1 Chronicles 17

Tsonga Xitsonga (Bibele) 1929

← Chapter 16 Jump to: Chapter 18 →

1Davhida, kuteloko a tshamile endlwini ya yena, a ku eka Natani, muprofeta: “Waswivo, ndzi akile endlwini ya kedari, kutani areka ya ntwanano wa Yehovha yi le ntsongeni.”

2Natani a ku eka Davhida: “Endla hinkwaswo leswi nga embilwini ya wena, hikuva Xikwembu xi na wena.”

3Vusiku byebyo rito ra Xikwembu ri ya ka Natani, ri ku:

4“Yana eka Davhida, nandza wanga, u ku eka yena: ‘Yehovha a vurisa sweswo, a ku: “A hi wena loyi a nga ta ndzi akela yindlu leyi ndzi nga ta tshama eka yona.

5Hikuva a ndzi akanga endlwini ku suka siku leri ndzi humeseke Israele eEgipta ku fika namuntlha kambe ndzi sukele ntsonga wun'wana ku nghena entsongeni wun'wana, ni yindlu yin'wana ku nghena endlwini yin'wana.

6Emikarhini hinkwavo leyi ndzi fambeke ha yona ni Vaisraele hinkwavo, xana ndzi humesile rito eka un'wana wa vaavanyisi va Israele, loyi ndzi n'wi leriseke ku risa tiko ranga, ndzi te: Xana a mi ndzi akelangi ha yini yindlu ya kedari xana?”

7Sweswi, u ya byela nandza wa mina Davhida, u ku: “Yehovha wa mavandla u vurisa sweswo, a ku: Ndzi ku humesile evudyelweni, laha u landzeke tinyimpfu kona, leswaku u va mufambisi wa tiko ranga, ra Israele.

8A ndzi ri na wena hinkwako laha u fambeke kona; ndzi susile valala hinkwavo emahlweni ka wena; ndzi twarisile vito ra wena kukotisa mavito ya lavakulu lava nga emisaveni;

9ndzi nyikile tiko ra mina ra Israele ndhawu, ndzi n'wi simekile kona kutani u akile ekarikwavo; a nga ka a nga ha pfilunganyisiwi, ni vana va mbabva va nga ka va nga ha n'wi dyi kukotisa khale,

10ni enkarhini lowu ndzi vekeleke tiko ranga ra Israele vaavanyisi. Ndzi tsongahatile valala va wena hinkwavo, kutani ndzi ku tivisa leswaku Yehovha u ta ku akela yindlu.

11Kutakuloko masiku ya wena ma hetisekile, kutani u ya eka vatata wa wena, ndzi ta tlakusa endzhaku ka wena vatukulu va wena, ndzi tiyisa ku fuma ka un'wana wa vana va wena.

12Hi yena la nga ta ndzi akela yindlu, ndzi ta tiyisa xiluvelo xa yena hilaha ku nga heriki.

13Ndzi ta va tata wa yena, na yena u ta va n'wananga; ndzi nga ka ndzi nga n'wi tekeli tintswalo ta mina, hilaha ndzi ti tekeleke loyi a ku rhangeleke;

14kambe ndzi ta n'wi veka endlwini ya mina, ni le ku fumeni ka mina, hilaha ku nga heriki, kutani xiluvelo ya yena xi ta tiya hi masiku.” ’ ”

15Natani a byela Davhida marito lawa hinkwawo ni mahlori lawa hinkwawo.

16Kavaloko hosi Davhida a ya humelela emahlweni ka Yehovha, a ku: “Xana ndzi mani, Yehovha Xikwembu! Ni yindlu ya mina hi yini leswaku u ndzi fikisa kwalaho xana?

17Oho! Xikwembu! I mhaka leyitsongo emahlweni ka wena; kambe u vurile ni mhaka ya yindlu ya nandza wa wena ya mikarhi leyi nga ta ta; kutani u ndzi langutile hi mukhuva wa vanhu, wee, Yehovha, Xikwembu, la nge henhlahenhla!

18Xana Davhida a ta engeta a ku byela yini ehenhla ka ku twala loku u ku nyikeke nandza wa wena? U tiva nandza wa wena.

19Oho Yehovha! U endlile mhaka leyikulu leyi hinkwayo hikwalaho ka nandza wa wena, ni hikwalaho ka mbilu ya wena, ku n'wi tivisisa timhaka letikulu leti.

20Oho Yehovha! A ku na loyi a fanaka na wena; a ku na Xikwembu xin'wana ehandle ka wena, hilaha hi swi tweke hinkwaswo hi tindleve ta hina.

21Kutani i mani la fanaka ni tiko ra wena ra Israele, tiko leri nga rin'we emisaveni, leri Xikwembu xi tikutsuleleke rona ku ri endla tiko ra xona, ni ku titwarisa hi timhaka letikulu leti chavisaka, hi ku hlongola matiko emahlweni ka tiko ra wena leri u tikutsuleleke rona eEgipta?

22Kutani u vekile tiko ra wena ra Israele ku va tiko ra wena hilaha ku nga heriki: loko u ri wena Yehovha, a wu ri Xikwembu xa vona.

23Sweswi, oho Yehovha! Rito leri u ri vuleke ehenhla ka nandza wa wena, ni le henhla ka yindlu ya yena, a ri tiyisiwe hi masiku, u endla hilaha u vuleke hakona!

24Vito ra wena a ri tshembisiwe, a ri dzunisiwe hi masiku; leswaku va ku: ‘Yehovha wa mavandla, Xikwembu xa Israele hi xona Xikwembu eka Israele!’ Kutani yindlu ya Davhida, nandza wa wena, yi ta tiyisiwa emahlweni ka wena.

25Hikuva wena, Xikwembu xanga, u tivisile nandza wa wena leswaku u ta n'wi akela yindlu, hikwalaho nandza wa wena u kumile xikhongelo lexi a xi humesaka emahlweni ka wena.

26Sweswi, oho Yehovha! Hi wena Xikwembu, u tshembisile nandza wa wena leswaku u ta n'wi endla hi tintswalo leti.

27Sweswi, wanga katekisa yindlu ya nandza wa wena, leswaku yi va kona hi masiku emahlweni ka wena! Hikuva leswi u swi katekisaka, wee Yehovha, swi katekisiwa hi masiku.”

← Chapter 16 Jump to: Chapter 18 →