Micah 4

Teso

← Chapter 3 Jump to: Chapter 5 →

1Kosodi konyet kapaarasia nukawasia Ecatunit eronat loka etogo loka EJAKAIT Kaidi naka ironan, Itopolooro kuju kiukon; Idiaete ituŋa mamakeŋ,

2Elosete atekerin nuipu kobalas ebe, “Kopotu, kadokasi oroŋat loka EJAKAIT. Togo da loka Edeke loka Yakob; Kisisianakini ŋesi oni ikeponesio, Kilosenenei korotinike.” Naarai elomuni ekisil koSion, Akirot da naka EJAKAIT koYerusalem.

3Etubokini ŋesi atekerin nuipu, Ediekakini atekerin nuegogon nuelwaka; Etataete kesi ikileŋakec aituluor imelekes, Ka akwarasikec da aituluor icilikikin lukidimet: Mam ateker ikiari ekileŋ asurokinia aceteker, Kwabo mam bobo isisiaunete ejie.

4Konye iboiete kesi ŋinituŋanan kwap kemusabibuke, Kwap ketinike da; Mam yenitukuriani kes: Naarai ener aituk naka EJAKAIT loka aioresio,

5Naarai elosenenete atekerin kere, Ŋinidiopet kokiror loka ekedeke, Konye kilosenenei oni kokiror loka EJAKAIT Ewokodeke Ikar ka ikar.

6Ebala EJAKAIT ebe, Kapaaran kaŋin Enotuni ŋin naicodo, Atukokini ŋin naerenearitai, Ka ŋin da naabu eoŋ ketiean;

7Etarauni ŋin naicodo aatoŋot, Ka ŋin da naereŋearitai ateker naegogoŋ: Irumi EJAKAIT kes komoru Sion Amear kwana, ido aitodol ikar kere.

8Ka jo da, wu etogo loeoja loka esipan, Eukot loka akoku naka Sion, Edolokini jo; Eebo, edolokini ayait nakolo, Alakanut naka akoku naka Yerusalem.

9Aso do kanukinyo ideloria? Emamei kereka ekabaka kotomakon? Aolio ekapetan akirokon, Tape kikamuni ariebo kwape naka aberu naidouni?

10Koriebakin, kitaaritoi aidoun, ijo akoku naka Sion, Kwape aberu naidouni: Naarai kwana ilomari kiŋa naka ere, Iboie okitui, idoli da Babulon. Kiyuunio kaŋina, Ŋina ŋes kilakunia EJAKAIT jo Kakan naka lukasurupokon.

11Kwana da etukonokinos atekerin nuipu asurokin jo, Nuebalas ebe, “Komunaun ŋesi, Koanyutu do awokokonye eimielikec koSion.”

12Konye mam ejenete kesi aomisio nuka EJAKAIT, Karaida ajenun ainerunike; Naarai atukok kes kwape iisutan kopejal.

13Konyou kicom, ijo akoku naka Sion: Naarai etaraun eoŋ amumwarakon asuat, Ka imagegerakon da aisinit: Inomonomoi atekerin nuipu; Igitari amedakec mama ejai EJAKAIT, Ka iborokec da mama ejai EJAKAIT loka akwap

← Chapter 3 Jump to: Chapter 5 →