1 Corinthians 7

Tulu (ಪೊಸ ಒಡಂಬಡಿಕೆ)

1ನಿಕುಲು ಬರೆತಿ ವಿಚಾರೊಡು ಎನ ಅಭಿಪ್ರಾಯ ದಾನೆಂದ್ಂಡ, ಪೊಂಜೊವುನು ಮುಟ್ಟಂದೆ ಉಪ್ಪುನವು ನರಮಾನಿಗ್ ಏತೋ ಎಡ್ಡೆ.

2ಆಂಡ ಹಾದ್ರೊಗು ಶೋಧನೆ ಆವಂದಿಲೆಕ್ಕ ಪ್ರತಿ ಒರಿಯಗ್ ಸ್ವಂತ ಬೊಡೆದಿ ಉಪ್ಪಡ್; ಪ್ರತಿ ಪೊಂಜೊವುಗು ಆಲೆನ ಸ್ವಂತ ಕಂಡನಿ ಉಪ್ಪಡ್.

3ಕಂಡನಿ ಬೊಡೆದಿಗ್ ಸಂದಾವೊಡಾಯಿನೆನ್ ಸಂದಾವಡ್; ಅಂಚೆನೇ ಬೊಡೆದಿ ಕಂಡನಿಗ್ ಸಂದಾವಡ್.

4ಬೊಡೆದಿಗ್ ತನ ಶರೀರದ ಮಿತ್ತ್ ಅಧಿಕಾರ ಇಜ್ಜಿ; ಅವು ಕಂಡನಿಗ್ ಉಂಡು. ಅಂಚೆನೇ ಕಂಡನಿಗ್ ತನ ಶರೀರದ ಮಿತ್ತ್ ಅಧಿಕಾರ ಇಜ್ಜಿ; ಅವು ಬೊಡೆದಿಗ್ ಉಂಡು.

5ಪ್ರಾರ್ಥನೆಗ್ ಮನಸ್ ಕೊರಿಯೆರೆಗಾದ್ ನಿಕುಲು ಒರಿ ಒರಿಯಗ್ ಒಪ್ಪಿಯೊಂದು ಒಂತೆ ಸಮಯ ದಂಪತಿಲೆ ಧರ್ಮ ಬುಡ್ದು ದೂರ ಆದುಪ್ಪೊಲಿ. ಅತ್ತಂದೆ ಬೇತೆ ಕಾರಣೊಗು ಅಂಚ ಮಲ್ಪೆರೆ ಬಲ್ಲಿ. ದಾಯೆಗಂದ್ಂಡ ನಿಕ್ಲೆಡ್ ಶರೀರದಾಶೆ ಹತೋಟಿ ಇಜ್ಜಂದಿನಾಕುಲೆನ್ ತೂದು ಸೈತಾನೆ ಶೋಧನೆ ಕೊರಂದಿಲೆಕ್ಕ ಬೇಗ ಒಂಜಾಲೆ.

6ಇಂಚ ಮಲ್ಪುಲೆ ಅಂದ್‌ದ್ ಪನ್ಪಿನವು ಎನ ಆಲೋಚನೆ, ಆಂಡ ಅಪ್ಪಣೆ ಅತ್ತ್.

7ಯಾನ್ ಉಪ್ಪುಲೆಕ್ಕನೇ ಮಾತ ನರಮಾನಿಲು ಉಪ್ಪೊಡಂದ್‌ದ್ ಎನ ಆಸೆ; ಆಂಡ ದೇವೆರೆಡ್ದ್ ಸ್ವಂತ ವರ ಉಂಡು. ಒರಿಯಗ್ ಮದ್ಮೆದ ವರ, ಬೊಕ್ಕೊರಿಯಗ್ ಮದ್ಮೆ ಆವಂದೆ ಒರಿಯೇ ಉಪ್ಪುನ ವರ.

8ಮದ್ಮೆ ಆವಂದಿನಾಕುಲೆಗ್ಲಾ ಕಂಡನಿ ಸೈತ್‌ದಿನಾಕುಲೆಗ್ಲಾ ಯಾನ್ ಪನ್ಪಿನಿ ದಾನೆಂದ್ಂಡ, ಯಾನ್ ಉಪ್ಪುಲೆಕ್ಕನೇ ಅಕುಲು ಉಪ್ಪುನವು ಎಡ್ಡೆ.

