John 14

Tulu (ಪೊಸ ಒಡಂಬಡಿಕೆ)

← Chapter 13 Jump to: Chapter 15 →

1“ನಿಕ್ಲೆನ ಉಡಲ್ ತಳಮಳ ಆವಂದೆ ಉಪ್ಪಡ್.” “ದೇವೆರೆನ್ ನಂಬುಲೆ ಎನನ್ಲಾ ನಂಬುಲೆ.

2ಎನ ಅಮ್ಮೆರೆ ಇಲ್ಲಡ್ ಮಸ್ತ್ ಬುಡಾರೊಲು ಉಂಡು. ಇಜ್ಜಾಂದೆ ಇತ್ತ್‌ದ್ಂಡ ನಿಕ್ಲೆಗ್ ಪನ್ತ್‌ವೆ, ಯಾನ್ ನಿಕ್ಲೆಗ್ ಜಾಗ್ ತಯಾರ್ ಮಲ್ಪೆರೆ ಪೋವೊಂದುಲ್ಲೆ.

3ಯಾನ್ ಪೋದು, ನಿಕ್ಲೆಗ್ ಜಾಗ್ ತಯಾರ್ ಮಲ್ತಿ ಬೊಕ್ಕ, ಯಾನ್ ಉಪ್ಪು ಜಾಗ್‌ಡೇ ನಿಕುಲುಲಾ ಉಪ್ಪೊಡು ಪಂಡ್ದ್, ಕುಡ ಪಿರ ಬತ್ತ್‌ದ್ ನಿಕ್ಲೆನ್ ಲೆತ್ತೊಂದು ಪೋದು ಎನ್ನೊಟ್ಟುಗು ಸೇರಾವೊನುವೆ. ದಾಯೆಗಂದ್ಂಡ ಯಾನ್ ಉಪ್ಪುನ ಜಾಗ್‌ಡ್ ನಿಕುಲುಲಾ ಉಪ್ಪೊಡು.

4ಬೊಕ್ಕ ಯಾನ್ ಪೋಪಿ ಜಾಗ್‌ದ ಸಾದಿ ನಿಕ್ಲೆಗ್ ತೆರಿದುಂಡು,” ಪಂಡೆ.

5ತೋಮೆ ಯೇಸುಡ, “ಕರ್ತವಾ, ಈ ಒಡೆಗ್ ಪೋಪನಾ ಎಂಕ್ಲೆಗ್ ತೆರಿಯಂದ್, ಅಂಚಾಂಡ ಸಾದಿ ಎಂಚ ತೆರಿವು?” ಕೇಂಡೆ.

6ಐಕ್ ಯೇಸು ಆಯಡ, “ಯಾನೇ ಮಾರ್ಗಲಾ ಸತ್ಯಲಾ ಜೀವಲಾ ಆದುಲ್ಲೆ. ಯಾನ್ ಅತ್ತಂದೆ ಏರ್ಲಾ ಅಮ್ಮೆರೆ ಕೈತಲ್‌ ಬರ್ಪುಜೆರ್

7ನಿಕುಲು ಎನನ್ ತೆರಿದಿತ್ತರ್ಡ ಎನ ಅಮ್ಮೆರೆನ್ ತೆರಿದಿತ್ತ್‌ವರ್, ಇತ್ತೆಡ್ದ್ ಆಯನ್ ತೆರಿಯೊಂದುಲ್ಲರ್ ಬೊಕ್ಕ ಆಯನ್ ತೂತರತ್ತಾ,” ಪಂಡೆ.

8ಐಕ್ ಫಿಲಿಪ್ಪೆ ಯೇಸುಡ, “ಕರ್ತವಾ ಎಂಕ್ಲೆಗ್ ಅಮ್ಮೆರೆನ್ ತೋಜಾವು, ಎಂಕ್ಲೆಗ್ ಆತೇ ಯಾವು,” ಅಂದ್‌ದ್ ಪಂಡೆ.

