Zephaniah 2

Sukuma 2019

← Chapter 1 Jump to: Chapter 3 →

1Bing'we ihanga lītī na minala, ibilingagi, alichene, ibilingagi;

2aho lītaalī kūshika ī likanza, nū lūshikū lwa kūmuheheeja gītī meela lūtaalī kwiza, aho būdaki būtaale bo ng'wa SEEBA būtaalī kūng'wikīīla, aho lūshikū lo būpelanu bo ng'wa SEEBA lūtaalī kūmusanga.

3Nkoobagi SEEBA bing'we bidoohya abo mulī mu sī, bing'we abo mulī bashikīlīja ba mihayo īyo ayīlagīlile we. Būkoobagi ū būtūngīlīja, nū widoohya būkoobagi; hamo mukūpandīka būpeelelo ū mu lūshikū lo būpelanu bo ng'wa SEEBA.

4Ī Gaza īkūpeelwa, ī Ashikeloni īkūlekelwa misaka yike. Ī Ashidodi īkūsaamiwa līīmi lūgala, nī Ekuloni īkwīnjiwa.

5Mulī mu kwihaga a bing'we bikaji ba mu sī ja mbalama ya nyanza, a bing'we Bakeleti. Ee Kanaani, bebe sī ya Bafilisiti, ū mhayo go ng'wa SEEBA gūlī na wilwisha nang'ho. Nakūkūkenaagūla na ūtūlekeelelwa nūūlū ūmò wa kwikala ū mulī bebe.

6Ī sī ya kū mbalama ya nyanza, ū kū wikalo wa Bakeleti īkūbiza madīīmīlo ga ng'holo na ha kūzenga numba ja ng'holo.

7Īkūbiza sī ya būshiigo wa banhū ba Yuda; bakūyūpandīkīla ng'wenūmo a madīīmīlo gabo. Ī būjikū bakūyūlaala mu numba ja Ashikeloni. Ū SEEBA Mulungu wabo hū ng'wene akūbalang'hana, akūbashokeja ī jabo.

8Naawigwile ū būdūkani wa Bamoabu, nū būsondagūji wa Baamoni, abo bakūbadūkagūlaga a banhū bane, kūnū bikumīlīgīja sī yabo.

9Alilūūlū, ū SEEBA wa Būdūla bose, ū Mulungu wa Isilaeli alīhaya gīkī, “Ūmo nene nalī mpaga, ng'hana gete ī Moabu īkūbiza gītī Sodoma, Ī Amoni īkwikolanījiwa na Gomola, ī sī jenījo jikookala yīnza, gakūbiza mapandī ga machongo ga munhu, jikūgaya mo shose shose ilalī. A banhū bane abo balasaagīīle bakūshisola ī shikolo shaamo; a b'ihanga lyane abo bakūpīla Īkūbiza sī ya wingīji wabo.”

10H'ī mheela īyo bakūpandīka kūlwa wigīmba gīmbi wabo, kūlwa kūbadūka na kūbasondagūla banhū ba ng'wa SEEBA wa Būdūla bose.

11Ū SEEBA ūlū ūbakenaagūla pye a bamulungu babo ū mu sī, akūbiza wa lyogohya no ū kūbo. A mahanga a gose gakūnamya we, būlī lyene hose hose ū mu sī yalyo.

12Na a bing'we bana Kushi, līkūmumala ī līlūshū lyane.

13Nī sukuma akwīgoloolela nkono gwakwe, akwīkenaagūla ī Ashulu; ī Ninawi ayīleke mu makambagūkīle, hangī nyūūmu no kūlū kūlū gīt'itogolo ikalamuku.

14Madaale ga ng'holo na ga ng'ombe gakūyūtūūgīja mo, na shiseeng'wa sha būlī mbika. Lūbundaaji na ging'hi ja kūhiimīla jikūyūteelela ū mu mabīndo gaamo. Jikūyūhiimīla jikwiyinhīlījaga ū mu madilisha, a ha milyango gakookala matūūgo ga mapalala, ī migamba ya mikoola īkūtendwa hape.

15Ū gwenūyū h'ū nzengo ūyo gwalī gūtadīlīīlaga, ūyo gwalī mu kikalīle ka mhola gwa. Gwikumīlījaga gūkwihayaga, “Ū nene hū nalī nene, atīho ūngī ūlū natī nene.” Al'ī haha gwasakaalile no, gaabizile mapagale gike, būhooyelo bo mashiinū! Pye abo bakūbītīlaga ho balīyūgwineenelegeja kūnū bakūgūponanjagījaga makono.

← Chapter 1 Jump to: Chapter 3 →