Ruth 1

Sukuma 2019

Jump to: Chapter 2 →

1Ū mu shikū jene ū būsugi waalī būtaalī ha sīlīlī ya balamuji, īkagwa nzala ū mu sī. Ngosha ūmò wa mu Betelehemu wīnga hamò nū nke na bitūnja bakwe babīlī, būja mu sī ya Moabu gīkī bakikale kwenūko ikanz'iguhī.

2Ī lina lyakwe ū ngosha ng'weenūyo witanagwa Elimeleki, ū nke walī Naomi; a bitūnja bakwe būbīlī wabo baalī Mahiloni na Kilioni. Baalī bazengi ba mu Betelehemu ya mu sī ya lūganda lwa ng'wa Yuda; alīyo a boi baalī baa lūganda lwa ng'wa Efulaimu. Na lūūlū būja Moabu kwikala kwenūko.

3Alīyo ū Elimeleki, ū ngoshi o ng'wa Naomi, ūchīla kwenūko, ū Naomi ūlekwa na bitūnja bakwe babīlī.

4A basūmba benabo būtoola bakīma bana Moabu, ūmò witanagwa Olipa, ūngī Luuzi. Aho yabīta myaka gīt'ikūmi gīko bakwikalaga kwenūko,

5a basūmba būbīlī wabo, ū Mahiloni nū Kilioni būzumalīka; ū Naomi ūbiza wachīlwa nū ngoshi hamò na a bitūnja bakwe.

6Aho alī ū mu sī ya Moabu, wigwa gīkī ū Seeba wabagenihile a banhū bakwe mu nzīla ya kūbinha shilīīwa. Na lūūlū ū Naomi na a bīnga bakwe bandya kūgolanya lūgendo lwa kūshoka kaya, wīnge ū kweenako.

7Na ng'hana wandya ū lūgendo na a bīnga bakwe, bīnga a ha kaya aho bikalaga, būbūūka kūjūdima nzīla ya kūbatwaala kū sī ya banhū ba lūganda lwa ng'wa Yuda.

8Alīyo ū Naomi ūbawīla a bīnga bakwe būbīlī wabo gīkī, “Bing'we shokagi kaya būlī ngwene aje kūlī nina. Nīyo ū Seeba akang'wītīle yawiza gīt'ūmo ng'walūbīītīlaga abo baazumalīkile, hamò nū nene.

9Ū Seeba ni ang'wīlūkīlage kwifuula būlī ūmò wing'we, būlī ng'wene apandīke kaya na ngoshi wakwe.” Hanuma ūbabbipa kūlwa kūbalaga; būlīla na ilaka lya higūlya

10balīng'wīla gīkī, “Yaya tūkūja hamò nang'ho ū kū banhū bako.”

11Ū Naomi ūbashokeja alīhaya, “Shookagi kaya baana bane. Nibūlī mulītogwa kūja hamò naane? Muliganika nakūbyala baana bagosha hangī, gīkī balaabize bagooshi bing'we?

12Baana bane shokagi kaya; ū nene naagigūlūhile no; natīīko kūtoolwa na ngosha ūngī. Nūūlū ni yabiza gīkī hamo nataalī na kwisagīlwa gīkī hīmba nadūgije kūtoolwa ū būjikū wa leelo īyī nabyaale baana bagosha,

13ning'wadūla ū kūlindana kūshisha bakūle? Ning'wadūla ū kwilang'hana mutizūtoolwa kūlwa nguno yabo? Yaya ītī gīko baana bane; ū nene nalī na būpīna būtaale no kūlwa nguno ying'we, ū Seeba wanitūlile ha bbahu!”

14Būūlīla hangī n'ilaka lya higūlya a bīnga bakwe; hanuma ya henaho ū Olipa ūmbipa ū nina būkwi ūnaga; ū Luuzi ū ng'wene ūndaamīīla gete.

15Ū Naomi ūng'wīla gīkī, “Bebe ūlīmona ū ntoolwa ng'wiyo washoka aje kū banhū bakwe na kū baamulungu bakwe; nkūūbījage muje!”

16Alīyo ū Luuzi ūshosha alīhaya, “Ūtanihadīkījage kūkūleka nūūlū kūshoka, naleke ū kūkūlondeela. Nguno hose hose ūko ūkūja nū nene nakūja, ūko ūlīīkikala nū nene nakwikala ko. A banhū bako bakūbiza banhū bane naane, nū Mulungu wako akūbiza Mulungu wane.

17Ūko ūlaakachīle nū nene nakūchīla kwenūko; nīyo h'ūko nakūjīkīlwa. Ū Seeba ni anitūlage hataale na kūtinda ho ūlū nūūlekaana nag'ho mu nzīla yīngī yose yose, ūlū ītī ya kūcha dūhū!”

18Na lūūlū ū Naomi aho wabona gīkī ū Luuzi waasolaga mhayo gwa kūja nang'hwe, ooya ū kūnganikīla ū mu mhayo gwenūyo.

19Hūna a bakīma būbīlī wabo benabo būja na lūgendo lwabo, būūkashika ī Betelehemu. Aho baashika ī Betelehemu būgūjinjimaja pyī ū nzengo. A bakīma bandya kūkumya bakwiwīlaga gīkī, “Bing'we baamayū, ū ng'wenūyū hū ng'wene gete ū Naomi?”

20Nang'hwe ūbashokeja ūhaya, “Mutaanitanagi Naomi, nitanagi Maala; nguno ū Seeba wabūgalūkije ū būpanga wane ūwīta kūbiza būlūlū.

21Aho nalīnga ū ng'wenūmu naalī nookalile pa, alīyo īhaha ū SEEBA wanishokije nalī dalali. Yaakī lūūlū ū kwikala mukūnitanaga Naomi? Waniluhije no ū Seeba; ū Ndūji wa shose wanigwisīgije mibi no ū nene!”

22Na lūūlū ū Naomi ūbiza waashoka ū kūfuma ī Moabu, wiza hamò na Luuzi ng'wīnga wakwe ū muna Moabu; būshika ī Betelehemu shikū ja magesa gaa būsīga hū jilandya kwingīla.

Jump to: Chapter 2 →