bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Tulu
/
Tulu (ಪೊಸ ಒಡಂಬಡಿಕೆ)
/
Mark 15
Mark 15
Tulu (ಪೊಸ ಒಡಂಬಡಿಕೆ)
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 16 →
1
ಬೊಲ್ಪಾಯಿ ಕೂಡ್ಲೆ ಪ್ರಧಾನಯಾಜಕೆರ್ಲಾ ಸಭೆತ ಹಿರಿಯಾಕುಲುಲಾ, ಶಾಸ್ತ್ರಿಲುಲಾ, ಹಿರಿಸಭೆತಾಕುಲುಲಾ ಮಾತೆರ್ಲಾ ಒಟ್ಟು ಸೇರ್ದ್ ಪಂಚಾತಿಕೆ ಮಲ್ತ್ದ್ ಯೇಸುನ ಕೈಕಟ್ಟ್ದ್ ಲೆತ್ತೊಂದು ಪೋದು ಪಿಲಾತಗ್ ಒಚ್ಚಿದ್ ಕೊರಿಯೆರ್.
2
ಪಿಲಾತೆ ಆಯಡ, “ಈ ಯೆಹೂದ್ಯೆರೆ ಅರಸು ಅಂದಾ?” ಪಂಡ್ದ್ ಕೇನ್ನಗ “ಈಯೆ ಪನೊಂದುಲ್ಲತ್ತಾ,” ಅಂದ್ದ್ ಉತ್ತರ ಕೊರಿಯೆ.
3
ಪ್ರಧಾನಯಾಜಕೆರ್ ಆಯನ ಮಿತ್ತ್ ಮಸ್ತ್ ದೂರು ಪನೊಂದಿತ್ತೆರ್. ಅಪಗ ಪಿಲಾತೆ ಕುಡೊರ ಕೇನ್ವೆ, “ಈ ದಾಲಾ ಉತ್ತರ ಕೊರ್ಪುಜನಾ? ತೂಲ, ಮೊಕುಲು ನಿನ ಮಿತ್ತ್ ಏತ್ ದೂರು ಪಾಡೊಂದುಲ್ಲೆರ್.”
5
ಆಂಡ ಯೇಸು ದಾಲಾ ಪಾತೆರಿಜೆ. ಅವೆನ್ ತೂದು ಪಿಲಾತಗ್ ಅಚ್ಚಿರ ಆಂಡ್.
6
ಪ್ರತಿ ವರ್ಸ ಪರ್ಬದಾನಿ ಜನೊಕುಲು ನಟ್ಟೊಂಡಿಲೆಕ್ಕ ಸೆರೆಮನೆಡ್ದ್ ಒರಿಯನ್ ಬುಡ್ದು ಕೊರ್ಪಿನವು ಪಿಲಾತನ ಅಧಿಕಾರೊಡು ಒಂಜಿ ಕ್ರಮ ಇತ್ತ್ಂಡ್.
7
ಅಪಗ ಬರಬ್ಬೆ ಪನ್ಪಿನಾಯೆ ಒರಿ ಇತ್ತೆ, ಆಯನ್ ಲಡಯಿಡ್ ಮಾನೆ ಕೆರ್ಪಿನಾಕುಲೆಡೊಪ್ಪ ಸೆರೆಮನೆಡ್ ಪಾಡ್ದ್ ಇತ್ತೆರ್.
8
ಜನೊಕುಲು ಪಿಲಾತನ ಕೈತಲ್ ಪೋದು, “ಈ ಎಂಕ್ಲೆಗ್ ಮಲ್ತೊಂದು ಬತ್ತಿಲೆಕ್ಕ ಒರಿಯನ್ ಬುಡುಗಡೆ ಮಲ್ತ್ದ್ ಕೊರೊಡು,” ಅಂದ್ದ್ ಕೇನೊಂದಿತ್ತೆರ್.
9
ಪ್ರಧಾನಯಾಜಕೆರ್ ಕಿಚ್ಚಿಮಚ್ಚರೊಡು ಯೇಸುನು ಒಚ್ಚಿದ್ ಕೊರ್ತೆರ್ ಅಂದ್ದ್ ಪಿಲಾತಗ್ ಗೊತ್ತಾಯಿನೆಡ್ದ್, “ಯಾನ್ ಯೆಹೂದ್ಯೆರೆ ಅರಸುನು ನಿಕ್ಲೆಗ್ ಬುಡ್ದು ಕೊರೊಡಾ?” ಅಂದ್ದ್ ಅಕ್ಲೆಡ ಕೇಂಡೆ.
