Zephaniah 1

Sukuma 2019

Jump to: Chapter 2 →

1Ūyū gwene mhayo go ng'wa Seeba ūyo gūkang'wizīīla Zefania ng'witūnja o ng'wa Kushi ng'wana Gedalia, ūyo walī ng'witūnja o ng'wa Amalia, nang'hwe ng'witūnja o ng'wa Hezekia. Jalī shikū ja būsugi bo ng'wa Yosia ng'witūnja o ng'wa Amoni ntemi wa Yuda.

2Nakūshikenaagūla pyī ī shikolo shishile a higūlya ya sī. Alīhaya SEEBA.

3Nakūbakenaagūla a banhū pyī nī ndimu, ī noni ja kūlala nī shī ja mu nyanza nakūjikenaagūla jishile. A ba malofu nakūbahūlūla; nakūbamala a banhū, bakūshila ū mu sī, alīhaya SEEBA.

4Nakūgūgoloola ū nkono gwane nītūle ī Yuda hamò na a bikaji ba mu Yelusalemu a bose. Nakūbūkenaagūla pyī ū būshiigo wa shiilamīlīgījo sha ng'wa Baalī, na a mina ga bagabīji ba mahanga a balamya ba shiikolile,

5abo bakalinhaga kū numba baatuja mazwi kūlamya ibità lya sonda, na bakinamaga mu kwilahīla kūnū bakūlīhayaga lina lya ng'wa SEEBA, alīyo bakilahīlaga na mu lina lya ng'wa Moleki,

6abo baagalūka booya kūnondeela ū SEEBA, hangī batankoobaga ū SEEBA nū kūbūūja kūlī we booya.

7Huumūlagi sele kū būtongi bo ng'wa SEEBA wa Būdūla bose, nguno ū lūshikū lwa ng'wa SEEBA lwegeelaga. Ū SEEBA wagolanije shitambò; na a batoneelwa wamalile kūbalaalīka.

8Ū mu lūshikū lwa shitambò sha ng'wa SEEBA nakūbinha nsango a basugi, na a bitūnja ba ntemi, na a bose abo bakazwalaga shizwalo ya nyageni.

9Ū mu lūshikū lwenūlo nakūbinha nsango pye abo bakakīlanhyaga mbawa ja ha nyango, abo bakookajaga hekalu ja bamulungu babo wiboneeji na būlomolomo.

10Ū Seeba alīhaya gīkī, “Ū mu lūshikū lwenūlo kūkūbiza ho kūlīla ū kū mita gwa ndīlo, na ng'hūngū īkūdulung'hanya ū kū Ng'hambī Mhya, n'ilaka lya kūpaanagūka kūtaale līkūfumīīla kū ngūlū.

11Tūlagi ng'hūngū bing'we bikaji ba kū mhandī j'igūlilū, pye a basūlūjū bako bakūshila. A basūlūja abo bakang'wenhelaga hela bakūkenaagūlwa a bose.

12Ū ng'wikanza lyenīlo nakūtiima na talà nalole hose pye ū mu Yelusalemu, abo batakelekaga nakūbinha nsango, abo babange madika ga walwa gikīndaga kū shidako, abo bakiganikaga gīkī, ‘Ū SEEBA atīta mhayo gose gose, gūbize nsoga nūūlū mi.’

13Ī sabo jabo bakūtaajiwa jijanwe, Ī numba jabo jikūkambagūlwa. Ī numba bakūzenga alīyo batikala mo; Ī migūnda ya mizabibu bakūlīma alīyo batīīng'wa ī divai.”

14Ū lūshikū lwa ng'wa SEEBA ū lūtaale lwegeelaga; lūlī hihī nīyo lūliza wangū no. Degelekagi! Ī ng'hūngū ya mu lūshikū lwa ng'wa Seeba īkūbiza nhaale no, ī yogè ya bashilikale ko ū kwenūko.

15Ū lūshikū lwenūlo lūkūbiza lwa būpelanu, lūshikū lwa kūzwangana na mayanga, lūshikū lwa makoye na būkenaagūji, lūshikū lwa giiti n'ilundu, lūshikū lwa malunde na giiti sha gamha,

16lūshikū lwa nhaaninga kūng'ang'aajiwa na ng'wano gwa būlūgū kūlījiwa kūlwa mizengo Īyo īpīndīlījiwe ndugu, nī ng'hambī ja bashilikale.

17Nakūbenhela kūzwanganga a banhū, bakūyūshimīza gītī babboku, kūlwa nguno ya kūng'wītīla shibi ū SEEBA. A mininga gabo gakwitagūlwa gītī lūbuubu, ū būla wabo gītī maashi.

18Ī hela nī zahabu jabo jitūdūla kūbapīja ū mu lūshikū lwa būpelanu bo ng'wa SEEBA. Ī sī yose īkūkenaagūlwa mu būdaki wa būpelanu bokwe, nguno akūbisanganīja a bikaji ba mu sī abamale pye a bose.

Jump to: Chapter 2 →