1 Corinthians 7

Shekhawati

1थे मनै मांडी ही क, के ओ चोखो ह क मिनख ब्या नइ करै?

2इ बात क बाबत म खेबो चाऊँ हूँ, कुकरमऊँ बचबा ताँई सगळा मोट्यारा की खुद-खुदकी लूगाई होणी चाए, अर सगळी लूगाया क मोट्यार होणा चाए।

3मोट्यारनै आपकी लूगाई की इंछ्या स्यांत करनी चाए; अर बंय्यांई लूगाईनै मोट्यार की इंछ्या स्यांत करनी चाए।

4लूगाईनैई आपकी काया प हक कोनी पण बिका मोट्यार को बी बिकी काया प हक ह; अर बंय्यांई मोट्यारनैई कोनी पण बिकी लूगाई को बी बिकी काया प हक ह।

5थे मोट्यार लूगाई एक दुसरा की इंछ्या मना मारज्यो। पण आपसरी म बतळार क्युंक देर ताँई इनै टाळ सको हो जिऊँ थारै अरदास करबा म दिकत नइ होवै, अर इकै पाछै थे ओज्यु एक सागै रह्यो; क्युं क कदै अंय्यां नइ हो क खुदनै बस म राखबा की कमी को फाईदो उठार सेतान थानै बिचासै।

6अर म आ बात मेरै कानिऊँ खेऊँ हूँ पण ओ हुकम कोनी ह।

7अर म अंय्यां चाऊँ हूँ क सगळा मिनख मेरी जंय्यांई बिना ब्या क रेह्ता। पण एक कनै एक बरदान ह जणा दुसरा कनै दुसरो। अंय्यां सगळा मिनखानै परमेसर कानिऊँ न्यारो-न्यारो बरदान मिलेड़ो ह।

8अर इब म बानै जाको ब्या कोनी होयो अर जाको मोट्यार लूगाई मरेड़ो ह बानै खेऊँ हूँ क बा ताँई कतो बडिया ह क बे मेरी जंय्यां ब्या नइ करै।

9पण ज थे खुदनै बस म नइ राख सको जणा इऊँ चोखो तो ओ ह क थे ब्या करल्यो; क्युं क इ भूख म जळबाऊँ ब्या करबो घणो चोखो ह।

10अर इब म बानै आदेस देऊँ हूँ जखा ब्याईड़ा हीं, अर ओ मेरो आदेस कोनी पण परबु को हुकम ह क लूगाई आपका मोट्यारनै नइ छोडै

11अर ज बा आपका मोट्यारनै छोड बी देवै जणा बिनै दुसरो ब्या नइ करबो चाए अर हो सकै तो बिनै ओज्यु आपका मोट्यार क सागै मेळमिलाप करलेणो चाए। अर अंय्यांई मोट्यारनै बी आपकी लूगाईनै नइ छोडणो चाए।

12अर इब आकै अलावा जखा मिनख रेह्गा बानै परबु कोनी पण म खेऊँ हूँ, ज कोई बिस्वासी भाईड़ा क लूगाई होवै अर बा बिस्वास कोनी करै पण बिकै सागै रेह्बा ताँई राजी ह जणा बो मिनख आपकी लूगाईनै नइ छोडै।

13अर अंय्यांई ज कोई लूगाई को मोट्यार बी बिस्वास कोनी करै पण बो बिकै सागै रेह्बा म राजी रेह्‍वै जणा बा लूगाई बी आपका मोट्यारनै नइ छोडै।

14क्युं क बो बिस्वास कोनी करबाळो मोट्यार आपकी बिस्वासी लूगाई क सागै रेह्बाऊँ परमेसर की नजर्या म भाबाळो होज्यावै ह अर अंय्यांई अबिस्वासी लूगाई आपका बिस्वासी मोट्यार क सागै रेह्बाऊँ परमेसर की नजर्या म भाबाळी होज्यावै ह। अर ज थे अंय्यां कोनी करो जणा थारा बेटा-बेटी बी असुद होसी पण अंय्यां करबाऊँ बे परमेसर की नजर्या म पबितर होसी।

15अर इकै पाछै बी कोई बिस्वास नइ करबाळा मोट्यार लूगाई न्यारो होबो चावै जणा बो न्यारो हो सकै ह। क्युं क अंय्यां की बाता प मसी मोट्यार लूगाई अजाद हीं। क्युं क परमेसर आपानै सुक-स्यांतीऊँ रेह्बा ताँई बुलायो ह।

16ओ लूगायो थे जाणो हो के? थारै अंय्यां करबाऊँ काँई बेरो थे थारा अबिस्वासी मोट्यारानै बचाल्यो? ओ मोट्यारो थे जाणो हो के? थारै अंय्यां करबाऊँ काँई बेरो थे थारी अबिस्वासी लूगायानै बचाल्यो?

