bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Tulu
/
Tulu (ಪೊಸ ಒಡಂಬಡಿಕೆ)
/
Romans 1
Romans 1
Tulu (ಪೊಸ ಒಡಂಬಡಿಕೆ)
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 2 →
1
ಯಾನ್ ಪೌಲು, ಯೇಸು ಕ್ರಿಸ್ತೆ ದಾಸೆಲಾ ಅಪೊಸ್ತಲೆ ಆವೆರೆ ಲೆಪ್ಪು ಇತ್ತಿನಾಯೆಲಾ ದೇವೆರೆ ಸುವಾರ್ತೆನ್ ಸಾರಿಯೆರೆ ನೇಮಕ ಆತಿನಾಯೆಲಾ ಆದುಲ್ಲೆ.
2
ಆ ಸುವಾರ್ತೆನ್ ಸಾರಿದ್ ತೆರಿಪಾವೆ ಪಂಡ್ದ್ ದೇವೆರ್ ಮಸ್ತ್ ಅನಾದಿಕಾಲೊಡ್ದೇ ಪರಿಶುದ್ಧ ಶಾಸ್ತ್ರೊಡು ತನ ಪ್ರವಾದಿಲೆಡ್ದ್ ಪಾತೆರ ಕೊರ್ತೆ.
3
ಈ ಸುವಾರ್ತೆ ದೇವೆರೆ ಮಗೆ ಆಯಿ ಯೇಸು ಕ್ರಿಸ್ತನ ವಿಷಯೊಡು ಆದುಂಡು. ಅವು ದಾನೆಂದ್ಂಡ ಆಯೆ ನರಮಾನಿ ಆದ್ ದಾವೀದನ ಸಂತಾನೊಡು ಪುಟ್ಟುದು; ಪರಿಶುದ್ಧ ಆತ್ಮೊಗು ಸರಿಯಾದ್ ಸೈತಿ ಬೊಕ್ಕ ಜೀವೊಡು ಲಕ್ಕಾಯಿನ ಮಲ್ಲ ಶಕ್ತಿಡ್ದಾದ್ ದೇವೆರೆ ಮಗೆ ಪಂಡ್ದ್ ತೆರಿದ್ ಬತ್ತಿನಾಯೆ ಆದುಲ್ಲೆ.
5
ಆಯ ಪುದರ್ಗ್ ಬೋಡಾದ್ ಮಾತ ಪಿದಯಿದ ಜನೊಕುಲು ನಂಬುದು ಒಳಗಾಪಿಲೆಕ್ಕ ಎಂಕುಲು ಆಯಡ್ದ್ ದಯೊನ್ಲಾ ಅಪೊಸ್ತಲೆರೆನ ಉದ್ಯೋಗುನ್ಲಾ ಪಡೆಯ.
6
ಉಂದೆಟ್ಟ್ ಯೇಸು ಕ್ರಿಸ್ತನಾಕುಲಾವೆರೆ ಲೆಪ್ಪು ಇತ್ತಿ ನಿಕುಲುಲಾ ಸೇರ್ದುಲ್ಲರ್.
7
ಅಂಚೆನೆ ರೋಮಾಪುರೊಟ್ಟುಪ್ಪು ದೇವೆರೆ ಪ್ರೀತಿದಾಕುಲೆಗ್ಲಾ ಲೆಪ್ಪು ಆತಿ ದೇವಜನೊಕುಲೆಗ್ಲಾ ಮಾತೆರೆಗ್ ಬರೆಪಿನಿ ದಾನೆಂದ್ಂಡ, ನಮ ಅಮ್ಮೆ ಆದುಪ್ಪು ದೇವೆರೆಡ್ದ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.
8
ದುಂಬಾದ್ ಪನ್ಪಿನಿ ದಾನೆಂದ್ಂಡ, ನಿಕ್ಲೆನ ನಂಬಿಕೆ ಲೋಕೊಡು ಮಾತ ಕಡೆಟ್ಟ್ ತೆರಿದ್ ಬೈದಿನೆಡ್ದ್ ಯಾನ್ ನಿಕ್ಲೆಗಾದ್ ಯೇಸು ಕ್ರಿಸ್ತಡ್ ಎನ ದೇವೆರೆಗ್ ಉಪಕಾರ ಸಂದಾವೆ.