11
ಅಲ್ಪ ಪ್ರಧಾನಯಾಜಕೆರ್ ಬರಬ್ಬನೇ ಬುಡ್ದು ಕೊರೊಡು ಅಂದ್ದ್ ಜನೊಕುಲೆನ್ ಲಕ್ಕಾಯೆರ್.
12
ಐಕ್ ಪಿಲಾತೆ ಕುಡ ಅಕ್ಲೆಡ, “ಅಂಚಾಂಡ ನಿಕುಲು ಪನ್ಪಿನ ಯೆಹೂದ್ಯೆರೆ ಅರಸುನು ಯಾನ್ ದಾನೆ ಮಲ್ಪೊಡು?” ಅಂದ್ದ್ ಕೇನ್ನಗ ಅಕುಲು,
13
“ಆಯನ್ ಕ್ರುಸ್ಸುಗು ಪಾಡ್ಪಾಲ,” ಅಂದ್ದ್ ಕುಡ ಬೊಬ್ಬೆ ಪಾಡಿಯೆರ್.
14
ಐಕ್ ಪಿಲಾತೆ, “ದಾಯೆಗ್? ಅಂಚಿನ ದಾದ ಹಾಳ್ ಬೇಲೆ ಮಲ್ತ್ದೆ?” ಪಂಡೆ. ಆಂಡ ಅಕುಲು, “ಆಯನ್ ಕ್ರುಸ್ಸುಗು ಪಾಡ್ಪಾಲ,” ಪಂಡ್ದ್ ಬೊಕ್ಕಲಾತ್ ಬೊಬ್ಬೆ ಪಾಡಿಯೆರ್.
15
ಐಕ್ ಪಿಲಾತೆ ಜನೊಕುಲೆ ಮನಸ್ನ್ ಸಮಾಧಾನ ಮಲ್ಪೊಡು ಪಂಡ್ದ್, ಬರಬ್ಬನ್ ಅಕ್ಲೆಗ್ ಬುಡ್ದು ಕೊರ್ದು, ಯೇಸುನು ಚಾಟಿಡ್ ಹಾಕಾದ್, ಕ್ರುಸ್ಸುಗು ಪಾಡಿಯೆರೆ ಒಚ್ಚಿದ್ ಕೊರಿಯೆ.
16
ಸಿಪಾಯಿಲು ಆಯನ್ ಅಧಿಪತಿನ ಅರಮನೆಕ್ ಸೇರ್ದಿನ ಜಾಲ್ದ ಉಲಯಿ ಕೊನೊದು, ಇಡೀ ಸಿಪಾಯಿಲೆ ದಂಡ್ನ್ ಒಟ್ಟುಗು ಲೆತ್ತೆರ್.
17
ಸಿಪಾಯಿಲು ಆಯಗ್ ಕೆಂಪುದ ಒಲ್ಲಿನ್ ಪೊದಿಪಾದ್ ಮುಳ್ಳುದ ಕಿರೀಟ ಮುಡೆದ್ ಆಯಗ್ ದೀದ್,
18
“ಯೆಹೂದ್ಯೆರೆ ಅರಸೋ!” ನಿಕ್ಕ್ ಸೊಲ್ಮೆಲು ಅಂದ್ದ್ ಆಯಗ್ ವಂದನೆ ಮಲ್ತ್ದ್
19
ಕೋಲುಡು ಆಯನ ತರೆಕ್ ಹಾಕ್ದ್, ಆಯನ ಮಿತ್ತ್ ಉಬ್ಬಿದ್, ಆಯನ ಎದುರುಡು ಮೊರಂಪೂರ್ದು ಅಡ್ಡ ಬೂರಿಯೆರ್.
