1 Corinthians 15

Tulu (ಪೊಸ ಒಡಂಬಡಿಕೆ)

1ಇತ್ತೆ ಸಹೋದ್ರೆರೇ, ಯಾನ್ ನಿಕ್ಲೆಗ್ ತೆರಿಪಾದಿ ಸುವಾರ್ತೆ ನಿಕ್ಲೆ ನೆನೆಪುಗು ಕನಬರ್ಪೆ; ನಿಕುಲು ಅವೆನ್ ಸ್ವೀಕಾರ ಮಲ್ತ್‌ದರ್, ಐಟ್ಟ್ ಉಂತುದರ್.

2ಯಾನ್ ಸಾರಿನ ಸುವಾರ್ತೆ ದೀವೊನಿಯರ್ಡ ನಿಕ್ಲೆಗ್ ರಕ್ಷಣೆ ಆವು. ಇಜ್ಜಾಂಡ ನಿಕ್ಲೆನ ನಂಬಿಕೆ ವ್ಯರ್ಥ ಆದ್ ಪೋವು.

3ಯಾನ್ ನಿಕ್ಲೆಗ್ ತೆರಿಪಾದಿನ ಸುರುತ್ತ ಸಂಗತಿಲೆಡ್ ಒಂಜಿ ಸಂಗತಿನ್ ನಿಕ್ಲೆಗ್ ಮುಖ್ಯವಾದ್ ತೆರಿಪಾದ್ ಕೊರಿಯೆ. ಅವು ಯಾನ್ಲಾ ಕಲ್ತೊಂದಿನವೇ. ಅವು ದಾನೆಂದ್ಂಡ ಶಾಸ್ತ್ರೊಡು ತೆರಿಪಾಯಿ ಲೆಕ್ಕನೇ ಕ್ರಿಸ್ತೆ ನಮ ಪಾಪೊಲೆಗಾದ್ ಸೈತೆ.

4ಆಯೆ ಕೌಂತುದಿನಾಯೆ ಆದ್ ಶಾಸ್ತ್ರದ ಪ್ರಕಾರನೇ ದೇವೆರ್ ಮೂಜನೇ ದಿನೊಟು ಸೈತಿನಾಕುಲೆಡ್ದ್ ಲಕ್ಕಾಯೆ.

5ಬೊಕ್ಕ ಪೇತ್ರಗ್, ಐಡ್ದ್ ಬೊಕ್ಕ ಪದ್ರಾಡ್ ಅಪೊಸ್ತಲೆರೆಗ್ ತೋಜಿಯೆ.

6ಐಡ್ದ್ ಬೊಕ್ಕ ಒಂಜೇ ಸರ್ತಿಗ್ ಐನೂದೆಡ್ದ್ ಹೆಚ್ಚ್ ಸಹೋದ್ರೆರೆಗ್ ತೋಜಿದ್ ಬತ್ತೆ. ಐಟ್ಟ್ ಹೆಚ್ಚಿನಾಕುಲು ಇನಿಕ್ಲಾ ಉಲ್ಲೆರ್; ಆಂಡ ಕೆಲೆವೆರ್ ಸೈತ್ ಪೋತೆರ್.

7ಬೊಕ್ಕ ಆಯೆ ಯಾಕೋಬುಗ್ಲಾ ಮಾತ ಅಪೊಸ್ತಲೆರೆಗ್ಲಾ ತೋಜಿದ್ ಬತ್ತೆ.

8ಕಡೆಕ್ಕ್ ಮಾತೆರೆಡ್ದ್ ದಿನ ದಿಂಜದೆ ಪುಟ್ಟಿನ ಬಾಲೆದ ಲೆಕ್ಕನೇ ಆದುಪ್ಪು ಎಂಕ್‌ಲಾ ತೋಜಿಯೆ.

