Galatians 5

Tulu (ಪೊಸ ಒಡಂಬಡಿಕೆ)

← Chapter 4 Jump to: Chapter 6 →

1ಕ್ರಿಸ್ತೆ ನಮನ್ ಸ್ವತಂತ್ರದಾಕುಲು ಆದುಪ್ಪೆರೆ ಬುಡುಗಡೆ ಮಲ್ತ್‌ದೆ. ನಿಕುಲು ಐಟ್ಟೇ ನಿಲೆ ಆದುಪ್ಪುಲೆ, ಕುಡೊರ ಗುಲಾಮತನತ ನುಗೊಟು ತಿಕ್ಕ್‌ದ್ ಬೂರಡೆ.

2ಕೇನ್ಲೆ, ಪೌಲು ಇನ್ಪಿ ಯಾನ್ ಪನೊಂದುಲ್ಲೆ, ನಿಕುಲು ಸುನ್ನತಿ ಮಲ್ತೊಂಡರ್ಡ ಕ್ರಿಸ್ತಡ್ದ್ ನಿಕ್ಲೆಗ್ ವಾ ಪ್ರಯೋಜನಲಾ ಇಜ್ಜಿ.

3ಏರ್ ಸುನ್ನತಿ ಮಲ್ತೊನುವೆನಾ, ಆಯೆ ನ್ಯಾಯಕಟ್ಟ್‌ಡ್ ಬರೆತಿ ಪ್ರತಿಯೊಂಜೆನ್ ಕೈಕೊನುನ ಹಂಗ್‌ಗ್ ಬೂರ್ವೆ ಅಂದ್‌ದ್ ಕುಡೊರ ಎಚ್ಚರಿಕೆ ಪನ್ಪೆ.

4ದಾಯೆಗಂದ್ಂಡ ನಿಕ್ಲೆಡ್ ಏರಾಂಡಲಾ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದಾದ್ ನೀತಿವಂತೆರ್ ಆವೆರೆ ಬಯಕುವರ್ಡ ಅಕುಲು ಕ್ರಿಸ್ತಡ್ದ್ ದೂರ ಆಪೆರ್. ಬೊಕ್ಕ ದೇವೆರೆ ದಯೊಡ್ದು ತತ್ತ್‌ದ್ ಬೂರ್ವೆರ್.

5ಆಂಡ ನಮ ದೇವೆರಾತ್ಮಡ್ದ್ ದೇವೆರೆನ ಮಿತ್ತ್ ನಂಬಿಕೆ ದೀದ್ ದೇವೆರೆ ಒಟ್ಟುಗು ನೀತಿವಂತೆರ್ ಆಪ ಇನ್ಪಿನ ನಿರೀಕ್ಷೆಡ್ ಉಲ್ಲ. ಈ ನಿರೀಕ್ಷೆ ಸಫಲ ಆವು ಅಂದ್‌ದ್ ಎದುರು ತೂವೊಂದುಲ್ಲ.

6ದಾಯೆಗಂದ್ಂಡ ನಮ ಕ್ರಿಸ್ತ ಯೇಸುಡು ಉಪ್ಪುನಗ, ಸುನ್ನತಿ ಆಂಡಲಾ ಪ್ರಯೋಜನ ಇಜ್ಜಿ. ಸುನ್ನತಿದಾಂತೆಲಾ ಪ್ರಯೋಜನ ಇಜ್ಜಿ, ಪ್ರೀತಿಡ್ ಯೇಸುನ ಮಿತ್ತ್ ನಂಬಿಕೆ ದೀದ್ ನಡಪುನವೇ ಪ್ರಯೋಜನ ಆದುಂಡು.

7ನಿಕುಲು ಎಡ್ಡೆಡ್ ಬಲ್ತೊಂದಿತ್ತರ್. ಸತ್ಯೊಗು ಒಳಗಾವಂದಿಲೆಕ್ಕ ನಿಕ್ಲೆನ್ ಏರ್ ತಡೆತೆರ್?

8ಈ ಬೋಧನೆ ನಿಕ್ಲೆಗ್ ಲೆತ್ತಿನಾಯಡ್ದ್ ಬೈದಿನವು ಅತ್ತಾ?