20
ಇಂಚ ಆಯನ್ ಗೇಲಿ ಮಲ್ತಿ ಬೊಕ್ಕ ಆ ಕೆಂಪು ಒಲ್ಲಿನ್ ದೆತ್ತ್ದ್ ಆಯನ ಕುಂಟುನು ಪಾಡ್ದ್ ಆಯನ್ ಕ್ರುಸ್ಸುಗು ಪಾಡಿಯೆರೆ ಲೆತ್ತೊಂದು ಪೋಯೆರ್.
21
ಅಪಗ ಕಂಡೊಡ್ದು ಪಿದಾಡ್ದ್ ಆ ಮಾರ್ಗೊಡು ಬರೊಂದಿತ್ತಿ ಒರಿಯನ್ ಯೇಸುನ ಕ್ರುಸ್ಸುನು ತುಂಬೊಂದು ಕೊನೆಯೆರೆ ಒತ್ತಾಯ ಮಲ್ತೆರ್. ಉಂಬೆ ಏರ್ ಅಂದ್ಂಡ, ಅಲೆಕ್ಸಾಂದ್ರ ಬೊಕ್ಕ ರೂಫು ಇನ್ಪಿನರೆನ ಅಮ್ಮೆರ್ ಆದುಪ್ಪು ಕುರೇನ ಪಟ್ಟಣದ ಸೀಮೋನೆ.
22
ಬೊಕ್ಕ ಯೇಸುನು ಗೊಲ್ಗೊಥಾ ಪನ್ಪಿ ಜಾಗ್ಗ್ ಲೆತ್ತೊಂದು ಬತ್ತೆರ್. ಗೊಲ್ಗೊಥಾ ಅಂದ್ಂಡ ಕಪಾಲದ ಜಾಗ್.
23
ಅಲ್ಪ ಆಯಗ್ ರಕ್ತಬೋಳ ಬೆರಕೆ ಮಲ್ತಿ ದ್ರಾಕ್ಷಾರಸೊನು ಕೊರಿಯೆರ್, ಆಂಡ ಯೇಸು ದೆತ್ತೊನ್ಜೆ.
24
ಅಕುಲು ಆಯನ್ ಕ್ರುಸ್ಸುಗು ಪಾಡ್ದ್ ಆಯನ ಕುಂಟುನು ಒವ್ವು ಏರೇರೆಗ್ ಆವೊಡು ಅಂದ್ದ್ ಚೀಟಿ ಪಾಡ್ದ್ ಪಾಲ್ ಮಲ್ತೊಂಡೆರ್.
25
ಆಯನ್ ಕ್ರುಸ್ಸುಗು ಪಾಡ್ನಗ ಕಾಂಡೆ ಒಂರ್ಬ ಗಂಟೆ ಆದಿತ್ತ್ಂಡ್.
26
ಉಂದತ್ತಂದೆ, ಅಕುಲು ಪಡ್ಪಾಯಿ ಅಪರಾಧೊನು ತೆರಿಪಾವುನ ಪತ್ತೆ ಅಂದ್ದ್ ಕ್ರುಸ್ಸುದ ಮಿತ್ತ್ ಬರೆದಿತ್ತ್ಂಡ್. ಅವು ದಾನೆಂದ್ಂಡ, “ಯೆಹೂದ್ಯೆರೆ ಅರಸು,” ಪನ್ಪಿನವೇ.
27
ಅವತ್ತಂದೆ ಇರ್ವೆರ್ ಕಲ್ವೆರೆನ್ ಕನತ್ದ್ ಒರಿಯನ್ ಆಯನ ಬಲತ್ತ್ಡ್ ಬೊಕ್ಕೊರಿಯನ್ ದತ್ತ ಮರ್ಗಿಲ್ಡ್ ಆಯಡೊಪ್ಪ ಕ್ರುಸ್ಸುಗು ಪಾಡಿಯೆರ್.
29
ಅಲ್ಪ ಪೋಪಿನಾಕುಲು ತರೆ ಆಡಾದ್, “ಆಹಾ! ದೇವಾಲಯೊನು ಬೂರ್ಪಾದ್ ಮೂಜಿ ದಿನೊಟು ಕುಡ ಕಟ್ಟುನಾಯಾ, ಕ್ರುಸ್ಸುಡ್ದು ಜತ್ತ್ದ್ ನಿನನ್ ಬಚವು ಮಲ್ತೊನ್ಲ,” ಅಂದ್ದ್ ಆಯನ್ ಗೇಲಿ ಮಲ್ತೊಂದಿತ್ತೆರ್.