9ಯೇಸು ಆಯಡ, “ಫಿಲಿಪ್ಪೋ, ಯಾನ್ ಈತ್ ದಿನ ನಿಕ್ಲೆಡೊಪ್ಪ ಇತ್ತ್‌ದ್‌ಲಾ ಈ ನನಲಾ ತೆರಿಯೊಂಡಿಜನಾ. ಎನನ್ ತೂತಿನಾಯೆ ಅಮ್ಮೆರೆನ್ ತೂತೆ ಅಂಚಾದ್ ಈ ಎಂಕ್ಲೆಗ್ ಅಮ್ಮೆರೆನ್ ತೋಜಾವು ಅಂದ್‌ದ್ ಪನ್ಪಿನಿ ಎಂಚ?”

10ಯಾನ್ ಅಮ್ಮೆ ಒಟ್ಟುಗು ಉಲ್ಲೆ, ಅಮ್ಮೆ ಎನೊಟ್ಟುಗು ಉಲ್ಲೆ ಪನ್ಪಿನೆನ್ ಈ ನಂಬುಜನಾ? ಯಾನ್ ನಿಕ್ಲೆಗ್ ಪನ್ಪಿ ಪಾತೆರೊಲು ಎನ್ನಾತೆಗ್ ಯಾನ್ ಪಾತೆರುಜಿ. ಅಮ್ಮೆ ಎನಡೊಪ್ಪ ಇತ್ತ್‌ದ್ ತನ ಕಾರ್ಯೊಲೆನ್ ನಡಪುಡುವೆ.

11ಯಾನ್ ಅಮ್ಮೆ ಒಟ್ಟುಗು ಉಲ್ಲೆ, ಅಮ್ಮೆ ಎನ ಒಟ್ಟುಗು ಉಲ್ಲೆ ಪನ್ಪಿ ಪಾತೆರೊಲೆನ್ ನಂಬುಲೆ, ಇಜ್ಜಾಂಡ ಕಾರ್ಯೊಲೆನ್ ತೂದು ಎನ ಪಾತೆರೊಲೆನ್ ನಂಬುಲೆ.

12ನಿಕ್ಲೆಗ್ ನಿಜಾದ್ ಪನ್ಪೆ, ಎನನ್ ನಂಬುನಾಯೆ ಯಾನ್ ಮಲ್ಪು ಕಾರ್ಯೊಲೆನ್ ತಾನ್‌ಲಾ ಮಲ್ಪುವೆ, ಬೊಕ್ಕ ಅವೆಡ್ದ್ ಮಲ್ಲ ಮಲ್ಲಕಾರ್ಯೊಲೆನ್ಲಾ ಮಲ್ಪುವೆ. ದಾಯೆ ಪಂಡ ಯಾನ್ ಅಮ್ಮೆರೆ ಕೈತಲ್‌ ಪೋಪೆ.

13ಉಂದತ್ತಂದೆ ನಿಕುಲು ಎನ ಪುದರ್‌ಡ್ ಎಂಚಿಂಚಿನ ನಟ್ಟೊಂಡರ್ಡ, ಅವೆನ್ ಮಲ್ತ್ ಕೊರ್ಪೆ. ಇಂಚ ಮಗಡ್ದ್ ಅಮ್ಮೆರೆಗ್ ಮೈಮೆ ಉಂಡಾಪುಂಡು.

14ನಿಕುಲು ಎನ ಪುದರ್‌ಡ್ ದಾದಾಂಡಲಾ ನಟ್ಟೊನುವರ್ಡ ಅವೆನ್ ಮಲ್ತ್ ಕೊರ್ಪೆ.

15“ನಿಕುಲು ಎನನ್ ಪ್ರೀತಿ ಮಲ್ಪುನಾಕುಲಾಂಡ ಎನ ಅಪ್ಪಣೆನ್ ಕೈಕೊಂದು ನಡಪುವರ್.

16ಅಪಗ ಯಾನ್ ಅಮ್ಮೆರೆಡ ನಟ್ಟೊನ್ವೆ. ಆಯೆ ನಿಕ್ಲೆಗ್ ನನೊಂಜಿ ಆದರಿಪುನಾಯನ್ ಕೊರ್ದು ಆಯೆ ಏಪೊಗ್ಲಾ ನಿಕ್ಲೆಡೊಪ್ಪ ಉಪ್ಪುಲೆಕ್ಕ ಕೊರ್ಪೆ.

