Romans 14

Tulu (ಪೊಸ ಒಡಂಬಡಿಕೆ)

← Chapter 13 Jump to: Chapter 15 →

1ನಂಬಿಕೆಡ್ ಬಲಹೀನ ಇತ್ತಿನಾಕುಲೆನ್ಲಾ ಸೇರಾವೊನ್ಲೆ; ಆಂಡ ಅಕ್ಲೆನ ಎದರುಡು ಸಂಶಯದ ಸಂಗತಿಲೆನ್ ಚರ್ಚೆ ಮಲ್ಪಡೆ.

2ಒರಿ ಒವೆನಾಂಡಲಾ ತಿನೊಲಿ ಪಂಡ್ದ್ ನಂಬುವೆ. ನಂಬಿಕೆಡ್ ಬಲ ಇಜ್ಜಂದಿನಾಯೆ ಕಾಯಿಕಜಿಪುನು ಮಾತ್ರ ತಿನ್ಪೆ.

3ತಿನ್ಪಿನಾಯೆ ತಿನಂದಿನಾಯನ್ ಹೀನ ಮಲ್ಪೆರೆ ಬಲ್ಲಿ. ತಿನಂದಿನಾಯೆ ತಿನ್ಪಿನಾಯನ್‌ ದೋಷಿ ಪಂಡ್ದ್ ಎನ್ನೆರೆ ಬಲ್ಲಿ. ದೇವೆರ್ ಇರ್ವೆರೆನ್ಲಾ ಸೇರಾವೊಂದೆ ಅತ್ತಾ?

4ನನೊರಿಯನ ಬೇಲೆದಾಯನ್ ತೀರ್ಪು ಮಲ್ಪೆರೆ ಈ ಏರ್? ಆಯೆ ತಪ್ಪುದಾಂತಿನಾಯೆ ಆದ್ ಉಂತುದೆಡಲಾ ತಪ್ಪುದಾಯೆ ಆದಿತ್ತ್‌ದ್ ಬೂರ್ದಿತ್ತೆಡಲಾ ಅವು ಆಯ ಯಜಮಾನಗ್ ಸೇರ್ದಿನವು. ಆಯೆ ತಪ್ಪುದಾಂತಿನಾಯೆ ಆದ್ ಉಂತುವೆ. ಆಯನ್ ಉಂತಾವೆರೆ ಕರ್ತವೆ ಶಕ್ತೆ ಆದುಲ್ಲೆ.

5ಒರಿ ಒಂಜಿ ದಿನೊಡ್ದು ಬೊಕ್ಕೊಂಜಿ ದಿನೊನು ವಿಶೇಷದವು ಪಂಡ್ದ್ ಎನ್ನುವೆ. ಬೊಕ್ಕೊರಿ ಮಾತ ದಿನೊಲೆನ್ ವಿಶೇಷದವು ಪಂಡ್ದ್ ಎನ್ನುವೆ, ಪ್ರತಿಯೊರಿಲಾ ತನ ತನ ಮನಸ್‌ಡ್ ತೀರ್ಮಾನ ಮಲ್ತಿಲೆಕ್ಕ ನಡಪಡ್.

6ದಿನೊಲೆನ್ ವಿಶೇಷ ಪಂಡ್ದ್ ಎನ್ನುನಾಯೆ ಕರ್ತವಗಾದ್ ಅಂಚ ಎನ್ನುವೆ. ತಿನ್ಪಿನಾಯೆ ಕರ್ತವಗಾದ್ ತಿನ್ಪೆ. ಆಯೆ ದೇವೆರೆಗ್ ಉಪಕಾರ ಮಲ್ಪುವೆ ಅತ್ತಾ. ತಿನಂದಿನಾಯೆಲಾ ಕರ್ತವಗಾದ್ ತಿನಂದೆ ದೇವೆರೆಗ್ ಉಪಕಾರ ಮಲ್ಪುವೆ.

7ನಮಡ ಒರಿಯಾಂಡಲಾ ತನ್ಕಾದ್ ಬದುಕುನುಲಾ ಇಜ್ಜಿ. ತನ್ಕಾದ್ ಸೈಪಿನಲಾ ಇಜ್ಜಿ.

8ನಮ ಬದುಕುವಡ ಕರ್ತವಗಾದ್ ಬದುಕುವ, ಸೈತ್ಂಡ ಕರ್ತವಗಾದ್ ಸೈಪ.