31
ಐತ ಲೆಕ್ಕನೇ ಪ್ರಧಾನಯಾಜಕೆರ್ಲಾ ಶಾಸ್ತ್ರಿಲುಲಾ, “ಆಯೆ ಬೇತೆಕ್ಲೆನ್ ಬಚವು ಮಲ್ತೆ, ತನನ್ ಬಚವು ಮಲ್ತೊನೆರೆ ಆಯಿಜಿ? ಇಸ್ರಾಯೇಲ್ಯೆರೆ ಅರಸು ಆದುಪ್ಪು ಈ ಕ್ರಿಸ್ತೆ, ಇತ್ತೆ ಕ್ರುಸ್ಸುಡ್ದು ಜತ್ತ್ದ್ ಬರಡ್, ಜತ್ತ್ದ್ ಬತ್ತ್ಂಡ ಎಂಕುಲು ನಂಬುವ,” ಅಂದ್ದ್ ತನ್ಕುಲೆ ಉಲಯಿ ಗೇಲಿಡ್ ಪಾತೆರೊಂದಿತ್ತೆರ್. ಆಯಡೊಪ್ಪ ಕ್ರುಸ್ಸುಗು ಪಾಡ್ದಿತ್ತಿನಾಕುಲುಲಾ ಅಂಚೆನೇ ಆಯನ್ ನಿಂದನೆ ಮಲ್ತೊಂದಿತ್ತೆರ್.
33
ಮಧ್ಯಾಹ್ನದ ಪೊರ್ತು ಇಡೀ ದೇಶದ ಮಿತ್ತ್ ಮೂಜಿ ಗಂಟೆ ಮುಟ್ಟ ಕತ್ತಲೆ ಆಂಡ್.
34
ಮೂಜಿ ಗಂಟೆಗ್ ಯೇಸು, “ಎಲೋಹಿ, ಎಲೋಹಿ, ಲಮಾ ಸಬಕ್ತಾನಿ,” ಪಂಡ್ಂಡ “ಎನ ದೇವೆರೇ, ಎನ ದೇವೆರೇ ದಾಯೆಗ್ ಎನ ಕೈ ಬುಡ್ತ,” ಅಂದ್ದ್ ಮಲ್ಲ ಸ್ವರೊಟ್ಟು ಬುಲ್ತೆ.
35
ಕೈತಲ್ ಉಂತುದಿನಾಕುಲೆಡ್ ಕೆಲೆವೆರ್ ಅವೆನ್ ಕೇಂಡ್ದ್, “ತೂಲೆ ಆಯೆ ಎಲೀಯನ್ ಲೆಪ್ಪುವೆ,” ಅಂದ್ದ್ ಪಂಡೆರ್.
36
ಅಪಗ ಒರಿ ಪಾರ್ಪೋದು ಸ್ಪಂಜಿನ್ ಪುಳಿರಸೊಟು ಮುರ್ಕಾದ್, ಕೋಲುಗು ತಿಕ್ಕಾದ್ ಆಯಗ್ ಪರಿಯೆರೆ ಕೊರ್ದು, “ಬುಡ್ಲೆ, ಎಲೀಯೆ ಉಂಬ್ಯನ್ ಜಪುಡಾಯೆರೆ ಬರ್ಪೆನಾ ದಾನ್ನ ತೂಕ,” ಅಂದ್ದ್ ಪಂಡೆರ್.
37
ಆಂಡ ಯೇಸು ಮಲ್ಲ ಸ್ವರೊಟ್ಟು ಬುಲ್ತುದು ಪ್ರಾಣ ಬುಡಿಯೆ.
38
ಅಪಗ ದೇವಾಲಯದ ಪರದೆ ಮಿತ್ತ್ಡ್ದ್ ತಿರ್ತ್ ಮುಟ್ಟ ಪರಿದ್ ರಡ್ಡ್ ಪಾಲ್ ಆಂಡ್.
