Zechariah 10

Tsonga Xitsonga (Bibele) 1929

← Chapter 9 Jump to: Chapter 11 →

1Kombelani mpfula eka Yehovha hi nkarhi wa timpfula ta xirimo! Yehovha u ta humesa tihati; kutani u ta va nyika mpfula ya dzonga, a nyika un'wana ni un'wana leswi milaka ensin'wini ya yena.

2Hikuva titerafi ti vula swahava. Vangoma va bvumbhile swa mavunwa, i milorho yo xisa leyi va nga yi lorha, va chavelela hi swahava. Hikwalaho, tiko ri sukile kukotisa ntlhambi, va xaniseka hi ku pfumala murisi.

3“Vukari bya mina byi pfurhele varisi, ndzi ta tshinya swiphongo; hikuva Yehovha wa tinyimpi u endzela ntlhambi wa yena, yi nga yindlu ya Yuda, u ta yi endla hanci ya yena yo saseka enyimpini.

4Eka Yuda ku ta huma ribye ra yinhla, eka yena ku huma mhingu, eka yena ku huma vurha bya nyimpi, ku ta huma ni ka yena vafumi hinkwavo swin'we.

5Va yindlu ya Yuda va ta kota tinhenha leti kandziyelaka valala endzhopeni wa ndlela enyimpini, va ta lwa, hikuva Yehovha u na vona; lava khandziyeke tihanci va khomiwa hi tingana.

6“Ndzi ta kurisa yindlu ya Yuda, ndzi ponisa yindlu ya Yosefa, ndzi ta va akisa, hikuva ndzi va tsetselele; swi ta kotisa loko swa nga a ndzi nga va lahlanga, hikuva hi mina Yehovha, Xikwembu xa vona, ndzi ta va yingisa.

7Efrayimi u ta kota nhenha; timbilu ta vona ti ta tsaka kukotisa loko swa nga va nwile vhinyo. Vana va vona va ta swi vona, va tsaka; timbilu ta vona ti ta titsakela eka Yehovha.

8Ndzi ta va bela noti, ndzi va hlengeleta; hikuva ndzi va kutsurile va ta andza ku kota leswi ngi va andzile eku sunguleni.

9Ndzi ta va byala exikarhi ka matiko, va ta ndzi tsundzuka ematikweni ya le kule va ta hanya ni vana va vona va ko va tlhela.

10Ndzi ta va tlherisa etikweni ra Egipta, ni le Asiriya, ndzi va hlengeleta, ndzi va tisa etikweni ra Giliyadi ni le Lebanoni, xivandla xi ko xi nga va ringani.

11Israele u ta famba exikarhi ka lwandle ra makhombo, kambe exikarhi ka lwandle u ta ba magandlati, kutani swidziva hinkwaswo swa nambu swi ta phya: ku tidzunisa ka Asiriya ku ta tsongahatiwa, ku susiwa ni nhonga ya vuhosi ya Egipta.

12Ndzi ta va kurisela eka Yehovha, kutani va ta famba hi vito ra yena,” ku vula Yehovha.

← Chapter 9 Jump to: Chapter 11 →