9ಕಾಮತಾಪೊಡು ಉಪ್ಪುನೆಡ್ದ್ ಅಕುಲು ಮದ್ಮೆ ಮಲ್ತೊನಡ್; ಶರೀರದಾಶೆ ತಡೆತೊನಿಯೆರೆ ಆಪುಜಿಡ ಮದ್ಮೆ ಮಲ್ತೊನೊನವು ಎಡ್ಡೆ.

10ಮದ್ಮೆ ಮಲ್ತೊಂದಿನಾಕುಲೆಗ್ ಎನ ಅಪ್ಪಣೆ ಮಾತ್ರತ್ತಂದೆ ಕರ್ತವ ಅಪ್ಪಣೆ ದಾನೆ ಪಂಡ, ಬೊಡೆದಿ ಕಂಡನಿನ್ ಬುಡ್ದು ಬೇತೆ ಆವೆರೆ ಬಲ್ಲಿ;

11ಒಂಜಿ ವೇಳೆ ಬೇತೆ ಆಂಡಲಾ ಮದ್ಮೆ ಆವಂದೆ ಉಪ್ಪೊಡು; ಇಜ್ಜಿಡ ಕಂಡನಿ ಒಟ್ಟುಗು ಸಮಾಧಾನೊಡು ರಾಜಿ ಮಲ್ತೊನಡ್. ಬೊಕ್ಕ ಕಂಡನಿ ಬೊಡೆದಿನ್ ಬುಡಿಯೆರೆ ಬಲ್ಲಿ.

12ಬಾಕಿದಾಕುಲೆನ ಸಂಗತಿಡ್ ಕರ್ತವ ಪಾತೆರ ಇಜ್ಜಾಂಡಲಾ ಯಾನ್ ಪನ್ಪಿನಿ ದಾನೆ ಪಂಡ, ಒರಿ ಸಹೋದ್ರಗ್ ನಂಬಿಕೆದಾಂತಿನ ಬೊಡೆದಿ ಇತ್ತಲ್‌ಡ, ಆಲ್ ಆಯ ಒಟ್ಟುಗು ಉಪ್ಪೆರೆ ಒಪ್ಪಿಯುನಾಂಡ ಆಯೆ ಆಲೆನ್ ಬುಡಿಯೆರೆ ಬಲ್ಲಿ.

13ಅಂಚೆನೇ ಒರ್ತಿಗ್ ನಂಬಿಕೆದಾಂತಿನ ಕಂಡನಿ ಉಲ್ಲೆಡ, ಆಯೆ ಆಲೆಡೊಪ್ಪ ಉಪ್ಪೆರೆಗ್ ಒಪ್ಪಿಯುನಾಂಡ ಆಲ್ ಆಯನ್ ಬುಡಿಯೆರೆ ಬಲ್ಲಿ.

14ದಾಯೆಗಂದ್ಂಡ ನಂಬಿಕೆದಾಂತಿನ ಕಂಡನಿ ಬೊಡೆದಿಡ್ದಾದ್ ದೇವಜನೊಕುಲೆನ ಸಮ್ಮಂಧೊನು ಪಡೆಪಿನಾಯೆ ಆಪೆ. ಅಂಚೆನೇ ನಂಬಿಕೆದಾಂತಿನ ಬೊಡೆದಿ ಕಂಡನಿಡ್ದಾದ್ ದೇವಜನೊಕುಲೆನ ಸಮ್ಮಂಧೊನು ಪಡೆಪಿನಾಲ್ ಆಪಲ್. ಅಂಚ ಇಜ್ಜಾಂಡ ನಿಕ್ಲೆ ಜೋಕುಲು ಅಶುದ್ಧ ಆದಿತ್ತ್‌ದ್ವೆರ್. ಆಂಡ ಇತ್ತೆ ಅಕುಲುಲಾ ದೇವಜನೊಕುಲೆಡ್ ಸೇರ್ದಿನಾಕುಲು ಆದುಲ್ಲೆರ್.

