James 1

Tulu (ಪೊಸ ಒಡಂಬಡಿಕೆ)

Jump to: Chapter 2 →

1ದೇವೆರೆಗ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಗ್ಲಾ ದಾಸೆ ಆದುಪ್ಪು ಯಾಕೋಬು ಬೇತೆ ದೇಶೊಲೆಡ್ ಪರಡ್ದ್ ಉಪ್ಪುನ ಇಸ್ರಾಯೇಲ್‌ದ ಪದ್ರಾಡ್ ಗೋತ್ರೊಲೆಗ್ ಬರೆಪಿನಿ. ನಿಕ್ಲೆಗ್ ಎಡ್ಡೆ ಆವಡ್.

2ಎನ ಸಹೋದ್ರೆರೇ, ನಿಕ್ಲೆನ ನಂಬಿಕೆಗ್ ಆಪಿನ ಪರೀಕ್ಷೆ ತಾಳ್ಮೆನ್ ಪುಟ್ಟಾವುಂಡು ಅಂದ್‌ದ್ ತೆರಿಯೊಂದು, ನಿಕುಲು ತರತರತ ಭಂಗೊಡು ತಿಕ್ಕ್‌ದ್ ಬೂರ್ನಗ, ಅವು ಸಂತೋಷನೆ ಅಂದ್‌ದ್ ಎನ್ನೊನ್ಲೆ.

4ಆ ತಾಳ್ಮೆ ನಿಕ್ಲೆಡ ಪೂರ್ತಿ ಆದ್ ತೋಜಿದ್ ಬನ್ನಗ ನಿಕುಲು ಮಾತ ಎಡ್ಡೆ ಗುಣತಾಕುಲುಲಾ ಕಡಿಮೆದಾಂತಿನಾಕುಲುಲಾ ಆದುಪ್ಪುವರ್.

5ನಿಕ್ಲೆಡ್ ಗೇನ ಕಡಿಮೆ ಇತ್ತ್ಂಡ, ಅಂಚಿನಾಕುಲು ದೇವೆರೆಡ ನಟ್ಟೊನಡ್. ಆಯೆ ಅವೆನ್ ನಿಕ್ಲೆಗ್ ಕೊರುವೆ. ನಿಕುಲು ನಟ್ಟಿನೆಕ್ಕಾದ್ ಆಯೆ ನಿಕ್ಲೆಗ್ ಬೇಜಾರ್‌ದಾಂತೆ ಕೊರ್ಪೆ.

6ಆಂಡ ಸಂಶಯ ಮಲ್ಪಂದೆ ನಂಬಿಕೆಡ್ ನಟ್ಟೊಡು. ಸಂಶಯ ಮಲ್ಪುನಾಯೆ ಗಾಳಿಗ್ ಅಡಿಮೇಲ್ ಆಪಿ ಕಡಲ್ದ ಸೆರೆಕ್ಕ್ ಸಮ ಆದುಲ್ಲೆ.

7ಆಯೆ ಸ್ಥಿರ ಆದುಪ್ಪುಜೆ, ಅಂಚಿತ್ತಿನಾಯೆ ಕರ್ತವಡ್ದ್ ದಾದಾಂಡಲಾ ತಿಕ್ಕುಂಡು ಅಂದ್‌ದ್ ಎನ್ನುನ ಬೊಡ್ಚಿ.

8ಆಯೆ ರಡ್ಡ್ ಮನಸ್‌ದಾಯೆ ಆದ್ ಮಾತೆಟ್ಲಾ ಸ್ಥಿರದಾಂತಿನಾಯೆ ಆದುಲ್ಲೆ.

9ಬಡತನೊಡು ಉಪ್ಪು ಸಹೋದರೆ ಮಿತ್ತ ಸ್ಥಿತಿಕ್ಕ್ ಬತ್ತೆ ಅಂದ್‌ದ್ ಸಂತೋಷ ಮಲ್ಪಡ್.

10ಮಲ್ಲಾದಿಗೆ ಇತ್ತಿನಾಯೆ ದೇವೆರ್ ತನ್ಕ್ ಬಡತನ ಕೊರಿನೆಕ್ಕಾದ್ ಸಂತೋಷ ಮಲ್ಪಡ್. ದಾಯೆಗಂದ್ಂಡ, ಮಲ್ಲಾದಿಗೆ ಇತ್ತಿನಾಯೆ ಪಜಿರ್‌ದ ಪೂತ ಲೆಕ್ಕನೆ ನಾಶಾದ್ ಪೋಪೆ.

11ಎಂಚಂದ್ಂಡ, ಸೂರ್ಯೆ ಮೂಡ್ದು ದೊಂಬು ಹಾಕ್‌ನಗ ಪಜಿರ್ ನುಂಗುಂಡು, ಬೊಕ್ಕ ಪೂ ತಾಲ್ದ್ ಐತ ಪೊರ್ಲು ನಾಶಾದ್ ಪೋಪಿಲೆಕ್ಕ ಮಲ್ಲಾದಿಗೆ ಇತ್ತಿನಾಯೆಲಾ ತನ ಪ್ರಯತ್ನೊಲೆಡ್ ನಾಶಾದ್ ಪೋಪೆ.

12ಶೋಧನೆನ್ ಸಹಿಸೊಂದು ಸ್ಥಿರ ಆದುಪ್ಪುನಾಯೆ ಭಾಗ್ಯವಂತೆ; ಆಯೆ ತಕ್ಕದಾಯೆ ಅಂದ್‌ದ್ ತೋಜಿಯೆಡ ದೇವೆರೆನ್ ಪ್ರೀತಿ ಮಲ್ಪುನಾಕುಲೆಗ್ ವಾಗ್ದಾನ ಮಲ್ತ್‌ದಿನ ನಿತ್ಯಜೀವದ ಕಿರೀಟ ಆಯಗ್ ತಿಕ್ಕುಂಡು.

13ಏರೆಗ್ಲಾ ಶೋಧನೆ ಆನಗ, “ಎಂಕ್ ದೇವೆರೆಡ್ದ್ ಶೋಧನೆ ಬೈದ್‌ಂಡ್,” ಅಂದ್‌ದ್ ಪನಡೆ. ದೇವೆರ್ ಪಡಿಕೆಂತಿನೆಕ್ಕ್ ಸಮ್ಮಂಧದಾಯೆ ಅತ್ತ್, ಆಯೆ ಏರೆನ್ಲಾ ಶೋಧನೆ ಮಲ್ಪುಜೆ.

14ಆಂಡ ಪ್ರತಿಯೊರಿ ತನ ಸ್ವಂತ ದುರಾಶೆಗ್ ಬಲಿ ಆದ್ ತಿಕ್ಕ್‌ದ್ ಬೂರಿನೆಡ್ದಾದ್ ಶೋಧನೆ ಆಪುಂಡು.

15ಆ ದುರಾಶೆಲೆಡ್ದ್ ಪಾಪದ ಕ್ರಿಯೊಲು ಪುಟ್ಟುಂಡು. ಬೊಕ್ಕ ಪಾಪ ಪೂರ್ತಿ ಆದ್ ಮರಣೊನು ಕನಪುಂಡು.

16ಎನ ಪ್ರೀತಿದ ಸಹೋದ್ರೆರೇ, ಮೋಸೊಡು ಬೂರಡೆ.

17ಮಾತ ಎಡ್ಡೆಂತಿನವುಲಾ ಕುಂದೆಲ್‌ದಾಂತಿ ಉಡಿಗೆರೆಲಾ ಬೊಲ್ಪುಲೆನ್ ಉಂಡು ಮಲ್ತಿ ಪರಲೋಕದ ಅಮ್ಮೆ ಆದುಪ್ಪು ದೇವೆರೆಡ್ದ್ ಜತ್ತ್‌ದ್ ಬರ್ಪುಂಡು. ಆಯೆ ಏಪೊಗ್ಲಾ ಎಡ್ಡೆಂತಿನೆನೇ ಕೊರ್ಪಿನಾಯೆ, ಅತ್ತ್‌ಡ ಆಯೆ ನಿರೆಲ್‌ದ ಲೆಕ್ಕ ದುಂಬು ಪಿರ ಪೋಪಿನಾಯೆ ಅತ್ತ್.

18ತನ ಸತ್ಯ ಪಾತೆರೊನು ನಂಕ್ ಕೊರ್ದು ನಮನ್ ಪುಟ್ಟಾಯಿನೆಡ್ದ್ ನಮ ಆಯನ ಮಾತ ಸೃಷ್ಟಿಡ್ಲಾ ಆಯಗ್ ಸುರುತ್ತ ಫಲ ಆದುಲ್ಲ.

19ಎನ ಪ್ರೀತಿದ ಸಹೋದ್ರೆರೇ, ಉಂದೆನ್ ತೆರಿಯೊನ್ಲೆ, ಪ್ರತಿಯೊರಿಲಾ ಕೇನುನೆಕ್ಕ್ ಬೇಗ, ಪಾತೆರ್‌ನೆಕ್ಕ್ ಮೆಲ್ಲ ಬೊಕ್ಕ ಕೋಪೊಗು ನಿಧಾನಿ ಆದುಪ್ಪೊಡು.

20ದಾಯೆಗಂದ್ಂಡ, ನರಮಾನಿ ಕೋಪ, ದೇವೆರೆಗ್ ಮೆಚ್ಚಿಗೆ ಆದುಪ್ಪು ನೀತಿಗ್ ಸರಿ ಆದುಪ್ಪುಜಿ.

21ಅಂಚಾದ್ ನಿಕ್ಲೆ ಜೀವನೊಡ್ದು ಮಾತ ನೀಚತನೊನ್ಲಾ ದುಷ್ಟತನೊನ್ಲಾ ದೆತ್ತ್‌ದ್ ಪಾಡ್ದ್, ದೇವೆರ್ ನಿಕ್ಲೆ ಉಡಲ್‌ಡ್ ದೀತಿನ ಪಾತೆರೊಗು ದೀನತೆಡ್ ಇಡೆ ಕೊರ್ಲೆ, ದಾಯೆಗಂದ್ಂಡ ನಿಕ್ಲೆನ ಆತ್ಮೊನು ರಕ್ಷಣೆ ಮಲ್ಪುನ ಶಕ್ತಿ ಆ ಪಾತೆರೊಗು ಉಂಡು.

22ಆಂಡ ದೇವೆರೆ ಪಾತೆರೊನು ಕೇನುನು ಮಾತ್ರ ಅತ್ತಂದೆ, ಅವು ದಾನೆ ಪನ್ಪುಂಡು ಅಂಚೆನೇ ನಡಪುನಾಕುಲು ಆದುಪ್ಪುಲೆ, ಇಜ್ಜಾಂಡ ನಿಕುಲು ನಿಕ್ಲೆಗೇ ಮೋಸ ಮಲ್ತೊಂದುಪ್ಪುವರ್.

23ಏರಾಂಡಲಾ ದೇವೆರೆ ಪಾತೆರೊನು ಕೇಂಡ್ದ್ ಐಕ್ ತಕ್ಕ ನಡತಿಜಿಡ, ಆಯೆ ತನ ಮೋನೆನ್ ಕನ್ನಡಿಡ್ ತೂಪಿ ನರಮಾನಿಗ್ ಸಮ ಆದುಲ್ಲೆ.

24ಅಂಚಿತ್ತಿನಾಯೆ ತನನ್ ತೂದು ಪಿದಾಡ್ದ್ ಪೋಯಿ ಕೂಡ್ಲೆ ತಾನ್ ಎಂಚ ಇತ್ತೆ ಅಂದ್‌ದ್ ಅಪಗನೆ ಮದತ್‌ದ್ ಬುಡ್ಪೆ.

25ಆಂಡ ತನನ್ ಬುಡುಗಡೆ ಮಲ್ಪುನ ನ್ಯಾಯಕಟ್ಟ್‌ಗ್ ಬುದ್ಧಿ ಕೊರ್ದು ಕೇಂಡಿನೆನ್ ಮದಪಂದೆ, ಐತ ಪ್ರಕಾರ ನಡಪುನಾಯೆ ಆದುಲ್ಲೆಡ ದೇವೆರ್ ಆಯನ್ ಆಶೀರ್ವದಿಪುವೆ.

26ಏರಾಂಡಲಾ ತನ ನಾಲಯಿಗ್ ಕಡಿವಾಣ ಪಾಡಂದೆ, ಭಕ್ತೆ ಅಂದ್‌ದ್ ಎನ್ನುನಾಯೆ ತನ ಉಡಲ್‌ಗ್ ಮೋಸ ಮಲ್ತೊಂದುಪ್ಪುವೆ. ಆಯನ ಭಕ್ತಿ ವ್ಯರ್ಥ ಆದುಂಡು.

27ಸಂಕಟೊಡು ಬೂರ್ದು ದಿಕ್ಕ್‌ದಾಂತಿನಾಕುಲೆನ್ಲಾ ವಿಧವೆರೆನ್ಲಾ ಪರಾಂಬರಿತ್‌ದ್, ಲೋಕದ ದೋಷ ಆಯಗ್ ತಾಗಂದಿಲೆಕ್ಕ ಕಾಪುನವೇ ಅಮ್ಮೆ ಆದುಪ್ಪು ದೇವೆರೆ ಎದುರುಡು ಶುದ್ಧಲಾ ಮೈಲೆದಾಂತಿನವುಲಾ ಆದುಪ್ಪು ಭಕ್ತಿ.

Jump to: Chapter 2 →