Titus 2

Shekhawati

← Chapter 1 Jump to: Chapter 3 →

1तितूस तू बोई सीखा जखो सई ह।

2बूडा-ठेरानै हिदायत दे क बे सिदा-सादा, थ्यावस राखबाळा, खुदनै बस म राखबाळा लोगा म बुजहाळा, प्यार-परेम अर बिस्वास म मजबूत अर बरदास करबाळा हो।

3अंय्यांई बूडी-ठेरी लूगायानै बी सीखा क बे पबितर मिनखा की जंय्यां बरताव करबाळी हो। बे चुगली-चाळा करबाळी नइ हो अर नइ बामै पीबा की लत हो। पण बे चोखी सीख देबाळी हो।

4जिऊँ क बे जुवान लूगायानै बाका मोट्यार अर टाबरा-टिकराऊँ प्यार करबा, खुदनै बस म राखबा, खुदनै पबितर राखबा, मोट्यार क खया म चालबाळी अर घर बांदबाळी चोखी लूगाई बणबा की सीख दे। जिऊँ कोईबी परमेसरऊँ आबाळा संदेस क बारां म बुरा नइ बोलै।

6अंय्यांई तू जुवान छोरानै समजदारीऊँ जीबा ताँई समजा।

7तू खुद बोई कर जखो चोखो ह, जिऊँ दुसरानै बेरो पड़ै की बानै कंय्यां को बरताव करबो चाए। तू तेरी सीख म ईमानदार अर खरो बण्यो रेह।

8बोई बोल जिपै कोई आँगळी नइ उठा सकै, जिऊँ तेरा बेरी सरमिंदा होवीं अर बाकन आपानै बुरो बताबा की कोई बजै नइ होवै।

9दासानै सीखा क बे आपका मालिका की हर बातनै मानर बानै राजी राखै। बे बानै ओटो जुबाब नइ देवै,

10बे मालिक क घर म चोरी-चकारी नइ करीं, पण पूरी तर्या चोखा अर बिस्वास जोगा बण्या रेह्‍वै जिऊँ आपानै बचाबाळा परमेसर क बारां म जखो सीखायो गयो ह हर कोई बिको मान करै।

11क्युं क परमेसर सगळा मिनखा का छुटकारा ताँई दया दिखाई ह।

12आ दया सीखावै ह क आपा बि जीवननै जिमै परमेसर कोनी अर दुनियादारी की बुरी इंछ्यानै छोडर इ जुग म खुद क बस म रेह्बाळो, खराईऊँ भर्यो जीवन जीवां जिमै परमेसर ह,

13अर आपा जखी भागहाळी आस राखां हां बिकै पूरो होबानै उडिकां हां, जद आपणो म्हान परमेसर अर छुटकारो देबाळो ईसु मसी मेमा म परगट होसी।

14बो आपणा ताँई खुदकी ज्यान दे दिनी। जिऊँ बो आपानै सगळा पापऊँ बचावै अर आपानै सुद कर खुद ताँई अंय्यां का मिनख बणावै जखा भला काम करबा ताँई उतावळा रेह्‍वै।

15तू अ सगळी बाता अधिकार क सागै तेरा सुणबाळानै सीखा, जुर्त पड़ै तो बाकै दकाल लगा अर जुर्त पड़ै तो हिमत बंधा। कोईकै सामैई तनै निचो नइ देखणो पड़ै।

← Chapter 1 Jump to: Chapter 3 →