9
ಆಯನ ಮಗನ ಸುವಾರ್ತೆನ್ ಸಾರಿಯೊಂದು, ಯಾನ್ ದಿಂಜಿದಿ ಆತ್ಮೊಡು ಆಯ ಸೇವೆನ್ ಮಲ್ತೊಂದುಲ್ಲೆ. ಪ್ರಾರ್ಥನೆ ಮಲ್ಪುನಗ ಮಾತ ಸಮಯೊಡು ಮದಪಂದೆ ನಿಕ್ಲೆಗಾದ್ ನಟ್ಟೊಂದುಲ್ಲೆ ಉಂದೆಕ್ಕ್ ದೇವೆರೆ ಎನ ಸಾಕ್ಷಿ.
10
ನಿಕ್ಲೆ ಕೈತಲ್ ಬರಿಯೆರೆ ದೇವೆರೆ ದಯೊಟು ಎಂಕ್ ಎಂಚಾಂಡಲಾ ಮಾರ್ಗ ಆವೊಡು ಅಂದ್ದ್ ನಟ್ಟೊನ್ವೆ.
11
ಬೊಕ್ಕ ಎನಡ್ದ್ ನಿಕ್ಲೆಗ್ ಆತ್ಮೀಕ ವರ ಕೊರ್ದು ನಿಕ್ಲೆನ್ ದೃಢ ಮಲ್ಪೊಡು ಪಂಡ್ದ್ ಎಂಕ್ ದಿಂಜ ಆಸೆ ಉಂಡು.
12
ದಾಯೆಗಂದ್ಂಡ ಎನ ನಂಬಿಕೆಡ್ದಾದ್ ನಿಕುಲುಲಾ, ನಿಕ್ಲೆ ನಂಬಿಕೆಡ್ದಾದ್ ಯಾನ್ಲಾ ಒರಿ ಒರಿಯಗ್ ಸಹಾಯ ಪಡೆಯೊಲಿ ಅಂದ್ದ್ ಯಾನ್ ಬಯಕುವೆ.
13
ಸಹೋದ್ರೆರೇ, ಎನ ಬೇಲೆ ಬೇತೆ ಜನಾಂಗೊಲೆಡ್ ಆತ್ಮೀಕ ಆಶೀರ್ವಾದೊಲೆನ್ ಪಡೆಯಿಲೆಕ್ಕ, ನಿಕ್ಲೆಡ್ಲಾ ಆತ್ಮೀಕ ಆಶೀರ್ವಾದೊನು ತಿಕ್ಕುಲೆಕ್ಕ ನಿಕ್ಲೆ ಕೈತಲ್ ಬರೊಡು ಪಂಡ್ದ್ ಎನ್ನೊಂಡಲಾ ಇನಿ ಮುಟ್ಟಲಾ ಅಡ್ಡಿ ಬತ್ತ್ಂಡ್ ಪನ್ಪಿನ ವಿಚಾರ ನಿಕ್ಲೆಗ್ ತೆರಿದುಪ್ಪೊಡು ಪಂಡ್ದ್ ಬಯಕುವೆ.
14
ದಾಯೆಗ್ ಪಂಡ ಗ್ರೀಕೆರೆಗ್ಲಾ, ಬೇತೆ ಜನಾಂಗದಾಕುಲೆಗ್ಲಾ, ಬುದ್ಧಿವಂತೆರೆಗ್ಲಾ, ಬುದ್ಧಿದಾಂತಿನಾಕುಲೆಗ್ಲಾ ಋಣ ಸಂದಾಯ ಮಲ್ಪುನ ಹಂಗ್ದಾಯೆ ಆದುಲ್ಲೆ.
15
ಐಡ್ದಾವರ ರೋಮಾಪುರೊಟ್ಟುಪ್ಪು ನಿಕ್ಲೆಗ್ಲಾ ಸುವಾರ್ತೆನ್ ಸಾರಿಯೆರೆ ಉಮೇದ್ಡುಲ್ಲೆ.
