John 7

Tulu (ಪೊಸ ಒಡಂಬಡಿಕೆ)

1ಈತ್ ಸಂಗತಿಲು ನಡತಿ ಬೊಕ್ಕ ಯೇಸು ಗಲಿಲಾಯೊಡು ಸಂಚಾರ ಮಲ್ತೊಂದಿತ್ತೆ, ಆಂಡ ಯೆಹೂದ್ಯೆರ್ ಆಯನ್ ಕೆರೊಡು ಅಂದ್‌ದ್ ಕಾತೊಂದಿತ್ತಿನೆಡ್ದ್ ಆಯಗ್ ಯೂದಾಯೊಡು ಸಂಚಾರ ಮಲ್ಪೆರೆ ಮನಸಿತ್ತ್‌ಜಿ.

2ಯೆಹೂದ್ಯೆರೆನ ಒಂಜಿ ಪರ್ಣಶಾಲೆದ ಪರ್ಬ ಪನ್ಪಿ ಒಂಜಿ ಜಾತ್ರೆ ಕೈತಲಾನಗ

3ಆಯನ ಮೆಗ್ಯಾಡ್ಲು ಆಯಡ, “ಅಪಗ ಈ ಮಲ್ಪು ಕಾರ್ಯೊಲೆನ್ ನಿನ ಶಿಷ್ಯೆರ್‌ಲಾ ತೂಪಿಲೆಕ್ಕ ಈ ಮುಲ್ತುಡ್ದು ಪಿದಾಡ್ದ್ ಯೂದಾಯೊಗು ಪೋ.

4ಪುದರ್ ಬರೊಡು ಪನ್ಪಿನಾಕುಲು ಏರಾಂಡಲಾ ತಾನ್ ಮಲ್ಪುನೆನ್ ಮದೆಟ್ ಮಲ್ಪುಜೆರತ್ತಾ, ಈ ಇಂಚಿತ್ತಿ ಕಾರ್ಯೊಲೆನ್ ಮಲ್ಪುನಾಯೆ ಆದಿತ್ತಿನೆಡ್ದ್ ಲೋಕೊಗು ತೋಜಾಪಾವೊನ್ಲ.” ಪಂಡೆರ್,

5ದಾಯೆಗಂದ್ಂಡ ಆಯ ಮೆಗ್ಯಾಡ್ಲುಲಾ ಆಯನ್ ನಂಬೊಂದಿತ್‌ಜೆರ್.

6ಯೇಸು ಅಕ್ಲೆಡ, “ಎನ ಪೋಪಿ ಗಳಿಗೆ ನನಲಾ ಬೈದಿಜಿ, ನಿಕ್ಲೆಗಾಂಡಲಾ ಮಾತ ಸಮಯಲಾ ಒಂಜೇ.

7ಲೋಕ ನಿಕ್ಲೆನ್ ಪಗೆ ಮಲ್ಪಂದ್, ಆಂಡ ಯಾನ್ ಮಲ್ಪು ಬೇಲೆಲು ಪಡಿಕೆಂತಿನವು ಅಂದ್‌ದ್ ಸಾಕ್ಷಿ ಪನ್ಪಿನೆಡ್ದ್, ಎನನ್ ಪಗೆ ಮಲ್ಪುಂಡು.

8ನಿಕುಲೇ ಜಾತ್ರೆಗ್ ಪೋಲೆ, ಎನ ಸಮಯ ನನಲಾ ಒದಗ್‌ದ್ ಬರಂದಿನೆಡ್ದಾದ್, ಯಾನ್ ಈ ಜಾತ್ರೆಗ್ ಇತ್ತೆ ಪೋಪುಜಿ.”

9ಉಂದೆನ್ ಪಂಡ್ದ್ ಯೇಸು ಗಲಿಲಾಯೊಡೇ ಉಂತಿಯೆ.

