Mark 1

Tulu (ಪೊಸ ಒಡಂಬಡಿಕೆ)

Jump to: Chapter 2 →

1ದೇವೆರೆ ಮಗೆ ಆಯಿ ಯೇಸು ಕ್ರಿಸ್ತನ ಸುವಾರ್ತೆದ ಆರಂಭ. “‘ಇಂದಾ, ಎನ ದೂತನ್ ನಿನ ದುಂಬು ಕಡಪುಡ್ವೆ. ಈ ಪೋಪಿನ ಸಾದಿನ್ ಆಯೆ ಸಮ ಮಲ್ಪುವೆ ಪಂಡ್ದ್‌ಲಾ.’ ‘ಕರ್ತವ ಮಾರ್ಗೊನು ತಯಾರ್ ಮಲ್ಪುಲೆ; ಆಯ ಸಾದಿನ್ ಸರ್ತ ಮಲ್ಪುಲೆ,’ ಅಂದ್‌ದ್ ಕಾಡ್‌ಡ್ ಬೊಬ್ಬೆ ಪಾಡುನಾಯನ ಸ್ವರ ಉಂಡು.” ಪ್ರವಾದಿ ಆದುಪ್ಪು ಯೆಶಾಯನ ಗ್ರಂಥೊಡು ಬರೆದುಪ್ಪು ಪ್ರಕಾರ ಸ್ನಾನಿಕೆ ಆಯಿ ಯೋಹಾನೆ ಬತ್ತ್‌ದ್ ಜನೊಕುಲೆಗ್, “ನಿಕುಲು ಪಾಪೊಲೆ ಪರಿಹಾರೊಗಾದ್ ಪಶ್ಚಾತಾಪ ಪಡೆದ್, ದೀಕ್ಷಾಸ್ನಾನ ಮಲ್ತೊನೊಡು,” ಅಂದ್‌ದ್ ಕಾಡ್‌ಡ್ ಸಾರಿಯೊಂದು ದೀಕ್ಷಾಸ್ನಾನ ಕೊರೊಂದಿತ್ತೆ.

5ಅಪಗ ಮಾತ ಯೂದಾಯ ಸೀಮೆದಾಕುಲುಲಾ ಯೆರೂಸಲೇಮುದಾಕುಲುಲಾ ಆಯ ಕೈತಲ್‌ ಪೋದು ತನ್ಕುಲೆ ಪಾಪೊಲೆನ್ ಪಂಡೊಂದು ಯೊರ್ದಾನ್ ತುದೆಟ್ ಆಯಡ್ದ್ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆರ್.

6ಈ ಯೋಹಾನೆ ಒಂಟೆ ಕುಜಲ್‌ದ ಪೊದಿಕೆಲಾ ಸೊಂಟೊಗು ಚರ್ಮದ ಪಟ್ಟಿಲಾ ಕಟ್ಟೊಂದಿತ್ತೆ. ಮೊಂಟೆಲಾ ಕಾಡ್‌ದ ತಿಗತನೆಯಿಲಾ ಆಯನ ತಿನಸ್ ಆದಿತ್ತ್ಂಡ್.

7ಯೋಹಾನೆ ಜನೊಕುಲೆಗ್ ಸಾರಿಯೊಂದು ಪಂಡಿನಿ, “ಒರಿ ಎನಡ್ದ್ ಬಲತ್ತಾಯೆ ಎನ ಬೆರಿಯೆ ಬರ್ಪೆ. ಆಯ ಜೋಡುದ ಪಟ್ಟಿನ್ ಗಿರ್ಪೆರೆಗ್ಲಾ ಯಾನ್ ತಕ್ಕದಾಯೆ ಅತ್ತ್.

8ಯಾನ್ ನಿಕ್ಲೆಗ್ ನೀರ್‌ದ ದೀಕ್ಷಾಸ್ನಾನ ಕೊರೊಂದುಲ್ಲೆ; ಆಂಡ ಆಯೆ ನಿಕ್ಲೆಗ್ ಪರಿಶುದ್ಧಾತ್ಮೊಡು ದೀಕ್ಷಾಸ್ನಾನ ಮಲ್ಪಾವೆ ಅಂದ್‌ದ್ ಸಾರಿದ್ ಪಂಡೆ.”

