Micah 3

Teso

← Chapter 2 Jump to: Chapter 4 →

1Abu katema atiar: Kopupokisi, kenainair, yes ikapolok luka Yakob, Ka ikayaitok luka ekek loka Isirael! Mere kereka nakus ajenun etube?

2Luisaeete ajokis, kominas aronis; Luibuluearete amunyinokec, Ka akiriŋikec alemar kakoiokec;

3Luinyamete akiriŋ naka ikatuŋa; Ŋenete amunyinokec, ibilete akojokec: Eebo, irikirikete kes, kwape toma amot, Kwape akiriŋ toma atakwa,

4Ŋes konyet emonyakiniata EJAKAIT, Konye mam ŋes eboŋokini kes: Eebo, ibwai ekereet kamakec kapak kaŋin, Naarai eswamata aronis kaswamisiokec.

5Inera EJAKAIT kwanata nuka inabin luitapaarete ikatuŋa, Luiworoete ebe, “Ainapakin,” Arai kejaas kaluekonyete kikecekel: Konye ekapanakinos ejie kanol Lomam ibwaikini ibore aitukekec,

6Kanuka ŋun eraun akuare mama iiaas, Komam aitapoet; Kimutonikis, komam idwarete. Elomari akoloŋ kama ejaas inabin, Koiesi da apaaran cucucuc kamakec.

7Irumete ikadwarak ileje, Edakaros akwes nuka ikaroak; Eebo, ebunete kesi aitukekec: Naarai emamei aboŋokinet naka Edeke.

8Konye abeit elelebun eoŋ agogoŋ, Ka Emoyo loka EJAKAIT, Ka etube, ka apedor da, Alimonokin Yakob aibucareteke, Ka Isirael da akeronis.

9Kopupokisi nu, kenaiŋait, Yes ikapolok luka ekek loka Yakob, Ka ikayaitok luka ekek loka Isirael, Luilaete etube, Luitiriete nuitenara kere.

10Edukete Sion kaokot, Ka Yerusalem da kanumam adolit.

11Etubete lukapolokoke akiro kanuka ainakinet, Isisianakinete isasedotinike kanuka eropit, Edwarete inabinoke kanuka apesan: Konye egoŋakina neejai EJAKAIT ebalas ebe, “Mere ejai EJAKAIT kidiniwok? Mam aronis kidoikini oni.”

12Aso kanukus ŋes ekoriere Sion kwape emanikor, Eraun Yerusalem aapoŋor, Eronat da loka etogo Kwape aiboisio nuiceleleete nuka amagoro.

← Chapter 2 Jump to: Chapter 4 →