John 1

Tulu (ಪೊಸ ಒಡಂಬಡಿಕೆ)

Jump to: Chapter 2 →

1ಆದಿಡ್ ವಾಕ್ಯ ಇತ್ತ್ಂಡ್, ಆ ವಾಕ್ಯ ದೇವೆರೆ ಕೈತಲ್ ಇತ್ತ್ಂಡ್, ಆ ವಾಕ್ಯ ದೇವೆರ್ ಆದಿತ್ತ್ಂಡ್.

2ಆ ವಾಕ್ಯ ಪನ್ಪಿನಾಯೆ ಆದಿಡ್ ದೇವೆರೆ ಕೈತಲ್ ಇತ್ತೆ.

3ಆಯಡ್ದ್ ಮಾತ ವಸ್ತುಲಾ ಉಂಡಾತ್ಂಡ್. ಉಂಡಾಯಿನ ವಸ್ತುಡು ಆಯೆದಾಂತೆ ಒಂಜಿಲಾ ಉಂಡಾಯಿಜಿ.

4ಆಯಡ ಜೀವ ಇತ್ತ್ಂಡ್, ಆ ಜೀವ ನರಮಾನಿಲೆಗ್ ಬೊಲ್ಪು ಆದಿತ್ತ್ಂಡ್.

5ಆ ಬೊಲ್ಪು ಕತ್ತಲೆಡ್ ಮಿಂಚೊಂದಿತ್ತ್‌ಂಡ್ ಕತ್ತಲೆ ಅವೆನ್ ದೆಂಗಾಯಿಜಿ.

6ದೇವೆರ್ ಒರಿ ನರಮಾನಿನ್ ಕಡಪುಡಿಯೆ. ಆಯನ ಪುದರ್ ಯೋಹಾನೆ. ಆ ಯೋಹಾನೆ ಸಾಕ್ಷಿಗಾದ್ ಬತ್ತೆ, ಮಾತೆರ್ಲಾ ನಂಬೊಡು ಅಂದ್‌ದ್ ಆ ಬೊಲ್ಪುದ ಸಂಗತಿಡ್ ಸಾಕ್ಷಿ ಕೊರಿಯೆರೆ ಬತ್ತೆ.

8ಆಯೆ ಆ ಬೊಲ್ಪು ಆದಿತ್ತಿಜೆ, ಆಂಡ ಆ ಬೊಲ್ಪುದ ಸಂಗತಿಡ್ ಸಾಕ್ಷಿ ಕೊರಿಯೆರೆಗಾದ್ ಬತ್ತೆ.

9ನಿಜವಾಯಿನ ಬೊಲ್ಪು ಲೋಕೊಗು ಬರಿಯೆರೆ ಇತ್ತ್ಂಡ್. ಆ ಬೊಲ್ಪೇ ಪ್ರತಿ ಒರಿಯಗ್ ಬೊಲ್ಪು ಕೊರ್ಪಿನವು ಆದಿತ್ತ್ಂಡ್.

10ಆಯೆ ಲೋಕೊಡಿತ್ತೆ. ಲೋಕ ಆಯಡ್ದೇ ಉಂಡಾಂಡ್, ಆಂಡಲಾ ಲೋಕ ಆಯನ್ ತೆರಿಯಿಜಿ.

11ಆಯೆ ತನ ಸ್ವಂತದಾಕುಲೆ ಕೈತಲ್‌ ಬತ್ತೆ. ಆಂಡ ಆಯನ ಸ್ವಂತದಾಕುಲು ಆಯನ್ ಅಂಗೀಕಾರ ಮಲ್ತ್‌ಜೆರ್.

12ಆಂಡ ಏರೇರ್ ಆಯನ್ ಅಂಗೀಕಾರ ಮಲ್ತೊಂಡೆರಾ, ಆಯನ ಪುದರ್‌ಡ್ ನಂಬಿಕೆ ದೀಯೆರಾ ಅಕ್ಲೆಗ್ ದೇವೆರೆ ಬಾಲೆಲಾಪಿ ಅಧಿಕಾರ ಕೊರಿಯೆ.

