Ruth 2

Sukuma 2019

← Chapter 1 Jump to: Chapter 3 →

1Ū Naomi walī na dūgūye ū kū lwande lwa kū būkwiye, ū kū ndūgū ja ng'wa Elimeleki; ū ndūgūye ng'wenūyo ī lina lyakwe witanagwa Boazi; ngosha nsabi.

2Ū Luuzi ū muna Moabu ūng'wīla ū nina būkwi ū Naomi gīkī, “Mayū naje kū migūnda ya bagesi, ūyo alanikūlīlwe nakūmanūūpūmbīla malagalīkwa ga shilīwa ayo galīyūlekeelwa kū numa.” Naomi ūnshokeja ūng'wīla, “Jaaga dūhū ng'wana wane.”

3Hūna ūja ūūkandya kūpūmbīīla mu ngūnda nebe kū numa ya bagesi. Gashinaga ū ngūnda ūyo akashikīla gūbiza go ng'wa Boazi, munhū wa mu lūdūgū lwa ng'wa Elimeleki.

4Lītabītile ikanza ū Boazi nang'hwe wiza kūfuma Betelehemu; ūshikīla kūbagīsha a bagesi bakwe gīkī, “Seeba abize hamò ning'we.” Nabo būnshokeja, “Seeba akwīīlūkīle mbango.”

5Hūna ū Boazi ūmūūja ū ntaale wa bagesi bakwe, “Ū shīke ng'wenūyū wa kū ng'wa nani?”

6Nang'hwe ū ntaale wa bagesi ūshosha, “Angū ū ng'wenūyo hū ng'wene ū muna Moabu ūyo wizile na Naomi kūfuma Moabu.

7Washikaga a henaha ūhaya, ‘Nalīlomba naje nūūpūmbīīla na kūsoleleja a mangala ayo galīīsaagīīla mu mabelele na a malagalīkwa ayo galīīlekwa hasī kū numa ya bagesi.’ Yū, baayīnga watūmama būlī, nguno wandyaga dilū kūshisha ikanza īlī; ūlū ītī kakanza kaguhī dūhū ako waalī waaja kwifuula hado mu mbeho.”

8Ū Boazi ūng'wīla ū Luuzi gīkī, “Alinidegelekage ng'wana wane, yaya ū kwīnga ū mu ngūnda gwenūyū ūje kūpūmbīīla kū migūnda yīngī; bebe diimanaga nabo dūhū a batūmami bane a bashīke benaba.

9Gūdīlīīlage ū nīmo ūje ūkūbakūūbījaga a hanuma yabo; a basūmba bene naabahūgūlaga batizikala bakūkwīgīja malang'wa. A minzī ga kūng'wa galīho beenhaga a basūmba, ūlū ūkolwa notà jaga dūhū ūkasole ū mu shiseme shise ūng'we.”

10Ū Luuzi aho wigwa ī mihayo yenīyo ūtuja mazwi hasī, hama winama kūshisha ūkuumya hasī ū būshū, ūhaya gīkī, “Yee baba, būtogwa kī ū wenūbū, shakwenheleja kī nose ūnibone na nene, munhū ngeni wa kūfuma kūle gīko?”

11Ū Boazi ūnshokeja alīhaya, “Naawīlilwe īyo ūkūng'wītīlaga ū noko būkwi, kūfuma a h'ikanza lya ngoshi wako kūzumalīka; nī gīkī wabalekile a ba so nū noko hamò nī sī ya ng'wing'we, wiza kwikala na banhū abo walī ūtabamanile kūfuma kale.

12Leka ū Seeba akūshokeje mu yose īyo wayītile, ū Seeba ū Mulungu wa Baisilaeli ni akūnong'hage inong'ho lyawiza; ūyo bebe wizile kūlang'hanwa mu mbeho ya manana gakwe.”

13Ū Luuzi ūhaya, “Baba leka nongeje kwanukūlwa ū mu miso gako; wanilūngūja no nguno walūngalūnga mihayo milyehu ū kūlī nsese wako, nūūlū īkī ū nene natigeleelilwe kūlenganījiwa nūūlū na ūmò wa basese bako a bakīma.”

14A h'ikanza lya shilīwa ū Boazi ūng'wīla, “Egeelaga aha tūlye; ūyūsombya nū ngatī gwako ū mu divai.” Ū Luuzi aho igaashije akūlyaga na a bagesi, ū Boazi ūng'winha matwajo gakalangile; ūlya kūshisha wigeja, ūsaaja gamò.

15Wahayūbūūka kwandya kūtūmama ū nshīke ng'wenūyo, ū Boazi ūbakomeleja a batūmami bakwe a bagosha alīhaya, “Ng'ūneka wasola na a mangala a matengeke, yaya ū kūng'hama.

16Ng'ūng'wīngīja nī sha mu miligo īyo ng'watungaga ng'wantūūlīla ha mhūjo wayūūbīnzagūla; yaya ū kūng'hama.”

17Na lūūlū ū Luuzi ūpūmbīīla ī shilīwa kūshisha līīmi lya mhīndī; hūna ūtūla īsho akapandīka, ūgwaasha sha kwigela kookal'idebbe.

18Ūbūūcha atwaalile kaya, aho washika ūng'olekeja ū nina būkwi īsho akapandīka. Ūshifunya nī shilīwa īsho walī wasaaja aho walya wigūta, ūng'winha ū nina būkwi.

19Ū nina būkwi ūmūūja, “Walī wakapūmbīīlīlaga he ī lelo? Halī ūko walūtūmamīlīlaga? Ū munhū ūyo walī wakūyegelaga ng'wenūyo ūkūgunanha na kūkūgunanha ni īīlūkīlagwe mbango!” Hūna ū Luuzi ūng'wīla ū nina būkwi ī mihayo ya ng'wa munhū ūyo watūmamaga kū ng'wakwe, ūhaya, “Ū munhū ng'wenūyo ī lina lyakwe Boazi.”

20Ū nina būkwi ūng'wīla, “Ū SSEEBA ūyo ataalī kooya kūbīītīla yawiza a bapanga na a bachiile, ni ang'wīlūkīlage ū ng'wenūyo.” Ongeja kūhaya, “Ū Boazi ndūgū o mu kaya gete; ashikile nūūlū kwingīla kaya.”

21Ū Luuzi ūhaya hangī, “Walī waniwīla na gīkī, ‘Nzūgū ūyūtūmama nabo a bagesi bane kūshisha gūshile ū nīmo gwa kūgesa ī shilīwa shane.’”

22Ū Naomi ūng'wīla ū ng'wīnga okwe gīkī, “Ng'hana ī chene īkūbeelela ng'wana wane ūtūmame nabo a baanikī bakwe, nguno ūlū ūja kū migūnda yīngī ūdūgije kwītīlwa wibonya na banhū.”

23Ū Luuzi wikalaga nū nina būkwi, kūnū akūjaga gwa wakatūmama na a baanikī ba ng'wa Boazi, kūshisha gūūshila a magesa ga būsīga na a ga ngano.

← Chapter 1 Jump to: Chapter 3 →