9ಈ ಸುಳ್ಳು ಬೋಧನೆ ಒಂತೆ ಪುಳಿಬಂದದ ಲೆಕ್ಕನೆ ಇಡೀ ಬಂದೊನು ಪುಳಿ ಮಲ್ಪುಂಡು.

10ನಿಕುಲು ಬೇತೆ ಸಾದಿಡ್ ಪೋಪುಜರ್ ಅಂದ್‌ದ್ ಕರ್ತವಡ್ ಎಂಕ್ ಭರವಸೆ ಉಂಡು. ನಿಕ್ಲೆಡ್ ಗಲಿಬಿಲಿ ಪುಟ್ಟಾವುನಾಯೆ ಏರೇ ಆವಡ್, ಆಯೆ ನ್ಯಾಯತೀರ್ಪುಗು ಗುರಿ ಆಪೆ.

11ಸಹೋದ್ರೆರೇ, ಸುನ್ನತಿ ಮಲ್ಪೊಡಂದ್‌ದ್ ನನಲಾ ಸಾರಿಯುವೆಡ ಎಂಕ್ ನನಲಾ ಭಂಗ ದಾಯೆಗ್? ಅಂಚಾದಿತ್ತ್ಂಡ ಕ್ರುಸ್ಸುದ ದಿಸೆಡ್ದ್ ಉಂಡಾತಿನ ಆತಂಕ ಪೋಂಡತ್ತಾ?

12ನಿಕ್ಲೆನ್ ಏರ್ ಗಲಿಬಿಲಿ ಮಲ್ಪುವೆರಾ, ಅಕುಲು ಅಕ್ಲೆನ ಅಂಗೊನು ಕಡ್ತ್ ಪಾಡುನನೇ ಎಡ್ಡೆ.

13ಎನ ಸಹೋದ್ರೆರೇ, ನಿಕುಲು ಸ್ವತಂತ್ರೆರಾದುಪ್ಪೊಡು ಅಂದ್‌ದ್ ದೇವೆರೆ ಲೆಪ್ಪು ಆತಿನಾಕುಲು. ಆಂಡ ನಿಕ್ಲೆ ಸ್ವತಂತ್ರೊನು ಶರೀರಭಾವೊಗು ತೃಪ್ತಿ ಮಲ್ಪೆರೆಗಾದ್ ಬಳಕೆ ಮಲ್ಪಂದೆ, ಪ್ರೀತಿಡ್ ಒರಿ ಒರಿಯಗ್ ಸೇವೆ ಮಲ್ತೊಂದುಪ್ಪುಲೆ.

14“ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪುಲ.” ಅಂದ್‌ದ್ ಇಡೀ ನ್ಯಾಯಕಟ್ಟ್‌ಡ್ ಒಂಜಿ ಪಾತೆರೊಡೇ ತೋಜಾವುಂಡು.

15ನಿಕುಲು ಒರಿಯಗ್ ಒರಿ ತುಚ್ಚಿದ್ ಪರ್ತೊಂದು ದಿಂಗುನಾಕುಲಾಯರ್ಡ ಒರಿಯಡ್ದೊರಿ ನಾಶ ಆಪರ್, ತೂವೊನ್ಲೆ.

16ಅಂಚಾದ್ ನಿಕ್ಲೆ ಜೀವನೊನು ಪರಿಶುದ್ಧಾತ್ಮ ನಡಪುಡಡ್ ಅಂದ್‌ದ್ ಯಾನ್ ಪನ್ಪೆ. ಅಪಗ ನಿಕುಲು ನಿಕ್ಲೆನ ಶರೀರಭಾವದ ಇಚ್ಚೆನ್ ಏತ್ ಮಾತ್ರೊಗ್ಲಾ ಮಲ್ಪಯರ್.

