Psalms 78 — Sukuma 2019

1Bing'we banhū bane, igwagi ū būlangi wane, Īdegelekagi ī mihayo īyo nalīhaya na nomo gwane,

2Nakūlūngalūnga sumo na nomo gwane, nakūfuboola mbisīla, mbisīla ja kūfuma kale.

3Ī mihayo īyo tūkīyigwaga na twīmanile; mihayo īyo baatūwīla babyaji bise.

4Ī yoi tūtūbabisa a baana babo, nī shibyalīlwe īsho shikwizaga tūkūshiwīla; ī shītwa sha ng'wa SEEBA ī sha kūkumīlījiwa nī nguzu jakwe, ī yakūkumya īyo wīyīta.

5Akang'winha ū Yakobo mihayo ya kūntongeela; ūng'winha malange ū Isilaeli, ayo akabalagīla bakūlūgenji bise kūbalanga a baana babo.

6Ī shibyalīlwe īsho shiliza shiitegeleje, pye na a baana abo bataalī kūbyalwa; nabo bakūle bakūbamanīkījaga a baana babo.

7Ū mu gīko hū bakūnsanya ū Mulungu, nī shītīle shakwe batūshīība, alīyo bakūshidima ī shilagīlo shakwe.

8Batizūlondeela shīmīle sha bakūlūgenji babo. Abo shibyalīlwe shabo shalī sha mitwe midiimu na bashitiigwa; shibyalīlwe sha ng'holò jitīmīīlile ha ng'hana, banhū ba moyo gūtansanije Mulungu.

9Bagosha ba Efulaimu bakafuma na būta wabo kūja kū būlūgū, alīyo ū mu lūshikū lwa kwamba būlūgū, būshoka kū numa.

10Baalī baalīleka ī lilagane lya ng'wa Mulungu, būlema nū kūshimīzīla ū mushilagīlo shakwe.

11Baalī bīyība īyo walī wīyīta, Ī yakūkumya īyo walī waboolekeja.

12Walī wīta shakūkumya ū kū būtongi wa bakūlūgenji babo, aho balī mu sī ya Misili, ng'witogolo lya Zoani.

13Akagabanhya minzī ga nyanza ūbabītīja henaho, a minzī ūgīta gikīga gītī shigūlū.

14Ī līīmi wabatongeelaga w'ilunde, Ī būjikū wabatongeelaga na būūpe wa moto.

15Ū ng'wibbaala akatandūla shiganga, ūbinha minzī mingī gītī ga kūfuma mu nyanza.

16Milala ya shiganga wīyīta kūbiza nzīla ja minzī, minzī ūgīta gahūūme gītī galī mu mongo.

17Nahene hū bakongeja ū kūng'wītīla ī shibi, ū ng'witogolo bakangomela ūyo Alī Higūlya no.

18Ū mu ng'holò jabo būngema ū Mulungu, bigongela shilīwa īsho baalī baashikūmvwa.

19Būyūndugumīla ū Mulungu; būhaya, “Ū Mulungu adūgije kūtūtengela shiliwa ū ng'wibbaala ūmu?

20Na ng'hana walī watūlile shiganga, gilonga minzī mingī, yūloloma myongo. A banhū bakwe adūgije kūbinha nī shilīwa, pyī nī nyama?”

21Ū SEEBA aho wabiigwa ūpelana no, moto gwakwe gūūbaka kūlwa ng'wa Yakobo, ū būpelanu wakwe būbapembekela a Baisilaeli;

22nguno bakalema ū kūnsanya ū Mulungu, nūūlū kūjisanya ī nguzu ja būpīji wakwe.

23Alīyo nahene akagalagīla a malunde, ūjilugūla ī nzwigī ja ng'wigūlū.

24Ūbenhela mbula ya eemanu, ūbinha shilīwa sha kūfuma ng'wigūlū.

25Banhū būlya shilīwa sha ba malaika, akabinha shilīwa būlya gīt'ūmo batogelilwe.

26Hanuma ūhembya nyaga gwa kīya kūfuma kwigūlū, na nyaga gwa dakama ūgwenha kūlwa būdūla wakwe.

27Akabenhela nyama gītī mbula, ningī no gītī lūbuubu; noni ja kūlala ningī gītī maseni ga ha nyanza.

28Ūjenha ū mu ng'hambī yabo, jūgwa hasī kūgapīndīlīja a maheema gabo.

29Bakalya bigeja kūshisha būūdūdūlūka, nguno akabinha gīt'ūmo jalī ng'hūmbū jabo.

30Alīyo aho bataalī kwīnga a ha shilīwa īsho baalī bashihahaalīlile, ī shilīwa aho shitaalī mu milomo yabo,

31ū būpelanu bo ng'wa Mulungu būbikīīla; ūbabūlaga pye a ba nguzu ningī ū mubo, ūbagwisha hasī a basūmba ba mu Isilaeli.

32Gwike nūūlū īkī īkabilongela ī yenīyo, nahene bakongeja dūhū ū kwīta ī shibi; nūūlū īkī walī waboolekeja shakūkumya, bakongeja ū kūndalaha.

33Hūna lūūlū ī shikū jabo akajikalīcha sagala sagala gītī myūyī; ni myaka yabo bīmalīja balī mu boobà.

34Ū Mulungu ūlū wababūlaga bankoobaga, bagalūkaga bandya kūnkooba mu būkomezu.

35Bizūkagwa gīkī ū Mulungu alī shiganga shabo, ū Mulungu ūyo Alī Higūlya no hū nkomooji wabo.

36Alīyo banaaja laajaga na milomo yabo; banembaga na ndīmi jabo dūhū.

