James 2

Tulu (ಪೊಸ ಒಡಂಬಡಿಕೆ)

← Chapter 1 Jump to: Chapter 3 →

1ಎನ ಸಹೋದ್ರೆರೇ, ಮೈಮೆದ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ ನಂಬಿಕೆ ದೀತಿನಕುಲಾದುಪ್ಪು ನಿಕುಲು ಭೇದಭಾವ ಮಲ್ಪೆರೆ ಬಲ್ಲಿ.

2ಎಂಚಂದ್ಂಡ, ಒರಿ ಬಂಗಾರ್‌ದ ಉಂಗಿಲ, ಎಡ್ಡೆ ಕುಂಟುನು ಪಾಡೊಂದು ಬೊಕ್ಕೊರಿ ಬಡವೆ ಮೈಲೆ ಕುಂಟು ಪಾಡೊಂದು ನಿಕ್ಲೆ ಸಭೆಕ್ ಬನ್ನಗ,

3ನಿಕುಲು ಎಡ್ಡೆ ಕುಂಟು ಪಾಡ್ದಿನಾಯಗ್, “ಮರ್ಯಾದಿ ಕೊರ್ದು ಎದುರುಡು ಕುಲ್ಲಾದ್,” ಬೊಕ್ಕ ಬಡವಗ್, “ಈ ಅಲ್ಪ ದೂರೊಡು ಉಂತುಲ, ಇಜ್ಜಾಂಡ ಎನ ಕಾರಕೈತಲ್ ಕುಲ್ಲುಲ,” ಅಂದ್‌ದ್ ಪಂಡರ್ಡ,

4ನಿಕುಲು ನಿಕ್ಲೆ ಉಲಯಿ ಭೇದಭಾವ ಮಲ್ತ್‌ದ್, ಹಾಳ್ ಆಲೋಚನೆಡ್ದ್ ತೀರ್ಪು ಮಲ್ಪುನಾಕುಲು ಆಯರತ್ತಾ?

5ಎನ ಪ್ರೀತಿದ ಸಹೋದ್ರೆರೇ ಕೇನ್ಲೆ, ದೇವೆರ್ ಈ ಲೋಕದ ಬಡವನ್ ಅಜತ್‌ದ್ ನಂಬಿಕೆಡ್ ಐಶ್ವರ್ಯವಂತೆ ಆದ್ ಮಲ್ತ್‌ದಿಜೆನಾ? ತನನ್ ಪ್ರೀತಿ ಮಲ್ಪುನಾಕುಲೆಗ್ ದೇವೆರ್ ವಾಗ್ದಾನ ಮಲ್ತ್‌ದಿನ ಪರಲೋಕ ರಾಜ್ಯ ಅಕ್ಲೆಗ್ಲಾ ಅಕ್ಲೆನ ಸ್ವಂತ ಆದ್ ತಿಕ್ಕುಂಡತ್ತಾ?

6ನಿಕುಲಾಂಡಲಾ ಬಡವೆರೆಗ್ ಅವಮಾನ ಮಲ್ಪುವರ್ ಅತ್ತಂದೆ ನಿಕ್ಲೆನ್ ಬಲಾತ್ಕಾರೊಡು ನ್ಯಾಯಾಲಯೊಗು ಒಯ್ಪುನಾಕುಲು ಐಶ್ವರ್ಯವಂತೆರೇ ಅತ್ತಾ?

7ನಿಕುಲು ಆರಾಧನೆ ಮಲ್ಪುನ ಕ್ರಿಸ್ತನ ಎಡ್ಡೆ ಪುದರ್‌ನ್ ದೂಷಿಯುನಾಕುಲು ಅಕುಲೇ ಅತ್ತಾ?

8ಆಂಡಲಾ ನ್ಯಾಯಕಟ್ಟ್‌ಗ್ ಸರಿಯಾದ್ ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪೊಡು ಇನ್ಪಿನ ರಾಜ ನಿಯಮೊಲೆನ್ ಕೈಕೊನುವರ್ಡ ನಿಕುಲು ಎಡ್ಡೆಂತಿನೆನ್ ಮಲ್ಪುನಾಕುಲು ಆದುಲ್ಲರ್.

9ಆಂಡ ನಿಕುಲು ಭೇದಭಾವ ಮಲ್ಪುನಾಕುಲು ಆದಿತ್ತ್ಂಡ ಪಾಪ ಮಲ್ಪುನಾಕುಲು ಆದಿತ್ತ್‌ದ್ ಅಪರಾಧಿಲು ಅಂದ್‌ದ್ ನ್ಯಾಯಕಟ್ಟ್‌ಡ್ದ್‌ ನಿಕ್ಲೆಗ್ ತೀರ್ಪು ಆಪುಂಡು.