9ಬದ್‌ಕ್ಂಡಲಾ ಸೈತ್ಂಡಲಾ ನಮ ಕರ್ತವನಾಕುಲೇ. ದಾಯೆ ಪಂಡ ಸೈತಿನಾಕಲೆಗ್ಲಾ ಬದುಕುನಾಕುಲೆಗ್ಲಾ ಕರ್ತವೆ ಆದುಪ್ಪೊಡು ಪಂಡ್ದೇ ಕ್ರಿಸ್ತೆ ಸೈತ್‌ದ್ ಕುಡ ಜೀವೊಡು ಲಕ್ಕ್‌ದ್ ಬತ್ತೆ.

10ತಿನಂದಿನಾಯಾ ನಿನ ಸಹೋದ್ರನ ಬಗೆಟ್ ಈ ತೀರ್ಪು ಮಲ್ಪುನು ದಾಯೆ? ತಿನ್ಪಿನಾಯಾ ನಿನ ಸಹೋದ್ರನ್ ಈ ಕೀಳ್ ಮಲ್ಪುನು ದಾಯೆ? ನಮ ಮಾತೆರ್ ದೇವೆರೆ ನ್ಯಾಯಾಸನದ ಎದುರುಡು ಉಂತೊಡತ್ತಾ?

11“ಎನ ಜೀವದಾಣೆ, ಮಾತೆರ್ ಎಂಕ್ ಅಡ್ಡಬೂರ್ವೆರ್. ಮಾತೆರ್ ಎನನ್ ದೇವೆರ್ ಪಂಡ್ದ್ ಅರಿಕೆ ಮಲ್ಪುವೆರ್,” ಪಂಡ್ದ್ ಕರ್ತವೆ ಪನ್ತೆ ಪಂಡ್ದ್ ಬರೆತ್ಂಡ್.

12ಅಂಚಾದ್ ನಮಡ ಪ್ರತಿ ಒರಿಲಾ ದೇವೆರೆ ಎದುರುಡು ಉತ್ತರ ಕೊರೊಡು.

13ಐಕಾದ್ ನಮ ಒರಿಯನ್ ಒರಿ ತೀರ್ಪು ಮಲ್ಪುನೆನ್ ಉಂತಾಗ. ಐತ ಬದಲಿಗ್ ಸಹೋದ್ರಗ್ ದಂಟೆರೆಗಾವಡ್ ಪಾಪೊಡು ಬೂರ್ಯೆರೆಗಾವಡ್ ಆಪಿಲೆಕ್ಕ ಮಲ್ಪುನೆನ್ ಏಪಲಾ ಮಲ್ಪುಜ ಪಂಡ್ದ್ ತೀರ್ಮಾನ ಮಲ್ತೊನ್ಲೆ.

14ವಾ ತಿನ್ಪಿ ವಸ್ತುಲಾ ಅಶುದ್ಧದವು ಅತ್ತ್ ಪಂಡ್ದ್ ತೆರಿದೆ ಬೊಕ್ಕ ಕರ್ತವೆ ಆದುಪ್ಪು ಯೇಸುಡೊಪ್ಪ ಇತ್ತ್‌ದ್ ದೃಢವಾದ್ ನಂಬುದೆ. ಆಂಡ ನಿಕುಲು ವಾ ತಿನ್ಪಿನ ವಸ್ತುಲೆನ್ ಅಶುದ್ಧ ಪಂಡ್ದ್ ನಂಬುವರ್ಡ ಅವು ನಿಕ್ಲೆಗ್ ಅಶುದ್ಧದವು ಆದುಂಡು.

15ಆಂಡ ಈ ತಿನ್ಪಿನ ವಸ್ತುಲೆಡ್ದ್ ನಿನ ಸಹೋದ್ರನ ಮನಸ್‌ಗ್ ಬೇನೆ ಮಲ್ಪುವಡ ಈ ಪ್ರೀತಿಗ್ ತಕ್ಕ ನಡತೊನುಜ. ಕ್ರಿಸ್ತೆ ಏರೆಗಾದ್ ಸೈತ್ ಪೋಯೆನಾ, ಆಯಗ್ ಈ ತಿನ್ಪಿನ ವಸ್ತುಲೆಡ್ದ್ ನಾಶ ಮಲ್ಪಡ.