13ಮೊಕುಲು ನೆತ್ತೆರ್‌ದ ಸಮ್ಮಂಧೊಡ್ದು ಆವಡ್, ಶರೀರ ಸಮ್ಮಂಧೊಡ್ದು ಆವಡ್, ನರಮಾನಿಲೆ ಸಂಕಲ್ಪೊಡ್ದು ಆವಡ್ ಪುಟ್ಟುದಿನಾಕುಲತ್ತ್ ಆಂಡ ದೇವೆರೆಡ್ದೇ ಪುಟ್ಟಿನಾಕುಲು.

14ಆ ವಾಕ್ಯ ಪನ್ಪಿನಾಯೆ ನರಮಾನಿ ರೂಪೊಡು ನಮ ನಡುಟು ಬದ್‌ಕಿಯೆ. ನಮ ಆಯನ ಮೈಮೆನ್ ತೂಯ. ಆ ಮೈಮೆ ಅಮ್ಮೆರೆಡ್ದ್ ಬತ್ತಿತ್ತಿ ಒರಿಯೇ ಮಗಕ್ಕ್ ಉಪ್ಪೊಡಾಯಿ ಮೈಮೆ. ಆಯೆ ದಯೊಟ್ಲಾ ಸತ್ಯೊಡ್ಲಾ ದಿಂಜಿದಿನಾಯೆ ಆದಿತ್ತೆ.

15ಯೋಹಾನೆ ಆಯ ಸಂಗತಿಡ್ ಸಾಕ್ಷಿ ಕೊರ್ಪೆ ಎಂಚಂದ್ಂಡ, “ಎನಡ್ದ್ ಬೊಕ್ಕ ಬರ್ಪಿನಾಯೆ, ಎನಡ್ದ್ ದುಂಬೇ ಇತ್ತಿನೆಡ್ದ್ ದುಂಬುದಾಯೆ ಆಯೆ, ಪಂಡ್ದ್ ಯಾನ್ ಪಂಡಿನಾಯೆ ಇಂಬೆನೇ.” ಬೊಬ್ಬೆ ದೀದ್ ಪಂಡೆ.

16ನಮ ಮಾತೆರ್ಲಾ ಆಯನ ದಿಂಜಿದಿ ದಯೊಟ್ಟು ದಯತ ಮಿತ್ತ್ ದಯ ಪಡೆವೊಂಡ.

17ದೇವೆರ್ ನ್ಯಾಯಕಟ್ಟ್‌ನ್ ಮೋಶೆಡ್ದ್ ಕೊರಿಯೆ, ಆಂಡ ದಯಲಾ ಸತ್ಯಲಾ ಯೇಸು ಕ್ರಿಸ್ತಡ್ದ್ ತಿಕ್ಕ್ಂಡ್.

18ದೇವೆರೆನ್ ಏರ್ಲಾ ಏಪಲಾ ತೂತುಜೆರ್. ಆಂಡ ಅಮ್ಮೆ ಮರ್ಗಿಲ್‌ಡುಪ್ಪು ಒರಿಯೇ ಮಗೆ ದೇವೆರೆನ ಗುರ್ತ ತೆರಿಪಾಯೆ.

19ಯೋಹಾನೆ ಕೊರಿನ ಸಾಕ್ಷಿ ದಾನೆಂದ್ಂಡ, ಯೆಹೂದ್ಯೆರ್ ಯೆರೂಸಲೇಮುಡ್ದು ಯಾಜಕೆರೆನ್ಲಾ ಲೇವಿಯೆರೆನ್ಲಾ ಯೋಹಾನನ ಕೈತಲ್ ಕಡಪುಡ್ದು, “ಈ ಏರ್,” ಅಂದ್‌ದ್ ಕೇಂಡಿನೆಕ್ಕ್,

20ಯೋಹಾನೆ ಮದೆಮಲ್ಪಂದೆ, “ಯಾನ್ ಕ್ರಿಸ್ತೆ ಅತ್ತ್,” ಅಂದ್‌ದ್ ಮಾತೆರೆ ಎದುರುಡ್ ಪಂಡೆ.