16
ಸುವಾರ್ತೆದ ವಿಚಾರೊಡು ಯಾನ್ ನಾಚಿಗೆ ಮಲ್ಪುನಾಯೆ ಅತ್ತ್. ಅವು ನಂಬುನಾಕುಲೆಗ್ ಮಾತೆರೆಗ್ಲಾ ರಕ್ಷಣೆಗಾದ್ ದೇವೆರೆನ ಬಲ ಆದುಂಡು. ದುಂಬತ್ತ ಯೆಹೂದ್ಯೆರೆಗ್ಲಾ ಐಡ್ದ್ ಬೊಕ್ಕ ಪಿದಯಿದ ಜನೊಕುಲೆಗ್ಲಾ.
17
ಎಂಚಂದ್ಂಡ ದೇವೆರೆಡ್ದ್ ತಿಕ್ಕುನ ನೀತಿ ಸುವಾರ್ತೆಡ್ದ್ ತೋಜಿದ್ ಬರ್ಪುಂಡು. ಅವು ಸುರುಡ್ದು ಕಡೆ ಮುಟ್ಟಲಾ ನಂಬಿಕೆಡ್ದೇ ಆಪುಂಡು. “ನೀತಿವಂತೆ ನಂಬಿಕೆಡ್ದೇ ಬದುಕುವೆ,” ಪನ್ಪಿನ ಶಾಸ್ತ್ರದ ಪಾತೆರಲಾ ಉಂಡತ್ತಾ?
18
ಕಾರಣ ದಾನೆಂದ್ಂಡ ಸತ್ಯೊನು ತೆರಿಯಂದಿಲೆಕ್ಕ ತಡೆಪಿನ ನರಮಾನಿಲೆನ ಮಾತ ತರತ ಪಾಪದ ಮಿತ್ತ್ಲಾ ಅನ್ಯಾಯದ ಮಿತ್ತ್ಲಾ ದೇವೆರೆ ಕೋಪ ಪರಲೋಕೊಡ್ದು ತೋಜಿದ್ ಬರ್ಪುಂಡು.
19
ದಾಯೆಗಂದ್ಂಡ, ದೇವೆರೆ ವಿಚಾರೊಡು ತೆರಿಯೊಡಾಯಿನ ಸಂಗತಿಲೆನ್ ದೇವೆರೆ ಸೃಷ್ಟಿಡ್ ಅಕ್ಲೆಗ್ ತೋಜಾದ್ ಕೊರ್ತಿನೆಡ್ದ್ ಅಕ್ಲೆಗ್ ಅವು ಮಾತಲಾ ಸ್ಪಷ್ಟ ಆತ್ಂಡ್. ಅವೆನ್ ಅಕ್ಲೆಗ್ ದೇವೆರೇ ಸ್ದಷ್ಟಾದ್ ತೆರಿಪಾಯೆರ್.
20
ದೇವೆರ್ ಈ ಲೋಕೊನು ಉಂಡು ಮಲ್ದಿನೆಡ್ದಿಂಚಿ ಬಾನೊನ್ಲಾ ಭೂಮಿನ್ಲಾ ತೂತೆರ್. ಆಯನ ತೋಜಂದಿ ಗುಣೊಕುಲು ಅಂದ್ಂಡ ಆಯನ ನಿತ್ಯ ಶಕ್ತಿಲಾ ದೈವತ್ವಲಾ ಮಾತೆರೆಗ್ಲಾ ಸ್ಪಷ್ಟ ಆದುಂಡು; ದೇವೆರ್ ಉಂಡು ಮಲ್ತಿನ ಸಂಗತಿಲೆಡ್ ಅವು ತೆರಿದ್ ಬರ್ಪುಂಡು. ಅಂಚಾಯಿನೆಡ್ದ್ ಆ ಜನೊಕುಲೆಗ್ ವಾ ನೆವನಲಾ ಇಜ್ಜಿ.