16ನಿಕುಲು ಎಡ್ಡೆ ಪಂಡ್ದ್ ಎನ್ನುನೆಕ್ಕ್ ದೂಷಣೆ ಆವಂದಿಲೆಕ್ಕ ತೂವೊನ್ಲೆ.

17ದಾಯೆಗಂದ್ಂಡ ತಿನ್ಪಿನವುಲಾ ಪರ್ಪಿನವುಲಾ ದೇವೆರೆ ರಾಜ್ಯ ಅತ್ತ್. ನೀತಿಲಾ, ಸಮಾಧಾನಲಾ ಪರಿಶುದ್ಧಾತ್ಮಡ್ದ್ ಉಂಡಾಪಿ ಸಂತೋಷ ಆದುಂಡು.

18ಬೊಕ್ಕ ನಿಕುಲು ಈ ರೀತಿಡ್ ಕ್ರಿಸ್ತನ ಸೇವೆ ಮಲ್ಪುನಾಂಡ ನಿಕುಲು ದೇವೆರೆಗ್ ಮೆಚ್ಚೆಗೆದಾಕುಲು ಆದ್‌ಲಾ ನರಮಾನಿಲೆಗ್ ಯೋಗ್ಯದಾಕುಲುಲಾ ಆದುಪ್ಪುವರ್ ಆತೇ.

19ಅಂಚಾದ್ ನಮ ಸಮಾಧಾನೊನ್ಲಾ ಒರಿಯಗ್ ಒರಿ ಭಕ್ತಿವೃದ್ಧಿಗ್ಲಾ ಅನುಕೂಲ ಆಪಿನೆನ್ ತೂವೊನುಗ.

20ದೇವೆರ್ ಕಟ್ಟಿನೆನ್ ತಿನ್ಪಿ ವಸ್ತುಲೆ ಕಾರಣೊಡ್ದಾದ್ ನಾಶ ಮಲ್ಪಡ. ಮಾತ ವಸ್ತುಲುಲಾ ಶುದ್ಧದವೇ. ಆಂಡ ತಿಂದ್‌ದ್ ಬೊಕ್ಕೊರಿಯಗ್ ಅಡ್ಡಿ ಮಲ್ಪುನವು ತಪ್ಪು.

21ಮಾಸ ತಿನ್ಪಿನಾವಡ್ ದ್ರಾಕ್ಷಾರಸ ಪರ್ಪಿನಾವಡ್ ನಿನ ಸಹೋದ್ರಗ್ ಅಡ್ಡಿ ಮಲ್ಪುನ ಬೇತೆ ಒವೆನ್ಲಾ ಬುಡ್ದು ಬುಡ್ಪಿನವೇ ಎಡ್ಡೆ.

22ನಿಕ್ಕುಪ್ಪು ನಂಬಿಕೆ ದೇವೆರೆಗ್ ಮಾತ್ರ ತೋಜುಲೆಕ್ಕ ಉಪ್ಪಡ್. ತನ್ಕುಲೆ ಮನಸ್‌ಡ್ ಸರಿ ಪಂಡ್ದ್ ಕಂಡಿತ ಮಲ್ತೊನೊಂದು ಅವೆನ್ ಮಲ್ಪುನಗ ಮನಸ್‌ಡ್ ಸಂಶಯ ಮಲ್ಪಂದಿನಾಯೆನೇ ಭಾಗ್ಯವಂತೆ.

23ಆಂಡ ತಿನ್ಪಿನೆತ್ತ ಬಗೆಟ್ ಏರೆಗಾಂಡಲಾ ಸಂಶಯ ಉಂಡುಡ, ಅಂಚಿತ್ತಿನೆನ್ ತಿನ್ಪಿನಾಕುಲೆನ್ ದೇವೆರ್ ಕಂಡಿಸಾವೆ. ದಾಯೆಗಂದ್ಂಡ ಅಕ್ಲೆನ ಕ್ರಿಯೆಗ್ ನಂಬಿಕೆದ ಆಧಾರ ಇಜ್ಜಿ. ಬೊಕ್ಕ ನಂಬಿಕೆಡ್ದ್ ಆವಂದಿನವು ಮಾತಲಾ ಪಾಪನೇ.

← Chapter 13 Jump to: Chapter 15 →