Titus 1

Shekhawati

Jump to: Chapter 2 →

1म ईसु मसीऊँ भेजेड़ो चेलो, परमेसर को दास पोलुस आ चिठी तितूस तनै मांडूँ हूँ। म परमेसर का टाळेड़ा मिनखानै बिस्वास म बढाबा भेज्यो गयो हूँ। जिऊँ बे सचनै जाणर पबितर जीवन जीवै।

2ओ सच अजर-अमर जीवन की आस बंधावै ह। जिको करार बिस्वास जोगो परमेसर जगत की सरूआतऊँ पेली कर दिओ हो।

3परमेसर को बचन सई टेम प परचार कर परगट कर्यो गयो। बोई समचार मनै सूप्यो गयो हो, अर आपानै बचाबाळा परमेसर का हुकमऊँ म इको हेलो पाड़ूँ हूँ।

4तितूस, आपणा एकसा बिस्वास की बजेऊँ, तू सचमई मेरो बेटो ह। परम-पिता परमेसर अर आपानै बचाबाळो मसी ईसु तेरै प दया अर स्यांती राखै।

5करेत टापू म, म तनै इ ताँई छोडर आयो हो क तू बठै की सगळी बचेड़ी बातानै सुदारै अर मेरी हिदायत गेल हर नगरी म बिस्वासी मंडळी का मुखियानै टाळर जिमेबारी सूपै।

6एक बडका म अ बाता होणी चाए क, बिमै कोई एब नइ हो, बिकै एकई लूगाई हो, बिका टाबर बिस्वासी, संस्कारी अर आज्ञा मानबाळा हो।

7परमेसर का कामनै आपका हाता म लेबाळा भंडारी ताँई ओ जरूरी ह क बिमै कोई एब नइ हो। बो घमंड करबाळो नइ होवै, नइ तावळोई ताव खाबाळो होवै, नइ दारूड़ो, नइ मारपीट करबाळो अर नइ पिसा को लालची।

8पण बो आवभगत करबाळो, भलाई चाबाळो, खुदनै बस म राखबाळो, पबितर, धरमी अर कायदा म रेह्बाळो होवै।

9बो बिस्वास जोगा परमेसर का समचार म मजबूती क सागै ठिक बंय्यांई बिस्वास करै जंय्यां क बिनै सीखायो गयो ह। जिऊँ क बो ओरानै बी सची सीखऊँ हिमत बंधा सकै। अर जखा सामै होवै बा मिनखा को मुंडो बंद कर बानै मनवा सकै क बे गळत हीं।

10क्युं क अठै सीर उठाबाळा, बकवास करबाळा अर धोको देबाळा बोळा मिनख हीं, खासकर बे जखा छुटकारा ताँई सुन्नत प जोर देवीं हीं।

11ओ जरूरी होगो ह क बाको मुंडो बंद कर्यो जाय। क्युं क बे पिसा कमाबा क चकरां म आपकी सीखऊँ घर-घरनै सई सीख प बिस्वास कोनी करबा दे।

12करेत टापू को रेह्बाळो बाकोई एक बडको खयो ह, “करेत का रेह्बाळा सदाई झूठ बोलै, अ जंगली ज्यानबर, आळसी अर पेटू हीं।”

13आकै बारां म इ आदमी की गुवाई सची ह, इ ताँई तू बानै दकालर समजा जिऊँ बे बिस्वास म मजबूत होवीं।

14अर यहूदि मिनखा की मनघड़ी क्हाण्या प अर बा मिनखा का आदेसा प ध्यान मना द्‍यो जखा सचाईनै कोनी मानै।

15पबितर मिनखा ताँई सक्यु सुद ह, पण असुद अर अबिस्वास्या ताँई क्युंई पबितर कोनी, क्युं क बाका मन अर बाकी अन्तर-आत्मा दोन्युई असुद करी गई ह।

16बे खेवै ह, क म्हें परमेसरनै जाणा हां, पण बाका करम इ जोगा कोनी। बे सूगला अर बात नइ मानबाळा अर चोखा काम करबा क जोगा कोनी।

Jump to: Chapter 2 →