21“ಅಂಚಾಂಡ ಈ ಏರ್?” ಈ ಎಲೀಯೆನಾ? ಅಂದ್‌ದ್ ಅಕುಲು ಕೇನ್ನಗ, ಅತ್ತ್ ಪಂಡೆ. “ಈ ಬರಿಯೆರೆ ಇತ್ತಿ ಆ ಪ್ರವಾದಿಯಾ?” ಅಂದ್‌ದ್ ಕೇಂಡಿನೆಕ್ಕ್ “ಯೋಹಾನೆ ಅತ್ತ್,” ಪಂಡೆ.

22ಅಪಗ ಅಕುಲು, “ಈ ಏರ್? ಎಂಕ್ಲೆನ್ ಕಡಪುಡ್ದಿನಾಕುಲೆಗ್ ಎಂಕುಲು ಉತ್ತರ ಕೊರೊಡತ್ತಾ; ನಿನ ಸಂಗತಿಡ್ ಈ ಎಂಚಿನ ಪನ್ಪ?” ಅಂದ್‌ದ್ ಕೇನ್ನಗ ಆಯೆ,

23“ಪ್ರವಾದಿ ಯೆಶಾಯೆ ಪಂಡಿಲೆಕ್ಕ, ‘ಕರ್ತವ ಸಾದಿನ್ ಸರ್ತ ಮಲ್ಪುಲೆ,’ ಅಂದ್‌ದ್ ಕಾಡ್‌ಡ್ ಬೊಬ್ಬೆ ಪಾಡುನಾಯ ಸ್ವರ ಉಂಡು ಪಂಡ್ದ್ ಕೇನ್ದರತ್ತ? ಆ ಸ್ವರನೇ ಯಾನಾದುಲ್ಲೆ.”

24ಬತ್ತಿತ್ತಿನಾಕುಲು ಪರಿಸಾಯೆರೆ ಕಡೆತ್ತಾಕುಲಾದಿತ್ತ್‌ದ್,

25“ಈ ಕ್ರಿಸ್ತೆ ಆವಡ್, ಎಲೀಯೆ ಆವಡ್, ಆ ಪ್ರವಾದಿ ಆವಡ್ ಅತ್ತ್‌ಡ ನೀರ್‌ದ ದೀಕ್ಷಾಸ್ನಾನ ಎಂಚ ಕೊರೊಂದುಲ್ಲ?” ಅಂದ್‌ದ್ ಆಯಡ ಕೇಂಡೆರ್.

26ಯೋಹಾನೆ ಅಕ್ಲೆಗ್, “ಯಾನ್ ಜನೊಕುಲೆಗ್ ನೀರ್‌ಡ್ ದೀಕ್ಷಾಸ್ನಾನ ಮಲ್ಪಾಯೆ, ಆಂಡ ನಿಕ್ಲೆಗ್ ತೆರಿಯಂದಿ ಒರಿ ನಿಕ್ಲೆನ ನಡುಟು ಉಂತೊಂದೆ.

27ಆಯೆನೇ ಎನ ಬೆರಿಯೆ ಬರ್ಪಿನಾಯೆ. ಆಯ ಕಾರ್‌ದ ಜೋಡುದ ಪಟ್ಟಿನ್ ಗಿರ್ಪೆರೆಗ್ಲಾ ಯಾನ್ ಯೋಗ್ಯದಾಯೆ ಅತ್ತ್,” ಪಂಡೆ.

28ಉಂದು ಮಾತ ಯೊರ್ದಾನ್ ತುದೆತ ಆಯೆರೆಡುಪ್ಪು ಬೇಥಾನ್ಯೊಡು ನಡತ್ಂಡ್. ಅಲ್ಪ ಯೋಹಾನೆ ನೀರ್‌ಡ್ ದೀಕ್ಷಾಸ್ನಾನ ಕೊರೊಂದಿತ್ತೆ.