10ಆಂಡ ಆಯ ಮೆಗ್ಯಾಡ್ಲು ಜಾತ್ರೆಗ್ ಪೋಯಿ ಬೊಕ್ಕ ತಾನ್‌ಲಾ ಪೋಯೆ, ಆಂಡ ಜನೊಕುಲೆಗ್ ತೋಜುಲೆಕ್ಕ ಪೋವಂದೆ ದೆಂಗೊಂದು ಪೋಯೆ.

11ಜಾತ್ರೆಡ್ ಯೆಹೂದ್ಯೆರೆ ಅಧಿಕಾರಿಲು, “ಯೇಸು ಓಲುಲ್ಲೆ?” ಪಂಡ್ದ್ ನಾಡೊಂದಿತ್ತೆರ್.

12ಬೊಕ್ಕ ಜನೊಕುಲೆ ಗುಂಪುಲೆಡ್ ಆಯನ ಸಂಗತಿಡ್ ಗುಸುಗುಸು ಪಾತೆರ ನಡತೊಂದಿತ್ತ್‌ಂಡ್. ಕೆಲೆವೆರ್, “ಆಯೆ ಎಡ್ಡೆಂತಿನಾಯೆ,” ಪಂಡೆರ್. ನನ ಕೆಲೆವೆರ್, “ಅತ್ತ್.” ಕೆಲೆವೆರ್, “ಆಯೆ ಜನೊಕುಲೆನ್ ತಪ್ಪು ಸಾದಿಗ್ ಒಯ್ಪುಪೆ,” ಪಂಡೆರ್.

13ಆಂಡ ಯೆಹೂದ್ಯೆರೆ ಅಧಿಕಾರಿಲೆ ಪೋಡಿಗೆಡ್ದ್ ಆಯ ಸಂಗತಿಡ್ ಹೆಚ್ಚ್ ಪಾತೆರಿಜೆರ್.

14ಜಾತ್ರೆದ ನಡುಟು ಯೇಸು ದೇವಾಲಯೊಗು ಪೋದು ಬೋಧನೆ ಮಲ್ತೊಂದಿತ್ತೆ.

15ಯೆಹೂದ್ಯೆರ್‌ ಐಕ್ ಅಚ್ಚಿರ ಆದ್, “ಬರವು ಕಲ್ಪಂದಿ ಉಂಬ್ಯಗ್ ಶಾಸ್ತ್ರೊಲು ತೆರಿದುಪ್ಪುನು ಎಂಚ?” ಪನೊಂದಿತ್ತೆರ್.

16ಐಕ್ ಯೇಸು, “ಯಾನ್ ಪನ್ಪಿನ ಬೋಧನೆ ಎನ್ನವು ಅತ್ತ್, ಎನನ್ ಕಡಪುಡ್ದಿನ ದೇವೆರೆನವೇ,

17ಆಯ ಚಿತ್ತದ ಲೆಕ್ಕ ನಡಪೆರೆ ಏರೆಗ್ ಮನಸುಂಡಾ ಅಕ್ಲೆಗ್ ಈ ಬೋಧನೆ ದೇವೆರೆಡ್ದ್ ಬೈದಿನವಾ, ಇಜ್ಜಿಂಡ ಎನ ಸ್ವಂತ ಅಧಿಕಾರೊಡ್ದು ಪಂಡಿನವಾ ಅಂದ್‌ದ್ ಗೊತ್ತಾವು.

18ತನ ಸ್ವಂತ ಅಧಿಕಾರೊಡ್ದು ಪನ್ಪಿನಾಯೆ ತನ್ಕ್ ಮಾನಾದಿಗೆ ಬರೊಡಂದ್‌ದ್ ಬಯಕುವೆ, ತನನ್ ಕಡಪುಡ್ದಿನಾಯಗ್ ಮಾನಾದಿಗೆ ಬರೊಡಂದ್‌ದ್ ಬಯಕುನಾಯೆ ಸತ್ಯವಂತೆ. ಆಯಡ ಅನ್ಯಾಯ ಇಜ್ಜಿ.

