Mark 3

Tulu (ಪೊಸ ಒಡಂಬಡಿಕೆ)

← Chapter 2 Jump to: Chapter 4 →

1ಯೇಸು ಕುಡೊಂಜಿ ಸರಿ ಸಭಾಮಂದಿರೊಗು ಪೋಯೆ, ಅಲ್ಪ ಕೈ ನುಂಗುಪೋತಿನಾಯೆ ಇತ್ತೆ.

2ಅಲ್ಪ ಇತ್ತಿನ ಕೆಲೆವೆರ್, ಯೇಸು ಆ ನರಮಾನಿನ್ ಸಬ್ಬತ್‌ದಿನೊಟು ಗುಣ ಮಲ್ಪುವೆನಾ ಅಂದ್‌ದ್ ಕಾತೊಂದು ಆಯನ ಮಿತ್ತ್ ತಪ್ಪು ನಾಡೊಂದಿತ್ತೆರ್.

3ಯೇಸು ಕೈ ನುಂಗುಪೋತಿನಾಯಡ, “ಲಕ್ಕ್‌ದ್ ನಡುಟು ಉಂತುಲ,” ಅಂದ್‌ದ್ ಪಂಡ್ದ್

4ಜನೊಕುಲೆಡ, “ನ್ಯಾಯಕಟ್ಟ್‌ದ ಪ್ರಕಾರ ಸಬ್ಬತ್‌ದಿನೊಟು ಒವೆನ್ ಮಲ್ಪುನವು ನ್ಯಾಯ? ಎಡ್ಡೆ ಮಲ್ಪುನವಾ ಹಾಳ್ ಮಲ್ಪುನವಾ? ಪ್ರಾಣೊನು ಒರಿಪಾವುನವಾ ಕೆರ್ಪಿನವಾ?” ಅಂದ್‌ದ್ ಪ್ರಶ್ನೆ ಕೇನ್ನಗ, ಅಕುಲು ಮನಿಪಂದೆ ಇತ್ತೆರ್.

5ಅಪಗ ಯೇಸು ಅಕ್ಲೆನ ಉಡಲ್ ಕಲ್ಲಾದಿತ್ತಿನೆನ್ ತೂದು ದುಃಖ ಮಲ್ತ್‌ದ್, ಕೋಪೊಡು ಸುತ್ತಲಾ ಅಕ್ಲೆನ್ ತೂದು, ಆ ನರಮಾನಿಡ, “ನಿನ ಕೈ ನೀಡ್ಲ!” ಅಂದ್‌ದ್ ಪಂಡೆ. ಆಯೆ ನೀಡಿಯೆ, ಕೈ ಗುಣ ಆಂಡ್.

6ಕೂಡ್ಲೆ ಪರಿಸಾಯೆರ್ ಪಿದಯಿ ಪೋದು, ಹೆರೋದ್ಯೆರೆನ ಗುಂಪುನು ಒಟ್ಟು ಸೇರಾದ್, ಇಂಬ್ಯನ್ ವಾ ಉಪಾಯೊಡು ಕೆರ್ಪಿನಿ ಪಂಡ್ದ್ ಆಯಗ್ ವಿರೋಧಾದ್ ಆಲೋಚನೆ ಮಲ್ತೊಂಡೆರ್.

7ಯೇಸು ತನ ಶಿಷ್ಯೆರೆಡೊಪ್ಪ ಆ ಜಾಗ್‌ನ್ ಬುಡ್ದು ಕಡಲ ಬರಿಕ್ಕ್ ಪೋಯೆ. ಅಪಗ ಗಲಿಲಾಯೊಡ್ದುಲಾ ಮಸ್ತ್ ಜನೊಕುಲು ಆಯನ ಬೆರಿಯೆ ಬತ್ತೆರ್.