9ದಾಯೆಗಂದ್ಂಡ ಯಾನ್ ಅಪೊಸ್ತಲೆರೆಡ್ ಲೆಖ್ಖೊಗು ಬರಂದಿನಾಯೆ. ಯಾನ್ ದೇವೆರೆ ಸಭೆಕ್ ಭಂಗ ಕೊರಿನೆಡ್ದ್ ಅಪೊಸ್ತಲೆ ಅಂದ್‌ದ್ ಲೆಪ್ಪಾವೊನಿಯೆರೆಗ್ಲಾ ತಕ್ಕದಾಯೆ ಅತ್ತ್.

10ಆಂಡ ಇತ್ತೆ ಯಾನ್ ಎಂಚಿನಾಯೆ ಆದುಲ್ಲೆನಾ, ಅವು ದೇವೆರೆ ದಯೊಡ್ದೇ. ಎನ ಮಿತ್ತ್ ತೋಜಿದ್ ಬತ್ತಿನ ಆಯನ ದಯ ವ್ಯರ್ಥ ಆದುಪ್ಪುಜಿ. ಯಾನ್ ಬೇತೆ ಅಪೊಸ್ತಲೆರೆಡ್ದ್ ಹೆಚ್ಚಾದ್ ಕಷ್ಟ ಪಡೆಯೆ. ಆಂಡ ಕಷ್ಟ ಪಡೆಯಿನಾಯೆ ಯಾನತ್ತ್, ಎನ ಮಿತ್ತುಪ್ಪುನ ದೇವೆರೆ ದಯೆನೇ.

11ಅಂಚಾಂಡ, ಯಾನಾವಡ್, ಅಕುಲಾವಡ್ ದಾನೆ, ಆ ಸಂಗತಿಲೆನೇ ಸಾರಿಯೊಂದುಲ್ಲ, ನಿಕುಲು ಅವೆನ್ ನಂಬಿಯರ್.

12ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾಯೆ ಪಂಡ್ದ್ ಸಾರಿನಗ, ನಿಕ್ಲೆಡ್ ಕೆಲೆವೆರ್, ದೇವೆರ್ ಸೈತಿನಾಕುಲೆಗ್ ಜೀವ ಕೊರ್ತಿಜೆ ಪಂಡ್ದ್ ಪನ್ಪಿನಿ ಎಂಚ?

13ದೇವೆರ್ ಸೈತಿನಾಕುಲೆಗ್ ಜೀವ ಕೊರ್ಪಿನವು ಇಜ್ಜಿ ಪನ್ಪಿನವು ನಿಜ ಆಂಡ ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದಿಜೆ ಪಂಡ್ದ್ ಆಂಡ್.

14ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದಿಜೆಡ, ಎಂಕುಲೆ ಪ್ರಸಂಗ ಪೊಕ್ಕಡೆದವು; ನಿಕ್ಲೆ ನಂಬಿಕೆಲಾ ಪೊಕ್ಕಡೆದವೇ.

15ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದೆ ಪಂಡ್ದ್ ಎಂಕುಲು ಪಂತ. ಆಂಡ ದೇವೆರ್ ಸೈತಿನಾಕುಲೆನ್ ಲಕ್ಕಾವುಜೆ ಪಂಡ್ದ್ ಸತ್ಯ ಆಂಡ ದೇವೆರ್ ಕ್ರಿಸ್ತನ್ ಲಕ್ಕಾಯಿನೇ ಇಜ್ಜಿ; ಲಕ್ಕಾದೆ ಪಂಡ್ದ್ ಸಾಕ್ಷಿ ಕೊರಿನ ಎಂಕುಲು ದೇವೆರೆ ವಿಷಯೊಡು ಸುಳ್ಳು ಸಾಕ್ಷಿ ಪನ್ಪಿನಾಕುಲಾದ್ ತೋಜಿದ್ ಬತ್ತ.

16ಸೈತಿನಾಕುಲು ಲಕ್ಕುಜೆರ್ಡ, ಕ್ರಿಸ್ತೆಲಾ ಸೈತಿನಾಕುಲೆಡ್ದ್ ಲಕ್ಕ್‌ದಿಜೆ.