19ಮೋಶೆ ನಿಕ್ಲೆಗ್ ನ್ಯಾಯಕಟ್ಟ್ ಕೊರ್ತೆಡಲಾ ನಿಕ್ಲೆಡ್ ಒರಿಲಾ ನ್ಯಾಯಕಟ್ಟ್‌ದ ಲೆಕ್ಕ ನಡಪುಜರತ್ತಾ? ದಾಯೆ ಎನನ್ ಕೆರಿಯೆರೆ ತೂಪರ್‌?” ಅಂದ್‌ದ್ ಪಂಡೆ.

20ಐಕ್ ಆ ಜನೊಕುಲು, “ನಿಕ್ಕ್ ದೆವ್ವ ಪತ್ತ್‌ದ್ಂಡ್! ನಿನನ್ ಕೆರಿಯೆರೆ ಏರ್ ತೂಪೆರ್?” ಪಂಡಿನೆಕ್ಕ್,

21ಯೇಸು ಅಕ್ಲೆಡ, “ಯಾನ್ ಒಂಜೇ ಕೆಲಸೊನು ಮಲ್ತ್‌ದಿನಿ, ಐಕ್ ನಿಕುಲು ಮಾತೆರ್ಲಾ ಅಚ್ಚಿರ ಆತರ್.

22ಮೋಶೆನ ಕಟ್ಟ್ ಮೀರ್‌ಯೆರೆ ಬಲ್ಲಿ ಅಂದ್‌ದ್ ಒರಿ ಸಬ್ಬತ್‌ದಿನೊಟು ಸುನ್ನತಿ ಮಲ್ತೊನ್ವೆ ಪಂಡ್ದಾಂಡ ಒಂಜಿ ಆಣ್ ಬಾಲೆಗ್ ಸುನ್ನತಿನ್ ಸಬ್ಬತ್‌ದಿನತಾನಿಲಾ ಮಲ್ಪುವರ್. ಅವು ಮೋಶೆಡ್ದ್ ಬೈದಿನವು ಅಂದ್‌ದ್ ಯಾನ್ ಪನಯೆ ಅವು ಮೂಲಪಿತೃಲೆ ಕಾಲೊಡ್ದು ಬೈದಿನವು.

23ಒರಿ ಆಣ್ ಬಾಲೆಗ್ ಸಬ್ಬತ್‌ದಿನೊಟು ಸುನ್ನತಿ ಮಲ್ಪುನೆಡ್ದ್ ಮೋಶೆ ಮಲ್ತಿ ನ್ಯಾಯಕಟ್ಟ್‌ಲೆನ್ ಮೀರುಜೆ, ಆಂಡ ಯಾನ್ ಸಬ್ಬತ್‌ದಿನೊಟು ಒರಿಯನ್ ಗುಣ ಮಲ್ತಿನೆಕ್ಕ್ ಎನ ಮಿತ್ತ್ ದಾಯೆಗ್ ಕೋಪ ಮಲ್ಪುವರ್?

24ಮೋನೆಗ್ ತಕ್ಕ ನ್ಯಾಯತೀರ್ಪು ಮಲ್ಪಂದೆ, ನ್ಯಾಯವಾಯಿನ ತೀರ್ಪು ಮಲ್ಪುಲೆ,” ಅಂದ್‌ದ್ ಪಂಡೆ.

25ಯೆರೂಸಲೇಮುಡು ಉಪ್ಪುನಾಕುಲೆಡ್ ಕೆಲೆವೆರ್, “ಅಕುಲು ಕೆರಿಯೆರೆ ನಾಡೊಂದಿತ್ತಿನಾಯೆ, ಇಂಬೆನೇ ಅತ್ತಾ?

26ತೂಲೆ! ಇಂಬೆ ದಿಂಜ ಪಾತೆರುವೆ ಅತ್ತಾ? ಅಕುಲು ಆಯಗ್ ದಾಲಾ ಪನ್ಪುಜೆರ್‌! ಮುಖ್ಯಸ್ಥೆರ್ ಉಂಬೆನೇ ಬರೊಡಾಯಿ ಕ್ರಿಸ್ತೆ ಅಂದ್‌ದ್ ನಿಜಾದ್ ನಿಗಂಟ್ ಮಲ್ತೊಂದೆರಾ ದಾನೆ?