8ಆಯೆ ಇಂಚಿಂಚಿ ಬೇಲೆಲೆನ್ ಮಲ್ಪುವೆ ಅಂದ್‌ದ್ ಕೇಂಡ್ದ್ ಮಸ್ತ್ ಜನೊಕುಲು ಯೂದಾಯೊಡ್ದುಲಾ ಯೆರೂಸಲೇಮುಡ್ದುಲಾ ಇದುಮಾಯೊಡ್ದುಲಾ ಯೊರ್ದಾನ್ ತುದೆತ ಆಯೆರೆಡ್ದ್ ತೂರ್ ಬೊಕ್ಕ ಸೀದೋನ್ ಪಟ್ಟಣದ ಸುತ್ತ ಇತ್ತಿನಾಕುಲುಲಾ ಆಯನ ಕೈತಲ್‌ಗ್ ಬತ್ತೆರ್.

9ಜನೊಕುಲೆ ಗುಂಪು ಆಯನ ಮೆಯಿತ ಮಿತ್ತ್ ಬೂರಂದಿಲೆಕ್ಕ, ಆಯಗ್ ಒಂಜಿ ಓಡೊನು ತಯಾರ್ ಮಲ್ಪೆರೆ ಯೇಸು ತನ ಶಿಷ್ಯೆರೆಗ್ ಪಂಡೆ.

10ದಾಯೆಗಂದ್ಂಡ ಆಯೆ ಮಸ್ತ್ ಜನೊಕುಲೆನ ಸೀಕ್‌ನ್ ಗುಣ ಮಲ್ತಿನೆಡ್ದ್, ಸೀಕ್‌ದಾಕುಲು ಮಾತೆರ್ಲಾ ಆಯನ್ ಮುಟ್ಟೊಡು ಅಂದ್‌ದ್ ಆಯನ ಮೇಲ್‌ಗ್ ಬೂರೊಂದಿತ್ತೆರ್.

11ಬೊಕ್ಕ ದೆವ್ವೊಲು ಆಯನ್ ತೂಯಿ ಕೂಡ್ಲೆ ಆಯನ ಎದುರು ಅಡ್ಡಬೂರ್ದು, “ಈಯೇ ದೇವೆರೆ ಮಗೆ,” ಅಂದ್‌ದ್ ಕಲ್ಕೊಂದಿತ್ತ.

12ಆಂಡ ಆಯೆ ತಾನ್ ಇಂಚಿತ್ತಿನಾಯೆ ಅಂದ್‌ದ್ ಏರೆಗ್ಲಾ ತೆರಿಪಾಯೆರೆ ಬಲ್ಲಿ ಅಂದ್‌ದ್ ಅಕ್ಲೆಗ್ ಕಡಾ ಕಂಡಿತಾದ್ ಪಂಡೆ.

13ಐಡ್ದ್ ಬೊಕ್ಕ ಯೇಸು ಗುಡ್ಡೆದ ಮಿತ್ತ್ ಪೋಯೆ. ಆಯೆ ತನ್ಕ್ ಬೋಡಾಪಿನಾಕುಲೆನ್ ಬರಿಯೆರೆ ಪನ್ನಗ ಅಕುಲು ಆಯನ ಕೈತಲ್‌ ಬತ್ತೆರ್.

14ಅಪಗ ಆಯೆ ಪದ್ರಾಡ್ ಮಂದಿಲೆನ್ ಅಜತ್‌ದ್ ಅಕ್ಲೆಗ್ ಅಪೊಸ್ತಲೆರ್ ಅಂದ್‌ದ್ ಪುದರ್ ಕೊರಿಯೆ. ಅಕುಲು ತನಡೊಪ್ಪ ಉಪ್ಪೊಡಂದ್‌ದ್‌ಲಾ, ಅಕ್ಲೆನ್ ಸುವಾರ್ತೆನ್ ಸಾರಿಯೆರೆಲಾ

15ದೆವ್ವೊಲೆನ್ ಬುಡ್ಪಾವುನ ಅಧಿಕಾರ ಉಪ್ಪುಲೆಕ್ಕಲಾ ನೇಮಕ ಮಲ್ತೆ.

16ಅಜತ್‌ದಿನಾಕುಲು ಏರಂದ್ಂಡ, ಸೀಮೋನೆ ಪನ್ಪಿನಾಯಗ್ ಪೇತ್ರೆ ಪಂಡ್ದ್ ಪುದರ್ ದೀಯೆ.

