Acts 12

Shekhawati

← Chapter 11 Jump to: Chapter 13 →

1बि टेम को राजा हेरोद बिस्वासी मंडळी का क्युंक मिनखानै सताबो चालू कर दिओ।

2बो यहून्ना का भाई याकूबनै तलवारऊँ मरवा दिन्यो।

3अर आ देखर क अंय्यां करबाऊँ यहूदि मिनख राजी होवीं हीं जणा बो पतरसनै बी पकड़ाबा की मन म करी, अर बे बिना खमिर की रोटी खाबाळा त्युंहार का दिन हा।

4अर बो बिनै पकड़र कोठड़ी म बंद करवार बिपै च्यार-च्यार सिपाईड़ा का च्यार पेरा बिठा दिओ, अर मन म करी की फसै का त्युंहार क पाछै बिनै मिनखा क सामै ल्यावै।

5अर जद पतरस कोठड़ी म बंद हो बि टेम सगळी बिस्वासी मंडळी बि ताँई पूरा मनऊँ परमेसरऊँ अरदास करबा लागरी ही।

6जद हेरोद पतरस प मुकदमो चलाबा ताँई बिनै ल्याबाळो हो, बि रात पतरस दो साँकळाऊँ बांदेड़ो दो सिपाईड़ा क बिच म सुत्यो हो। अर कोठड़ी क बारना प रूखाळा पेरो देर्या हा।

7अर बठै चाणचुकई के होयो क परबु को एक ईस्बर नगरी दुत बि कोठड़ी म परगट होयो। जिऊँ बि कोठड़ी म जोरको च्यानणो होगो अर बो पतरस की पासड़्या प हात धर बिनै जगार बोल्यो, “बेगोसो खड़्यो हो।” अत्ता मई बिकै हातऊँ साँकळा खुलर पड़गी।

8अर ईस्बर नगरी दुत बिऊँ बोल्यो, “तेरो कोटियो, कमर पट्टो बां'दर जुती पेरले अर फटाफट त्यार होज्या।” जणा पतरस बिकै कह्या गेल हात्युहात त्यार होगो जणा पाछै बो बिनै आपकै गेल आबा ताँई बोल्यो।

9अर बो बिकै गेल होगो पण बो आ कोनी समज सक्यो क ओ जोक्यु बो परबु को ईस्बर नगरी दुत करर्यो हो बो सच ह के? बिकै भाऊँ तो ओ एक दरसावई हो।

10बे पेला अर दुसरा पेराऊँ निकळर लौ का बारना क कनै पुग्या जखो नगरी म खुलतो हो। बि बारना को दरूजो बा ताँई मतैई खुलगो, अर बे बठैऊँ एक गळी मांयकी गया, इकै पाछै ईस्बर नगरी दुत बिनै छोडर चलेगो।

11जणा जार पतरस चेता म आयो अर आपका मुंडाऊँ बोल्यो, “इब म जाणगो क सचमई परबु ईस्बर नगरी दुतनै भेजर मनै हेरोद क हातऊँ छुटा लिओ अर यहूदि मिनखा की सगळी मनस्या प पाणी फेर दिओ।”

12आ जा'णर बो यहून्ना जिनै मरकुस बोलै ह बिकी माँ मरीयम क घरा आयो, बठै पेल्याऊँई बोळासारा मिनख भेळा होर अरदास करबा लागर्या हा।

13बिकै कुआड़ खुड़काबा प रूदे नाम की एक दासी बारना प आई।

14पतरस की उवाज पिछाणर बा कुआड़ तो खोली कोनी पण राजी होर पेली मांयनै गई अर सगळानै खे सुणाई क पतरस बारना म खड़्यो ह।

15बे बिऊँ कह्या, “तू बावळी तो कोनी होगी ह? ओ कंय्यां हो सकै ह।” पण बा तो आपकी बात प अड़ी री जणा जार बे कह्या, “हो सकै ह क ओ बिको ईस्बर नगरी दुत होगो।”

16अर बठिनै पतरस कुआड़ खुड़कातो रिह्यो जणा बे कुआड़ खोल्या अर बिनै सामै देखर सुन्ना होगा।

17जणा बो मुंडा प आँगळी धर बानै इसारो कर्यो क चुप रेह्‍वै अर बो बानै बे सगळी बाता बताई क परबु कंय्यां बिनै जेळऊँ अजाद कर्यो। अर ओ ओडार क, “याकूब अर दुसरा भाई-भाणानै बी आ बात बता दिज्यो,” बो बठैऊँ दुसरी झघा चलेगो।

18दिन उगताई बा सिपाईड़ा क घालामेली लागगी क पतरस को काँई होयो बो कठै चलेगो।

19हेरोद बिकी खोज करवाई पण बो बिकै हात कोनी लाग्यो, जणा बो बा रूखाळानै बुलाया अर बाऊँ पुछाताछी कर बानै मारबा को हुकम काड्या। अर हेरोद यहूदिआनै छोडर कैसरिया म जार क्युंक दिना ताँई बसगो।

20हेरोद सूर अर सैदा म रेह्बाळा मिनखाऊँ नराज हो जि बजेऊँ बे सगळा मिलर बलास्तूस जखो राजा की राण्या की देखभाळ करबाळो खास करमचारी हो। बिनै बुलार बिऊँ सुळजेटो करबो चायो क्युं क राजा क देसऊँई बाका देस म खाबाळो समान भेज्यो जातो हो।

21एक दिन हेरोद राजा हाळी पोसाक धारण कर न्यायहाळा सिंघासन प बेठर जनतानै भासण देबा लागर्यो हो।

22जणा बिकी सुणर लोग जोरऊँ बोलबा लाग्या क, “आ बाणी तो कोई देवता की ह मिनख की तो आथ कोनी।”

23बि टेमई परबु को ईस्बर नगरी दुत बिनै मार्यो क्युं क बो परमेसरनै मेमा कोनी दि। अर बिकी काया म किड़ा पड़्या अर बिनै खाबा लाग्या जिऊँ बो मरगो।

24पण परमेसर को बचन फेलतो अर बढतो गयो।

25बरनाबास अर साऊल यरूसलेम म आपको काम खतम कर यहून्नानै जिनै मरकुस खेता हा आपकै सागै अंताकीया लेर आया।

← Chapter 11 Jump to: Chapter 13 →