27ಆಂಡ ಉಂಬೆ ಒಲ್ತಾಯೆ ಅಂದ್‌ದ್ ನಮ ತೆರಿದ, ಕ್ರಿಸ್ತೆ ಬನ್ನಗ ಆಯೆ ಒಲ್ತಾಯೆ ಅಂದ್‌ದ್ ಒರಿಯಗ್ಲಾ ತೆರಿಯಂದ್,” ಪಾತೆರೊಂದಿತ್ತೆರ್.

28ಯೇಸು ಉಂದೆನ್ ತೆರಿದ್ ದೇವಾಲಯೊಡು ಬೋಧನೆ ಕೊರ್ದು ಗಟ್ಟಿಯಾದ್ ಪಂಡಿನಿ, “ಅಂದ್, ಎನನ್ ತೆರಿದರ್, ಯಾನ್ ಒಲ್ತಾಯೆಂದ್ ತೆರಿದರ್, ನಿಜನೇ ಆಂಡಲಾ ಯಾನ್ ಎನ್ನಾತೆಗೆ ಬೈದಿನಾಯೆ ಅತ್ತ್; ಎನನ್ ಕಡಪುಡ್ದಿನಾಯೆ ಸತ್ಯದಾಯೆ, ನಿಕುಲು ಆಯನ್ ತೆರಿದಿಜರ್.

29ಯಾನ್ ಆಯನ್ ತೆರಿದೆ, ದಾಯೆಗಂದ್ಂಡ ಯಾನ್ ಆಯ ಕಡೆಡ್ದ್ ಬೈದಿನಾಯೆ ಎನನ್ ಆಯೆನೇ ಕಡಪುಡ್ದಿನಿ.”

30ಅಪಗ ಆಯನ್ ಪತ್ತಿಯೆರೆ ತೂಯೆರ್, ಆಂಡಲಾ ಆಯನ್ ಪತ್ತುನ ಗಳಿಗೆ ಬರಂದೆ ಇತ್ತಿನೆಡ್ದ್ ಏರ್ಲಾ ಆಯನ ಮಿತ್ತ್ ಕೈ ಪಾಡಿಜೆರ್.

31ಜನೊಕುಲೆಡ್ ಮಸ್ತ್ ಜನ ಆಯನ್ ನಂಬುದು, “ಕ್ರಿಸ್ತೆ ಬನ್ನಗ, ಉಂಬೆ ಮಲ್ತಿನೆಡ್ದ್ ಹೆಚ್ಚ್ ಕಾರ್ನಿಕೊಲೆನ್ ಮಲ್ಪುವೆನಾ?” ಪಂಡೆರ್.

32ಜನೊಕುಲು ಆಯನ ಸಂಗತಿಡ್ ಗುಸುಗುಸು ಪಾತೆರೊಂದಿನೆನ್ ಪರಿಸಾಯೆರ್ ಕೇನ್ನಗ, ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಆಯನ್ ಪತ್ತಿಯೆರೆಗ್ ಸಿಪಾಯಿಲೆನ್ ಕಡಪುಡಿಯೆರ್.

33ಅಪಗ ಯೇಸು ಅಕ್ಲೆಡ, “ನನ ಒಂತೆ ಸಮಯ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್, ಐಡ್ದ್ ಬೊಕ್ಕ ಎನನ್ ಕಡಪುಡ್ದಿನಾಯ ಕೈತಲ್‌ ಪೋಪೆ.

34ನಿಕುಲು ಎನನ್ ನಾಡುವರ್, ಆಂಡ ನಿಕ್ಲೆಗ್ ತಿಕ್ಕಯೆ, ಯಾನ್ ಉಪ್ಪುನಡೆ ನಿಕ್ಲೆಗ್ ಬರಿಯೆರೆ ಆವಂದ್,” ಪಂಡೆ.

