Hosea 12

Tsonga Xitsonga (Bibele) 1929

← Chapter 11 Jump to: Chapter 13 →

1Efrayimi u ndzi rhendzele hi mavunwa, ni yindlu ya Israele, hi ku kanganyisa; loko a ri Yuda, wa ha tiarisa, wa ala ku yingisa Xikwembu, Muhlawuriwa la tshembekaka.

2Efrayimi u tixurhisa hi moya, u landzela moya wa le vuxeni. Siku hinkwaro u andzisa vunwa ni ku onhaka. Va endle xinakulobye na Asiriya, kutani va yisa mafurha eEgipta.

3Yehovha u ni ku tengisana na Yuda, kambe u ta tshinya Yakobo hikwalaho ka ku famba ka yena, a n'wi endlela leswi fanelaka maendlelo ya yena.

4U khome makwavo hi xirhendze a ha ri ekhwirini ra mana wa yena, ni le vukulwini bya yena wa ha lwa ni Xikwembu.

5A lwa ni ntsumi, a va a yi hlula, a ri karhi a rila, a yi khongela. A yi kuma eBetele, kutani kona yi vulavula na hina.

6Yehovha i Xikwembu xa tinyimpi, Yehovha hi rona vito ra yena.

7Kambe loko u ri wena, tlhelela eka Yehovha, u hlayisa tintswalo ni ku lulama, u titshembela Xikwembu xa wena hi masiku.

8Efrayimi i Mukanana (muxavisi); evokweni ra yena u tamele xikalo xa ku xisa, u rhandza ku kanganyisa.

9Kutani u te: “E, ndzi fuwile, ndzi tilavele rifuwo”; eka hinkwaswo leswi ndzi swi fuweke, ku nga ka ku nga kumeki ku biha eka mina, ni leswi swi nga vaka nandzu.

10Kasi hi mina Yehovha, Xikwembu xa wena, loko wa ha huma etikweni ra Egipta. Ndza ha ta ku akisa emitsongeni, kukotisa loko ku endliwa siku ra nkhuvo.

11Ndzi vulavurile ni vaprofeta, ndzi andzisile swikombiso, kambe hi vaprofeta ndzi vulavurile swifaniso.

12Kungakuloko Giliyadi a tiendle swahava vona va ta ya hela ntsena. Ku tlhaviwa tinkunzi eGiligala. Tialitari ta vona ti kotisa tinhulu ta maribye emasin'wini.

13Yakobo u chavile etikweni ra Aramu; Israele u tirhele wansati, ku kuma nsati a tiendle murisi.

14Hi muprofeta, Yehovha u humesile Israele eEgipta, kutani hi muprofeta, Israele u hlayisiwile.

15Efrayimi u karihisile Yehovha ngopfu; u ta hlayiseriwa milandzu ya yena ya ngati; hosi ya yena yi ta n'wi tlherisela ku xumbadza ka yena.

← Chapter 11 Jump to: Chapter 13 →