29ಮನದಾನಿ ಯೋಹಾನೆ ಯೇಸು ತನ ಕೈತಲ್‌ ಬರ್ಪಿನೆನ್ ತೂದು, “ಇಂದಾ, ಬಲಿ ಅರ್ಪಣೆಗಾದ್ ದೇವೆರ್ ನೇಮಕ ಮಲ್ತಿ ಕುರಿತ ಕಿನ್ನಿ, ಲೋಕದ ಪಾಪೊನು ತುಂಬೊಂದು ಪೋಪಿನಾಯೆ.

30‘ಎನಡ್ದ್ ಬೊಕ್ಕ ಬರ್ಪಿನಾಯೆ, ಎನಡ್ದ್ ದುಂಬೇ ಇತ್ತಿನೆಡ್ದ್ ಎಂಕ್‌ ದುಂಬುದಾಯೆ ಆಯೆ,’ ಅಂದ್‌ದ್ ಯಾನ್ ನಿಕ್ಲೆಗ್ ಪನೊಂದಿತ್ತಿನವು ಇಂಬ್ಯನ ವಿಷಯೊಡೇ.”

31ಎಂಕ್‌ಲಾ ಆಯನ ಗುರ್ತ ಇತ್ತ್‌ಜಿ; ಆಂಡ ಆಯನ್ ಇಸ್ರಾಯೇಲ್ಯೆರೆಗ್ ತೆರಿಪಾವೆರೆಗಾದ್ ಯಾನ್ ನೀರ್‌ದ ದೀಕ್ಷಾಸ್ನಾನ ಕೊರಿಯೆರೆ ಬತ್ತೆ ಅಂದ್‌ದ್ ಪಂಡೆ.

32ಉಂದತ್ತಂದೆ ಯೋಹಾನೆ ಸಾಕ್ಷಿ ಕೊರ್ದು ಪಂಡಿನಿ ದಾನೆಂದ್ಂಡ, “ದೇವೆರಾತ್ಮ ಪಾರಿವಾಳದ ರೂಪೊಡು ಬಾನೊಡ್ದು ತಿರ್ತ್ ಜಪ್ಪುನೆನ್ ತೂಯೆ. ಅವು ಆಯ ಮಿತ್ತ್ ನಿಲೆ ಆಂಡ್.

33ಎಂಕ್‌ಲಾ ಆಯನ ಗುರ್ತ ಇತ್ತ್‌ಜಿ, ಆಂಡ ನೀರ್‌ದ ದೀಕ್ಷಾಸ್ನಾನ ಮಲ್ಪೆರೆಗಾದ್ ಎನನ್ ಕಡಪುಡ್ದಿನಾಯೆ, ‘ಏರೆ ಮಿತ್ತ್ ಆತ್ಮ ಬರ್ಪಿನೆನ್ ತೂಯನಾ ಆಯೆನೇ ಪರಿಶುದ್ಧಾತ್ಮಡ್ ದೀಕ್ಷಾಸ್ನಾನೊನು ಕೊರ್ಪಿನಾಯೆ,’ ಅಂದ್‌ದ್ ಎಂಕ್ ಪಂಡೆ.

34ಯಾನ್ ಅವೆನ್ ತೂದು ಇಂಬೆನೇ ದೇವೆರೆ ಮಗೆ,” ಅಂದ್‌ದ್ ಸಾಕ್ಷಿ ಪಂಡೆ.

35ಮನದಾನಿ ಕುಡ ಯೋಹಾನೆಲಾ ಆಯನ ಇರ್ವೆರ್ ಶಿಷ್ಯೆರೆಡೊಪ್ಪ ಉಂತೊಂದುಪ್ಪುನಗ

36ಯೋಹಾನೆ ಅಲ್ಪ ತಿರ್ಗೊಂದಿತ್ತಿ ಯೇಸುನು ತೂದು, “ಇಂದಾ, ಬಲಿ ಅರ್ಪಣೆಗಾದ್ ದೇವೆರ್ ನೇಮಕ ಮಲ್ತ್‌ದಿನ ಕುರಿತ ಕಿನ್ನಿ!” ಅಂದ್‌ದ್ ಪಂಡೆ.