15ಆಂಡ ನಂಬಿಕೆದಾಂತಿನಾಕುಲು ಬೇತೆ ಆದ್ ಪೋಪೆರ್ಡ ಪೋವಡ್. ಇಂಚಿತ್ತಿ ಸಮಯೊಡು ಒರಿ ಸಹೋದರೆ ಆವಡ್, ಸಹೋದ್ರಿ ಆವಡ್ ಮದ್ಮೆದ ಒತ್ತಾಂಕೆಡ್ ಉಪ್ಪುಜೆರ್. ಸಮಾಧಾನೊಡು ಉಪ್ಪೊಡು ಅಂದ್‌ದ್ ದೇವೆರ್ ನಮನ್ ಲೆತ್ತ್‌ದೆ.

16ಓ ಪೊಂಜೊವೇ! ನಿನಡ್ದಾದ್ ನಿನ ಕಂಡನಿಗ್ ರಕ್ಷಣೆ ಆವು ಅಂದ್‌ದ್ ನಿಕ್ಕ್ ಎಂಚ ಗೊತ್ತು? ಓ ಅಂಜೊವೇ! ನಿನಡ್ದಾದ್ ನಿನ ಬೊಡೆದಿಗ್ ರಕ್ಷಣೆ ಆವು ಅಂದ್‌ದ್ ನಿಕ್ಕ್ ಎಂಚ ಗೊತ್ತು?

17ಆಂಡಲಾ ಕರ್ತವೆ ಪ್ರತಿ ಒರಿಯಗ್ ವಾ ಸ್ಥಿತಿನ್ ನೇಮಕ ಮಲ್ತ್‌ದೆನಾ, ದೇವೆರ್ ಲೆಪ್ಪುನಗ ಪ್ರತಿಯೊರಿ ವಾ ಸ್ಥಿತಿಟ್ಟ್ ಉಪ್ಪುವೆನಾ, ಆ ಸ್ಥಿತಿಕ್ಕ್ ತಕ್ಕ ನಡತೊನಡ್. ಇಂಚ ಮಾತ ಸಭೆಟ್ಲಾ ಅಪ್ಪಣೆ ಕೊರ್ಪೆ.

18ದೇವೆರ್ ಲೆತ್ತಿ ಕಾಲೊಡು ಏರಾಂಡಲಾ ಸುನ್ನತಿದಾಯೆ ಆದುಲ್ಲೆನಾ, ಆಯೆ ಸುನ್ನತಿದಾಂತಿನಾಯಲೆಕ್ಕ ಆಯೆರೆ ಬಲ್ಲಿ. ದೇವೆರ್ ಲೆತ್ತಿನಪಗ ಏರಾಂಡಲಾ ಸುನ್ನತಿದಾಂತಿನಾಯೆ ಆದಿತ್ತ್ಂಡ ಆಯೆ ಸುನ್ನತಿ ಮಲ್ತೊನಿಯೆರೆ ಬಲ್ಲಿ.

19ಸುನ್ನತಿ ಆಪಿನವುಲಾ ವಿಶೇಷದವು ಅತ್ತ್; ಸುನ್ನತಿದಾಂತೆ ಉಪ್ಪುನವುಲಾ ವಿಶೇಷದವು ಅತ್ತ್; ದೇವೆರೆ ಅಪ್ಪಣೆಲೆನ್ ಕೈಕೊಂದು ನಡಪುನವೇ ವಿಶೇಷದವು.

20ದೇವೆರ್ ಲೆಪ್ಪುನಗ ಪ್ರತಿಯೊರಿಲಾ ವಾ ಸ್ಥಿತಿಟ್ಟ್ ಉಲ್ಲೆನಾ ಅವ್ವೇ ಸ್ಥಿತಿಟ್ಟ್ ಉಪ್ಪೊಡು.