17ಜೆಬೆದಾಯನ ಮಗೆ ಆಯಿ ಯಾಕೋಬುಗ್ಲಾ ಆಯನ ಮೆಗ್ಯೆ ಆಯಿ ಯೋಹಾನಗ್ಲಾ ಬೊವನೆರ್ಗೆಸ್ ಪಂಡ್ಂಡ ತೆಡಿಲ್‌ದ ಕಿನ್ನಿಲು ಪಂಡ್ದ್ ಪುದರ್ ದೀಯೆ.

18ಬೊಕ್ಕ ಒರಿದಿನಾಕುಲು ಏರಂದ್ಂಡ, ಅಂದ್ರೆಯೆ, ಫಿಲಿಪ್ಪು, ಬಾರ್ತೊಲೊಮಾಯೆ, ಮತ್ತಾಯೆ, ತೋಮೆ, ಅಲ್ಫಾಯನ ಮಗೆ ಯಾಕೋಬು, ತದ್ದಾಯೆ, ಮತಾಭಿಮಾನಿ ಅಂದ್‌ದ್ ಲೆಪ್ಪವೊಂಡಿ ಸೀಮೋನೆ,

19ಬೊಕ್ಕ ಯೇಸುನು ಪತ್ತ್‌ದ್ ಕೊರಿ ಇಸ್ಕಾರಿಯೋತ ಯೂದೆ ಮೊಕುಲೇ.

20ಯೇಸು ಇಲ್ಲದುಲಯಿ ಬತ್ತಿನಪಗ ಜನೊಕುಲೆ ಗುಂಪು ಕುಡ ಸೇರಿನೆಡ್ದ್ ಆಯಗ್ಲಾ ಆಯನ ಶಿಷ್ಯೆರೆಗ್ಲಾ ವಣಸ್ ಮಲ್ಪೆರೆ ಆಯಿಜಿ.

21ಉಂದೆನ್ ಕೇಂಡ್ದ್ ಆಯನ ಸಂಬಂದಿಕೆರ್, “ಆಯಗ್ ಮರ್ಲ್ ಪತ್ತ್‌ದ್ಂಡ್,” ಅಂದ್‌ದ್ ಆಯನ್ ಪತ್ತಿಯೆರೆ ಪಿದಾಡಿಯೆರ್,

22ಉಂದತ್ತಂದೆ ಯೆರೂಸಲೇಮುಡ್ದು ಬತ್ತ್‌ತ್ತಿ ಶಾಸ್ತ್ರಿಲು, “ಇಂಬ್ಯನ್ ಬೆಲ್ಜೆಬೂಲೆ ಪತ್ತ್‌ದ್ಂಡ್, ಇಂಬೆ ದೆವ್ವೊಲೆ ಮುಖ್ಯಸ್ಥನ ಸಹಾಯೊಡ್ದು ದೆವ್ವೊಲೆನ್ ಬುಡ್ಪಾವೆ,” ಅಂದ್‌ದ್ ಪನೊಂದಿತ್ತೆರ್.

23ಯೇಸು ಅಕ್ಲೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಡ, ಉಪಕತೆತ್ತ ರೂಪೊಡು ಪಂಡಿನಿ ದಾನೆಂದ್ಂಡ, “ಸೈತಾನೆ ಸೈತಾನನ್ ಬುಡ್ಪಾವುನ ಉಂಡಾ?

24ಒಂಜಿ ರಾಜ್ಯದ ಉಲಯಿ ಭೇದ ಉಂಡಾಂಡ, ಆ ರಾಜ್ಯ ಒರಿಯಂದ್.

25ಐತ ಲೆಕ್ಕನೆ ಒಂಜಿ ಇಲ್ಲದ ಉಲಯಿ ಭೇದ ಉಂಡಾಂಡ ಆ ಇಲ್ಲ್‌ಲಾ ಒರಿಯಂದ್.

26ಅಂಚೆನೇ, ಸೈತಾನೆ ತನ್ಕ್ ವಿರೋಧಾದ್ ಭೇದ ಮಲ್ತೊಂಡೆಡ ಆಯೆ ನಾಶಾದ್ ಪೋವೆ.

