Luke 22 — Shekhawati

10जणा बो बोल्यो, “थे जंय्यांई नगरी म बड़स्यो बंय्यांई थानै एक आदमी पाणी को घड़ो लिआ मिलसी थे तो बिकै गेल-गेल होज्याज्यो अर जि घर म बो जावै थे बी, बि घर म बड़ ज्यायो।

11अर बि घर का धणीऊँ बोलज्यो, ‘गरूजी आ बुजबा भेज्या हीं क बा बेठख कठै ह जठै म मेरा चेला क सागै फसै की रोटी खास्युं?’

12जणा बो आदमी थानै बडोसारो जच्यो-जचाईड़ो चोबारो दिखासी। थे दोन्यु बठैई सक्यु त्यार करज्यो।”

13जणा बे चलेग्या अर जंय्यां बानै बोल्यो गयो हो बंय्यांई सक्यु मिल्यो जणा बे फसै की रोटी बणाई।

14जद बा घड़ी आई जणा ईसु आपका बा चेला क सागै रोटी खाबा बेठ्यो जखा भेजेड़ा चेला खुवाता हा।

15अर बो बाऊँ बोल्यो, “पिड़ा भोगबाऊँ पेली म चाऊँ हूँ क म थारै सागै फसै की रोटी खाऊँ।

16क्युं क जद ताँई परमेसर का राज म इ रोटी को मतबल पूरो नइ होज्या आज क पाछै बि दिन ताँई म ओज्यु आ रोटी कोनी खास्युं।”

17जणा बो कचोळो लेर अरदास करीं अर बोल्यो, “ल्यो इनै आपसरी म बाट ल्यो।

18क्युं क आजऊँ लेर जद ताँई परमेसर को राज नइ आज्यावै बि दिन ताँई म ओज्यु आ अँगूरी कोनी पीऊँ।”

19इकै पाछै बो रोटी लेर अरदास करी अर बिका टुकड़ा कर बानै देर बोल्यो, “ल्यो आ मेरी काया ह जखी थारै ताँई दि गई ह मेरी याद म अंय्यांई करज्यो।”

20अंय्यांई रोटी खाबा क पाछै बो कचोळो लेर बानै बोल्यो, “ल्यो ओ कचोळो मेरा लोयऊँ करेड़ा नया करार की निसाणी ह। जखो थारै ताँई बहायो जार्यो ह।

21पण मनै पकड़ाबाळो मेरै सागैई खाबा लागर्यो ह।

22मिनख का बेटानै तो मरनोई ह जंय्यां की परमेसर ते कर्यो ह। पण हाय बि मिनख प जखो बिनै पकड़ासी।”

23इ बात प बे एक दुसराऊँ बुजबा लाग्या, “आपणा मऊँ बो कूणसो ह जखो अंय्यां करसी।”

24चेला म इ बात प खिचा-ताणी होई क बामै कूणसो बडो मान्यो जावै।

25ईसु बोल्यो, “परमेसरनै नइ ध्यारबाळा राजा आपकी परजा प हक जमावीं। अर राज करबाळा मिनखा का भाईला खुवावीं।

26पण थे अंय्यां का कोनी, इकै बदलै थारै मऊँ जखो बडो ह बो छोटा की जंय्यां अर परधान ह बो दास की जंय्यां बणज्यो।

27बडो कूण? जखो खाबा ताँई चोकी प बेठ्यो ह, नहिस परूसगारो? के बो कोनी जखो खाबा बेठ्यो ह, पण म तो थारै मांयनै परूसगारा की जंय्यां हूँ।

28पण थे बे हो जखा मेरा दुख म सदाई मेरै सागै रिह्या हो।

29राज करबा ताँई म थानै बो हक देर्यो हूँ जखो मेरा परम-पिताऊँ मनै मिलेड़ो ह।

30क्युं क मेरा राज म थे मेरी चोकी प खाई-पी करस्यो अर राजगद्‍या प बेठर इजरायल का बारा गोता को न्याय करस्यो।”

31ईसु पतरसऊँ बोल्यो, “समोन ओ समोन! मेरी बात सुण! जंय्यां एक किसान ग्युंनै फटकार बिनै तुड़ीऊँ न्यारो करै ह। बंय्यांई थानै सगळानै बिचासबा की हामी सेतान ले लिओ ह।

32पण म तेरै ताँई परमेसरऊँ अरदास करी ह की तेरो बिस्वास बण्यो रेह्‍वै अर जद तू पाछो जीवन का गेला प आवै जणा तेरा भाई-भाणानै बिस्वास म पक्को करजे।”

33पतरस बोल्यो, “परबु म तेरै सागै जेळ जाबा अर मरबानै बी त्यार हूँ।”

34जणा ईसु बोल्यो, “मेरी बात सुण जद ताँई तू तीन बार मेरै ताँई कोनी नट देसी आज मुरगो बांग कोनी देसी।”

35इकै पाछै बो आपका चेलाऊँ बुज्यो, “म जद थानै बिना बटूआ, झोळा अर चपल्या क भेज्यो जणा थानै क्युं चिज की कमी पड़ी ही के?” बे कह्या, “ख्याकीई कमी कोनी होई।”

36पण इब म बोलुँ हूँ, “जिकनै बटूओ ह बो बिनै लेले अर अंय्यांई झोळो अर जिकै कनै तलवार कोनी बो आपका गाबा बेचर बिनै मोल लेले।

37क्युं क सास्तर म मंडेड़ी बाता मेरै ताँई पूरी होसी क बो अपराद्‍या म गिण्यो जासी अ मंडेड़ी बाता पूरी होबा जारी ह।”