21ದೇವೆರ್ ಲೆಪ್ಪುನಗ ಈ ಬೊಕ್ಕೊರಿಯನ ದಾಸೆ ಆದುಲ್ಲನಾ? ಐಕಾದ್ ಚಿಂತೆ ಮಲ್ಪಡ. ಆಂಡ ಬುಡುಗಡೆ ಆಯೆರೆ ನಿನ ಕೈಡ್ದ್ ಆಪುಂಡಾ ಸ್ವತಂತ್ರೆ ಆಪಿನವೇ ಎಡ್ಡೆ.

22ಒರಿ ದಾಸೆ ಆದ್ ಕರ್ತವಡ್ ಲೆಪ್ಪು ತಿಕ್ಕ್ಂಡ, ಆಯೆ ಕರ್ತವಡ್ ಸ್ವತಂತ್ರೊಡು ಉಲ್ಲೆ. ಅಂಚೆನೇ ಒರಿ ಸ್ವತಂತ್ರೆ ಆದ್ ಕರ್ತವಡ್ ಲೆಪ್ಪು ತಿಕ್ಕ್ಂಡ, ಆಯೆ ಕ್ರಿಸ್ತಗ್ ದಾಸೆ ಆದುಲ್ಲೆ.

23ದೇವೆರ್ ನಿಕ್ಲೆನ್ ಮಸ್ತ್ ಕ್ರಯೊಕು ದೆತ್ತೊಂದಿನೆಡ್ದ್ ನರಮಾನಿಲೆಗ್ ದಾಸೆರಾವಡೆ.

24ಸಹೋದ್ರೆರೇ, ಪ್ರತಿ ಒರಿ ಲೆಪ್ಪು ಆನಗ ವಾ ಸ್ಥಿತಿಟ್ಟ್ ಉಲ್ಲೆನಾ ಅವ್ವೇ ಸ್ಥಿತಿಟ್ಟ್ ದೇವೆರೆ ಸಮ್ಮಂಧೊಡು ಉಂತಡ್.

25ಕನ್ಯಪೊಣ್ಣುಲೆ ವಿಚಾರೊಡು ಕರ್ತವಡ್ದ್ ಬತ್ತಿನ ವಾ ಅಪ್ಪಣೆಲಾ ಇಜ್ಜಿ. ಆಂಡ ನಂಬಿಗಸ್ತೆ ಆದುಪ್ಪೆರೆ ಕರ್ತವಡ್ದ್ ಕರುಣೆ ತಿಕ್ಕಿದಿನಾಯಗ್ ಎನ ಆಲೋಚನೆಲೆನ್ ಪನ್ಪೆ.

26ಇತ್ತೆ ಕಷ್ಟಕಾಲೊಲು ಉಪ್ಪುನೆಡ್ದ್ ನರಮಾನಿಗ್ ಅಂಚೆನೇ ಉಪ್ಪುನವು ಎಡ್ಡೆ ಅಂದ್‌ದ್ ಎನ್ನುವೆ.

27ಬೊಡೆದಿನ್ ಕಟ್ಟೊಂದನಾ? ಬುಡುಗಡೆ ಆಯೆರೆ ತೂವಡ. ಬೊಡೆದಿದಾಂತಿನಾಯೆ ಆದುಲ್ಲನಾ? ಬೊಡೆದಿನ್ ಮಲ್ತೊನೆರೆ ಪ್ರಯತ್ನ ಮಲ್ಪಡ.

28ಒಂಜಿ ವೇಳೆ ಈ ಮದ್ಮೆ ಆಂಡಲಾ ಪಾಪ ಅತ್ತ್. ಕನ್ಯಪೊಣ್ಣು ಮದ್ಮೆ ಆಂಡಲಾ ಪಾಪ ಅತ್ತ್. ಆಂಡ ಮದ್ಮೆ ಆಯಿನಾಕುಲೆಗ್ ಶರೀರೊಡು ಕಷ್ಟ ಬರ್ಪುಂಡು. ನಿಕ್ಲೆಗ್ ಅಂಚ ಆವೆರೆ ಬಲ್ಲಿ ಅಂದ್‌ದ್ ಎನ ಆಸೆ.