17ಕ್ರಿಸ್ತೆ ಸೈತಿನಾಕುಲೆಡ್ದ್ ಲಕ್ಕಾದಿಜಾಂಡ, ನಿಕ್ಲೆ ನಂಬಿಕೆ ವ್ಯರ್ಥದವು. ನಿಕುಲು ನನಲಾ ಪಾಪೊಡೇ ಉಲ್ಲರ್.

18ಉಂದು ಮಾತ್ರ ಅತ್ತಂದೆ ಕ್ರಿಸ್ತನಾಕುಲಾದ್ ನಿದ್ರೆ ಪೋಯಿನಾಕುಲು ನಾಶಾದ್ ಪೋಯೆರ್.

19ಈ ಜೀವಮಾನ ಕಾಲ ಪೂರ ಎಂಕುಲು ಕ್ರಿಸ್ತಡ್ ಭರವಸ ದೀವೊಂಡಿನವೇ ಅತ್ತಂದೆ ಬೇತೆ ದಾಲಾ ಇಜ್ಜಿಡ ಮಾತ ನರಮಾನಿಲೆಡ್ದ್ ಕಂಗಾಲಾಯಿನಕುಲೇ ಸರಿ.

20ಆಂಡ ಕ್ರಿಸ್ತೆ ನಿಜಾದ್‌ಲಾ ಜೀವ ಆದ್ ಲಕ್ಕ್‌ದ್ ಬೈದೆ ಪನ್ಪಿನವು ಸತ್ಯ. ಸೈತಿನಾಕುಲೆಡ್ ಲಕ್ಕ್‌ದ್ ಬತ್ತಿನೆಟ್ಟ್ ಕ್ರಿಸ್ತೆನೇ ಸುರುತ್ತ ಫಲ ಆಯೆ.

21ದಾಯೆಗಂದ್ಂಡ, ಒರಿ ನರಮಾನಿಡ್ದ್ ಮರಣ ಬತ್ತಿಲೆಕ್ಕನೇ ಒರಿ ನರಮಾನಿಡ್ದೇ ಸೈತಿನಾಕುಲೆಡ್ದ್ ಕುಡ ಲಕ್ಕಾವುನಲಾ ಉಂಡು.

22ವಾ ರೀತಿಡ್ ಸುರುತ್ತ ನರಮಾನಿ ಆದಾಮುನ ಸಮ್ಮಂಧೊಡ್ದು ಮಾತೆರ್ಲಾ ಸೈಪುನಾಕುಲಾಯೆರಾ, ಅವ್ವೇ ರೀತಿಡ್ ಕ್ರಿಸ್ತನ ಸಮ್ಮಂಧೊಡ್ದು ಮಾತೆರ್ಲಾ ಜೀವ ಆವೆರ್.

23ಆಂಡ ಪ್ರತಿ ಒರಿಲಾ ತನ ತನ ಕ್ರಮ ಪ್ರಕಾರ ಜೀವಾದ್ ಲಕ್ಕುವೆರ್, ಕ್ರಿಸ್ತೆ ಸುರುತ್ತ ಫಲ ಆದ್ ಜೀವಾದ್ ಲಕ್ಕಿಯೆ; ಬೊಕ್ಕ ಆಯೆ ಕುಡ ಬನ್ನಗ ಆಯನಾಕುಲುಲಾ ಜೀವಾದ್ ಲಕ್ಕುವೆರ್.

24ಬೊಕ್ಕ ಅಂತ್ಯ ಬರ್ಪುಂಡು. ಅಪಗ ಮಾತ ದೊರೆತನೊನು, ಅಧಿಕಾರೊನು, ಮಾತ ಬಲೊನು ಆಯೆ ದೆತ್ತ್‌ದ್ ಪಾಡುವೆ, ಬೊಕ್ಕ ಅಮ್ಮೆ ಆದುಪ್ಪು ದೇವೆರೆಗ್ ರಾಜ್ಯೊನು ಒಚ್ಚಿದ್ ಕೊರ್ಪೆ,

25ದಾಯೆಗಂದ್ಂಡ ದೇವೆರ್ ಮಾತ ವೈರಿಲೆನ್ ಕ್ರಿಸ್ತನ ಕಾರ್‌ದಡಿಕ್ ಪಾಡುನ ಮುಟ್ಟ ಆಳೊಡಾಪುಂಡು.