17ದಾಯೆಗಂದ್ಂಡ ಶರೀರಭಾವದ ಇಚ್ಚೆ ಆತ್ಮೊಗು ವಿರೋಧ ಆದುಂಡು. ಆತ್ಮ ಶರೀರಭಾವದ ಇಚ್ಚೆಗ್ ವಿರೋಧ ಆದುಂಡು. ಈ ರಡ್ಡ್ ಶಕ್ತಿಲು ನಿಕುಲು ಬಯಕುನೆನ್ ಮಲ್ಪಂದಿಲೆಕ್ಕ ಒಂಜೆಕ್ಕೊಂಜಿ ವಿರೋಧ ಆದ್ ಹೋರಾಟ ಮಲ್ತೊಂದೇ ಉಪ್ಪುವ.

18ಆಂಡ ನಿಕುಲು ಆತ್ಮೊಡ್ದು ನಡತೊಂದು ಉಪ್ಪುನಾಕುಲಾಂಡ ನ್ಯಾಯಕಟ್ಟ್‌ದ ಅಧೀನೆರತ್ತ್.

19ಶರೀರಭಾವದ ಸ್ವಭಾವೊಲು ಬಯಲಾದುಂಡು; ಅವು ಒವು ಪಂಡ, ಹಾದ್ರ, ಬಂಡ್‌ತನ, ನಾಚಿಗೆದಾಂತಿನವು

20ಮೂರ್ತಿಪೂಜೆ, ಮಾಟಮಂತ್ರ, ವೈರತ್ವ, ಪೆಟ್ಟ್‌ಪುಡೆ, ಕಿಚ್ಚಿ, ಎದುರು ಕೋಪ, ಸ್ವಾರ್ಥ, ತರ್ಕ, ಜಾತಿಭೇದ,

21ದ್ವೇಷ, ಕುಡ್ಚೆಲ್, ದರ್ಬಾರ್, ಇಂಚಿತ್ತಿನವೇ. ಇಂಚಿತ್ತಿನೆನ್ ಮಲ್ಪುನಾಯಗ್ ದೇವೆರೆ ರಾಜ್ಯೊಡು ಬಾಧ್ಯಸ್ತಿಗೆ ತಿಕ್ಕಂದ್ ಅಂದ್‌ದ್ ಯಾನ್ ದುಂಬು ಪಂಡಿಲೆಕ್ಕನೆ ಇತ್ತೆಲಾ ಪನ್ಪೆ.

22ಆಂಡ ದೇವೆರಾತ್ಮೊಡ್ದು ಉಂಡಾಪಿನ ಫಲ ದಾನೆಂದ್ಂಡ ಪ್ರೀತಿ, ಸಂತೋಷ, ಸಮಾಧಾನ, ತಾಳ್ಮೆ, ಉಪಕಾರ, ಎಡ್ಡೆತನ, ನಂಬಿಕೆ, ಸಜ್ಜನಿಗೆ, ಬೊಕ್ಕ ಕಷ್ಟ ತಡೆತೊನುನವು ಇಂಚಿತ್ತಿನವೇ.

23ಇಂಚಿತ್ತಿನೆಕ್ಕ್ ವಾ ನ್ಯಾಯಕಟ್ಟ್‌ಲಾ ವಿರೋಧ ಮಲ್ಪುಜಿ.

24ಕ್ರಿಸ್ತ ಯೇಸುಗು ಸೇರ್ದಿನಾಕುಲು ತನ್ಕುಲೆ ಶರೀರಭಾವದ ಇಚ್ಚೆಲೆನ್ ಕ್ರುಸ್ಸುಗು ಪಾಡ್ದಿನಾಕುಲಾದುಲ್ಲೆರ್.

25ನಮ ಆತ್ಮಡ್ದ್ ಬದುಕುನಾಕುಲಾದ್ ಆತ್ಮಗ್ ಸರಿಯಾದ್ ನಡಪುಗ.

26ನಮ ಪೊಕ್ಕಡೆದ ಪುಗರಿಕೆಗ್ ಆಸೆ ಮಲ್ಪಂದೆ ಒರಿ ಒರಿಯಗ್ ಕೋಪ ಲಕ್ಕಾವಂದೆ, ಒರಿ ಒರಿಯಗ್ ಮಚ್ಚರ ಮಲ್ಪಂದೆ ಉಪ್ಪುಗ.

← Chapter 4 Jump to: Chapter 6 →