37ಆ ಇರ್ವೆರ್ ಶಿಷ್ಯೆರ್ ಅವೆನ್ ಕೇಂಡ್ದ್ ಯೇಸುನ ಬೆರಿಯೆ ಪೋಯೆರ್.

38ಯೇಸು ತಿರ್ಗ್‌ದ್ ಅಕುಲು ತನ ಬೆರಿಯೆ ಬರ್ಪಿನೆನ್ ತೂದು, “ನಿಕ್ಲೆಗ್ ದಾದ ಬೋಡು,” ಅಂದ್‌ದ್ ಕೇನ್ನಗ ಅಕುಲು, “ರಬ್ಬಿ” (ರಬ್ಬಿ ಪಂಡ್ಂಡ ಗುರು) “ಈ ಉಪ್ಪುನು ಒಲ್ಪ?” ಅಂದ್‌ದ್ ಕೇಂಡೆರ್.

39ಐಕ್ ಯೇಸು, “ಬತ್ತ್‌ದ್ ತೂಲೆ,” ಅಂದ್‌ದ್ ಪನ್ನಗ ಅಕುಲು ಪೋದು ಆಯೆ ಉಪ್ಪು ಜಾಗ್‌ನ್ ತೂದು, ಆ ದಿನ ಆಯಡೊಪ್ಪ ಇತ್ತೆರ್. ಅಪಗ ಹೆಚ್ಚಿಕಡಿಮೆ ಬೈಯದ ನಾಲ್ ಗಂಟೆ ಆದಿತ್ತ್ಂಡ್.

40ಯೋಹಾನನ ಪಾತೆರೊನು ಕೇಂಡ್ದ್ ಯೇಸು ಬೆರಿಯೆ ಪೋಯಿ ಆ ಇರ್ವೆರೆಡ್ ಒರಿ ಸೀಮೋನ ಪೇತ್ರನ ಮೆಗ್ಯೆ ಅಂದ್ರೆಯೆ.

41ಇಂಬೆ ದುಂಬತ್ತ ತನ ಪಲಯೆ ಸೀಮೋನನ್ ತೂದು ಆಯಡ ಪಂಡಿನಿ ದಾನೆಂದ್ಂಡ, “ಮೆಸ್ಸೀಯೆ ಎಂಕ್ಲೆಗ್ ತಿಕ್ಕಿಯೆ.” (ಮೆಸ್ಸೀಯೆ ಪಂಡ್ಂಡ ಕ್ರಿಸ್ತೆ)

42ಆಯನ್ ಯೇಸು ಕೈತಲ್‌ ಲೆತ್ತೊಂದು ಬತ್ತೆ. ಯೇಸು ಆಯನ್ ತೂದು, “ಈ ಯೋಹಾನನ ಮಗೆ ಸೀಮೋನೆ ನನ ಮಿತ್ತ್ ಈ ಕೇಫ ಅಂದ್‌ದ್ ಲೆಪ್ಪಾವೊನುವ.” (ಕೇಫ ಪಂಡ್ಂಡ ಪೇತ್ರೆ).

43ಮನದಾನಿ ಯೇಸು ಗಲಿಲಾಯೊಗು ಪೋವೊಡಂದ್‌ದ್ ಉಪ್ಪುನಗ ಫಿಲಿಪ್ಪುನ್ ತೂದು ಆಯಡ, “ಎನ ಬೆರಿಯೆ ಬಲ.” ಪಂಡೆ

44ಫಿಲಿಪ್ಪೆ ಬೆತ್ಸಾಯಿದಾಯೆ ಅಂದ್ರೆಯೆಲಾ ಪೇತ್ರೆಲಾ ಅವ್ವೇ ಊರುದಾಕುಲು.

