Matthew 4

Tsonga Xitsonga (Bibele) 1929

← Chapter 3 Jump to: Chapter 5 →

1Kutani Yesu a yisiwa hi Moya emananga ku ya ringiwa hi Diyavulosi.

2Kutani a tshama a nga dyi nchumu hi masiku ya mune wa makume, ni vusiku bya mune wa makume, a kondza a twa ndlala.

3Kutani muringi a n'wi tshinelela, a ku: “Loko u ri n'wana wa Xikwembu u nge maribye lawa, a ma hundzuke vuswa.”

4Kambe Yesu a hlamula, a ku: “Ku tsariwile va ku: ‘Munhu a nga ka a nga hanyi hi vuswa ntsena, kambe u ta hanya hi marito hinkwawo lama humaka enon'wini wa Xikwembu.’ ”

5Kutani Diyavulosi a n'wi yisa emutini lowu hlawuriweke, a n'wi veka exihlungweni xa tempele,

6a ku eka yena: “Loko u ri n'wana wa Xikwembu, jitama ehansi, hikuva ku tsariwile va ku: ‘Xi ta lerisa tintsumi ta xona, ti ta ku khawulela emavokweni ya tona leswaku nenge wa wena wu nga tshuki wu khunguvanyeka hi ribye.’ ”

7Yesu a ku eka yena: “Ku tsariwile kambe va ku: ‘U nga tshuki u ringa Hosi, Xikwembu xa wena.’ ”

8Diyavulosi a engeta a n'wi yisa entshaveni leyo leha ngopfu, a n'wi komba mimfumo hinkwayo ya misava ni ku twala ka yona,

9kutani a ku eka yena: “Swilo leswo hinkwaswo ndzi ta ku nyika swona, loko u ndzi khinsamela hi matsolo, u ndzi gandzela.”

10Kambe Yesu a ku eka yena: “Suka Satana hikuva ku tsariwile va ku: ‘U ta khinsamela Hosi, Xikwembu xa wena u tirhela xona ntsena.’ ”

11Kwalaho Diyavulosi a n'wi tshika; kutani vonani, tintsumi ti n'wi tshinelela, ti n'wi tirhela.

12Kuteloko Yesu a tiva leswaku Yohane u nghenisiwile ekhotsweni, a tlhelela eGaleliya.

13Kutani a rhurha eNazareta, a ya tshama eKapernawume emutini lowu nga ekusuhi ni lwandle, hitlhelo ra Zebuloni ni ra Neftali;

14leswaku ku endleka leswi nga vula hi Esaya, muprofeta, loko a te:

15“Tiko ra Zebuloni, ni tiko ra Neftali, endleleni ya lwandle, entsungeni wa hase wa Yordani, Galeliya ya matiko.

16Tiko leri ngi ri tshame emunyameni, ri vonile ku vonakala lokukulu; volavo ingi va tshamile etikweni ra rifu ni le ndzhutini wa rona, ku vonakala ku va humelele.”

17Enkarhini wolowo, Yesu a sungula ku dyondzisa, a ku: “Hundzukani, hikuva ku fuma ka matilo ku kusuhi.”

18Kutani Yesu loko a lulama ni lwandle ra Galeliya, a vona vavanuna vambirhi, a a ri Simoni la vuriwaka Petro, na Andriya makwavo, va peta tinkoka ta vona elwandle, hikuva a va ri vaphasi va tinhlampfi.

19Kutani a ku eka vona: “Ndzi landzeni, ndzi ta mi endla lava phasaka vanhu.”

20Kwalaho va hatlisa, va siya tinkoka ta vona, va n'wi landza.

21Kutani a hundzela emahlweni, a vona vavanuna vambirhi van'wana, a a ri Yakobo n'wana Zebediya na Yohane makwavo, va tshamile ebyatsweni na Zebediya tata wa vona, va tlhaviketela tinkoka ta vona, kutani a va vita.

22Volavo va hatlisa, va siya byatso ni tata wa vona, va landza Yesu.

23Kutani a famba hinkwako eGaleliya, a ri karhi a dyondzisa emasinagogeni ya kona, a vula Evhangeli ya ku fuma, a hanyisa vuvabyi byihi ni byihi, ni ku vaviseka hinkwako loku nga eka vanhu.

24Kutani ku twakala ka yena ku hangalaka eSiriya hinkwako. Va tisa eka yena hinkwavo lava nga tsakangiki, ni lava xanisekaka hi vuvabyi bya tinxakaxaka ni nhlomulo, ni lava ngi va ri ni rihuhu ra mademona, ni lava ngi va ri ni rihuhu ra n'weti, ni lava omeke swirho; yena a va hanyisa.

25Kutani mitshungu leyikulu yi n'wi landza, yi huma eGaleliya, na Dekapolisi, na Yerusalema, na Yudiya, ni le ntsungeni wa hase wa Yordani.

← Chapter 3 Jump to: Chapter 5 →