29ಸಹೋದ್ರೆರೇ, ಯಾನ್ ಪನ್ಪಿನಿ ದಾನೆಂದ್ಂಡ, ಸಮಯ ಒಂತೆ ಉಪ್ಪುನೆಡ್ದ್ ನನ ದುಂಬಗ್ ಬೊಡೆದಿ ಇತ್ತಿನಾಕುಲು ಬೊಡೆದಿ ಇಜ್ಜಾಂದಿನಾಕುಲೆ ಲೆಕ್ಕ;

30ಬುಲ್ಪುನಾಕುಲು ಬುಲ್ಪಂದಿನಾಕುಲೆಲೆಕ್ಕ ಸಂತೋಷ ಮಲ್ಪುನಾಕುಲು ಸಂತೋಷ ಮಲ್ಪಂದಿನಾಕುಲೆಲೆಕ್ಕ ಕ್ರಯೊಕು ದೆತ್ತೊಂಡಿನಾಕುಲು ಅವು ತನ್ಕುಲೆನವು ಅತ್ತಂದಿಲೆಕ್ಕನೇ ಉಪ್ಪಡ್.

31ಈ ಲೋಕದ ವ್ಯವಹಾರೊಡು ಉಪ್ಪುನಾಕುಲು ಐಟ್ಟೇ ಮುರ್ಕುದುಪ್ಪೆರೆ ಬಲ್ಲಿ. ದಾಯೆಗಂದ್ಂಡ ಈ ಲೋಕದ ರೂಪರೇಕೆ ಕಡೆಕ್ಕ್ ಮಾಜಿದ್ ಪೋಪುಂಡು.

32ಆಂಡ ನಿಕುಲು ಚಿಂತೆ ಇಜ್ಜಂದೆ ಇತ್ತಿನಕುಲಾದ್ ಉಪ್ಪೊಡು ಅಂದ್‌ದ್ ಎನ ಆಸೆ. ಮದ್ಮೆ ಆವಂದಿನಾಯೆ ತಾನ್ ಕರ್ತವನ್ ಎಂಚ ಮೆಚ್ಚಾವುನು ಅಂದ್‌ದ್ ಕರ್ತವ ಕಾರ್ಯೊಲೆಗಾದ್ ಚಿಂತೆ ಮಲ್ಪುವೆ.

33ಆಂಡ ಮದ್ಮೆ ಆತಿನಾಯೆ ಬೊಡೆದಿನ್ ಎಂಚ ಮೆಚ್ಚಾವುನು ಅಂದ್‌ದ್ ಈ ಲೋಕದ ಸಂಗತಿಲೆಗಾದ್ರ ಚಿಂತೆ ಮಲ್ಪುವೆ.

34ಆಯನ ಮನಸ್ ರಡ್ಡ್ ಕಡೆಕ್ಲಾ ಒಯ್ತೊಂದುಪ್ಪುಂಡು. ಆಂಡ ಮದ್ಮೆ ಆವಂದಿನಾಲ್‌ಲಾ ಕನ್ಯಪೊಣ್ಣುಲಾ ತನ ಶರೀರೊಡ್ಲಾ ಆತ್ಮೊಡ್ಲಾ ಪರಿಶುದ್ಧ ಆದಿತ್ತ್‌ದ್ ಕರ್ತವನ ಸಂಗತಿಲೆಗಾದ್ ಚಿಂತೆ ಮಲ್ಪುವಲ್, ಆಂಡ ಮದ್ಮೆ ಆತಿನಾಲ್ ತನ ಕಂಡನಿನ್ ಎಂಚ ಮೆಚ್ಚಾವುನು ಅಂದ್‌ದ್ ಈ ಲೋಕದ ಸಂಗತಿಲೆಗಾದ್ರ ಚಿಂತೆ ಮಲ್ಪುವಲ್.

35ನಿಕ್ಲೆನ್ ಬಂಧನೊಡು ದೀವೆರೆ ಅತ್ತ್, ನಿಕ್ಲೆ ಪ್ರಯೋಜನೊಗಾದೇ ಉಂದೆನ್ ಪನ್ಪೆ. ನಿಕುಲು ಸಜ್ಜನೆರಾದ್ ನಡತ್‌ದ್ ರಡ್ಡ್ ಮನಸ್‌ದಾಂತೆ ಕರ್ತವಗ್ ಪಾದಸೇವೆ ಮಲ್ಪುನಾಕುಲು ಆವೊಡು ಅಂದ್‌ದ್ ಎನ ಆಸೆ.

