Micah 6

Teso

← Chapter 5 Jump to: Chapter 7 →

1Aso kiirasi nuinera EJAKAIT atiar: Konyou, kopur kakonyen nuka imor, Kisiira iukon ekoniporoto.

2Kiirasi, yes imor, aŋolopa naka EJAKAIT, Ka yes da apeteta nuka akwap numam edaunos; Naarai ejai EJAKAIT aŋolopa ka iketuŋa, Epuri ka Isirael.

3“Okwe ikatuŋa, kekonak eoŋ yes ai? Inyo gwai ketapasitor eoŋ yes? Kobonokinoil

4Naarai abu ketonyou yes kakwap nako Misiri, Kalaku kotogo loka ebulesene; Kesinarenik yes Musa, ka Aaron ka Miriam.

5Okwe ikatuŋa, kiitutu bo nueneruni Balak ekabaka loka Moab, Ka nuabonokini da Balaam okoku loka Beor; Kiitutu ageun koSitim kiton Giligal, Tetere ijenunete aswamisio nukadolit nuka EJAKAIT.”

6“Abunari inyo akonyen nuka EJAKAIT, Kesudede kakonyen nuka Edeke loitelekarit kere? Ekunyakini kereka ŋes kainakineta nuicweio, Ka itak luka ekaru ediopet?

7Itojoki kereka EJAKAIT imerekekin ilukumin, Arai icorin ilukumin itomon luka akinyet? Ainakini kereka eoŋ ikoku yenikiyai kanuka apaarika, Araito naka akuanaka kanuka aronis nakotauka?”

8Okwe etuŋanan, kipukok jo naejok; Inyo bo kiburai EJAKAIT, Mere aswam nuebeito, amin aitim, Alosit da kaitasono nepepe ka Ekonideke?

9Iworoi eporoto loka EJAKAIT mama ejai ere, Yenikaeoa da eyoni ekonikiror: “Kopupokisi yesi ebela, ka loaseuni ŋes.

10Eroko kereka ejaas iboro luka akais nuipu luka aronis Kotogo loka ikaronok, Ka aitemis da nainonara naerai naketal?

11Asegara kereka eoŋ kajaas kaininisio nukaronok, Ka eriagi da loka aitemisio nukainal?

12Naarai ileleba ikabarakake akaje, Esabanakinete luibojete kotomake, Iŋalaete aŋajepakec kotoma aitukekec.

13Kanuka nun ŋes kenomia eoŋ jo kamusunut naerono noi; Ketisil jo kanuka aronisiokon.

14Inyami, konye mam imonanakin; Iworoori kotomakon; Ilemari, konye mam iyuuni; ŋul da luiyuuni ejaikini eoŋ ekileg.

15Iyei, konye mam isaki; Ipudapudai iseitunin, konye mam inyonyoikin akinyet; Icui emusabibu da, konye mam imasi ebino,

16Naarai irieete ikisila luka Omiri, Ka aswamisio kere nuka ekek loka Akab; Ilosenenete kainerunikec: Tape ketuluor yes aapoŋor, Ka luibojete kotoma eraunos aijuaret; Ibwokete amorosit naka ikatuŋa.

← Chapter 5 Jump to: Chapter 7 →