Song of Solomon 8

Tsonga Xitsonga (Bibele) 1929

← Chapter 7 Jump to:

1Oho! Loko ngi u ri makwerhu, La an'weke emaveleni ya manana! Loko ngi ndzi hlangana na wena ehandle, a ndzi ta ku ntswontswa, Kutani ngi ndzi nga ri na ku soriwa.

2Ingi ndzi ku heleketa, ndzi ku yisa endlwini ya manana; Wena u ta ndzi lerisa, Mina ndzi ku nwisa vhinyo ya ku nandziha, Ni leswi tsokombelaka swa magirenada ya mina.

3Voko ra yena ra ximatsi a ri ve ehansi ka nhloko ya mina, Kutani a a ndzi singarhele hi lera xinene!

4Ndza mi lerisa, n'wina vanhwanyana va Yerusalema, Mi nga n'wi hiti, ni loko ku ri ku pfuxa murhandziwa wanga, Loko a nga si swi rhandza.

5I mani loyi a tlhandlukaka, a pfa emananga, A tiseketele eka murhandziwa wa yena? Ndzi ku pfuxile u ri ehansi ka mirhi ya maapula, Laha u velekiweke kona hi mana wa wena, U twile ku vaviseka kona loyi a ku velekeke.

6Ndzi teke, ndzi va embilwini ya wena kukotisa mfungho, Kukotisa mfungho evokweni ra wena; Hikuva rirhandzu ri ni matimba ku fana ni rifu, Makwanga ma tiya kukotisa xivandla xa vafi. Ku hiseka ka wona i ku hiseka ka ndzilo, I langavi ra Yehovha.

7Mati lamakulu ma nga ka ma nga timi rirhandzu, Ni milambu yi nga ka yi nga ri kukuti. Hambi munhu a nga humesela rirhandzu rifuwo hinkwaro ra yindlu ya yena, U ta soriwa ntsena.

8Hi ni makwerhu lontsongo wa wanhwanyana, La nga siki va na mavele; Hi ta endla yini hi makwerhu, Siku va nga ta ta n'wi vuta?

9Loko ngi ri ri rirhangu, Hi ta aka ehenhla ka rona makhokholo ya silivhere; Loko ngi yi ri nyangwa, Hi ta yi pfala hi rivanti ra kedari.

10Ndzi rirhangu, ni mavele ya mina ma fana ni makhokholo, Hikwalaho emahlweni ka yena ndzi fana ni loyi a kumeke ku rhula.

11Solomoni a a ri ni nsimu ya vhinya le Baala-Hamoni; A yi vekile emavokweni ya vahlayisi; Un'wana ni un'wana a humesela mihandzu ya yona tixikele ta silivhere ta khume ra madzana.

12Vhinya ya mina, leyi nga ya mina kunene, ndzi ta yi hlayisa; Tixikele ta khume ra madzana i ta wena, Solomoni, Ni madzana mambirhi eka lava hlayisaka mihandzu ya yona!

13Wena la tshamaka emasin'wini! Vanakulorhi va rhandza ku twa rito ra wena. Wa nga ndzi twisa rona!

14Suka, u tsutsuma, murhandziwa wanga! Kukotisa ntswele ya mhala, kumbe rhole ra timbavala, Etintshaveni ta mirhi ya risuna!

← Chapter 7 Jump to:

Recommended Reading

Commentary Song of Solomon Commentaries → Devotional Song of Solomon Devotional Guide → Get This Bible Bibele Study Bible →