Zephaniah 3

Sukuma 2019

← Chapter 2 Jump to:

1Gūlī mu kwihīga ū nzengo gwa biboneeji, nzengo ngomi na nsoso!

2Gūtang'wigwaga ose ose, gūlemile kwanukūla būhūgūji. Gūtansanije ū SEEBA, hangī gūtang'wegeelaga Mulungu waago.

3A batongeeji baamo babange shimba jikūhīītaga, a basugi baamo batikīlile na mhūūge mu makanza ga būjikū, ījo jitasaajaga na shipolo sha ha ntondo.

4A bahangi baamo bikumīlīja; bijomboki ba banhū. A bagabīji baamo bakalīsosohajaga Ī lipandī lyeela, nī shilagīlo bakashikenaagūlaga.

5Alīyo ū SEEBA ūyo al'ū mu nzengo gwenūyo ng'wene ntūngīlīja; atītaga mhayo gūhūbīlile. Ntondo na ntondo akalamulaga mu būtūngīlīja, na būlī lūshikū ūlo lūliza atalebaga mu mhayo gose gose, alīyo abo batī batūngīlīja batamanile kūcha soni.

6Nayagaja mahanga gūjimīīla, na ng'hambī jabo ja bashilikale jūseesagūlwa. A banhū babo naabamala, nose a mapanda gabo galī dalali, ndūhū wa kūyeela yeela mo. Ī mizengo yabo yakenaagūlwa wagaya wa kūsaaga mo, ndūhū nūūlū wa ngota.

7Nakagūwīla ū nzengo gīkī, “Ng'hana ū bebe ūkūbiza na logohano ū kūlī nene, ūkūzunya nū kūganikīlwa.” A henaho ū wikalo bokwe ni būtakenaagūlilwe, nī misango yane ī yose n'ītampandīkile. Alīyo baalī bataalī bayegelile būbi mu yose īyo bīītaga.

8Alilūūlū nilindīīlagi, alīhaya SEEBA, lūlindagi ū lūshikū ūlo nakwīmīīla kwīyoolecha ī ng'hana. Naafunije būlamuji bo kūgabilinga a mahanga, nagabilinge a mabūtemi nagītīīle būpelanu bone; pye gete ū būdaki bo būpelanu bone. Ī sī pyī ī yose īkūnogotejiwa moto gwa būdaki kūlwa wilu bone.

9Hūna nakwīyeeja ī milomo ya banhū, bose pye badūle kūlitana ī lina lyang'wa SEEBA, bayūntūmamīla mu būsangī būmò.

10A balamya bane bakwiza kūfuma kū myongo ya Kushi, a banhū bane abo basambaalile bakūnenhela shitambò.

11Ū mu lūshikū lwenūlo ūtūgooka kūlwa būbi pye ūbo wanīītīla, nguno nakūbīnja ū mu nzengo abo bakayegelaga mu wikumīlīja wabo. Ūtūbiza ng'wikumīlīja hangī ū mu lūgūlū lwane lwela.

12Alīyo nakūkūlekela a balyehu na a bidoohya, abo balīsanije lina lya ng'wa SEEBA.

13A ba būshiigo wa Baisilaeli batīta ī yabūbi; batūyomba ya būlomolomo, nūūlū ū būlemba lembi būtigela hangī ū mu milomo yabo. Bakūyūlya baalaala, na atilonga wa kūbogohya.

14Bebe Sayuni īmbaga; Ee Isilaeli, tūlaga lūpūndū! Ee Yelusalemu, yegaga ūzalabane na ng'holò yako yose!

15Ū SEEBA wakwīngīgije ū nsango gwako, wamponije kū numa ū ng'wanishi wako. Ū SEEBA, ū Ntemi wa Isilaeli, alī hamò nang'ho; ūtalogoha mayanga hangī.

16Ū mu lūshikū lwenūlo bakwīwīla Ī Yelusalemu gīkī, “Bebe Sayni ūtogohage; yaya ū kūgalekanīja a makono gako ganogoleke.

17Ū Seeba Mulungu wako alī hamò nang'ho, alī nabo ū būdūla wa kūpīja. Akūkūyegela no ū bebe, akūkūkongoola na būtogwa bokwe, akūkūyegela no na kwīmba kūlwa nguno yako.”

18Nakūwīnja ū būpīna wako ū mu makanza ga shigukulu; nguno ū gwenūyo nigo ndito ū kūlī bebe, hangī gūkakwenhelaga ibengwe.

19Abo baakūluhyaga nakūbadīlīla ū ng'wikanza lyenīlo; a balemehazu nakūbapīja, abo basambaalile nakūbabilinga. Nakūbinha ikūjo bayūkumīlījiwa ū mu sī jose ījo bibengelejiagwa.

20Ū ng'wikanza lyenīlo nakūmubilinga; ū ng'wikanza lyenīlo nakūmushosha kaya. Mukūbona naamushokeja ī mbango jing'we hangī, nūng'winha n'ikūjo muyūkumīlījiwa mu banhū ba mu sī jose, alīhaya SEEBA.

← Chapter 2 Jump to: