James 5

Tulu (ಪೊಸ ಒಡಂಬಡಿಕೆ)

← Chapter 4 Jump to:

1ಐಶ್ವರ್ಯವಂತೆರೇ, ಇಂಚಿ ಕೇನ್ಲೆ, ನಿಕ್ಲೆಗ್ ಬರಿಯೆರೆ ಉಪ್ಪುನ ಭಯಂಕರ ಉಪದ್ರೊಲೆಗಾದ್ ಕಣ್ಣೀರ್ ದೀದ್ ಬುಲ್ಪುಲೆ.

2ನಿಕ್ಲೆ ಐಶ್ವರ್ಯ ಹಾಳಾದ್ ಪೋತುಂಡು ಬೊಕ್ಕ ನಿಕ್ಲೆನ ಎಡ್ಡೆ ಕುಂಟುಲು ಕುಟ್ಟೆ ತಿಂದ್‌ದ್ ಪೋತುಂಡು.

3ನಿಕ್ಲೆನ ಬೊಳ್ಳಿ ಬಂಗಾರೊಗು ಕಲೆಂಗ್ ಪತ್ತ್‌ದ್ಂಡ್. ಐತ ಕಲೆಂಗ್ ನ್ಯಾಯತೀರ್ಪುದ ದಿನೊಟು ನಿಕ್ಲೆಗ್ ವಿರೋಧಾದ್ ಸಾಕ್ಷಿ ಆದ್ ಉಂತುಂಡು. ಆ ಕಲೆಂಗ್ ನಿಕ್ಲೆ ಶರೀರೊನು ತೂತ ಲೆಕ್ಕ ತಿಂದ್‌ದ್ ಪಾಡುಂಡು. ಅಂತ್ಯದಿನೊಕುಲೆಗ್ ನಿಕುಲು ಸಂಪೊತ್ತುನು ಕೂಡಾವೊಂಡರ್.

4ಕೇನ್ಲೆ, ಮಜೂರಿ ಕೊರಂದೆ ನಿಕುಲು ಕಂಡದ ಬೇಲೆದಾಕುಲೆಗ್ ಮೋಸ ಮಲ್ತ್‌ದರ್, ಅಕುಲು ಬುಲ್ಪುವೆರ್. ಅಕ್ಲೆನ ಬುಲ್ಪು ಪರಲೋಕ ಸೈನ್ಯದ ಕರ್ತವ ಕೆಬಿಕ್ ಬೂರ್ದುಂಡು.

5ಭೂಮಿದ ಮಿತ್ತ್ ನಿಕುಲು ಸಂಭ್ರಮೊಡು ಬೊಕ್ಕ ಮನಸ್ ಬತ್ತಿಲೆಕ್ಕ ನಡತೊಂಡರ್. ಬಲಿ ಕೊರ್ಪಿನ ದಿನೊಟು ನಿಕ್ಲೆ ಉಡಲ್‌ನ್ ಸೊರ್ಕಾವೊಂದರ್.

6ನಿಕುಲು ನೀತಿವಂತನ್ ಕಂಡಿಸಾದ್ ಕೆರ್ದ್ ಪಾಡಿಯರ್. ಆಯೆ ನಿಕ್ಲೆಗ್ ಎದುರುಂತುಜೆ.

7ಸಹೋದ್ರೆರೇ, ಕರ್ತವೆ ಬನ್ನಮುಟ್ಟ ತಾಳ್ಮೆಡ್ ಕಾತೊಂದುಪ್ಪುಲೆ. ಬೆನ್ನಿದಾಯನ್ ತೂಲೆ, ಆಯೆ ಭೂಮಿದ ಎಡ್ಡೆ ಫಲೊನು ಕಾತೊಂದು, ಸುರುತ್ತ ಬರ್ಸೊಗ್ಲಾ ಅಕೇರಿದ ಬರ್ಸೊಗ್ಲಾ ತಾಳ್ಮೆಡ್ ಕಾತೊಂದುಪ್ಪುವೆ.

8ನಿಕುಲುಲಾ ಅಂಚೆನೇ ತಾಳ್ಮೆಡುಪ್ಪುಲೆ. ನಿಕ್ಲೆ ಉಡಲ್‌ನ್ ಸ್ಥಿರ ಮಲ್ತೊನ್ಲೆ, ದಾಯೆಗಂದ್ಂಡ, ಕರ್ತವೆ ಬರ್ಪಿ ದಿನ ಕೈತಲ್‌ ಉಂಡು.

9ಸಹೋದ್ರೆರೇ, ನಿಕ್ಲೆಗ್ ನ್ಯಾಯತೀರ್ಪು ಆವಂದಿಲೆಕ್ಕ ಒರಿಯಗ್ ಒರಿ ಗುಣುಗುಟ್ಟಡೆ. ತೂಲೆ, ನ್ಯಾಯಾಧಿಪತಿ ಬಾಕಿಲ್‌ಡೇ ಉಲ್ಲೆ.

10ಸಹೋದ್ರೆರೇ, ಕರ್ತವ ಪುದರ್‌ಡ್ ಪಾತೆರಿ ಪ್ರವಾದಿಲೆನ್ ನೆನೆಪು ಮಲ್ತೊನ್ಲೆ. ಭಂಗೊನು ತಾಳ್ಮೆಡ್ ತಾಳೊನುನೆಟ್ ಅಕ್ಲೆನ್ ಮಾದ್ರಿ ಆದ್ ಮಲ್ತೊನ್ಲೆ.

11ಇಂದಾ, ತಾಳ್ಮೆಡ್ ತಾಳೊನುನಾಕುಲು ಅಂದ್‌ದ್ ನಮ ಪನ್ಪ. ಯೋಬನ ತಾಳ್ಮೆದ ಸಂಗತಿಡ್ ಕೇನ್ಲೆ, ಕರ್ತವೆ ಕಡೆಕ್ಕ್ ಆಯಗ್ ಮಲ್ತಿನೆನ್ ತೂಲೆ, ಕರ್ತವೆ ದಿಂಜ ಕನಿಕರದಾಯೆಲಾ ಕರುಣೆದಾಯೆಲಾ ಆದುಲ್ಲೆ.

12ಎನ ಸಹೋದ್ರೆರೇ, ಆಜ ಪಾಡಡೆ, ಪರಲೋಕದ ಮಿತ್ತ್ ಆವಡ್, ಭೂಮಿದ ಮಿತ್ತ್ ಆವಡ್, ಬೇತೆ ಒಯಿತಾಂಡಲಾ ಮಿತ್ತ್ ಆವಡ್ ಆಜ ಪಾಡಡೆ. ನಿಕ್ಲೆನ ಪಾತೆರ ಅಂದ್ ಆದಿತ್ತ್ಂಡ ಅಂದ್, ಅತ್ತ್ ಆದಿತ್ತ್ಂಡ ಅತ್ತ್ ಆದುಪ್ಪಡ್. ಇಂಚಾಂಡ ನಿಕುಲು ನ್ಯಾಯತೀರ್ಪುಗು ಸೇರುಜರ್.

13ನಿಕ್ಲೆಡ್ ಒರಿ ಭಂಗೊಡು ಉಲ್ಲೆನಾ ಆಯೆ ಪ್ರಾರ್ಥನೆ ಮಲ್ಪಡ್, ಒರಿ ಸಂತೋಷೊಡು ಉಲ್ಲೆನಾ ಆಯೆ ದೇವೆರೆಗ್ ಸ್ತುತಿರಾಗ ಮಲ್ಪಡ್.

14ನಿಕ್ಲೆಡ್ ಏರಾಂಡಲಾ ಸೀಕ್‌ಡ್ ಉಲ್ಲೆರಾ? ಆಯೆ ಸಭೆತ ಹಿರಿಯೆರೆನ್ ಬರಿಯೆರೆ ಪನಡ್, ಅಕುಲು ಬತ್ತ್‌ದ್ ಕರ್ತವ ಪುದರ್‌ಡ್ ಎಣ್ಣೆ ಪೂಜಿದ್, ಆಯಗಾದ್ ಪ್ರಾರ್ಥನೆ ಮಲ್ಪಡ್.

15ನಂಬಿಕೆಡ್ ಮಲ್ತಿನ ಪ್ರಾರ್ಥನೆ ಸೀಕ್‌ದಾಯನ್ ಗುಣ ಮಲ್ಪುಂಡು ಬೊಕ್ಕ ಕರ್ತವೆಲಾ ಆಯನ್ ಗುಣ ಮಲ್ಪುವೆ. ಆಯೆ ಪಾಪ ಮಲ್ತ್‌ದಿತ್ತ್‌ಂಡ ಆಯಗ್ ಬುಡುಗಡೆ ಆಪುಂಡು.

16ಅಂಚಾದ್ ನಿಕುಲು ಗುಣ ಆವೊಡಾಂಡ ನಿಕ್ಲೆನ ಪಾಪೊಲೆನ್ ಒರಿಯಗ್ ಒರಿ ಅರಿಕೆ ಮಲ್ತೊಂದು ಒರಿಯಗ್ ಬೋಡಾದ್ ಒರಿ ಪ್ರಾರ್ಥನೆ ಮಲ್ಪುಲೆ. ನೀತಿವಂತನ ಅತ್ಯಾಸಕ್ತಿದ ಪ್ರಾರ್ಥನೆ ಬಾರಿ ಬಲತ್ತವು ಆದುಂಡು.

17ಎಲೀಯೆ ನಮ ಲೆಕ್ಕಂತಿ ಸ್ವಭಾವದ ಒರಿ ನರಮಾನಿ ಆದಿತ್ತೆ. ಆಂಡ ಆಯೆ ಪ್ರಾರ್ಥನೆದ ಮಿತ್ತ್ ಪ್ರಾರ್ಥನೆ ಮಲ್ಪುನಗ ಮೂಜಿ ವರ್ಸ ಆಜಿ ತಿಂಗೊಲು ಭೂಮಿದ ಮಿತ್ತ್ ಬರ್ಸನೇ ಬತ್ತ್‌ಜಿ.

18ಬೊಕ್ಕ ಆಯೆ ಕುಡ ಪ್ರಾರ್ಥನೆ ಮಲ್ಪುನಗ ಬಾನೊಡ್ದು ಬರ್ಸ ದೊರಿಂಡ್, ಭೂಮಿಡ್ ಬುಲೆ ಬುಲೆಂಡ್.

19ಎನ ಸಹೋದ್ರೆರೇ, ನಿಕ್ಲೆಡ್ ಏರಾಂಡಲಾ ಒರಿ ಸತ್ಯೊನು ಬುಡ್ದು ದೂರ ಪೋಯೆಡ, ಅಂಚಿತ್ತಿನಾಯನ್ ಕುಡ ಪಿರ ಕನಲೆ.

20ಒರಿ ಪಾಪಿನ್ ತತ್ತಿ ಸಾದಿಡ್ದ್ ಪಿರ ಕನ ಬತ್ತಿನಾಯೆ, ಆಯನ ಆತ್ಮೊನು ಮರಣೊಡ್ದು ತಪ್ಪಾದ್, ಆಯನ ಲೆಕ್ಕದಾಂತಿ ಪಾಪೊಲೆಗ್ ಮಾಪು ತಿಕ್ಕುಂಡು ಅಂದ್‌ದ್ ತೆರಿಯೊನಡ್.

← Chapter 4 Jump to: