Psalms 74

Sukuma 2019

← Chapter 73 Jump to: Chapter 75 →

1Ee Mulungu, nibūlī watūponije ilalī? Nibūlī ūjipelanīlile na būkalī gīko ī ng'holo ja ng'widīīmīlo lyako?

2Lizūkagwe ī libità lya banhū bako Īlo walīgūla kūfuma kale, a banhū bako abo ūkabakomoola gīkī būbize wingīji wako; lwizūkagwe ū Lūgūlū lwa Sayuni, ūlo lūlī wikalo wako.

3Līyeleelage ī lipandī īlo līlī mapagale ga būja na būja ī haha; a banishi baakenaagūlile pyī ī shikolo ū ng'wipandī lyeela.

4A banishi bako baayoganije no ū mu numba yako, būleka mo na mbembeela kūlwa shimanīīkījo shabo.

5Baalī gītī banhū na mbasa jabo ng'wipoolu, bakūsengaga masaka.

6Pyī ī shikolo shamo ī sha būlenji baashihīnagūlile bo mbasa, na kūshitobagūla na nundo.

7Ī lipandī lyako lyeela baalītiimile, lyanogotejiwe moto, būbūsosohaja ū wikalo wa lina lyako.

8Baaliwīlaga ū mu ng'holò jabo gīkī, “Tūkūbashigina pye ūmo bagelelile.” Pye a masinagogi ga mu sī yise baagapembile moto.

9Tūtī na shimanīkījo sha kūtoolekeja, na a bahangi batīho ī haha, nīyo ndūhū nūūlū ūmò wise ūyo ayīmanile Ī ng'halīlo y'ikanza.

10Ee Mulungu, ū ng'wanishi akwikala ūūkūgīmba nyachilū kūshisha nanalī? Ū ng'wanishi ikale akūlīsondagūlaga Ī lina lyako kūshika nanali?

11Nibūlī ūkūgūlemejaga ū nkono gwako, ū nkono gwako gwa būlyo? Gwīnjage a ha shikuba aho ūgūbandije.

12Alīyo ū bebe, Ee Mulungu ūlī ntemi wane kūfuma kale na kale; mu sī jose hū bebe ūkatūūlaga būpīji.

13Hū bebe ūkīlekanya ī nyanza na nguzu jako, ūbelagūla mitwe ya shiinū mu minzī.

14Bebe h'ūyo ūkabelagūla na mitwe ya ng'wa Lewiasani, ūjinha shiinū ja mu matogolo jūlya.

15Hū bebe ūkadūlūla nzwīlo ja minzī, ūdūla na mahululu; ūūkamya minzī mu myongo īyo ītoyaga kūhūūma.

16Ī likanza lya līīmi līlī lyako, nī lya būjikū nī lyene lyako; hū bebe walībeeja ī līīmi nū ng'weji.

17Ī sī ūkītūūlīla bebe pyī ī mbīmbī jayo; ūtūūla ho na makanza ga chū na shidikū.

18Ee SEEBA, izūkagwa ūmo bakūkūgīmbīlaga nyachilū a banishi, ūmo bakūlīsondagūlīlaga Ī lina lyako a babbūūlī.

19Ū būpanga wa mhunda yako ūtizūbūlekela mashiinū ga mu mapoolu; a banhū bako bakūluhiagwa, ūtizūbīība ilalī.

20Yaya ū kūlyība ī lilagane lyako; nguno a mapandī ga giiti ū mu sī gookalile ng'hambī ja wiboneeji.

21Ū ng'wiboneelwa ūtizūneka ashoke agookile; ū ng'habī nū ngayiwa balīkumīlīje ī lina lyako.

22Ee Mulungu, būkaga; Īlwīlīīlage ī ng'hana yako, izūkagwa ūmo bakūkwibengelegejaga a babbūūlī līīmi bbu.

23Yaya ū kwīyība ī yombo ya banishi bako, ū nsambo gwa banhū abo bakūkolilwe, ūyo gūkūmanagongeja kūkwīla.

← Chapter 73 Jump to: Chapter 75 →