26ಮರಣ ಕಡೇತ ವೈರಿ ಆದ್ ನಾಶ ಆಪುಂಡು.

27“ದೇವೆರ್ ಮಾತೆನ್ಲಾ ಕ್ರಿಸ್ತನ ಕಾರ್‌ದಡಿಕ್ ಪಾಡ್ದ್ ಆಯಗ್ ಅಧೀನ ಮಲ್ಪುವೆ,” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡ್. “ಮಾತೆನ್ಲಾ” ಆಯ ಕಾರ್‌ದಡಿಕ್ ಪಾಡ್ದೆ ಪಂಡಿನಪಗ ಅಧೀನ ಮಲ್ತಿನಾಯೆ ದೇವೆರ್ ಐಟ್ಟ್ ಸೇರ್ದಿಜೆ ಪನ್ಪಿನವು ನಿಗಂಟ್ ಆಂಡ್.

28ಬೊಕ್ಕ ದೇವೆರ್ ಮಾತ ವಸ್ತುಲಾ ಮಗನ ಅಧೀನೊಗು ಕೊರಿನೆಡ್ದಾವರ ಮಗೆಲಾ ತನ ದೇವೆರೆಗ್ ಅಧೀನ ಆಪೆ. ಇಂಚ ದೇವೆರ್ ಮಾತೆಟ್ಲಾ ಮಾತಲಾ ಆದುಲ್ಲೆ.

29ದೇವೆರ್ ಸೈತಿನಾಕುಲೆನ್ ಲಕ್ಕಾವುನವು ಇಜ್ಜಿಡ ನಿಕುಲು ಸೈತಿನಾಕುಲೆ ಪುದರ್‌ಡ್ ದೀಕ್ಷಾಸ್ನಾನ ಮಲ್ತೊನುನ ಕ್ರಮ ದಾಯೆಗ್? ಸೈತಿನಾಕುಲು ಲಕ್ಕುಜೆರ್ ಪನ್ಪಿನಾಂಡ ಅಕ್ಲೆಗಾದ್ ದೀಕ್ಷಾಸ್ನಾನ ದಾಯೆಗ್ ಮಲ್ತೊನ್ವೆರ್

30ಎಂಕುಲುಲಾ ಪ್ರತಿ ಗಳಿಗೆಡ್ ಸೈಪಿನ ವಿಷಯೊಡು ಪೋಡಿಗೆಡ್ ಉಪ್ಪುನು ದಾಯೆ?

31ಸಹೋದ್ರೆರೇ, ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಡು ಎಂಕ್ ಉಪ್ಪುನ ಪುಗರಿಗೆದ ಮಿತ್ತ್ ಆಜ ದೀದ್ ಪನ್ಪೆ, ಯಾನ್ ದಿನಾಲ ಸೈಯೊಂದು ಉಲ್ಲೆ.

32ಯಾನ್ ನರಮಾನಿ ಆಸೆಡ್ ಇತ್ತ್‌ದ್ ಈ ಕಾಡ್ ಮೃಗತ್ತಲೆಕ್ಕ ಎಫೆಸೊಡುಪ್ಪು ಜನೊಕುಲೆಡ ಉರ್ಡೊಡಾಂಡ ಎಂಕ್ ದಾನೆ ಪ್ರಯೋಜನ? ದೇವೆರ್ ಸೈತಿನಾಕುಲೆನ್ ಲಕ್ಕಾವುನವು ಇಜ್ಜಿಡ, “ನಮ ತಿನ್ಕ, ಪರ್ಕ; ದಾಯೆಗಂದ್ಂಡ ಎಲ್ಲೆ ನಮ ಸೈಪ ಅತ್ತಾ?”

33ಮೋಸೊಡು ಬೂರಡೆ, “ಪಡಿಕೆಂತಿನಾಕುಲೆ ಒಟ್ಟುಗು ಸೇರೊನುಂಡ ಎಡ್ಡೆ ನಡತೆನ್ ತೆಟ್ಟಾವುಂಡು.”