21
ದಾಯೆಗಂದ್ಂಡ ಅಕುಲು ದೇವೆರೆನ್ ತೆರಿದೆರ್ಡಲಾ; ಆಯಗ್ ಸಂದಾವೊಡಾಯಿನ ಮಾನೊನು ಅಕುಲು ಕೊರ್ಪುಜೆರ್; ಆಯ ಉಪಕಾರೊಲೆನ್ ನೆನೆತ್ದ್ ಸ್ತುತಿ ಮಲ್ಪುಜೆರ್. ಪಗತೆಗ್ ಅಕ್ಲೆ ಯೋಚನೆಲು ದಡ್ಡ್ ಆದಿತ್ತ್ಂಡ್ ಬೊಕ್ಕ ಅಕ್ಲೆನ ಬುದ್ಧಿದಾಂತಿನ ಉಡಲ್ ಕತ್ತಲೆಡ್ ದಿಂಜಿದುಂಡು.
22
ತನ್ಕುಲು ಬುದ್ಧಿವಂತೆರ್ ಅಂದ್ದ್ ಪನೊಂದು ಮೂರ್ಖೆರಾಯೆರ್.
23
ಬೊಕ್ಕ ನಾಶಾವಂದಿ ದೇವೆರೆ ಮೈಮೆನ್ ಬುಡ್ದು ಐತ ಪಗತೆಗ್ ನಾಶಾಪಿನ ನರಮಾನಿಲೆನ, ಪಕ್ಕಿಲೆನ, ಪ್ರಾಣಿಲೆನ ಅತ್ತ್ಡ ಸರ್ಪೊಲೆನ ಸಮ ಬೂರು ಮೂರ್ತಿಲೆನ್ ಮಲ್ಪುವೆರ್.
24
ಅಂಚಾದ್ ದೇವೆರ್ ಅಕ್ಲೆನ್ ಅಕ್ಲೆ ಉಡಲ್ದ ಆಸೆ ಮಲ್ಪು ದುರಾಶೆಲೆಡ್ ನಡತ್ದ್ ತನ್ಕ್ಲೆ ಶರೀರೊನು ಪಡ್ಕೆಂತಿನ ಕಾರ್ಯೊಗು ಒಪ್ಪಿಸಾದ್ ಕೊರ್ತೆ.
25
ಅಕುಲು ಸತ್ಯ ದೇವೆರೆನ್ ಬುಡ್ದು ಸುಳ್ಳುನು ಪತ್ತೊಂದು ಸೃಷ್ಟಿನ್ ಉಂಡು ಮಲ್ತಿನಾಯ ಪಗತೆಗ್ ಆಯಡ್ದ್ ಉಂಡಾಯಿನ ವಸ್ತುಲೆನ್ ಆರಾಧನೆ ಮಲ್ತ್ದ್ ಐಕ್ಲೆನ ಸೇವೆ ಮಲ್ಪುವೆರ್. ಸೃಷ್ಟಿಕರ್ತವೆ ಒರಿಯೇ, ಏಪೊಗ್ಲಾ ಪುಗರೊನಿಯೆರೆ ತಕ್ಕದಾಯೆ. ಆಮೆನ್.
26
ಅಕುಲು ಇಂಚ ಮಲ್ಪುನೆಡ್ದ್ ದೇವೆರ್ ಅಕ್ಲೆನ್ ನಾಚಿಗೆ ಪುಟ್ಟಾವು ದುರಾಶೆಲೆಗ್ ಒಚ್ಚಿದ್ ಕೊರಿಯೆ. ಅಕ್ಲೆ ಪೊಂಜೊವುಲು ತನ್ಕುಲೆ ಶರೀರದ ಸಂಬಂಧೊನು ಶರೀರೊಗು ವಿರೋಧ ಆದುಪ್ಪುನೆಕ್ಕ್ ಪಗತೆರ್.