27“ಉಂದತ್ತಂದೆ ಒರಿ ಸುರುಟ್ಟು ಬಲವಂತನ್ ಕಟ್ಟ್‌ದ್ ಪಾಡಂದೆ ಆ ಬಲವಂತನ ಇಲ್ಲನ್ ಪೊಗ್ಗುದು ಸೊತ್ತುಲೆನ್ ಲೂಟಿ ಮಲ್ಪೆರೆ ಆಪುಜಿ. ಕಟ್ಟಿ ಬೊಕ್ಕನೇ ಆಯನ ಇಲ್ಲನ್ ಲೂಟಿ ಮಲ್ಪೊಲಿ.”

28ಉಂದೆನ್ ಯೇಸು ಪಂಡಿನಿ ದಾಯೆಗಂದ್ಂಡ ಶಾಸ್ತ್ರಿಲು, “ಆಯಡ ದೆವ್ವೊಲು ಉಂಡು,” ಅಂದ್‌ದ್ ಪಂಡಿನೆಕ್ಕ್. ಆಯೆ ಅಕ್ಲೆಗ್, “ನಿಕ್ಲೆಗ್ ನಿಜಾದ್ ಪನ್ಪೆ ನರಮಾನಿ ಮಲ್ಪುನ ಪ್ರತಿ ಒಂಜಿ ಪಾಪೊಗ್ಲಾ ಬಾಯಿಡ್ದ್ ಬರ್ಪಿ ದೂಷಣೆಗ್ಲಾ ಮಾಪು ಉಂಡು. ಆಂಡ ಪರಿಶುದ್ಧಾತ್ಮೊಗು ವಿರೋಧಾದ್ ದೂಷಣೆ ಮಲ್ತಿನಾಯಗ್ ಏಪೊಗ್ಲಾ ಮಾಪು ಆವಂದ್. ಆಯೆ ನಿತ್ಯ ಪಾಪಿ ಆದುಪ್ಪುವೆ,” ಅಂದ್‌ದ್ ಪಂಡೆ.

31ಯೇಸುನ ಅಪ್ಪೆಲಾ ಮೆಗ್ಯಾಡ್ಲುಲಾ ಬತ್ತ್‌ದ್ ಪಿದಯಿ ಉಂತೊಂದು ಆಯನ್ ಲೆಪ್ಪುಡಾಯೆರೆ ಕಡಪುಡಿಯೆರ್.

32ಜನೊಕುಲು ಆಯಡ, “ತೂಲ, ನಿನ ಅಪ್ಪೆಲಾ ನಿನ ಮೆಗ್ಯಾಡ್ಲುಲಾ ನಿನನ್ ನಾಡೊಂದು ಪಿದಯಿ ಉಂತುದೆರ್,” ಅಂದ್‌ದ್ ಪಂಡೆರ್.

33ಐಕ್ ಯೇಸು ಅಕ್ಲೆಡ, “ಎನ ಅಪ್ಪೆಲಾ ಮೆಗ್ಯಾಡ್ಲುಲಾ ಏರ್?” ಅಂದ್‌ದ್ ಕೇಂಡೆ.

34ತನ ಸುತ್ತಲಾ ಕುಲ್ಲುದಿನಾಕುಲೆನ್ ತೂದು, “ಇಂದಾ, ಮೊಕುಲೇ ಎನ ಅಪ್ಪೆಲಾ, ಎನ ಮೆಗ್ಯಾಡ್ಲುಲಾ.

35ಏರ್ ದೇವೆರೆ ಚಿತ್ತದ ಲೆಕ್ಕ ನಡಪುವೆನಾ ಆಯೆನೇ ಎನ ಮೆಗ್ಯೆಲಾ ಮೆಗ್ದಿಲಾ ಅಪ್ಪೆಲಾ ಆದುಲ್ಲೆರ್,” ಅಂದ್‌ದ್ ಪಂಡೆ.

← Chapter 2 Jump to: Chapter 4 →