būkaanīji wako nabūdimile, na hangī nabūtogilwe nīyo no.

168Ū būhūgūji nū būkaanīji wako nabūdimile, nguno ī nzīla jane jose jilī kū būtongi wako.

169Ee SEEBA, ū kūlīla kwane ni kūshikage kū būtongi wako; ninhage witegeleja kūlenganīla na mhayo gwako.

170Ū kwikūmbīlīja kwane ni kūshikage kū būtongi wako; nipījage kūlenganīla na kwisagīja kwako.

171Ū nomo gwane gūkūpumunha būgongooji wingī, nguno hū bebe ūkanilangaga ī shilagīlo shako.

172Ū lūlīmi lwane lūkwīmba kūgūkumūcha ū mhayo gwako, nguno pyī ī shilagīlo shako shitūngīlīgije.

173Ū nkono gwako ni gūnigunage, nguno naasolile gwa kūlondela kahūgūlīle kako.

174Ee SEEBA, nalī na ng'hūmbū na būpīji wako, na a malange gako hū būyegi wane.

175Nilekage nikale mpanga nakūkumīlīje, ū būlamuji wako h'ūbo būnigune.

176Nakūtagaalījaga gītī ng'holo ījimīīlile, nikoobage ū nene ntūmami wako, nguno nataalī ū kūshīība ī shilagīlo shako.