38चेला कह्या, “परबु आ देखो अठै दो तलवार पड़ी ह।” इपै बो बोल्यो, “अ तो बोळी।”

39ईसु नगरीनै छोडर आपकी बाण गेल जेतून का डूँगरपै चलेगो। अर चेला बिकै गेल-गेल,

40बठै पुग्या पाछै बो बाऊँ बोल्यो, “अरदास करो की थे बिचास्या नइ जाओ।”

41जत्ती दूर भाठो बगायो जा सकै ह बो बेत्ती दूर बाऊँ न्यारो जार गोडा क पाण बेठर अरदास करबा लागगो,

42“परम-पिता ज थे चाओ तो इ दुख का कचोळाऊँ मनै बचा सको हो, पण मेरी नइ थारी इंछ्या पूरी होणी चाए।”

43जणा बठै बिकै सामै एक ईस्बर नगरी दुत परगट होयो अर बिनै हिमत बंधायो।

44अर बो बोळो दुखी होर ओर बी बेत्ती लगन क सागै अरदास करबा लाग्यो। अर बिको पसिनो लोय का टपका की जंय्यां धरती प गिरै हो।

45अर जद बो अरदासऊँ उठर आपका चेला कनै गयो जणा बे बिनै दुख क मार्या आखता होर सुत्या लाध्या।

46जणा बो बानै बोल्यो, “सोर्या क्याले हो खड़्या होर अरदास म लागज्याओ जिऊँ थे बिचास्या नइ जाओ।”

47बो हाल बोलर्योई हो, क बठै भीड़ भेळी होगी अर बि भीड़ क आगै-आगै यहूदा होर्यो जखो बा बारा चेला मऊँ एक हो। बो ईसु कनै आर बिको माखो ले लिओ।

48पण ईसु बिनै बोल्यो, “यहूदा मेरो माखो लेर के तू मिनख का बेटानै धोकाऊँ पकड़ावै ह?”

49जणा बिका चेला आ भापर की आगै काँई होबाळो हो कह्या परबु म्हें तलवार काडल्याँ के?

50अर बामैऊँ एक आपकी तलवार काड म्हायाजक का दास को दाइणो कान काट दिओ।

51इपै ईसु बोल्यो, “बस चुपचाल्या रेह्‍वो!” अर बो बिका कान क हात अड़ार बिनै ओज्यु जोप दिओ।

52जणा पाछै बो बिपै चढाई करबा आया परधान याजक, मनदर का सिपाईड़ा का अधिकारी अर यहूदि नेताऊँ बोल्यो, “म डाकू हूँ के? जखो थे तलवार अर लाठी लेर मेर कनै आया हो।

53जद म रोजकी थारै सागै मनदर म रेह्तो हो बि टेम तो थे मेर प हात कोनी घाल्यो। पण आज थारो टेम ह जिपै अँधकार की ताकत को हक ह।”

54इकै पाछै बे बिनै पकड़र म्हायाजक क घरा लेग्या। अर पतरस छापळतो छापळतो बाकै गेल होर्यो हो।

55याजक हाळी गुवाड़ी क बिचमै जार बे आग सूलगाई अर जखा आग क च्यारूमेर बेठ्या हा बाकै सागै पतरस बी बेठगो।

56जणा एक दासी बिनै आग का च्यानणा म पिछाणर बोली, “ओ आदमी बी तो ईसु क सागैई हो।”

57पण पतरस नटतो नटतो बोल्यो, “ए स्याणी म बिनै कोनी जाणू।”

58चिनेक देर पाछै एक ओर मिनख पतरसनै देखर बोल्यो, “तू बी तो बामैऊँई ह।” पण इबकै बी पतरस बोल्यो, “अरै भला मानस म बो कोनी।”

59अर घंटा भर पाछै एक जणो ओर जोर देर बोल्यो, “ओ तो साच्याई बामैऊँई ह। क्युं क ओ बी गलिली ह।”

60पण पतरस बोल्यो, “भला मानस मेरै क्युंई पलै कोनी पड़री, थे की ताँई बोलर्या हो।” बो आ खेर्योई हो क मुरगो बांग दि।

61जणा ईसु बिनै आपकी नाड़ घूमार देख्यो। अर देख ताँई पतरसनै परबु की बोलेड़ी बात याद आगी क, “आज मुरगा क बांग देबाऊँ पेली तू मेरै ताँई तीन बार नटसी।”

62जणा बो बारनै आर बुर्या रोबा लागगो।

63जखा ईसुनै पकड़ राख्या हा बे बिको मजाक उडाबा अर पिटबा लागगा।

64बे बिकी आँख्या प पटी बांद दि अर कह्या, “बूजा काड क तनै कूण मारै ह?”

65अर बे बिको निरादर करबा ताँई ओर बी बोळी बाता बोली।

66दिन उगताई यहूदि नेता, परधान याजक अर सास्तरनै सीखाबाळा भेळा होया अर ईसुनै बी पंचायत म पेस कर्यो गयो।

67अर बिऊँ सुवाल कर्यो, “तू मसी ह के?” ईसु बोल्यो, “ज म बोलुँ जणा थे मेरो बिस्वास कोनी करस्यो।

68अर ज म थानै बुजूँ जणा थे जुबाब कोनी देस्यो।

69पण इबऊँई मिनख को बेटो परम-परधान परमेसर क दाया हात कानि बेठसी।”

70बे सगळा कह्या, “जणा के तू परमेसर को बेटो ह?” ईसु बोल्यो, “जंय्यां की थे खुद खेर्या हो, क बो म हूँ।”

71जणा बे कह्या, “आपानै ओर सबूत की कोई जुर्त कोनी क्युं क आपा अ बात तो इकै मुंडाऊँई सुण लिआ हां।”