37Nguno ī ng'holò jabo jalī jitīmīīlile ha ng'hana ū kūlī we; baalī batalīdimile ī lilagane lyakwe.

38Alīyo īkī ū wei alī na shigongo, wabalekejaga ī shibi shabo, waleka ū kūbamala. Ng'hangala nīngī wabūlang'hanaga ū būpelanu wakwe, walī atabūsooselaga pyī ū būpelanu wakwe.

39Wizūkagwa gīkī balī banhū ba mīlī dūhū, lūyaga lūbītile, ūlo lūtīko kūshoka hangī.

40Ū ng'witogolo bikalaga bakūngomelaga ng'hangala na ng'hangala, makanza mingī bampīnīhajaga ū kū mbaala!

41Bangemaga ng'hangala ningī no, bayūmpelanya ū Ng'wela wa Isilaeli.

42Baalī batawiganikaga ū būdūla wa nkono gwakwe, nūūlū ū lūshikū ūlo akabīngīnja mu nkono gwa nuhya;

43aho akoolecha shimanīkījo shakwe mu Misili, nī sha kūkamaaja shakwe ū ng'witogolo lya Zoani.

44A minzī ga myongo yabo akagagalūcha gūbiza mininga, būlemeelwa kūgang'wa a minzī ga myongo yabo.

45Na magi ūbatūmīla gūyūbaluma, būyaga na madanga ga kūbakoya.

46Ī shilīwa sha mu migūnda yabo ūshigumīīla mbilīsī, na a matwajo ga mu milīmo yabo gūmalwa njige.

47Ī mizabibu yabo wīkenaagūla na mbula ya mawe; ī mitini yabo yūkenaagūlwa mbeho ng'halī.

48Ī ng'ombe jabo ūjileka jūtūlwa mbula ya mawe; jiyūtaalwa ng'hūba ī mitugo jabo.

49Ūbitīīla būpelanu wakwe būkalī; bidīkīlwa būdaki, wayī na makoye, ūbatūmīla ibità lya bamalaika kūbayagaja.

50Ū būpelanu wakwe ūbūlugūlīla nzīla; atawihūgije ū būpanga wabo ū kwicha, alīyo akabagumanīja kwihūūya.

51Akababūlaga pye a babyalwa ba kwandya ū mu Misri, abo baalī nguzu jabo ū mu maheema ga ng'wa Hamu.

52Alīyo a banhū bakwe ūbafunya moi gīt'idaale; ūbīta nabo mu matogolo, akūbatongeelaga gītī ng'holo.

53Batogohile shose shose īkī wabatongeelaga mu mhola, alīyo a banishi babo yūbamila ī nyanza.

54A banhū bakwe ūbashisha kū mbīmbī ja sī yakwe neela, kū lūgūlū ūlo walī walūdima na nkono gwakwe gwa būlyo.

55Ūpeeja mahanga gīkī gabīngīle a boi, Ī sī ya mahanga wīfunya kūbiza wingīji wabo; ū mu kaya jenījo ūtūūla Baisilaeli, ng'anda jabo jikala mo.

56Gwike nahene bakangema, ū Mulungu ūyo Alī Higūlya no būngomela, ū būkaanīji wakwe būleka ū kūbūdīlīla.

57Bakagalūka būneka, boya ū kūnsanya; h'ūmo bīītīlaga na a bakūlūgenji babo, būbiza batigeleelilwe kūsanyiwa, ūmo būkabizīlaga būta ūlū būbīnzīkile.

58Yūbatoga myalīlo kū mapandī ga kwigūlya, būmpelanya mu wilamīlīja wenūbo; būng'wingīja mu wilu kūlwa shiikolile shabo sha kūpūnza.

59Ū Mulungu akagwigwa ū gwenūyū ūdaka no, ūnema nye gete ū Isilaeli.

60Ūbūlekanīja ū wikalo wakwe ū mu Shilo, Ī liheema, īlo wikalaga mo hamò na banhū.

61Ī nguzu jakwe ūjileka jūtwalwa būding'wa, Ī likūjo lyakwe lyūja mu makono ga banishi.

62A banhū bakwe ūbaponya kū līlūshū lībamale, bakampelanya no a banhū ba wingīji bokwe.

63Moto gūbabuugīlīja a baana babo a basūmba; a banhya gūūlema ū gwa kūbinīlwa mbina ya kabunga.

64A bagabīji babo būbūlagwa bo līlūshū mu būlūgū, a bachīlwa babo batapandīkile ū ng'wanya gwa kūbalīla.

65Hūna ū Seeba nose ūmisha gītī kūfuma mu tūlo; ūchoma ng'wano gītī ngosha wa makaya akolilwe walwa.

66Ūbatūla a banishi bakwe ūbapyena, būgwa mu magooke ga welelo bose.

67Gwike akīlema ī ng'hambī ya lūganda lwa ng'wa Yosefu, nū lūganda lwa Efulaimu atalūsolile.

68Alīyo ūlūsola lūganda lwa Yuda; lūgūlū lwa Sayuni, ūlo akalūtogwa.

69Ūzenga ipandī lyakwe lyeela gītī ngūlū ndīhu; gītī sī īyo ayītūūlile ho gīkī ībize ya kūshinga ilalī shikū jose.

70Ūnsola ntūmami wakwe Daūdi, ūng'winja kū madīīmīlo ga ng'holo.

71Ūnecha nīmo gwa kūlang'hana ng'holo na baana bajo, ūng'wīta kūbiza ndīīmi wa banhū bakwe, wa babyalwa ba ng'wa Yakobo, Isilaeli ūyo alī wingīji wakwe.

72Ū Daūdi ūbalang'hana na ng'holò ngololoku, ūbatongeela na nkono gwa witegeleja būtaale.