17परबु जिनै जंय्यां को बरदान दिओ ह अर जिनै जि रूप म टाळ्यो ह, बिनै चाए की बो बंय्यांई जीवै। अर म सगळी बिस्वासी मंडळ्यानै अंय्यांई सीखाऊँ हूँ।

18ज सुन्नत करवायड़ा मिनखनै परबु बुलावै जणा बिनै सुन्नत की सेलाणीनै नइ लुखाणो चाए। अर अंय्यांई बिना सुन्नतहाळा मिनखनै जद परबु बुलावै जणा बिनै सुन्नत कराबा की कोई जुर्त कोनी।

19क्युं क परमेसर का हुकमानै मानबा क अलावा नइ तो सुन्नत अर नइ सुन्नत नइ कराबो कोई माईनो राखै ह।

20सगळा मिनखानै बंय्यां रेह्बो चाए जंय्यां बिनै बुलायो गयो ह।

21तनै जद बुलायो गयो हो बी टेम का के तू दास हो? तू इकी चिंत्या मना करै। पण ज तू अजाद होबो चावै ह तो मोका को फाईदो उठा।

22क्युं क जि दासनै परबु बुलायो ह बो परबु को अजाद मिनख ह। अर अंय्यांई अजाद मिनखनै परबु बुलायो ह बो परबु ईसु मसी को दास ह।

23परबु थारो मोल देर थानै मोल लिआ ह। इ ताँई मिनखा का गुलाम मना बणो।

24ओ मेरा लाडला बिस्वास्यो, परमेसर की सोबत म रेह्‍वो पण थानै थारी बी दसाऊँ भागबा की जुर्त कोनी जिमै रेह्तासोता थानै बुलायो गयो हो।

25कुंआरी ताँई परबु क कानिऊँ मनै कोई हुकम कोनी मिल्या। इ ताँई म परबु की दयाऊँ अर बिस्वास जोगो होबा की बजेऊँ सला देऊँ हूँ।

26अर म सोचूँ हूँ क इ दुख की घड़ीनै देखता तो थारो बिना ब्या क रेह्बो चोखो ह।

27अर ज तेरै लूगाई ह तो बिऊँ न्यारो होबा की कोसिस मना करै, अर ज तेरै लूगाई कोनी तो बिनै ब्याबा की कोसिस मना करै।

28अर ज तू ब्या बी करै ह तो ओ पाप कोनी; अर ज कोई कुंआरी छोरी ब्याई जावै ह तो बा कोई पाप कोनी करै। पण ब्याईड़ा मिनखानै बोळी परेसानी होवै ह अर म आ परेसान्याऊँ थानै बचाबो चाऊँ हूँ।

29ओ मेरा लाडला बिस्वास्यो, म तो आई खेऊँ हूँ, क टेम बोळो कम ह। इ ताँई इबऊँ जिकै लूगाई ह बो अंय्यां रेह्‍वै जंय्यां बिकै लूगाई आथई कोनी।

30अर जखा बिलखै ह बे अंय्यां रेह्‍वै जंय्यां बे कदै दुखीई कोनी होया। अर जखा राजी हीं बे अंय्यां रेह्‍वै क बे कदै राजीई कोनी रिह्या। अर जखा चिज मोल लेवीं हीं बे अंय्यां रेह्‍वै क बाकन क्युंई कोनी।

31अर जखा इ दुनिया की चिजा का मजा लेर्या हीं, बे अंय्यां रेह्‍वै क बे चिजा बाकै काम की कोनी। क्युं क इ दुनिया का रिती-रिवाज जाता रेह्सी।

32अर म चाऊँ हूँ क थे चिंत्या मना करज्यो। क्युं क एक कुंआरो मिनख परबु क बारां म सोचतो रेह्‍वै ह क परबुनै कंय्यांसिक राजी करूं।

33अर एक ब्याईड़ो मिनख दुनिया म ही मगन रेह्‍वै अर आ सोचतो रेह्‍वै ह क खुदकी लूगाईनै कंय्यांसिक राजी राखूँ।

34अर अंय्यां करबाऊँ बिको जीवन दो हिस्सा म बट जावै ह। अर अंय्यांई कुंआरी छोरी क सागै ह। एक कुंआरी छोरी परबु की चिंत्या म रेह्‍वै ह जिऊँ बा आत्मा म अर काया म पबितर हो सकै। पण एक ब्याईड़ी लूगाई इ दुनिया की बाता म मगन रेह्‍वै ह अर आ चावै ह क म मेरा मोट्यारनै कंय्यांसिक राजी राखूँ।

35अर म अ बाता थार प पाबंदि लगाबा ताँई कोनी बोलुँ हूँ पण थारी भलाई ताँई बोलुँ हूँ। जिऊँ थे इ दुनिया की चिंत्यानै छोडर परबु क हाता म रेह सको।

36अर ज कोई ओ सोचै की जिऊँ मेरी सगाई होईड़ी ह बा छोरी तो जुवान होगी ह अर म इऊँ ब्या नइ कर इको हक मार्यो हूँ जणा बो जंय्यां चावै ह बो बिकै सागै करै ओ पाप कोनी, अर बिनै बिकै सागै ब्या कर लेणो चाए ।

37पण जखो आपकै हिया म गांठ बांद राखी हो अर जिपै खुदका मन को दबाव बी कोनी, अर बो आपकी इंछ्यानै बस म राख सकै अर बो आपका हिया म आ ध्यार राखी हो क म मेरी सगाई होईड़ीऊँ ब्या कोनी करूं जणा बो चोखो करै ह।

38इ ताँई जखो बी आपकी सगाई होईड़ीऊँ ब्या करै ह बो चोखो करै ह। पण जखो ब्या कोनी करै बो ओर बी चोखो करै ह।

39अर जद ताँई लूगाई को मोट्यार जीवै ह, बा ब्या का बंदण म बंदी रेह्‍वै ह। पण ज बिका मोट्यार की मोत होज्यावै जणा बा चावै बिकै सागै ब्या करबा ताँई अजाद ह पण परबु म।

40अर ज बा जंय्यां ह बंय्यांई रेह्‍वै जणा राजी रेह्सी। ओ मेरो बिचार ह अर म आ सोच्यो हूँ क मेरै मांयनै बी परमेसर की पबितर आत्मा को बास ह।

← Chapter 6 Jump to: Chapter 8 →