1 Corinthians 5

Shekhawati

← Chapter 4 Jump to: Chapter 6 →

1मेरै सुणबा म आयो ह क थारै मांय कुकरम फेलर्यो ह अर अंय्यां का कुकरम तो परमेसरनै नइ ध्यारबाळा मिनख बी कोनी करै। अर कई तो आपकी सोतेली माँ क सागैई काळो मुंडो करै ह।

2अर थे अंय्यां कर गुमान म फूलर्या हो जदकी थानै दुखी होणो चाए। अर थानै अंय्यां करबो चाए की जखो मिनख अंय्यां को काम करै ह बिनै थारूँ न्यारो कर देणो चाए।

3म कायाऊँ तो थारै कनै कोनी पण आत्माऊँ तो थारै कनैई रेह्ऊँ हूँ। अर इ बजेऊँ म अठैऊँई मेरो फेसलो बुरा मिनखा ताँई सुणा दिओ।

4जद थे परबु ईसु की सक्‍ति क सागै बिका नाम म भेळा होस्यो जणा मेरी काया को तो बेरो कोनी पण मेरी आत्मा बठै होसी।

5जणा बि बुराई करबाळा मिनख की कायानै नास करबा ताँई सेतान क हात सूप दिओ जासी जिऊँ परबु क ओज्यु आबा का दिन बिकी आत्मा को छुटकारो हो सकै।

6थारो गुमान करबो चोखो कोनी ह। अर थे आ खेबत तो सुण्याई हो क, “चिनोसोक खमिर सगळा गुंदेड़ा आटानै खमिर बणा देवै ह।”

7इ ताँई थे थारै मांयनैऊँ पुराणा खमिरनै जखी बुरी बाता हीं बारनै बगाद्‍यो अर खुदनै पबितर करो जिऊँ थे चोखो ताजा गुंदेड़ो आटो बण सको। पण थे तो बिना खमिर हाळी फसै की रोटी की जंय्यां हो। अर आपानै पबितर करबा ताँई ईसु मसीनै फसै की जंय्यां बलि कर चढायो गयो हो।

8इ ताँई आओ आपा फसै को त्युंहार बुरी बाता अर पुराणा पाप हाळी खमिर की रोटी क सागै नइ पण खराई अर सचाईऊँ जखी बिना खमिर की रोटी जंय्यां ह मनावां।

9अर म थानै मेरा गेलड़ा कागद म मांड्यो हो क थे कुकरमीयाऊँ कोई नातो मना राखज्यो।

10अर मेरो खेबा को ओ मतबल बि कोनी हो क थे इ दुनिया का कुकरम करबाळाऊँ, लालच्याऊँ, ठगाऊँ, मूरतीपुजबाळाऊँ कोई नातो मना राखज्यो। ज थे अंय्यां करस्योक जणा तो थानै इ जगत का मिनखाऊँ न्यारो रेह्णो पड़सी।

11पण मेरो अंय्यां मांडबा को ओ मतबल ह क थे अंय्यां का मिनखाऊँ नातो मना राखज्यो जखा देख दिखाई का बिस्वासी भाई बणी हीं पण बे कुकरमी, लालची, मूरतीपुजबाळा, गाळीगळोच करबाळा, पियाचरी करबाळा अर ठग हीं। अंय्यां का मिनखा क सागै उठा-बेठी मना राखज्यो।

12अर जखा अबिस्वासी हीं बा मिनखा को न्याय म क्युं करूं? बिस्वासी मंडळी का को न्याय थानैई करबो चाए।

13जखा अबिस्वासी हीं बाको न्याय तो परमेसरई करसी। अर सास्तर म जंय्यां मंडर्यो ह क “थे थारै मांयनैऊँ बुरा मिनखनै निकाळ द्‍यो।”

← Chapter 4 Jump to: Chapter 6 →