34ಇಂಚಿತ್ತಿನ ಅಮಲ್‌ಡ್ದ್ ಲಕ್ಕ್‌ದ್ ನೀತಿವಂತೆರಾಲೆ; ಪಾಪ ಕೆಲಸೊಲೆನ್ ಬುಡ್ಲೆ. ಕೆಲೆವೆರೆಗ್ ದೇವೆರೆ ವಿಷಯೊಡು ಗೇನನೇ ಇಜ್ಜಿ; ನಿಕ್ಲೆಗ್ ನಾಚಿಗೆ ಆವೊಡು ಅಂದ್‌ದ್ ಉಂದೆನ್ ಪನ್ಪೆ.

35ಆಂಡ, “ಸೈತ್‌ದಿನಾಕುಲು ಎಂಚ ಲಕ್ಕುವೆರ್, ಎಂಚಿತ್ತಿ ಶರೀರೊಡು ಬರ್ಪೆರ್?” ಅಂದ್‌ದ್ ಒರಿ ಕೇನೊಲಿ.

36ಉಂದು ಬುದ್ಧಿದಾಂತಿ ಪ್ರಶ್ನೆ! ಈ ಬಿತ್ತುನ ಬಿತ್ತ್ ಸೈತ್‌ಜಿಡ ಕೊಡಿಯೆರೆ ಇಜ್ಜಿ,

37ಗೇನೊಗು ದೆತ್ತೊನ್ಲೆ; ಈ ಗೋದಿದ ಬಿತ್ತ್ ಆವಡ್, ಬೇತೆ ಒವ್ವೇ ಬಿತ್ತ್ ಆವಡ್ ಬಿತ್ತ್‌ನಗ ಬಜೀ ಬಿತ್ತೇ ಅತ್ತಂದೆ ದುಂಬು ಬುಲೆವೊಡಾಯಿ ದೈನ್ ಬಿತ್ತುಜ.

38ಆಂಡ ದೇವೆರ್ ತನ್ಕ್ ಸರಿ ತೋಜುಲೆಕ್ಕ ಐಕ್ ಒಂಜಿ ಶರೀರೊನು ಕೊರ್ಪೆ. ಪ್ರತಿ ಬಿತ್ತ್‌ಗ್ಲಾ ಐಕ್ ತಕ್ಕಂತಿನ ಶರೀರೊನು ಕೊರ್ಪೆ.

39ಮಾತ ಶರೀರೊಲುಲಾ ಒಂಜೆ ತರತವು ಆದುಪ್ಪುಜಿ. ನರಮಾನಿನ ಶರೀರ ಬೇತೆ, ಪಶುಕುಲೆನ ಶರೀರ ಬೇತೆ, ಪಕ್ಕಿಲೆನ ಶರೀರ ಬೇತೆ, ಮೀನ್‌ದ ಬೇತೆ.

40ಉಂದತ್ತಂದೆ, ಪರಲೋಕದ ಶರೀರೊಲುಲಾ ಉಂಡು, ಭೂಲೋಕದ ಶರೀರೊಲುಲಾ ಉಂಡು, ಪರಲೋಕದ ಶರೀರೊಲೆ ಮೈಮೆ ಬೇತೆನೇ, ಭೂಲೋಕದ ಶರೀರೊಲೆ ಮೈಮೆ ಬೇತೆನೇ.

41ಸೂರ್ಯನ ಮೈಮೆ ಒಂಜಿ ತರತವು; ಚಂದ್ರನ ಮೈಮೆ ಬೊಕ್ಕೊಂಜಿ ತರತವು. ನಕ್ಷತ್ರೊಲೆನ ಮೈಮೆ ಕುಡೊಂಜಿ ತರತವು. ಮೈಮೆಡ್ ಒಂಜಿ ನಕ್ಷತ್ರೊಗ್ಲಾ ಕುಡೊಂಜಿ ನಕ್ಷತ್ರೊಗ್ಲಾ ಹೆಚ್ಚಿಕಡಿಮೆ ಉಂಡತ್ತಾ?

42ಸೈತಿನಾಕುಲು ಕುಡ ಲಕ್ಕುನೆಟ್ಲಾ ಅಂಚೆನೇ ಆಪುಂಡು. ಕೌಂತಿನ ಶರೀರ ನಾಶಾದ್ ಪೋಪುಂಡು, ಜೀವೊಡು ಲಕ್ಕಾಯಿನ ಶರೀರ ನಾಶಾಪುಜಿ.

43ಕೌಂತಿನ ಶರೀರ ಪೊರ್ಲುದಾಂತೆ ಬಲದಾಂತೆ ಆದ್ ಪೋಪುಂಡು. ಜೀವೊಡು ಲಕ್ಕಾಯಿನ ಶರೀರ ಮೈಮೆಡ್ಲಾ ಬಲೊಟ್ಲಾ ಉಪ್ಪುಂಡು.

44ಕೌಂತಿನ ಶರೀರ ನರಭಾವ ಆದುಂಡು; ಜೀವೊಡು ಲಕ್ಕುನ ಶರೀರ ಆತ್ಮೀಕ ಆದುಂಡು. ನರಭಾವದ ಶರೀರೊಲು ಉಪ್ಪುನಾಂಡ ಆತ್ಮೀಕ ಶರೀರೊಲುಲಾ ಉಂಡು.

45“ಸುರುತ್ತ ನರಮಾನಿ ಆದಾಮೆ ಬದುಕುನ ಪ್ರಾಣಿ ಆಯೆ,” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡತ್ತಾ. ಕಡೇತ ಆದಾಮೆ ಪಂಡ ಕ್ರಿಸ್ತೆ ಜೀವ ಕೊರ್ಪಿನಾಯೆ ಆದುಲ್ಲೆ.

46ಆತ್ಮಭಾವದವು ಸುರುತ್ತವು ಅತ್ತ್, ನರಭಾವದವು ಸುರುತ್ತವು. ಐಡ್ದ್ ಬೊಕ್ಕ ಆತ್ಮಭಾವದವು.

47ಸುರುತ್ತ ನರಮಾನಿ ಭೂಮಿದ ಮಣ್ಣ್‌ಡ್ದ್ ಉಂಡಾಯಿನಾಯೆ, ರಡ್ಡನೆ ನರಮಾನಿ ಪಂಡ ಕ್ರಿಸ್ತೆ ಪರಲೋಕೊಡ್ದು ಬೈದಿನಾಯೆ.

48ಭೂಮಿದಾಕುಲು ಮಣ್ಣ್‌ಡ್ ಉಂಡಾಯಿನ ನರಮಾನಿಲೆಕ್ಕ ಆಂಡ ಪರಲೋಕದಾಕುಲು ಪರಲೋಕೊಡ್ದು ಬತ್ತಿ ನರಮಾನಿಲೆಕ್ಕ.

49ಎಂಕುಲು ಮಣ್ಣ್‌ಡ್ದ್ ಪುಟ್ಟಿ ಆದಾಮುನ ಸ್ವರೂಪ ಪಾಡೊಂಡಿಲೆಕ್ಕನೇ ಪರಲೋಕೊಡ್ದು ಬತ್ತಿ ಕ್ರಿಸ್ತನ ಸ್ವರೂಪೊನ್ಲಾ ಪಾಡೊನ್ವ.

50ಸಹೋದ್ರೆರೇ, ಯಾನ್ ಪನ್ಪಿನಿ ದಾನೆಂದ್ಂಡ, ನಮ ಮಾಸ ನೆತ್ತೆರ್ ಇತ್ತಿನ ಶರೀರೊಲು ದೇವೆರೆ ರಾಜ್ಯೊಗು ಬಾಧ್ಯ ಆಪುಜಿ. ನಾಶ ಆಪಿನ ಶರೀರ ನಾಶ ಆವಂದಿನೆಕ್ಕ್ ಬಾಧ್ಯ ಆಪುಜಿ.