39
ಆಯೆ ಇಂಚ ಪ್ರಾಣ ಬುಡಿನೆನ್ ತೂದು ಆಯನ ಎದುರುಡು ಉಂತುದಿತ್ತಿ ಶತಾಧಿಪತಿ, “ನಿಜಾದ್ಲಾ ಈ ನರಮಾನಿ, ದೇವೆರೆ ಮಗೆನೇ,” ಅಂದ್ದ್ ಪಂಡೆ.
40
ಉಂದತ್ತಂದೆ ಅಲ್ಪ ಪೊಂಜೊವುಲುಲಾ ದೂರೊಡ್ದು ತೂವೊಂದಿತ್ತೆರ್. ಅಕ್ಲೆಡ್ ಆಯೆ ಗಲಿಲಾಯೊಡಿತ್ತಿನಪಗ ಆಯನ ಬೆರಿಯೆ ಪೋವೊಂದು ಸೇವೆ ಮಲ್ತೊಂದಿತ್ತಿ ಮಗ್ದಲದ ಮರಿಯಲಾ ಎಲ್ಯ ಯಾಕೋಬು ಯೋಸೆನ ಅಪ್ಪೆ ಆಯಿ ಮರಿಯಲಾ, ಸಲೋಮಿಲಾ ಇತ್ತೆರ್. ಆಯಡೊಪ್ಪ ಯೆರೂಸಲೇಮುಗು ಬೈದಿನ ಬೇತೆ ಮಸ್ತ್ ಪೊಂಜೊವುಲುಲಾ ಇತ್ತೆರ್.
42
ಅಪಗನೆ ಬೈಯ ಆದಿತ್ತ್ಂಡ್. ಆ ದಿನ ಸಬ್ಬತ್ದ ದುಂಬಿನಾನಿ ಆದಿತ್ತ್ಂಡ್.
43
ಅಪಗ ಅರಿಮಥಾಯದ ಯೋಸೇಫೆ ಹಿರಿಸಭೆಟ್ ಪುದರ್ ಇತ್ತಿನಾಯೆ ದೇವೆರೆ ರಾಜ್ಯೊನು ಕಾತೊಂದಿತ್ತಿನಾಯೆಲಾ ಆದಿತ್ತ್ದ್ ಆಯೆ ಧೈರ್ಯೊಡು ಪಿಲಾತನ ಕೈತಲ್ ಪೋದು ಯೇಸುನ ಶರೀರೊನು ಎಂಕ್ ಕೊರ್ಲೆ ಅಂದ್ದ್ ನಟ್ಟೊಂಡೆ.
44
ಪಿಲಾತೆ, ಯೇಸು ಈತ್ ಬೇಗ ಸೈತೆ ಅಂದ್ದ್ ಅಚ್ಚಿರ ಆಯೆ. ಶತಾಧಿಪತಿನ್ ಲೆಪುಡಾದ್ ಯೇಸು ಸೈತೆನಾ ಅಂದ್ದ್ ಆಯಡ ಕೇಂಡೆ.
45
ಆಯೆ ಸೈತಿನೆನ್ ಶತಾಧಿಪತಿಡ್ದ್ ತೆರಿದ್ ಪುಣೊನು ಯೋಸೇಫಗ್ ಕೊರ್ಪಾಯೆ.
46
ಯೋಸೇಫು ನಾರ್ಮಡಿತ ಕುಂಟುನು ಕ್ರಯೊಕು ದೆತ್ತೊಂದು ಯೇಸುನ ಪುಣೊನು ಕ್ರುಸ್ಸುಡ್ದು ಜಪುಡಾಯೆ. ಪುಣೊನು ನಾರ್ಮಡಿತ ಕುಂಟುಡು ಸುತ್ತುದು ಪಾದೆಡ್ ಕುರೆದಿತ್ತಿ ಸಮಾಧಿಡ್ ದೀದ್ ಸಮಾಧಿದ ಬಾಕಿಲ್ಗ್ ಕಲ್ಲ್ನ್ ಪೊರೆಲ್ಪಾಯೆ.
47
ಮಗ್ದಲದ ಮರಿಯಲಾ ಯೋಸೆನ ಅಪ್ಪೆ ಮರಿಯಲಾ ಯೇಸುನು ದೀತಿನ ಜಾಗ್ನ್ ತೂಯೆರ್.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 16 →
All chapters:
1
2
3
4
5
6
7
8
9
10
11
12
13
14
15
16