10ದಾಯೆಗಂದ್ಂಡ, ಒರಿ ಇಡೀ ನ್ಯಾಯಕಟ್ಟ್‌ದ ಲೆಕ್ಕ ನಡತ್‌ದ್ ಒಂಜೆಟ್ಟ್ ತತ್ತೆಡ, ಆಯೆ ಮಾತೆಟ್ಲಾ ತತ್ತಿನಾಯೆ ಆದುಲ್ಲೆ.

11ದಾಯೆಗಂದ್ಂಡ, “ವ್ಯಭಿಚಾರ ಮಲ್ಪೆರೆ ಬಲ್ಲಿ” ಪಂಡಿನ ಅವ್ವೇ ದೇವೆರ್, “ಕೆರಿಯೆರೆ ಬಲ್ಲಿ” ಪಂಡ್ದ್‌ಲಾ ಪನ್ತೆ. ಅಂಚಾದ್ ಈ ವ್ಯಭಿಚಾರ ಮಲ್ತ್‌ಜಿಡಲಾ ಒರಿಯನ್ ಕೆರಿಯಡ, ನ್ಯಾಯಕಟ್ಟ್‌ಗ್ ತತ್ತಿನಾಯೆ ಆದುಲ್ಲ.

12ಅಂಚಾದ್ ನಿಕ್ಲೆನ್ ಬುಡುಗಡೆ ಮಲ್ಪುನ ನ್ಯಾಯಕಟ್ಟ್‌ಡ್ದೇ ನಿಕ್ಲೆಗ್ ತೀರ್ಪು ಆಪುಂಡು ಇನ್ಪಿನೆನ್ ತೆರಿಯೊಂದು ಐಕ್ ತಕ್ಕ ಪಾತೆರ್ಲೆ, ಕಾರ್ಯ ಮಲ್ಪುಲೆ.

13ದಾಯೆಗಂದ್ಂಡ, ಕರುಣೆ ತೋಜಾವಂದಿನಾಯಗ್ ಕರುಣೆ ತಿಕ್ಕಂದ್. ಆಂಡ ಈ ಕರುಣೆ ತೋಜಾಯಡ, ದೇವೆರ್ ನಿನನ್ ನ್ಯಾಯತೀರ್ಪು ಮಲ್ಪುನಗ ನಿಕ್ಕ್ ಕರುಣೆ ತೋಜಾವೆ.

14ಎನ ಸಹೋದ್ರೆರೇ, ನಿಕ್ಲೆಡ್ ಒರಿ ನಂಬಿಕೆ ಉಂಡು ಅಂದ್‌ದ್ ಪನೊಂದು, ಆಯ ಕ್ರಿಯೊಲೆಡ್ ಅವು ತೋಜಿದ್ ಬತ್ತ್‌ಜಿಡ ದಾನೆ ಪ್ರಯೋಜನ? ಅಂಚಿತ್ತಿ ನಂಬಿಕೆ ಆಯನ್ ರಕ್ಷಣೆ ಮಲ್ಪುಂಡಾ?

15ಒರಿ ಸಹೋದ್ರಗ್ ಅತ್ತ್‌ಡ ಸಹೋದ್ರಿಗ್ ಕುಂಟು, ದಿನತ ಪಡಿ ದಾಂತೆ ಉಪ್ಪುನಗ,

16ನಿಕ್ಲೆಡ್ ಒರಿ ಅಕ್ಲೆ ಶರೀರೊಗು ಬೋಡಾಪಿನೆನ್ ಕೊರಂದೆ, ಸಮಾಧಾನೊಡು ಪೋಲೆ, ಚಳಿ ಕೈತೊನ್ಲೆ, ಬಂಜಾರ ಉನ್ಲೆ ಅಂದ್‌ದ್ ಪಾತೆರೊಡು ಪಂಡ್ಂಡ ದಾನೆ ಪ್ರಯೋಜನ?

17ಅಂಚಿನ ಕ್ರಿಯೊಲುದಾಂತಿನ ನಂಬಿಕೆ ತನಡ ಜೀವದಾಂತಿನವು ಆದುಂಡು.

18ಆಂಡ ಏರಾಂಡಲಾ ಒರಿ, “ಒರಿಯಡ ನಂಬಿಕೆ ಉಂಡು, ಬೊಕ್ಕೊರಿಯಡ ಕ್ರಿಯೊಲು ಉಂಡು” ಅಂದ್‌ದ್ ಪನ್ಪೆ. ಆಂಡ ಎನ ಉತ್ತರ, “ಏರಾಂಡಲಾ ಕ್ರಿಯೊಲಿಜ್ಜಂದೆ ನಂಬಿಕೆನ್ ಎಂಚ ತೋಜಾವೊಲಿ, ಯಾನ್ ಎನ ಕ್ರಿಯೊಲೆಡ್ ನಂಬಿಕೆನ್ ನಿಕ್ಕ್ ತೋಜಾವೆ,” ಅಂದ್‌ದ್ ಪನುವೆ ಅತ್ತಾ?

19ಒರಿಯೇ ದೇವೆರ್ ಉಲ್ಲೆ ಅಂದ್‌ದ್ ಈ ನಂಬುವನಾ? ಅವು ಎಡ್ಡೆನೇ. ದೆವ್ವೊಲುಲಾ ಉಂದೆನ್ ನಂಬುದು ಪೋಡಿಗೆಡ್ ನಡುಗುವ.

20ಓ ಬುದ್ಧಿದಾಂತಿನಾಯಾ, ಕ್ರಿಯೆದಾಂತಿ ನಂಬಿಕೆ ವ್ಯರ್ಥ ಆದುಂಡು ಪನ್ಪಿನೆಕ್ಕ್ ದೃಷ್ಟಾಂತ ಬೋಡಾ?

21ನಮ ಅಮ್ಮೆ ಆಯಿ ಅಬ್ರಹಾಮು ತನ ಮಗೆ ಇಸಾಕನ್ ಬಲಿಪೀಠದ ಮಿತ್ತ್ ಅರ್ಪಣೆ ಮಲ್ಪುನಗ ನೀತಿದಾಯೆ ಅಂದ್‌ದ್ ತೀರ್ಪು ಪಡೆಯಿನಿ ನಂಬಿಕೆದ ಕ್ರಿಯೊಲೆಡ್ದೇ ಅತ್ತಾ?

22ಆಯನ ನಂಬಿಕೆಲಾ ಕ್ರಿಯೊಲುಲಾ ಅಲ್ಪ ಒಟ್ಟಾದ್ ಬೇಲೆ ಮಲ್ತ್ಂಡ್. ಆಯನ ಕ್ರಿಯೊಲೆಡ್ದಾದ್ ಆಯನ ನಂಬಿಕೆ ಪೂರ್ತಿ ಆಂಡ್ ಅಂದ್‌ದ್ ತೋಜುಂಡತ್ತಾ.

23ಅಬ್ರಹಾಮು ದೇವೆರೆನ್ ನಂಬಿಯೆ. ಬೊಕ್ಕ ಆ ನಂಬಿಕೆನೇ ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್ ಪನ್ಪಿನ ಶಾಸ್ತ್ರದ ಪಾತೆರ ಇಂಚ ಪೂರ್ತಿ ಆಂಡ್. ಬೊಕ್ಕ ದೇವೆರೆ ಸ್ನೇಹಿತೆ ಪನ್ಪಿನ ಪುದರ್ ಆಯಗ್ ಬತ್ತ್ಂಡ್.

24ನರಮಾನಿ ಕ್ರಿಯೊಲೆಡ್ದ್ ನೀತಿದಾಯೆ ಅಂದ್‌ದ್ ತೀರ್ಪು ಪಡೆಪೆ ಅತ್ತಂದೆ ಬಜೀ ನಂಬಿಕೆಡ್ದೇ ಅತ್ತ್ ಅಂದ್‌ದ್ ತೂಪರ್.

25ಅವ್ವೇ ರೀತಿಡ್ ವೇಶ್ಯೆ ರಹಾಬುಲಾ ಗೂಢಾಚಾರೆರೆನ್ ತನ ಇಲ್ಲಡ್ ಸೇರಾವೊಂದು, ಬೇತೆ ಸಾದಿಡ್ ಅಕ್ಲೆನ್ ಕಡಪುಡ್ದು ಕೊರ್ದು ಕ್ರಿಯೊಲೆಡ್ದ್ ನೀತಿವಂತೆದಿ ಅಂದ್‌ದ್ ತೀರ್ಪು ಪಡೆಯಲ್ ಅತ್ತಾ?

26ಆತ್ಮದಾಂತಿ ಶರೀರ ಎಂಚ ಜೀವದಾಂತಿನವು ಆದುಂಡಾ, ಅಂಚೆನೇ ಕ್ರಿಯೆದಾಂತಿ ನಂಬಿಕೆಲಾ ಜೀವದಾಂತಿನವು ಆದುಂಡು.

← Chapter 1 Jump to: Chapter 3 →