51ಕೇನ್ಲೆ ಇದ ಮುಟ್ಟ ಗುಟ್ಟುಡಿತ್ತಿನ ಒಂಜಿ ಸಂಗತಿನ್ ನಿಕ್ಲೆಗ್ ತೆರಿಪಾವೆ. ನಮ ಮಾತೆರ್ಲಾ ಸೈಪುಜ; ಆಂಡ ದೇವೆರ್ ಎಂಕ್ಲೆನ್ ಮಾತೆರೆನ್ಲಾ ಬದಲಾವಣೆ ಮಲ್ಪುವೆ.

52ಆಂಡ ಕಡೇತ ತುತೂರಿದ ಶಬ್ಧ ಆನಗ ಒಂಜಿ ಕ್ಷಣೊಟೇ ಕಣ್ಣ್ ಮುಚ್ಚಿ ಜಪ್ಪುನೆತ್ತ ಉಲಯಿ ಉಂದು ಆಪುಂಡು. ತುತೂರಿ ಉರ್ಪುನಗ ದೇವೆರ್ ಸೈತಿನಾಕುಲೆನ್ ಲಕ್ಕಾದ್ ನಾಶ ಆವಂದಿನಾಕುಲಾದ್ ನಮ ಬದಲಾದ್ ಪೋಪ.

53ದಾಯೆಗಂದ್ಂಡ ನಾಶಾದ್ ಪೋಪಿನ ಈ ಶರೀರ ನಾಶಾವಂದಿನೆನ್ ಪಾಡೊನುಂಡು; ಮರಣೊಗು ಅಧೀನವಾದುಪ್ಪು ಈ ಶರೀರ ಅಮರತ್ತ್ವೊನು ಪಾಡೊನುನವು ಅಗತ್ಯ.

54ನಾಶಾಪಿನ ಈ ಶರೀರ ನಾಶಾವಂದಿನೆನ್ ಪಾಡೊನ್ನಗ, ಮರಣೊಗು ಅಧೀನವಾದುಪ್ಪು ಈ ಶರೀರ ಅಮರತ್ತ್ವೊನು ಪಾಡೊನ್ನಗ ಬರೆದುಪ್ಪು ಈ ಪಾತೆರ ನೆರವೇರುಂಡು. ಆ ಪಾತೆರ ದಾನೆಂದ್ಂಡ, “ಮರಣೊನು ನಾಶ ಮಲ್ತ್‌ದ್, ಜಯೊನು ಜೈಸಿಯೆ.”

55“ ಓ ಮರಣ, ನಿನ ಜಯ ಓಲು? ಓ ಮರಣ, ನಿನ ವಿಷತ ಕೊಂಡಿ ಓಲು?”

56ಮರಣದ ಕೊಂಡಿ ಪಾಪನೇ; ಬೊಕ್ಕ ಪಾಪದ ಬಲೊಕು ಆಧಾರ ಮೋಶೆನ ನ್ಯಾಯಕಟ್ಟಲೆ.

57ಆಂಡ, ದೇವೆರ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ನಂಕ್ ಜಯೊನು ಕೊರ್ತೆ, ಆಯಗ್ ಉಪಕಾರ ಸ್ತುತಿ ಆವಡ್.

58ಅಂಚಾಯಿನೆಡ್ದ್ ಎನ ಪ್ರೀತಿದ ಸಹೋದ್ರೆರೇ, ನಿಕುಲು ಸ್ಥಿರಚಿತ್ತೊಡ್ಲಾ ದೃಢಾದ್‌ಲಾ ಉಪ್ಪುಲೆ. ನಿಕುಲು ಕರ್ತವ ಪುದರ್‌ಡ್ ಮಲ್ಪು ಪ್ರಯಾಸ ವ್ಯರ್ಥ ಆಪುಜಿ ಅಂದ್‌ದ್ ಎನ್ನೊಂದು ಕರ್ತವ ಕೆಲಸೊಲೆನ್ ಏಪಲಾ ಮಸ್ತ್ ಆಸಕ್ತಿಡ್ ಮಲ್ಪುಲೆ.

← Chapter 14 Jump to: Chapter 16 →