17ಆ ಆದರಿಪುನಾಯೆ ಏರ್ ಪಂಡ್ಂಡ ಸತ್ಯದ ಆತ್ಮೆನೇ. ಲೋಕದಾಕುಲು ಆಯನ್ ತೂವಂದೆಲಾ ತೆರಿಯಂದೆಲಾ ಉಪ್ಪುನೆಡ್ದ್, ಅಕ್ಲೆಗ್ ತಿಕ್ಕುಜೆ. ನಿಕುಲು ಆಯನ್ ತೆರಿದರ್, ಎಂಚಂದ್ಂಡ ಆಯೆ ನಿಕ್ಲೆಡೊಪ್ಪ ತಡೆದ್‌ ಬೊಕ್ಕ ನಿಕ್ಲೆನ ಉಲಯಿ ಉಪ್ಪುವೆ.

18“ಯಾನ್ ನಿಕ್ಲೆನ್ ದಿಕ್ಕ್‌ದಾಂತಿನಾಕುಲೆ ಲೆಕ್ಕ ಬುಡ್ಪುಜಿ. ನಿಕ್ಲೆನ ಕೈತಲ್‌ ಬರ್ಪೆ.

19ನನ ಒಂತೆ ಸಮಯ ಆಯಿ ಬೊಕ್ಕ ಲೋಕ ಎನನ್ ತೂಪುಜಿ, ಆಂಡ ನಿಕುಲು ಎನನ್ ತೂವರ್. ಯಾನ್ ಬದುಕುನೆಡ್ದ್ ನಿಕುಲುಲಾ ಬದುಕುವರ್.

20ಯಾನ್ ಎನ ಅಮ್ಮೆರೆಡ್ ನಿಕುಲು ಎನಡ್ ಬೊಕ್ಕ ಯಾನ್ ನಿಕ್ಲೆಡ್ ಉಪ್ಪುನೆನ್ ನಿಕುಲು ಆ ದಿನೊಟು ತೆರಿವೊನ್ವರ್.

21“ಎನ ಅಪ್ಪಣೆನ್ ಪಡೆವೊಂದು ಅವೆನ್ ಕೈಕೊಂದು ನಡಪುನಾಯೆನೇ ಎನನ್ ಪ್ರೀತಿ ಮಲ್ಪುವೆ. ಎನನ್ ಪ್ರೀತಿ ಮಲ್ಪುನಾಯೆ ಎನ ಅಮ್ಮೆರೆಗ್ ಪ್ರೀತಿದಾಯೆ ಆದುಪ್ಪುವೆ. ಯಾನ್ಲಾ ಆಯನ್ ಪ್ರೀತಿ ಮಲ್ತ್‌ದ್, ಆಯಗ್ ತೋಜಿದ್ ಬರ್ಪೆ,” ಅಂದ್‌ದ್ ಪಂಡೆ.

22ಯೂದೆ, (ಉಂಬೆ ಇಸ್ಕಾರಿಯೋತ ಯೂದೆ ಅತ್ತ್) ಯೇಸುಡ, “ಕರ್ತವಾ, ಈ ಲೋಕೊಗು ನಿನನ್ ತೋಜಾಪಾವಂದೆ ಎಂಕ್ಲೆಗ್ ಮಾತ್ರ ದಾಯೆಗ್ ತೋಜಾಪಾವ?” ಅಂದ್‌ದ್ ಕೇಂಡಿನೆಕ್ಕ್

23ಯೇಸು ಆಯಡ, “ಏರಾಂಡಲಾ ಎನನ್ ಪ್ರೀತಿ ಮಲ್ಪುವೆಡ ಎನ ಪಾತೆರೊಲೆನ್ ಕೈಕೊಂದು ನಡಪುವೆ. ಆಯನ್ ಎನ ಅಮ್ಮೆ ಪ್ರೀತಿ ಮಲ್ಪುವೆ, ಬೊಕ್ಕ ಎಂಕುಲು ಇರ್ವೆರ್‌ಲಾ ಆಯ ಕೈತಲ್‌ಗ್ ಬತ್ತ್‌ದ್ ಆಯಡೊಪ್ಪ ಬುಡಾರ ಮಲ್ತೊನ್ವ.

24ಎನನ್ ಪ್ರೀತಿ ಮಲ್ಪಂದೆ ಉಪ್ಪುನಾಯೆ ಎನ ಪಾತೆರೊಲೆನ್ ಕೈಕೊನೊಂದು ನಡಪುಜೆ, ನಿಕುಲು ಕೇನುನ ಪಾತೆರೊಲು ಎನ್ನವು ಅತ್ತ್, ಎನನ್ ಕಡಪುಡಿ ಅಮ್ಮೆರೆನವೇ ಆದುಂಡು.

25“ಈ ಪಾತೆರೊಲೆನ್ ಯಾನ್ ನಿಕ್ಲೆನ ಒಟ್ಟುಗು ಉಪ್ಪುನಗನೇ ಪನ್ತೆ.

26ಆಂಡ, ಎನ ಪುದರ್‌ಡ್ ಅಮ್ಮೆ ಕಡಪುಡ್ದು ಕೊರ್ತಿ ಆದರಿಪುನಾಯೆ ಪರಿಶುದ್ಧಾತ್ಮೆನೇ, ನಿಕ್ಲೆಗ್ ಮಾತೆನ್ ಬೋಧನೆ ಮಲ್ತ್‌ದ್, ಯಾನ್ ನಿಕ್ಲೆಗ್ ಪನ್ತಿನೆನ್ ಮಾತೆನ್ಲಾ ನಿಕ್ಲೆನ ನೆನೆಪುಗು ಕನಪೆ.

27“ಸಮಾಧಾನೊನು ನಿಕ್ಲೆಗ್ ಬುಡ್ದು ಪೋಪೆ. ಎನ ಸಮಾಧಾನೊನು ನಿಕ್ಲೆಗ್ ಕೊರ್ಪೆ. ಲೋಕ ಕೊರ್ಪಿ ರೀತಿಡ್ ಯಾನ್ ನಿಕ್ಲೆಗ್ ಕೊರ್ಪುಜಿ. ನಿಕ್ಲೆನ ಉಡಲ್ ತಳಮಳ ಆವಂದೆ ಪೋಡಿಯಂದೆ ಉಪ್ಪಡ್.

28‘ಯಾನ್ ಪೋದು ಕುಡ ನಿಕ್ಲೆನ ಕೈತಲ್‌ ಬರ್ಪೆ.’ ಅಂದ್‌ದ್ ಪನ್ತಿನೆನ್ ನಿಕುಲು ಕೇಂಡ್ದರ್. ನಿಕುಲು ಎನನ್ ಪ್ರೀತಿ ಮಲ್ಪುನಾಕುಲಾಂಡ, ಯಾನ್ ಅಮ್ಮೆರೆ ಕೈತಲ್‌ ಪೋಪಿ ಸಂಗತಿಡ್ ಸಂತೋಷ ಪಡೆತ್ವರ್, ದಾಯೆ ಪಂಡ ಅಮ್ಮೆ ಎನಡ್ದ್ ಮಲ್ಲಾಯೆ.

29ಉಂದು ಮಾತ ಆನಗ ನಿಕುಲು ಎನನ್ ನಂಬೊಡು ಪಂಡ್ದ್, ಮಾತ ಆವೊಡ್ದುಂಬೇ ಯಾನ್ ನಿಕ್ಲೆಗ್ ಪನ್ಪೆ.

30ನನ ಯಾನ್ ನಿಕ್ಲೆಡೊಪ್ಪ ಹೆಚ್ಚ್ ಪಾತೆರುಜಿ, ದಾಯೆ ಪಂಡ ಭೂಲೋಕದ ಅಧಿಪತಿ ಬರ್ಪೆ. ಆಯಗ್ ಸಂಬಂಧ ಪಡೆಯಿನ ದಾಲಾ ಎನಡ ಇಜ್ಜಿ.

31ಆಂಡಲಾ ಯಾನ್ ಅಮ್ಮೆರೆನ್ ಪ್ರೀತಿ ಮಲ್ಪುವೆ ಅಂದ್‌ದ್ ಲೋಕೊಗು ತೆರಿದುಪ್ಪೊಡು ಅಂದ್‌ದ್ ಅಮ್ಮೆ ಎಂಕ್ ಕೊರಿ ಅಪ್ಪಣೆಗಾದ್ ಉಂದೆನ್ ಮಲ್ಪುವೆ. ಲಕ್ಕ್‌ಲೆ, ನಮ ಮುಲ್ತುಡ್ದು ಪೋಯಿ.”

← Chapter 13 Jump to: Chapter 15 →