9ಆ ಸಮಯೊಡು ಯೇಸು ಗಲಿಲಾಯದ ನಜರೇತ್ ಪನ್ಪಿ ಊರುಡ್ದು ಬತ್ತ್‌ದ್ ಯೊರ್ದಾನ್ ತುದೆಟ್ ಯೋಹಾನಡ್ದ್ ದೀಕ್ಷಾಸ್ನಾನ ಮಲ್ಪಾವೊಂಡೆ.

10ಯೇಸು ನೀರ್‌ದುಲಯಿಡ್ದ್ ಮಿತ್ತ್ ಬತ್ತಿನಪಗ ಪರಲೋಕ ಜತ್ತ್ಂಡ್, ಬೊಕ್ಕ ದೇವೆರಾತ್ಮ ಪಾರಿವಾಳದ ರೂಪೊಡು ಆಯ ಮಿತ್ತ್ ಜಪ್ಪುನೆನ್ ಯೋಹಾನೆ ತೂಯೆ.

11ಅಪಗ ಪರಲೋಕೊಡ್ದು ಒಂಜಿ ಸ್ವರ ಆಂಡ್, “ಈ ಎನ ಪ್ರೀತಿದ ಮಗೆ, ನಿನಡ್ ಎಂಕ್ ಮೆಚ್ಚಿಗೆ ಉಂಡು.”

12ಅಪಗನೇ ದೇವೆರಾತ್ಮೆ ಯೇಸುನು ಕಾಡ್‌ಗ್ ಲೆತ್ತೊಂದು ಪೋಯೆ.

13ಆಯೆ ನಲ್ಪ ದಿನ ಕಾಡ್‌ಡ್ ಮೃಗೊಕ್ಕುಲೆ ಒಟ್ಟುಗು ಇತ್ತ್‌ದ್ ಸೈತಾನಡ್ದ್ ಶೋಧನೆಗ್ ಒಳಗಾಯೆ, ಬೊಕ್ಕ ದೂತೆರ್ ಆಯಗ್ ಉಪಚಾರ ಮಲ್ತೆರ್.

14ಯೋಹಾನೆ ಕೈದಿ ಆಯಿ ಬೊಕ್ಕ ಯೇಸು ಗಲಿಲಾಯ ಸೀಮೆಗ್ ಬತ್ತ್‌ದ್ ಜನೊಕುಲೆಗ್, “ಕಾಲ ಕರಿಂಡ್, ದೇವೆರೆ ರಾಜ್ಯ ಕೈತಲ್ ಆವೊಂದುಂಡು. ಪಶ್ಚಾತಾಪ ಪಡೆಲೆ, ಸುವಾರ್ತೆನ್ ನಂಬುಲೆ!” ಪಂಡ್ದ್ ದೇವೆರೆ ಸುವಾರ್ತೆನ್ ಸಾರಿಯೆ.

16ಯೇಸು ಗಲಿಲಾಯ ಕಡಲ್ದ ಬರಿಟ್ಟ್ ಪೋವೊಂದುಪ್ಪುನಗ, ಸೀಮೋನೆ ಬೊಕ್ಕ ಆಯನ ಮೆಗ್ಯೆ ಅಂದ್ರೆಯೆ ಕಡಲ್ಡ್ ಬಲೆ ಬೀಪುನೆನ್ ತೂಯೆ. ಅಕುಲು ಮೀನ್ ಪತ್ತುನಾಕುಲು.

17ಯೇಸು ಅಕ್ಲೆಡ, “ಎನ ಬೆರಿಯೆ ಬಲೆ, ಯಾನ್ ನಿಕ್ಲೆನ್ ನರಮಾನಿಲೆನ್ ಪತ್ತುನ ಬೆಸ್ತೆರಾದ್ ಮಲ್ಪುವೆ.” ಅಂದ್‌ದ್ ಪಂಡೆ.

18ಕೂಡ್ಲೆ ಅಕುಲು ತನ್ಕುಲೆ ಬಲೆನ್ ಬುಡ್ದು ಆಯ ಬೆರಿಯೆ ಪೋಯೆರ್.