36ಒರಿ ತನ ನಿಚ್ಚಯ ಆದಿತ್ತಿ ಕನ್ಯಪೊಣ್ಣು ಮದ್ಮೆದಾಂತೆ ಉಪ್ಪುನವು ಮರ್ಯಾದಿ ಅತ್ತ್ ಅಂದ್‌ದ್ ಎನ್ನುವೆಡ, ಬೊಕ್ಕ ಆಲೆಗ್ ಪ್ರಾಯ ಕರಿದ್ ಪೋಪುಂಡತ್ತಾ, ಮದ್ಮೆ ಆಪಿನವು ಎಡ್ಡೆ ಅಂದ್‌ದ್ ಆಯಗ್ ತೋಜಿಂಡ ಆಯೆ ಅಂಚೆನೇ ಮಲ್ಪಡ್. ಆಯೆ ಪಾಪ ಮಲ್ಪುಜೆ, ಮದ್ಮೆ ಮಲ್ತ್ ಕೊರಡ್.

37ಆಂಡ ಒರಿ ದೃಢ ಮನಸ್‌ಡ್ ಬಲಾತ್ಕಾರ ದಾಲಾದಾಂತೆ ತನ ಚಿತ್ತೊಲೆನ್ ನಡಪಾವೆರೆ ಹಕ್ಕ್ ಇತ್ತಿನಾಯೆ ಆದಿತ್ತ್‌ದ್ ತನ ಕನ್ಯಪೊಣ್ಣ್‌ನ ಮದ್ಮೆ ಮಲ್ತ್ ಕೊರ್ಪುಜಿ ಅಂದ್‌ದ್ ತನ ಉಲಯಿ ನಿರ್ಧಾರ ಮಲ್ತೊಂಡೆಡ ಅಂಚೆನೇ ಮಲ್ಪುನವು ಎಡ್ಡೆ.

38ಅಂಚಾಂಡ ತನ ನಿಚ್ಚಯ ಆದಿತ್ತಿ ಕನ್ಯಪೊಣ್ಣನ್ ಮದ್ಮೆ ಮಲ್ತ್ ಕೊರ್ಪಿನಾಯೆ ಎಡ್ಡೆನೇ ಮಲ್ಪುವೆ. ಮದ್ಮೆ ಮಲ್ತ್ ಕೊರಂದೆ ಉಪ್ಪುನಾಯೆ ನನಲಾ ಎಡ್ಡೆಂತಿನೆನ್ ಮಲ್ಪುವೆ.

39ಮದ್ಮೆ ಆತಿನಾಲ್ ತನ ಕಂಡನಿ ಜೀವೊಡು ಉಪ್ಪುನೆಟ್ಟ ಆಲೆಗ್ ಆಯನ ಕಟ್ಟ್ ಉಂಡು. ಆಯೆ ಸೈತ್ ಪೋಯೆಡ, ತನ್ಕ್ ಬೋಡಾಯಿನಾಯಡ ಮದ್ಮೆ ಆವೆರೆ ಆಲೆಗ್ ಸ್ವತಂತ್ರ ಉಂಡು. ಆಂಡ ಆಯೆ ಕ್ರಿಸ್ತ ನಂಬಿಕೆಡ್ ಉಪ್ಪೊಡು.

40ಆಂಡ ಆಲ್ ಮದ್ಮೆ ಮಲ್ತೊನುನೆಡ್ದ್, ಮದ್ಮೆ ಆವಂದೆ ಉಪ್ಪುನವು ಆಲೆಗ್ ಸುಖ ಅಂದ್‌ದ್ ಎನ ಅಭಿಪ್ರಾಯ; ಎಂಕ್‌ಲಾ ದೇವೆರೆ ಆತ್ಮೆ ಉಲ್ಲೆ ಅಂದ್‌ದ್ ಎನ್ನುವೆ.

← Chapter 6 Jump to: Chapter 8 →