27
ಅಂಚೆನೇ ಅಂಜೊವುಲು ಪೊಂಜೊವುನ ಒಟ್ಟುದ ಶರೀರ ಸಮ್ಮಂಧೊಲೆನ್ ಬುಡ್ದು ಒರಿ ಒರಿಯಗ್ ಶರೀರದ ದುರಾಶೆಗ್ ಒಳಗಾಯೆರ್. ಅಂಜೊವುಲು ಅಂಜೊವುಲೆ ಒಟ್ಟುಡು ಸಮ್ಮಂಧ ಮಲ್ತೊಂದು ತನ್ಕುಲೆ ಅಕ್ರಮೊಲೆಗಾದ್ ಬರೊಡಾಯಿನ ಶಿಕ್ಷೆಗ್ ತಕ್ಕದಾಕುಲಾಯೆರ್.
28
ಉಂದತ್ತಂದೆ ದೇವೆರೆ ಗೇನ ಅಕ್ಲೆಗ್ ಇಷ್ಟದಾಂತಿನೆಡ್ದ್ ದೇವೆರ್ ಅಕ್ಲೆನ್ ಅತ್ತಂದಿನ ನೀಚ ಬುದ್ಧಿಗ್ ಒಪ್ಪಿಸಾದ್ ಕೊರಿಯೆ. ಅಂಚಾದ್ ಅಕುಲು ಬೊಡ್ಚಾಂದಿನ ಕಾರ್ಯೊಲೆನ್ ಮಲ್ತೆರ್.
29
ಎಂಚಂದ್ಂಡ ಅಕುಲು ಮಾತ ತರತ ಅನ್ಯಾಯ, ದುರ್ಮಾರ್ಗ, ಲೋಬಿತನೊಡ್ದುಲಾ ದುಷ್ಟತನೊಡ್ದುಲಾ, ಕಿಚ್ಚಿ, ಕೊಲೆ, ಲಡಯಿ, ಮೋಸ, ಪಗೆ ಇಂಚಿತ್ತಿನೆಡ್ದ್ ದಿಂಜಿದಿನಕುಲಾಯೆರ್.
30
ಬೊಕ್ಕ ಅಕುಲು ಕೆಬಿ ಉರ್ಪುನಾಕುಲುಲಾ ಚಾಡಿ ಪನ್ಪಿನಾಕುಲುಲಾ ದೇವೆರೆ ಪಗೆನಾಕುಲುಲಾ ಸೊರ್ಕುದಾಕುಲುಲಾ ಅಹಂಕಾರಿಲುಲಾ ಬಡಾಯಿ ಕೊಚ್ಚುನಾಕುಲುಲಾ ಆದಿತ್ತ್ದ್ ಹಾಳ್ ಮಲ್ಪುನೆಕ್ಕಾದೇ ಬಯಕುವೆರ್. ಅಪ್ಪೆಅಮ್ಮನ ಪಾತೆರೊನು ಕೇನಂದಿನಾಕುಲುಲಾ
31
ಬುದ್ಧಿದಾಂತಿನಾಕುಲುಲಾ ಪಾತೆರೊಗು ತಪ್ಪುನಾಕುಲುಲಾ, ಪ್ರೀತಿದಾಂತಿನಾಕುಲುಲಾ ಕನಿಕರದಾಂತಿನಾಕುಲುಲಾ ಆಯೆರ್.
32
ಈ ರೀತಿ ಬದುಕುನಾಕುಲೆಗ್ ಮರಣನೇ ಗತಿ; ದೇವೆರೆ ನಿಯಮೊನು ಅಕುಲು ತೆರಿದಿತ್ತ್ಂಡಲಾ ಅಕುಲು ಅವ್ವೆ ತಪ್ಪುನು ಮಲ್ಪುನತ್ತಂದೆ ತಪ್ಪು ಮಲ್ಪುನಾಕುಲೆನ್ಲಾ ಮೆಚ್ಚಾವೆರ್.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 2 →
All chapters:
1
2
3
4
5
6
7
8
9
10
11
12
13
14
15
16
Recommended Reading
Commentary
Romans Commentaries
→
Devotional
Romans Devotional Guide
→
Get This Bible
Tulu (ಪೊಸ ಒಡಂಬಡಿಕೆ) Study Bible
→