19ಅಲ್ಪಡ್ದ್ ಒಂತೆ ದೂರ ಪೋನಗ ಜೆಬೆದಾಯನ ಮಗೆ ಯಾಕೋಬುನ್ಲಾ ಆಯನ ಮೆಗ್ಯೆ ಯೋಹಾನನ್ಲಾ ತೂಯೆ. ಮೊಕುಲು ಓಡೊಡು ತನ್ಕುಲೆ ಬಲೆನ್ ಸರಿ ಮಲ್ತೊಂದಿತ್ತೆರ್.

20ಕೂಡ್ಲೆ ಅಕ್ಲೆನ್ಲಾ ಲೆತ್ತೆ. ಅಕುಲು ತನ್ಕುಲೆ ಅಮ್ಮೆ ಜೆಬೆದಾಯನ್ ಬೇಲೆದಾಕುಲೆಡೊಪ್ಪ ಓಡೊಡೇ ಬುಡ್ದು ಆಯ ಬೆರಿಯೆ ಪೋಯೆರ್.

21ಐಡ್ದ್ ಬೊಕ್ಕ ಯೇಸುಲಾ ಆಯನ ಶಿಷ್ಯೆರ್‌ಲಾ ಕಪೆರ್ನೌಮು ಪನ್ಪಿ ಊರುಗು ಪೋಯೆರ್. ಸಬ್ಬತ್‌ದಿನೊಟ್ಟು ಯೇಸು ಸಭಾಮಂದಿರೊಗು ಪೋದು ಅಲ್ಪದ ಜನೊಕುಲೆಗ್ ಬೋಧನೆ ಕೊರಿಯೆ.

22ಜನೊಕುಲು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯೆರ್. ದಾಯೆಗಂದ್ಂಡ ಆಯೆ ಶಾಸ್ತ್ರಿಲೆ ಲೆಕ್ಕ ಬೋಧನೆ ಕೊರಂದೆ ಅಧಿಕಾರ ಇತ್ತಿನಾಯಲೆಕ್ಕ ಅಕ್ಲೆಗ್ ಬೋಧನೆ ಕೊರೊಂದಿತ್ತೆ.

23ಅಪಗ ಆ ಸಭಾಮಂದಿರೊಡು ದೆವ್ವ ಪತ್ತ್‌ದಿನ ಒರಿ ನರಮಾನಿ ಇತ್ತೆ.

24ಆ ದೆವ್ವ, “ನಜರೇತ್‌ದ ಯೇಸೋ ಎಂಕ್ಲೆನ ಸುದ್ಧಿ ನಿಕ್ಕ್ ದಾಯೆ? ಎಂಕ್ಲೆನ್ ನಾಶ ಮಲ್ಪೆರೆ ಬೈದನಾ? ಈ ಏರ್ ಅಂದ್‌ದ್ ಎಂಕ್ ಗೊತ್ತುಂಡು, ಈ ದೇವೆರೆ ಪರಿಶುದ್ಧದಾಯೆನೇ.” ಅಂದ್‌ದ್ ಅರಬಾಯಿ ದೀದ್ ಪಂಡ್ಂಡ್.

25ಯೇಸು ಅವೆನ್ ದಟ್ಟಿದ್, “ಮನಿಪಂದೆ ಕುಲ್ಲು, ಉಂಬ್ಯನ್ ಬುಡ್ದು ಪೋಲ,” ಅಂದ್‌ದ್ ಪನ್ನಗ

26ಆ ದೆವ್ವ ಆಯನ್ ಪೊರೆಲ್ಪಾದ್, ಅರಬಾಯಿ ಕೊರ್ದು ಆಯನ್ ಬುಡ್ದು ಪೋಂಡು.

