Isaiah 61

Tsonga Xitsonga (Bibele) 1929

← Chapter 60 Jump to: Chapter 62 →

1Moya wa Hosi, Yehovha, wu le ka mina, hikuva u ndzi totile ku byela swisiwana mahungu ya ku saseka; u ndzi rhumile ku horisa lava nga ni timbilu leti vavisekaka, ku tivisa lava bohiweke leswaku va ta tshunxiwa, ni lava khotsiweke leswaku va ta humesiwa;

2ni ku vula lembe lerinene ra Yehovha, ni siku ra ku tirihisela ka Xikwembu xa hina ku chavelela hinkwavo lava vavisekaka;

3ku tisela lava rilaka eSiyoni, ni ku va rhwexa harhi ya vuhosi ematshan'weni ya nkuma, mafurha ya ku tsaka ematshan'weni ya nkosi, ni nguvu ya nkhuvo ematshan'weni ya moya lowu tsaneke, leswaku va ta vuriwa mikuhlu ya ku lulama, leyi nga byariwa hi Yehovha ku n'wi dzunisa.

4Va ta tlhela va pfuxa marhumbi ya khale va ta pfuxeta rirhangu ra khale va ta vuyetela miti leyi onhakeke leyi nga mbundzuxiwa emikarhini ya khale.

5Vamatiko va ta va kona, va ta risa mitlhambi ya n'wina, vana va vamatiko, va ta va varimeri va n'wina, ni vahlayisi va tivhinya ta n'wina.

6Kambe n'wina, mi ta thyiwa vaprista va Yehovha, mi ta vuriwa malandza ya Xikwembu xa hina; mi ta dya rifuwo ra matiko, mi ta tidzunisa hi ku twala ka wona.

7Ematshan'weni ya tingana ta n'wina mi ta nyikiwa swipandzwa swimbirhi; ematshan'weni ya ku hlunama, va ta tsakela ku averiwa ka vona; hi mukhuva wolowo, va ta averiwa kambirhi etikweni, va ta tsaka hi ku tsaka loku nga heriki.

8“Hikuva mina, Yehovha, ndzi rhandza ku lulama, ndzi venga ku phanga loku endliwaka hi ku xisa; ndzi ta va nyika hi ku tshembeka hakelo ya vona, kutani ndzi ta endla na vona ntwanano lowu nga heriki.

9Rixaka ra vona ri ta twakala ematikweni, ni vana va vona exikarhi ka vamatiko; hinkwavo lava nga ta va vona, va ta swi tiva leswaku i rixaka leri katekisiweke hi Yehovha.”

10Ndzi ta titsakela eka Yehovha, moya wanga wu ta titsakela eka Xikwembu xa mina; hikuva xi ndzi ambexile tinguvu ta ku hlayiseka, xi ndzi funengetile hi nkumba wa ku lulama kukotisa muvuti la tibombiseke hi musingasoro, kukotisa mutekiwa la tibombiseke hi ku saseka ka nsuku.

11Hikuva, hilaha misava yi humesaka mahluke, hilaha ntanga wu mirisaka timbewu ta wona, hi mukhuva wolowo, Hosi Yehovha, u ta mirisa ku lulama ni ku dzuna, emahlweni ka matiko hinkwawo.

← Chapter 60 Jump to: Chapter 62 →