35ಐಕ್ ಯೆಹೂದ್ಯೆರ್, “ಉಂಬೆ ನಂಕ್ ತಿಕ್ಕಂದಿಲೆಕ್ಕ ಒಡೆಗ್ ಪೋವೊಡು ಪಂಡ್‌ದುಲ್ಲೆ? ಗ್ರೀಕೆರೆ ಉಲಯಿ ಪರಡ್ದ್ ಪೋತಿ ನಮ್ಮಕುಲೆನ ಕೈತಲ್ ಪೋದು, ಗ್ರೀಕೆರೆಗ್ ಬೋಧನೆ ಮಲ್ಪೊಡುಂದುಲ್ಲೆನಾ?

36ಎನನ್ ನಾಡುವರ್, ಆಂಡ ನಿಕ್ಲೆಗ್ ತಿಕ್ಕಯೆ, ಬೊಕ್ಕ ಯಾನ್ ಉಪ್ಪುನಡೆ ನಿಕ್ಲೆಗ್ ಬರಿಯೆರೆ ಆವಂದ್, ಆಯೆ ಪನ್ಪಿನ ಪಾತೆರ ಎಂಚಿನಾದುಪ್ಪು?” ತನ್ಕುಲೆ ಉಲಯಿ ಪಾತೆರೊಂಡೆರ್.

37ಆ ಜಾತ್ರೆದ ಮಲ್ಲ ದಿನತ ಕಡೆ ದಿನೊಟು ಯೇಸು ಲಕ್ಕ್‌ದ್ ಉಂತುದು ಸಾರಿಯೊಂದು, “ಏರೆಗಾಂಡಲಾ ಬಾಜೆಲ್ ಆದಿತ್ತ್ಂಡ ಆಯೆ ಎನ ಕೈತಲ್‌ ಬತ್ತ್‌ದ್ ಪರಡ್.

38ಎನನ್ ನಂಬುನಾಯನ ಬಂಜಿಡ್ದ್ ಶಾಸ್ತ್ರೊಡು ಪಂಡಿಲೆಕ್ಕ ‘ಜೀವ ಇತ್ತಿ ನೀರ್‌ದ ತುದೆಕುಲು ಪರತೊಂದು ಪೋವು,’” ಪಂಡೆ.

39ಉಂದೆನ್ ಆಯೆ ತನನ್ ನಂಬುನಾಕುಲು ಹೊಂದಿಯೆರೆ ಉಪ್ಪು ಪರಿಶುದ್ಧಾತ್ಮನ ಬಗೆಟ್ ಪಂಡೆ. ಯೇಸು ನನಲಾ ತನ ಮೈಮೆದ ಗದ್ದಿಗೆನ್ ಪಡೆವಂದೆ ಇತ್ತಿನೆಡ್ದ್, ಪರಿಶುದ್ಧಾತ್ಮ ವರ ನನಲಾ ಬತ್ತಿತ್‌ಜಿ.

40ಜನೊಕುಲೆಡ್ ಕೆಲೆವೆರ್ ಆ ಪಾತೆರೊಲೆನ್ ಕೇಂಡ್ದ್, “ನಿಜಾದ್‌ಲಾ ಉಂಬೆ ಬರೊಡಾಯಿ ಆ ಪ್ರವಾದಿ!” ಅಂದ್‌ದ್ ಪಂಡೆರ್.

41ಬೊಕ್ಕ ಕೆಲೆವೆರ್, “ಉಂಬೆ ಬರೊಡಾಯಿ ಕ್ರಿಸ್ತೆ ಪಂಡೆರ್. ನನ ಕೆಲೆವೆರ್ ಕ್ರಿಸ್ತೆ ಗಲಿಲಾಯೊಡ್ದು ಬರ್ಪಿನಿ ಎಂಚ?

42ದಾವೀದನ ಸಂತಾನೊಡ್ದು ದಾವೀದೆ ಇತ್ತಿ ಬೇತ್ಲೆಹೇಮು ಪನ್ಪಿ ಗ್ರಾಮೊಡ್ದುಲಾ ಕ್ರಿಸ್ತೆ ಬರ್ಪೆ ಅಂದ್‌ದ್ ಶಾಸ್ತ್ರೊಡು ಉಂಡತ್ತಾ,” ಪಂಡೆರ್.