27ಜನೊಕುಲು ಮಾತೆರ್ಲಾ ಅಚ್ಚಿರ ಆದ್, “ಉಂದು ದಾದ ಕತೆ? ಉಂದು ಪೊಸ ಬೋಧನೆ. ಉಂಬೆ ಅಧಿಕಾರೊಡು ದೆವ್ವೊಲೆಗ್ ಅಪ್ಪಣೆ ಕೊರ್ಪೆತ್ತಾ, ಐಕುಲು ಆಯನ ಪಾತೆರೊನು ಕೇನ್ವತ್ತಾ,” ಅಂದ್‌ದ್ ತನ್ಕುಲೆ ಉಲಯಿ ಪನೊಂದಿತ್ತೆರ್.

28ಅಪಗನೇ, ಯೇಸುನ ಸುದ್ಧಿ ಗಲಿಲಾಯದ ಸೀಮೆಡ್ ಮಾತ ಕಡೆಟ್ಲಾ ಪರಡ್ಂಡ್.

29ಯೇಸು ಬೊಕ್ಕ ಆಯನ ಶಿಷ್ಯೆರ್ ಸಭಾಮಂದಿರೊಡ್ದು ಪಿದಾಡ್ದ್ ಯಾಕೋಬು, ಯೋಹಾನಡೊಪ್ಪ ಸೀಮೋನ ಅಂದ್ರೆಯನ ಇಲ್ಲಗ್ ಬತ್ತೆರ್.

30ಅಲ್ಪ ಸೀಮೋನನ ಮಾಮಿ ಜ್ವರೊಟು ಜೆತ್ತ್‌ದಿತ್ತಲ್, ಅಪಗನೆ ಆಲೆ ಸಂಗತಿನ್ ಯೇಸುಡ ತೆರಿಪಾಯೆರ್.

31ಆಯೆ ಕೈತಲ್‌ ಬತ್ತ್‌ದ್ ಆಲೆನ ಕೈ ಪತ್ತ್‌ದ್ ಲಕ್ಕಾನಗ ಆಲೆನ ಜ್ವರ ಬುಡ್ದು ಪೋಂಡು, ಆಲ್ ಅಕ್ಲೆಗ್ ಉಪಚಾರ ಮಲ್ತೊಲು.

32ಬೈಯಗ್‌ ಪೊರ್ತು ಕಂತಿ ಬೊಕ್ಕ ಜನೊಕುಲು ಮಾತ ಸೀಕ್‌ದಾಕುಲೆನ್ಲಾ ದೆವ್ವ ಪತ್ತ್‌ದಿನಾಕುಲೆನ್ಲಾ ಆಯ ಕೈತಲ್‌ಗ್ ಲೆತ್ತೊಂದು ಬತ್ತೆರ್.

33ಇಡೀ ಊರುದಾಕುಲು ಬಾಕಿಲ್‌ದಲ್ಪ ಕೂಡ್ದು ಬತ್ತೆರ್.

34ಅಪಗ ಯೇಸು ತರತರತ ಸೀಕ್‌ಲೆಡ್ ನರಳೊಂದಿತ್ತಿ ಮಸ್ತ್ ಜನೊಕುಲೆನ್ ಗುಣ ಮಲ್ತ್‌ದ್, ದೆವ್ವ ಪತ್ತ್‌ದಿನಕಲೆನ್ ಬುಡ್ಪಾಯೆ. ಯೇಸು ಇಂಚಿತ್ತಿನಾಯೆ ಅಂದ್‌ದ್ ದೆವ್ವೊಲೆಗ್ ತೆರಿದಿತ್ತಿನೆಡ್ದ್, ಆಯೆ ಐಕ್ಲೆನ್ ಪಾತೆರಿಯೆರೆ ಬುಡ್ಜೆ.

35ಪುಲ್ಯಕಾಂಡೆ ನನಲಾ ಕತ್ತಲೆ ಉಪ್ಪುನಗ ಯೇಸು ಲಕ್ಕ್‌ದ್ ಪಿದಾಡ್ದ್ ಜನಮಾನಿದಾಂತಿನ ಜಾಗ್‌ಗ್ ಪೋದು ಅಲ್ಪ ಪ್ರಾರ್ಥನೆ ಮಲ್ತೊಂದಿತ್ತೆ.

