Isaiah 59

Tsonga Xitsonga (Bibele) 1929

← Chapter 58 Jump to: Chapter 60 →

1Vonani voko ra Yehovha a ri khwanyelanga leswaku ri nga tsandzeka ku ponisa, ni ndleve ya yena a yi sivekanga leswaku yi nga tsandzeka ku yingisa.

2Kambe i swidyoho swa n'wina leswi endleke rihlampfu exikarhi ka n'wina ni Xikwembu xa n'wina; i milandzu ya n'wina leyi mi sirheleke mombo wa xona, leswaku xi nga mi yingisi.

3Hikuva mavoko ya n'wina ma nyamisiwile hi ngati, ni tintiho ta n'wina hi vudyoho; milomu ya n'wina yi vula mavunwa, tindzimi ta n'wina ti vulavula swa lunya.

4A ku na munhu la yaka eku tengeni hi ku lulama, ku hava loyi a tivulavulelaka hi ntiyiso! Va tiseketela hi swahava, va vulavula hi vunwa; va xurha lunya kutani ku velekiwa ku dyoha.

5Va fukamela matandza ya mhiri, kutani va luka tintavala tama pume. Loko munhu a dya matandza walawo u ta fa; ni loko ku fayiwa rin'we ra wona, ku ta huma nyoka.

6Tintavala ta vona ti nga ka ti nga vi tinguvu, kutani va nga ka va nga tifunengeti hi mitirho ya vona; mitirho ya vona i mitirho ya ku dyoha, kutani tihanyi ti le mavokweni ya vona;

7milenge ya vona yi tsutsumela eku biheni, yi ni matsambo ku ya halata ngati leyi nga riki na nandzu; miehleketo ya vona i miehleketo ya ku dyoha ku onhaka ni makhombo swi le tindleleni ta vona.

8A va tivanga ndlela ya ku rhula, a ku na ku lulama emitileni ya vona; va famba hi tindlela leto homboloka; un'wana ni un'wana la fambaka ha tona a nga tivi ku rhula.

9Hikwalaho ka swona, ku pona ku le kule na hina, ni ku lulama a ku fiki ka hina; hi langutele ku vonakala, kasi munyama wu kona, hi langutele nhlekanhi, kasi hi famba emunyameni.

10Hi hulumetela emakhumbini kukota lavo fa mahlo, hi hulumetela swange a hi na mahlo, hi khunguvanyeka ninhlekanhi tanihi loko ngi hi le munyameni; hambi hi le ndzalweni hi fana ni vafi.

11Hi vovola hinkwerhu kukota tibere, hi rila kukota magugurhwana; ha langutela ku lulama kasi ku hava, ni ku pona, kasi ka hi balekela.

12Hikuva milandzu ya hina yi tele emahlweni ya wena, kutani swidyoho swa hina swa hi hehla; hikuva milandzu ya hina yi le mahlweni ka hina, kambe ha tiva swidyoho swa hina.

13Hi tiarisile hi va hi hemba mavunwa eka Yehovha, hi hundzukele Xikwembu xa hina hi vulavurile swa ku pfukela van'wana matimba, ni ku tiarisa; hi ehleketile ni ku vula etimbilwini ta hina marito ya mavunwa.

14Kutani ku pona ku tlherile, ni ku hlayiseka ku titshamele kule na hina, hikuva ntiyiso wu wile ehubyeni ku lulama ku nga ka ku nga tshineri kona.

15Kutani ntiyiso wu tlhakile, ni loyi a tshinelaka kule ni leswo biha, wa vutleriwa. Yehovha wa swi vona hi mahlo lama vavisekaka, leswaku ku lulama ku hava.

16Wa vona leswaku a ku na munhu kona, kutani a hlamala leswaku ku hava loyi a humelelaka; kutani voko ra yena ri n'wi pfuna, ni ku lulama ka yena ku n'wi seketela.

17Wa ambala ku lulama kukota xisirhelelo, kutani u veka enhlokweni e xihuku xa ku hlayiseka; u ambala tinguvu ta ku tirihisela, kutani u tifunengeta hi rilondzo kukota nkhancu.

18U ta tlherisela un'wana ni un'wana hi mitirho ya yena, vukari eka valala va yena, ni ku ba eka lava n'wi vengaka, u ta tlherisela swihlale hi mfanelo.

19Va ta chava vito ra Yehovha ku suka evupeladyambu, ni ku twala ka yena ku suka le vuxeni; loko nala a ta ta kukotisa nambu, moya wa Yehovha wu ta n'wi tsutsumisa.

20“Ku ta ta loyi a nga ta kutsula Siyoni, ni va ka Yakobo lava nga ta hundzuka eku tiariseni ka vona,” ku vula Yehovha.

21“Ntwanano wa mina na vona hi lowo,” ku vula Yehovha: “Moya wa mina, lowu nga ka wena, ni marito ya mina, lawa ndzi ma vekeke enon'wini wa wena, ma nga ka ma nga humi enon'wini wa wena, ni le milon'wini ya vana va wena, ni le milon'wini ya vana va vana va wena,” ku vula Yehovha, sweswi ni masiku!

← Chapter 58 Jump to: Chapter 60 →