Hosea 6

Tsonga Xitsonga (Bibele) 1929

← Chapter 5 Jump to: Chapter 7 →

1“Tanani, a hi tlheleleni eka Yehovha, hikuva hi yena la hi handzuleke, kambe u ta hi horisa; u tsemile, kambe u ta hi bohelela timbanga.

2Loko ku hele masiku mambirhi, u ta hi hanyisa; hi ra vunharhu, u ta hi yimisa leswaku hi hanya emahlweni ka yena.

3A hi tiveni Yehovha, a hi chivirikeni ku n'wi tiva! Ku humelela ka yena ku tiyile kukotisa vurhonga; u ta hi tela kukotisa mpfula, kukotisa mpfula ya xirimo leyi nonisaka misava.”

4Ndzi ta ku endla yini, Efrayimi? Ndzi ta ku endla yini, Yuda? Hikuva rirhandzu ra n'wina ri tanihi hunguva ya vuxa, ni mberha leyi sukaka hi ku hatlisa.

5Hikwalaho, ndzi va bile hi vaprofeta, ndzi va dlele hi marito ya nomu wa mina; ku avanyisa ka mina ku ve tanihi ku vonakala loku humaka!

6Hikuva ndzi rhandza tintswalo, ku nga ri magandzelo, ni ku tiviwa ka Xikwembu ku tlurisa tiholokosta.

7Kambe vona va tlule ntwanano kukotisa Adama; laha, va ndzi endlele vuntswaka.

8Giliyadi i muti wa vadyohi, u tichele hi ngati.

9Ku fana ni makhamba lama tumbelelaka vanhu, hi sweswo ntlawa wa vaprista; va dlaya vanhu endleleni leyi yaka eXikeme; hikuva va endla hi mona.

10Endlwini ya Israele, ndzi vone leswo chavisa; kona ku oswana Efrayimi! Israele wa tinyamisa!

11Na wena Yuda, u hlayiseriwe ku tshovela, siku ndzi kutsulaka tiko ra mina evukhumbini bya rona.

← Chapter 5 Jump to: Chapter 7 →