45ಫಿಲಿಪ್ಪೆ ನತಾನಿಯೇಲನ್ ತೂದು ಆಯಡ, “ಏರೆ ವಿಷಯೊಡು ಮೋಶೆ ನ್ಯಾಯಕಟ್ಟ್‌ಲೆ ಬೊಕ್ಕ ಪ್ರವಾದಿಲು ಬರೆತೆರಾ, ಆಯೆ ಎಂಕ್ಲೆಗ್ ತಿಕ್ಕಿಯೆ. ಆಯೆ ಏರಂದ್ಂಡ ಯೋಸೇಫು ಮಗೆ ಆಯಿ ನಜರೇತ್‌ದ ಯೇಸು.” ಅಂದ್‌ದ್ ಪಂಡೆ.

46ಅಪಗ ನತಾನಿಯೇಲೆ, “ಎಡ್ಡೆಂತಿನವು ದಾಲಾಂಡಲಾ ನಜರೇತ್‌ಡ್ದ್ ಬರಿಯೆರೆ ಉಂಡಾ?” ಪನ್ನಗ ಫಿಲಿಪ್ಪು “ಬತ್ತ್‌ದ್ ತೂಲ.” ಅಂದ್‌ದ್ ಪಂಡೆ.

47ಯೇಸು ತನ ಕೈತಲ್‌ ಬರ್ಪಿ ನತಾನಿಯೇಲನ್ ತೂದು ಆಯ ಸಂಗತಿಡ್, “ಇಂದಾ, ಆಯೆ ನಿಜ ಇಸ್ರಾಯೇಲ್ಯೆ, ಆಯಡ ಕಪಟ ಇಜ್ಜಿ!” ಪಂಡೆ.

48ನತಾನಿಯೇಲೆ, “ಎನ ಗುರ್ತ ನಿಕ್ಕ್ ಎಂಚ?” ಅಂದ್‌ದ್ ಯೇಸುಡ ಕೇಂಡಿನೆಕ್ಕ್ ಆಯೆ, “ಫಿಲಿಪ್ಪೆ ನಿನನ್ ಲೆಪ್ಪುನೆಡ್ದ್ ದುಂಬು, ಈ ಅಂಜೂರದ ಮರತ ಅಡಿಟ್ಟ್ ಉಪ್ಪುನಗ ಯಾನ್ ತೂಯೆ.” ಪಂಡೆ.

49ಐಕ್ ನತಾನಿಯೇಲೆ, “ಓ ಗುರೂ, ಈ ದೇವೆರೆ ಮಗೆ, ಈಯೇ ಇಸ್ರಾಯೇಲ್ಯೆರೆ ಅರಸು!” ಪಂಡೆ.

50ಐಕ್ ಯೇಸು, “ಆ ಅಂಜೂರದ ಮರತ ಅಡಿಟ್ಟ್ ಯಾನ್ ನಿನನ್ ತೂಯೆ ಅಂದ್‌ದ್ ನಿನಡ ಪಂಡಿನೆಡ್ದ್ ಈ ನಂಬುವನಾ? ಉಂದೆಡ್ದ್ ಮಲ್ಲ ಕಾರ್ಯೊಲೆನ್ ತೂವ.” ಪಂಡೆ.

51ಉಂದತ್ತಂದೆ ಕುಡ ಆಯಡ, “ಯಾನ್ ನಿಕ್ಕ್ ಸತ್ಯಾದ್ ಪನ್ಪೆ, ಪರಲೋಕ ಜತ್ತ್‌ದುಪ್ಪುನೆನ್ಲಾ ನರಮಾನಿ ಮಗ ಮಿತ್ತ್ ದೇವೆರೆ ದೂತೆರ್ ಏರ್ದ್ ಪೋಪಿನೆನ್ಲಾ ಜತ್ತ್‌ದ್ ಬರ್ಪಿನೆನ್ಲಾ ತೂವರ್.” ಅಂದ್‌ದ್ ಪಂಡೆ.

Jump to: Chapter 2 →