43ಇಂಚ ಆಯನ ವಿಚಾರೊಡು ಜನೊಕುಲೆ ನಡುಟು ಭೇದ ಉಂಡಾಂಡ್.

44ಅಕ್ಲೆಡ್ ಕೆಲೆವೆರ್ ಆಯನ್ ಪತ್ತೊಡು ಅಂದ್‌ದ್ ಇತ್ತೆರ್ಡಲಾ ಒರಿಲಾ ಆಯ ಮಿತ್ತ್ ಕೈ ಪಾಡ್ಜೆರ್.

45ಐಡ್ದ್ ಬೊಕ್ಕ ಆ ಸಿಪಾಯಿಲು ಪ್ರಧಾನಯಾಜಕೆರೆ ಬೊಕ್ಕ ಪರಿಸಾಯೆರೆ ಕೈತಲ್‌ ಬನ್ನಗ ಮೊಕುಲು, “ನಿಕುಲು ದಾಯೆ ಆಯನ್ ಪತ್ತ್‌ದ್ ಕನತಿಜರ್?” ಅಕ್ಲೆಡ ಕೇಂಡಿನೆಕ್ಕ್,

46ಆ ಸಿಪಾಯಿಲು, “ಆ ನರಮಾನಿ ಪಾತೆರಿಲೆಕ್ಕ ಏರ್ಲಾ ಏಪಲಾ ಪಾತೆರ್ದ್‌ಜೆರ್‌!” ಉತ್ತರ ಕೊರಿಯೆರ್.

47ಐಕ್ ಪರಿಸಾಯೆರ್, “ನಿಕುಲುಲಾ ಮರ್ಲಾಯರಾ?

48ಮುಖ್ಯಸ್ಥೆರೆಡಾವಡ್, ಪರಿಸಾಯೆರೆಡಾವಡ್ ಏರಾಂಡಲಾ ಆಯನ್ ನಂಬುದೆರಾ?

49ಮೋಶೆನ ನ್ಯಾಯಕಟ್ಟ್‌ನ್ ತೆರಿಯಂದಿ ಈ ಪುಂಡು ಶಾಪ ದಿಂಜಿದಿನವೇ!” ಪಂಡೆರ್.

50ಅಕ್ಲೆಡ್ ಒರಿ ನಿಕೋದೇಮೆ ಪನ್ಪಿನಾಯೆ, ದುಂಬು ಯೇಸು ಕೈತಲ್‌ ಬತ್ತ್‌ತ್ತಿನಾಯೆ

51ಆಯೆ ಅಕ್ಲೆಡ, “ಎಂಕ್ಲೆನ ನ್ಯಾಯಕಟ್ಟ್ ಸುರುಟ್ಟು ಒರಿಯನ್ ಪಿದುಕೊಂದು ಆಯೆ ಮಲ್ಪುನವು ದಾದ ಅಂದ್‌ದ್ ತೆರಿಯೊನಂದೆ ಆಯನ ಸಂಗತಿಡ್ ತೀರ್ಪು ಮಲ್ಪುನವು ಉಂಡಾ?” ಪಂಡಿನೆಕ್ಕ್,

52ಅಕುಲು, “ಈಲಾ ಗಲಿಲಾಯದಾಯೆನಾ? ಗಲಿಲಾಯೊಡು ಪ್ರವಾದಿ ಪುಟ್ಟುನೇ ಇಜ್ಜಿ. ಶಾಸ್ತ್ರೊನು ನಾಡ್ದ್ ತೂಲ,” ಅಂದ್‌ದ್ ಪಂಡೆರ್.

53ಬೊಕ್ಕ ಮಾತೆರ್ಲಾ ಅಕ್ಲಾಕ್ಲೆನ ಇಲ್ಲಗ್ ಪೋಯೆರ್.

← Chapter 6 Jump to: Chapter 8 →