36ಸೀಮೋನೆಲಾ ಆಯ ಒಟ್ಟುಗು ಇತ್ತಿನಾಕುಲುಲಾ ಆಯನ್ ನಾಡೊಂದು ಆಯೆ ಇತ್ತಿನಡೆಗ್ ಬತ್ತ್‌ದ್,

37“ಮಾತೆರ್ಲಾ ನಿನನ್ ನಾಡ್ವೆರ್,” ಅಂದ್‌ದ್ ತೆರಿಪಾಯೆರ್.

38ಐಕ್ ಆಯೆ ಅಕ್ಲೆಡ ಪಂಡಿನಿ, “ಎಂಕುಲು ಕೈತಲುಪ್ಪು ಬೇತೆ ಊರುಲೆಗ್ ಪೋಯಿ. ಅಲ್ಪಲಾ ಯಾನ್ ಸುವಾರ್ತೆನ್ ಸಾರಿಯೊಡು. ನೆಕ್ಕಾದೆ ಯಾನ್ ಪಿದಾಡ್ದ್ ಬತ್ತೆ.” ಅಂದ್‌ದ್ ಪಂಡೆ.

39ಬೊಕ್ಕ ಆಯೆ ಇಡೀ ಗಲಿಲಾಯದ ಮಾತ ಕಡೆಕ್ಕ್ ಪೋದು, ಸಭಾಮಂದಿರೊಲೆಡ್ ಸುವಾರ್ತೆನ್ ಸಾರಿಯೊಂದು ದೆವ್ವೊಲೆನ್ ಬುಡ್ಪಾವೊಂದಿತ್ತೆ.

40ಒರಿ ಕೊಷ್ಟದಾಯೆ ಯೇಸುನ ಕೈತಲ್‌ ಬತ್ತ್‌ದ್ ಅಡ್ಡಬೂರ್ದು, “ನಿಕ್ಕ್ ಮನಸಿತ್ತ್‌ಂಡ ಎನನ್ ಶುದ್ಧ ಮಲ್ಪೊಲಿ,” ಪಂಡ್ದ್ ನಟ್ಟಿಯೆ.

41ಯೇಸು ಕನಿಕರೊಡು ಕೈ ನೀಡ್ದ್ ಆಯನ್ ಮುಟ್ಟುದು, “ಎಂಕ್ ಮನಸುಂಡು; ಶುದ್ಧ ಆಲ,” ಪಂಡೆ.

42ಕೂಡ್ಲೆ ಆಯನ ಕೊಷ್ಟ ಬುಡ್ದು ಪೋಂಡು; ಆಯೆ ಶುದ್ಧ ಆಯೆ.

43ಅಪಗ ಯೇಸು ಆಯಡ, “ತೂಲ, ಉಂದೆನ್ ಏರೆಗ್ಲಾ ದಾಲ ಪನೊಡ್ಚಿ.

44ಆಂಡ ಪೋದು ಯಾಜಕೆರೆಗ್ ನಿನ ಮೆಯಿ ತೋಜಾದ್ ಮೋಶೆ ನೇಮಕ ಮಲ್ತಿ ಲೆಕ್ಕನೇ ನಿನ ಶುದ್ಧಾಚಾರೊನು ಮಲ್ಪುಲ. ಅವು ಜನೊಕುಲೆಗ್ ಸಾಕ್ಷಿ ಆವಡ್,” ಪಂಡ್ದ್ ಕಡಪುಡಿಯೆ.

45ಆಂಡ ಆಯೆ ಪೋದು ಮಾತೆರೆಡ ಪಂಡ್ದ್ ಊರಿಡೀ ಸಾರಿಯೆರೆ ಸುರು ಮಲ್ತೆ. ಐಡ್ದಾವರ ಯೇಸು ಮಾತೆರ್ ತೋಜುಲೆಕ್ಕ ವಾ ಊರುಗ್ಲಾ ಪೋವೆರೆ ಆವಂದೆ ಜನಮಾನಿದಾಂತಿನ ಜಾಗ್‌ಲೆಡ್ ಇತ್ತೆ. ಆಂಡ ಜನೊಕುಲು ನಾಲ್ ಕಡೆಡ್ದ್‌ಲಾ ಆಯ ಕೈತಲ್‌ ಬರೊಂದಿತ್ತೆರ್.

Jump to: Chapter 2 →