Matthew 17

Tsonga Xitsonga (Bibele) 1929

← Chapter 16 Jump to: Chapter 18 →

1Masiku ya ntlhanu na rin'we loko ma hundzile, Yesu a teka Petro, na Yakobo, na Yohane, makwa Yakobo a ya na vona hitlhelo, entshaveni leyo leha.

2Kutani a hundzuka emahlweni ka vona; mombo wa yena wu kwetsima kukotisa dyambu; na tona tinguvu ta yena ti hundzuka leto basa, ti vangama.

3Hi nomu wolowo Muxe na Eliya va humelela eka vona, va vulavula na yena.

4Hikwalaho Petro a angula, a ku eka Yesu: “Hosi, swi sasekile loko hi tshama la; loko u swi rhandza, hi nga aka mitsonga minharhu kwala, wun'wana wu va wa wena, wun'wana wa Muxe, wun'wana wa Eliya.”

5A ku a ha vulavula, papa lero vangama ri humelela ri va khubumeta; kutani ku twakala rito leri humaka epapeni ri ku: “Loyi, i n'wananga la rhandziwaka, loyi ndzi n'wi tsakelaka: n'wi yingiseni.”

6Kutani vadyondzisiwa, loko va twa rito rero, va wa hi mimombo, va chava ngopfu.

7Kambe Yesu a va tshinelela a va khumba a ku eka vona: “Pfukani, mi nga chavi.”

8Kutani loko va tlakusa mahlo, va vona Yesu a ri swakwe, ku nga ri na umbe.

9Kakuloko va rhelela entshaveni, Yesu a va laya, a ku: “Leswi mi swi voneke, mi nga tshuki mi byela vanhu, N'wana wa Munhu a nga si pfuka eku feni.”

10Kutani vadyondzisiwa va yena va n'wi vutisa, va ku: “Xana vatsari va vulela yini, va ku: Swi fanele leswaku Eliya a rhanga a ta.”

11Yesu a va hlamula, a ku eka vona: “Kunene Eliya u fanele ku ta, ku ta tlherisela hinkwaswo eku lulameni.

12Kambe ndzi ri eka n'wina: Eliya u tile, kambe a va n'wi tivanga; kutani va n'wi endlile hinkwaswo leswi va swi rhandzeke. N'wana wa Munhu, na yena, u ta twisiwa ku vaviseka hi vona.”

13Kambe vadyondzisiwa va twisisa leswaku a a va hlambanyisela ta Yohane Mukhuvuri.

14Kuteloko va vuye entshungwini, munhu a n'wi tshinelela a khinsama hi matsolo, a ku:

15“Hosi, twela n'wananga vusiwana, hikuva u ni rihuhu ra n'hweti, a vabya ngopfu, hikuva wa andze ku wela endzilweni ni le matini ngopfu.

16Ndzi n'wi tisile eka vadyondzisiwa va wena, kambe a va tivanga ku n'wi hanyisa.”

17Yesu a hlamula, a ku: “Rixaka leri nga pfumeriki, lero homboloka, ndzi ta va na n'wina ku yisa kwihi xana? Ndzi ta mi lehisela mbilu ku yisa kwihi xana? N'wi neheni laha ka mina.”

18Kutani Yesu a holovela ngopfu e rihuhu, kutani ri huma eka n'wana yeloyi, a hanya hi nkarhi wolowo.

19Kutani vadyondzisiwa va ta eka Yesu hitlhelo, va ku eka yena; “Xana hi tsandzeke ha yini ku hlongola demona leri?”

20Yesu a ku eka vona: “Hikwalaho ka ku tsana ka vupfumeri bya n'wina. Hikuva ndzi vurisile ndzi ri eka n'wina: Loko ngi mi ri ni ku pfumela loku kotisaka nhlampfu ya sinapi, hambi mi nga ku eka ntshava leyi: Rhurhela lahaya, yi nga ya kona; ku nga ha ri na nchumu lexi mi tsandzaka.

21Kambe rixaka leri ra mademona, a ri humi loko ku nga ri hi ku khongela, ni ku titsona swakudya.”

22Kakuloko va ha ri eGaleliya, Yesu a ku eka vona: “N'wana wa Munhu u ta nyiketiwa emavokweni ya vanhu;

23va ta n'wi dlaya, kambe u ta pfuka hi siku ra vunharhu,” kutani vadyondzisiwa va va ni tingana ngopfu.

24Kuteloko va fika eKapernawume lava hlengeletaka tidragma letimbirhi ta ndzuvo va ta eka Petro, va ku eka yena: “Xana mufundhisi wa n'wina a nga humesi tidragma timbirhi xana?”

25A ku: “Ina, wa humesa.” Kutani loko a nghene endlwini, Yesu a n'wi rhangela, a ku eka yena: “Swo yini ka wena, Simoni? Tihosi ta misava ta luvisa, kumbe ti kungisa mani xana? Xana i vana va vona, kumbe i vamatiko xana?”

26Petro a ku eka yena: “I vamatiko.” Yesu a ku eka yena: “Loko swi ri sweswo, vana va vona va va tshika.

27Kambe hileswaku hi nga va khunguvanyisi, yana e lwandle, u ya hoxa xinjovo kona, kutani u ta khoma nhlampfi leyi nga ta rhanga yi papama; kutakuloko u yi ahlamise nomu, u ta kuma statera kona, u yi teka u va nyika yona, u humesela mina na wena.”

← Chapter 16 Jump to: Chapter 18 →